100 ವರ್ಷಾಕ ಪಾವಲೀಲೆ ರಾಷ್ಟ್ರೀಯ ಸ್ವಯಂ ಸೇವಕ ಸಂಘ ಹೇ ಸ್ಥಿತಿಕ ಸುಲಭಾನಿ ಯೇನಿ, ತಾಜ್ಜ ಮಾಕ್ಷಿ ಅಪಾರ ಲೋಕಾಂಗೆಲೆ ಕಷ್ಟ, ತ್ಯಾಗ, ನಿರಂತರ ಪರಶ್ರಮ ಆಸ್ಸಾ. – ಶ್ರೀ ಮಂಗೇಶ ಭೆಂಡೆ.
ರಾಷ್ಟ್ರೀಯ ಸ್ವಯಂ ಸೇವಕ ಸಂಘ ಘೆಲೀಲೆ ೧೦೦ ವರ್ಷಾಚಾನಿ ಹೇ ದೇಶಾಚೆ ಸಾಂಸ್ಕೃತಿಕ ಪುನರ್ ಪ್ರತಿಷ್ಠೆಕ ವಾವರೋ ಕರತಾ ಆಯಲ್ಯಾ, ಸಬಾರ ಕಷ್ಟ, ನಷ್ಟಾಕ ಶಿರಕಲ್ಯಾ, ಸಂಘಾಚೆ ಕಾರ್ಯ ಆಜಿ ಜಗಾಂತೂ ಏಕ ಪ್ರತಿಷ್ಠೆಕ ಕಾರಣ ಜಾಲ್ಲ್ಯಾ, ಚರ್ಚೆಚೆ ವಿಷಯು ಜಾಲ್ಲ್ಯಾ, ಆಕರ್ಷಣೆಕ ಕಾರಣ ಜಾಲ್ಲ್ಯಾ, ಜಾಲಯಾರಿ ಸಂಘ ಹೇ ಸ್ಥಿತಿಕ ಸುಲಭಾನಿ ಯೇನಿ, ತಾಜ್ಜ ಮಾಕ್ಷಿ ಅಪಾರ ಲೋಕಾಂಗೆಲೆ ಕಷ್ಟ, ತ್ಯಾಗ, ನಿರಂತರ ಪರಶ್ರಮ ಆಸ್ಸಾ. ಆರ್.ಎಸ್.ಎಸ್. ಸಂಘಾಚೆ ಸಂಸ್ಥಾಪಕ ಡಾ|| ಹೆಗಡೇವಾರ ವರೇನ ಏಕಳೆ ವೈಶಿಷ್ಠ್ಯಪೂರ್ಣ ಮನೀಷ, ತಾಂಗೆಲೆ ಆಠ ವರಸಾಚೆ ಪ್ರಾಯಾರಿ ಬ್ರಿಟನ್ನಾಚೆ ವಿಕ್ಟೋರಿಯಾ ರಾಣಿಲೆ ೬೦ ವರಸಾಚೆ ಪಟ್ಟಾಭಿಷೇಕೋತ್ಸವಾಚೆ ಪ್ರಯಕ್ತ ಭಾರತ ದೇಶಾದ್ಯಂತ ಇಸ್ಕೂಲಾಂತು ಉಂಡೊ ವಾಂಟಿಲಿ ತೆದ್ನಾ ತಾನ್ನಿ ತ್ಯಾ ಉಂಡೊ ವ್ಹರ್ನು ಕೋಯರಾಚೆ ಬುಟ್ಟಿಕ ಉಡ್ಡೆಯಿಲೆ ದೇಶಪ್ರೇಮಿ ಅಶ್ಶಿ ಮ್ಹೊಣು ರಾಷ್ಟ್ರೀಯ ಸ್ವಯಂ ಸೇವಕ ಸಂಘಾಚೆ ಅಖಿಲ ಭಾರತ ವ್ಯವಸ್ಥಾ ಪ್ರಮುಖ ಶ್ರೀ ಮಂಗೇಶ ಭೆಂಡೆನಿ ಸಾಂಗ್ಲೆ. ತಾನ್ನಿ ದಿನಾಂಕ. ೨೪-೦೬-೨೦೨೬ಕ ಹುಬ್ಬಳ್ಳಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ೮೧ವೇಂ `ಸಮಾಜ ಡೇಕ ಮುಖೇಲ ಸೊಯರೆ ಜಾವ್ನು ಯವ್ನು ಉಲಯಾಶ್ಶಿಲೆ.
ಮುಖಾರ್ಸುನು ಉಲಯಿಲೆ ತಾನ್ನಿ “ಸಂಘಾನಿ ಅಜಿ ಚಮತ್ಕಾರ ಕೆಲ್ಲ್ಯಾ, ಸಮಾಜಾಚೆ ಜೀವನಾಂತು ಸಬಾರ ರಂಗಾಂತು ಪರಿವರ್ತನ ಹಾಡಲ್ಯಾ, ಕಿತಯಾಕ ಮ್ಹಳಯಾರಿ ಸಂಘ ಸುರುವಾತ ಜಾಲೀಲ್ಲೇಚಿ ಸಮಾಜಾಚೆ ಪರಿವರ್ತನೆ ಖಾತ್ತಿರಿ. ಆರ್.ಎಸ್.ಎಸ್ ಸಂಘಾಕ ಪಾಂಚ ಧ್ಯೇಯ ಆಸ್ಸಾ. ತ್ಯಾ ಧ್ಯೇಯ ಆಮ್ಮಿ ಸಂಪೂರ್ಣ ಜಾವ್ನು ಕಾರ್ಯರೂಪಾಕ ಹಾಡಲೇರಿ ಆಮ್ಗೆಲೆ ದೇಶ ಜಗಾಂತೂಚಿ ಶ್ರೇಷ್ಠ ರಾಷ್ಟ್ರ ಜಾವಚಾಂತು ಖಂಚೇಯಿ ಸಂಶಯ ನಾ. ತಾಂತು ಪ್ರಮುಖ ಧ್ಯೇಯ ಮ್ಹಳಯಾರಿ ಕುಟುಂಬ ಪ್ರಬೋಧನ,ಸಗಳೆ ಜಗಾಂತೂ ಏಕ ವೈಶಿಷ್ಠ್ಯಪೂರ್ಣ ಕುಟುಂಬ ವ್ಯವಸ್ಥಾ ಆಶ್ಶಿಲೆ ಖಂಚತರಿ ಸಂಸ್ಕೃತಿ ಆಸ್ಸ ಮ್ಹೊಣು ಜಾಲಯಾರಿ ತ್ಯಾ ಆಮ್ಗೆಲೆ ಹಿಂದೂ ಕುಟುಂಬ ವ್ಯವಸ್ಥಾಮ್ಹೊಣು ಸಾಂಗೂನು ಆಮ್ಗೆಲೆ ಹಿಂದೂ ಸಂಸ್ಕೃತಿಚೆ ಮಹತ್ವ, ಆವಯಿಲೆ ಜವಾಬ್ದಾರಿ, ಸಂಸ್ಕಾರಾಚೆ ವಿಶೇಷತಾ, ಡಾ|| ಹೆಗಡೇವಾರಾನಿ ಆರ್.ಎಸ್.ಎಸ್. ಸಂಘ ಸ್ಥಾಪನ ಕೆಲೀಲೆ ಕಾರಣ, ದೇಶಪ್ರೇಮ ಮಹತ್ವ ಆದಿ ಸಬಾರ ವಿಷಯಾ ವಯ್ರಿ ತಾನ್ನಿ ಸವಿಸ್ತಾರ ಜಾವ್ನು ಉಲಯಿಲೆ.
ಸಭಾಚೆ ಅಧ್ಯಕ್ಷಪಣ ಘೆತ್ತಿಲೆ ಸಮಾಜಾಧ್ಯಕ್ಷ ಶ್ರೀ ರಮೇಶ ಪಿ. ನಾಯಕ ಮಾಮ್ಮಾನಿ ಆಪಣೇಲೆ ಅಧ್ಯಕ್ಷೀಯ ಭಾಷಣಾಂತು ಹುಬ್ಬಳ್ಳಿ ಸಮಾಜ ಶಿಕ್ಷಣಾಕ, ಆರೋಗ್ಯಾಕ ದಿತ್ತಾ ಆಯಲೇಲೆ ಮಹತ್ವಾಚೆ ವಿಷಯು ಉಲಯಿಲೆ. ಸಮಾಜ ಮಂದಿರಾಕ ಸೋಲಾರ ಪ್ಲಾಂಟ್ ಘಾಲೋನು ಕರೆಂಟಾಂತು ಸ್ವಾವಲಂಬನ ಜಾಲೀಲೆ ಸಾಂಗೂನು, ಕೆ.ಇ.ಬಿ. ಕ ಆಮ್ಮಿ ಕರೆಂಟ್ ವಿಕತಾತಿ ಮ್ಹಣ್ಚೆ ವಿಷಯು ಅಭಿಮಾನಾನಿ ಸಾಂಗ್ಲೆ. ದುರ್ಬಲ ಸಮಾಜ ಬಾಂದವಾಲೆ ಆರೋಗ್ಯ ರಾಕವಣಾಕ ಧಾರವಾಡಾಚೆ ಎಸ್.ಡಿ.ಎಮ್. ಆಸ್ಪತ್ರೆ ಬರಶಿ ಟೈಅಪ್ ಜಾಲೀಲೆ ಆಸ್ಸುನು ಗರಜ ಆಶ್ಶಿಲ್ಯಾನಿ ತಾಜ್ಜೆ ಮುನಾಪೋ ಘೆವ್ಕಾ ಮ್ಹೊಣು ಆಪೋವ್ಣಿ ದಿಲ್ಲಿ.
