ಹರಿಗುರು ಸೇವೇನ ಆಮ್ಮಿ ಕೆಲ್ಲಿಲಿ ಸತ್ಕಾರ್ಯಾಂಚೇ ಫಲಾನ ಆಮ್ಗೆಲೆ ಸಂತತೀಕ ಶುಭ ಜಾತ್ತಾ- ಪರ್ತಗಾಳೀ ಸ್ವಾಮೆ ಶ್ರೀ ವಿದ್ಯಾಧೀಶ ತೀರ್ಥ. ( ವರದಿ: ವಾಸುದೇವ ಶಾನಭಾಗ ಶಿರಸಿ)
“ ಆಮ್ಮಿ ಆಮಗೆಲೆ ಜೀವಿತಕಾಲಾಂತು ಕೆಲ್ಲೆಲಿಂ ಸತ್ಕಾರ್ಯಾನ ಆಮ್ಗೆಲೆ ನಂತರ ಆಮ್ಗೆಲೆ ಚೇರ್ಡಾಂಕ ಆನಿ ನಾತ್ರಾಂಕ ವರೇನ ತಾಂಗೆಲೆ ಜೀವನಾಂತು ಬರೆಪಣ ಜಾತ್ತಾ. ತ್ಯಾಖಾತ್ತೇರಿ ಆಮ್ಮಿ ಕಿತ್ಲೇಕಷ್ಟ ಜಾಲ್ಯಾರಿಹೀ ದೇವಾಲೆ ನಾಮಸ್ಮರಣ, ಆನಿ ಪೂಜಾ ಪುನಸ್ಕಾರ ಅಸ್ಸಲೀಂ ಪುಣ್ಯ ಕಾರ್ಯಂ ಕೊರಚೆಂ ಸೊಡಚ್ಯಾಕ ನಾ. ತ್ಯಾಮಿತ್ತಿ ಆಮ್ಗೆಲೆ ಚೆರ್ಡಾಂಕ ಭೀ ಉತ್ತಮ ಸಂಸ್ಕಾರ ಪ್ರಾಪ್ತ ಜಾತ್ತಾ” ಅಶ್ಶಿಂ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಮಠಾಚೆ ಯತಿವರ್ಯ ಶ್ರೀಮದ್ ವಿದ್ಯಾಧೀಶತೀರ್ಥ ಸ್ವಾಮ್ಯಾನಿಂ ಸಾಂಗ್ಲೆಂ. ತಾನ್ನೀ ಶಿರಸಿಯ ಮಹಾವಿಷ್ಣು ದೇವಳಾಚೆ 186ನೇ ವರ್ಧಂತಿ ಉತ್ಸವಾಚೆ ನಿಮಿತ್ತ ಜಿ.ಎಸ್.ಬಿ.ಸಮಾಜಾಚೆ ಧರ್ಮಸಭೇಂತು ಸಾನ್ನಿಧ್ಯ ವಹಿಸೂನು ಆಶಿರ್ವಚನ ದಿತ್ತಾನಾ ಸಾಂಗ್ಲೆಂ. ಆಜಿ ಸರ್ವೈ ಜಗ ವೈಜ್ಞಾನಿಕ ವಿಷಯಾಂತು ಖೂಪ ಮುಂದುವರ್ಸಲಾಂ. ಪೈಲೆಂ ಮೆಕ್ಯಾನಿಕಲ್ ಯುಗ ಆಶಿಲ್ಲೆಂ ಕ್ರಮೇಣ ಕಂಪ್ಯೂಟರ್ ಯುಗಜಾವ್ನು ಐಲೀಕಡೆನ ಕೃತಕ ಬುದ್ಧಿಮತ್ತೇಚೆಂ ಯುಗ ಜಾಲ್ಲಾಂ. ಆಮ್ಗೆಲಿಂ ಚೇರ್ಡುವಾಂನಿ ಆಯ್ಚ್ಯಾ ಅವಶ್ಯಕತೆಕ ಸಮಜಾವ್ನು ಶಿಕ್ಷಣ ಘೇವ್ಕಾ ಮ್ಹಣ್ಣು ಆವ್ಸು ಬಾಪ್ಪೂಸೂಹಿ ಲೆಕ್ತಾತಿ. ಜಾಲ್ಯಾರಿ ತಾಂಕಾಂ ಖಂಚೆ ವಿಷಯಾಂತು ಆಸಕ್ತಿ ಆಸ್ಸಕೀ ತ್ಯಾಚ್ಚೀ ವಿಷಯಾಂತು ಶಿಕ್ಷಣ ಘೇವನು ಮುಕಾರಿ ಗೆಲ್ಯಾರಿ ಮಾತ್ರ ತಾಂತು ಯಶಸ್ಸು ಮೆಳ್ತಾ. ತಾಜ್ಜಾನ ಆತ್ಮ ತೃಪ್ತಿ ಆನಿಕ ಆನಂದ ಮೆಳ್ತಾ. ತ್ಯಾದೆಕ್ಕೂನ ಪಾಲಕಾಂನೀ ತಾಂಗೆಲೆ ಚೆರ್ಡಾಂಕ ತಾಂಗೆಲಿ ಆಸಕ್ತಿ ಪಳೋವ್ನು ಶಿಕ್ಷಣ ದಿವ್ಚೆಂ ಅವಶ್ಯ ಆಸ್ಸಾ ಮ್ಹಣ್ಣು ಸಾಂಗ್ಲೆಂ. “ಮನುಷ್ಯಾನ ಕಿತ್ಲೆಂ ಧನಕನಕಾದಿ ಮೆಳೈಲ್ಯಾರೀ ಮನಾಕ ತೃಪ್ತಿ ಆನಿ ಸಂತೋಷ ದಿವ್ಚೇಂ ದೇವಾಲೆಂ ನಾಮಸ್ಮರಣೆ ಆನಿ ಆಮ್ಗೆಲೆ ಸಂಸ್ಕಾರ ಕೆನ್ನಾ ಸೊಡ್ಚ್ಯಾಕ ನಾ”. ಮ್ಹಣ್ಣು ಸಾಂಗೂನು. ಶಿರಸಿ ಗಾಂವಚೇ ಸದ್ಭಕ್ತ ಜಾನಾನ್ನಿ ಕರ್ತೋ ಆಶಿಲ್ಲಿ ಹರಿಗುರು ಸೇವಾ ಪ್ರಶಂಸನೀಯ ಆಸ್ಸಾ ಅಶ್ಶೀಂ ಸ್ವಾಮಿ ಮ್ಹಳಾಲೆ.
ವೇ.ಮೂ. ಪ್ರಸನ್ನ ಭಟ್ಟ, ವೇ.ಮೂ. ಹರೀಶ ಭಟ್ಟ ಆನಿ ವೇ.ಮೂ. ಅನಂತ ಭಟ್ಟ ಹಾಂಗೆಲ್ಯಾ ವೇದಘೋಷಾನ ಪ್ರಾರಂಭ ಜಾಲ್ಲಿಲೊ ಸಭಾ ಕಾಯಕ್ರಮ ಜೀವೋತ್ತಮ ಭಜನಾ ಮಂಡಳಿಚೆ ಮಹಿಳಾ ಸದಸ್ಯಾಂಲೀ ಪ್ರಾರ್ಥನಾ ಗೀತೇಚೆ ನಂತರ ಮೊಕ್ತೇಸರ ವಿಷ್ಣುದಾಸ ಕಾಸರಕೋಡ ಹಾನ್ನೀ ಸ್ವಾಗತ ಕೋರ್ನು ಪ್ರಾಸ್ತಾವಿಕ ಉತ್ರಾಂತು ಶ್ರೀ ಪರ್ತಗಾಳೀ ಮಠಾಕ ಅನೇಕ ಶತಮಾನಧೋರ್ನು ಶಿರಸಿ ಪೇಂಟೇ ಬರ್ಶೀಂ ಆಶ್ಸೀಲೊ ಭಕ್ತಿ ಸಂಬಂಧಾ ಬದ್ದಲ ಪ್ರಸ್ತಾಪ ಕೆಲ್ಲೊ. ಶ್ರೀ ಮಹಾವಿಷ್ಣು ದೇವಾಲೀ 186ನೇ ವರ್ಧಂತಿ ಉತ್ಸವಾಚೆ ಪ್ರಯುಕ್ತ ಗರ್ಭಗುಡಿಚೆ ದ್ವಾರಾಕ ನಿರ್ಮಾಣ ಕೆಲ್ಲಿಲೆಂ ರಜತದ್ವಾರ ಶ್ರೀ ಶ್ರೀಮದ್ ವಿದ್ಯಾಧೀಶತೀರ್ಥ ಸ್ವಾಮೀಜಿ ಹಾನ್ನೀ ದ್ವಾರಪೂಜನ ಕೋರ್ನು ಉಕ್ತಾವಣ ಕೆಲ್ಲಿಲೇಂ. ಹ್ಯಾ ರಜತ ದ್ವಾರಾಚೇ ನಿರ್ಮಾಣಕಾರ್ಯ ಕೆಲ್ಲಿಲೇ ಶಿಲ್ಪಿ ಕುಮಟಾಚೇ ಕಿರಣ ಗುಡಿಗಾರ, ಅಜಿತಕುಮಾರ ಶೇಟ ಆನಿ ಶಿರಸೀಚೆ ಅಭಿಯಂತರ ಅರುಣ ಮೋಹನ ನಾಯಕ ಹಾಂಕಾಂ ಸ್ವಾಮ್ಯಾನ್ನೀ ಫಲಮಂತ್ರಾಕ್ಷತೆ ದೀವ್ನು ಆಶೀರ್ವಾದ ಕೆಲ್ಲೊ. ಹ್ಯಾ ಸಂದರ್ಭಾಂತು ರಜತದ್ವಾರ ನಿರ್ಮಾಣಾಚೆ ಉಸ್ತುವಾರಿ ಕೆಲ್ಲಿಲ್ಯಾ ಹರಿಪ್ರಸಾದ ನಾಯಕ ಆನಿ ಗೆಲ್ಲಿಲ್ಯಾ ಪನ್ನಾಸ ವರ್ಷ ಧೋರ್ನು ದೇವಸ್ಥಾನಾಂತು ಸಾಂಸ್ಕೃತಿಕ ಆನಿ ಸಾಮಾಜಿಕ ಕ್ಷೇತ್ರಾಂತು ಸೇವೆ ಕೆಲ್ಲಿಲ್ಯಾ ವಾಸುದೇವ ಶಾನಭಾಗ ಹಾಂಕಾಂ ಶ್ರೀ ಸ್ವಾಮಿವರ್ಯಾಂನೀ ಶಾಲು ಪಾಂಗೂರ್ನು ಫಲ ಮಂತ್ರಾಕ್ಷತೆ ದೀವ್ನು ಆಶೀರ್ವದ ಕೆಲ್ಲೊ.
ಹ್ಯಾ ಕಾರ್ಯಕ್ರಮಾಂತುಂ ಆಪಣ್ಯಾಲಿ ಅದ್ಭುತ ಗ್ರಹಣ ಶಕ್ತಿ ಆನಿ ವಿಶೇಷ ಸ್ಮರಣ ಶಕ್ತಿ ದಾಕೋವ್ನು “ಕಲಾಮ್ಸ ವರ್ಲ್ಡ ರೆಕಾರ್ಡ” ಪ್ರಶಸ್ತಿ ಘೆತ್ತಿಲ್ಯಾ ಅಡೀಚ ವರ್ಷಾಚೀ ಬಾಲ ಪ್ರತಿಭೆ, ಭಕ್ತಿ ಭಗವಾನ ಶಾನಭಾಗ ಆನಿಕ ಭರತನಾಟ್ಯಾಂತು “ರಾಷ್ಟ್ರೀಯ ನಾಟ್ಯಮಯೂರಿ ಕಲಾಸೇವಾರತ್ನ” ಪ್ರಶಸ್ತಿ ಘೇತ್ತಲ್ಲೀ ಕೀರ್ತಿ