ಸುರವೇಕ ಕು|| ಸಾಂಘವಿ ಕಾಮತ ಆನಿ ಕು|| ಸಮೀಕ್ಷಾ ಕಾಮತ ಹಾಂಗೆಲೆ ಸ್ವಾಗತ ಗೀತೆ ಬರಶಿ ಸಮಾರಂಭ ಆರಂಭ ಜಾಲ್ಲೆ. ಶ್ರೀ ಹರೀಶ ಮಾಂಜ್ರೆಕರ ಮಾಮ್ಮಾನಿ ಶ್ರೀ ಮಂಗೇಶ ಭೆಂಡೆ ಸಹಿತ ಸಕಡ್ಯಾಂಕ ಯೆವಕಾರ ಕೆಲ್ಲಿ. ಮುಖೇಲೆ ಸೊಯರೊ ಸಹಿತ ವೇದಿಕೇರಿ ಆಶ್ಶಿಲೆ ಸಕಡ್ಯಾನಿ ಮೇಳ್ನು ದೀಪ ಪ್ರಜ್ವಲನ ಕೊರನು ಸಮಾರಂಭಾಕ ಸುರುವಾತ ದಿಲ್ಲಿ.
ಸಮಾಜಾಚೆ ಕಾರ್ಯದರ್ಶಿ ಶ್ರೀ ಪ್ರಮೋದ ಕಾಮತ್ ಮಾಮ್ಮಾನಿ ಸಮಾಜಾಚೆ ಗತ ವರ್ಷಾಚೆ ವರದಿ ವಾಚನ ಕೆಲ್ಲಿ. ಸಮಾಜಾಚೆ ಮಹಿಳಾ ವಿಭಾಗಾಚೆ ವರದಿ ವಾಚನ ಕಾರ್ಯದರ್ಶಿ ಶ್ರೀಮತಿ ಜಯಾ ಪೈ ತಾನ್ನಿ ಕೆಲ್ಲಿ. ಹೇ ವೇಳ್ಯಾರಿ ಸಮಾಜಾಚೆ ಮಹಿಳಾ ಮಂಡಳಿಚೆ ಮಾಜಿ ಕಾರ್ಯದರ್ಶಿ ಶ್ರೀಮತಿ ಶಾಲಿನಿ ಅರವಿಂದ ಪ್ರಭು ಹಾಂಕಾ ಸಮಾಜಾ ತರಪೇನಿ ಹೃತ್ಪೂರ್ವಕ ಸನ್ಮಾನ ಚಲ್ಲೆ. ಹೇ ವೇಳ್ಯಾರಿ ಉಲಯಿಲೆ ಶ್ರೀಮತಿ ಶಾಲಿನಿ ಮಾಯೇನಿ ಹುಬ್ಬಳ್ಳಿ ಸಮಾಜಾಚೆ ಶೈಕ್ಷಣಿಕ ನಿಧಿ ರೂ. ೧೦,೦೦,೦೦೦/-(ಧಾ ಲಾಕ್ ರೂ.) ದೇಣಿಗಾ ದಿವಚೆ ವಾಗ್ಧಾನ ಕೆಲ್ಲಿ.
ಪ್ರತಿ ವರ್ಷ ಮ್ಹಣಕೆ ೭೦ ವರ್ಷಾ ಪಶಿ ಚ್ಹಡ ವಯ ಜಾಲೀಲೆ ಸಮಾಜಾಚೆ ಮ್ಹಾಲ್ಗಡ್ಯಾಂಕ ಸನ್ಮಾನ ಚಲ್ಲೆ. ಅವುಂದು ಸಮಾಜ ಡೇ ದಿವಸು ಸತ್ಕಾರ ಸ್ವೀಕಾರ ಕೆಲೀಲೆ ಮ್ಹಾಲ್ಗಡೆ ಮಹನೀಯ ಮ್ಹಳಯಾರಿ ಶ್ರೀ ವಿಠ್ಠಲದಾಸ ಗಂಗಾಧರ ಶ್ಯಾನಭಾಗ(ವಿ.ಜಿ. ಶ್ಯಾನಭಾಗ) ಆನಿ ತಾಂಗೆಲೆ ಧರ್ಮಪತ್ನಿ ಶ್ರೀಮತಿ ವಿಜಯಾ ಶ್ಯಾನಭಾಗ, ಶ್ರೀ ಅರುಣ ಉಭಯಕರ ಆನಿ ಶ್ರೀ ಸತೀಶ ಮಹಾಲೆ ಆನಿ ಶ್ರೀ ಶ್ರೀಮತಿ ಸುರ್ಣ ಮಹಾಲೆ.
ಮಿಸ್ ರೇವತಿ ಪೈ ತಾಂಕಾ ಅತ್ಯುತ್ತಮ ಮಹಿಳಾ ಸ್ವಯಂಸೇವಕಿ ಮ್ಹೊಣು ವೆಂಚೂನು ದಿ. ಶ್ರೀ ರಂಗಪ್ಪಾ ಪಾಂಡುರಂಗ ಕಾಮತ್ ರೂಲಿಂಗ್ ಶೀಲ್ಡ್ ದಿವನು ಹೇಂಚಿ ವೇದಿರಿ ಸನ್ಮಾನ ಕೆಲ್ಲಿ. ತಶೀಚಿ ಶ್ರೀ ಪ್ರಮೋದ ಆರ್. ಶೆಣೈ ತಾಂಕ ಅತ್ಯುತ್ತಮ ಪುರುಷ ಸ್ವಯಂ ಸೇವಕ ಮ್ಹೊಣು ಮಾನೂನು ದಿ. ಶ್ರೀ ಶೇಷಗಿರಿ ಪಾಂಡುರಂಗ ಕಾಮತ ರೂಲೀಂಗ್ ಶೀಲ್ಡ್ ದಿವನು ಸತ್ಕಾರ ಕೆಲ್ಲೊ. ಏಕ್ಕಾ ಕ್ಲಾಸಾಚಾನ ಧಾಂಚೆ ಕ್ಲಾಸಾ ಪರಿಯಂತ ಶಿಕ್ತಾ ಆಸ್ಸುಚೆ ಸಮಾಜಾಚೆ ಸದಸ್ಯಾಲೆ ಚರಡುವಾಂಕ ದತ್ತು ಯೋಜನೆಂತು ಮುಖೇಲ ಸೊಯರೆ ಶ್ರೀ ಮಂಗೇಶಭೆಂಡೆ ಹಾಂಗೆಲೆ ಹಾತ್ತಾನಿ ಸ್ಕಾಲರ್ಶಿಪ್ ದಿವೋನು, ಆಶೀರ್ವಾದ ಕರೈಲೆ. ಮಾತ್ರ ನ್ಹಂಹಿ ಎಸ್.ಎಸ್.ಎಲ್.ಸಿ., ಪಿ.ಯು.ಸಿ. ಪ್ರಥಮ ಆನಿ ದ್ವಿತೀಯ ವರ್ಷಾಚೆ ಅಂತಿಮ ಪರೀಕ್ಷೆಂತು ಅತ್ಯುತ್ತಮ ಅಂಕ ಆನಿ ೯೦ ಪಶಿ ಚ್ಹಡ ಅಂಕ ಘೆತ್ತಿಲೆ ಹುಬ್ಬಳ್ಳಿ ಸಮಾಜಾಚೆ ಸಕ್ಕಡ ಚರಡುವಾಂಕ ಪುರಸ್ಕಾರ ಮ್ಹೋಣು ನಗದಿ ಬಹುಮಾನ ದಿವನು ಗೌರವ ಕೆಲ್ಲೆ.
ಶ್ರೀ ಗಣಪತಿ ಶ್ಯಾನಭಾಗ, ಶ್ರೀ ಮಹೇಶ ಕಾಮತ ಆನಿ ಶ್ರೀ ಗೋಪಾಲಕೃಷ್ಣ ಶ್ಯಾನಭಾಗ ಹಾನ್ನಿ ಹೇ ಕಾರ್ಯಕ್ರಮ ಚಲೋನು ದಿಲ್ಲಿ. ಶ್ರೀ ಸದಾನಂದ ಕಾಮತ್ ಹಾನ್ನಿ ಅಖೇರಿಕ ಆಬಾರ ಮಾನ್ಲೆ. ಸಂಚಿತಾ ಲಾಮತ ಆನಿ ಸಹನಾ ಮಹಾಲೆ ಹಾನ್ನಿ ಕಾರ್ಯಕ್ರಮಾಚೆ ಸ್ವರಸಂಚಾಲನ ಕೆಲ್ಲೆ.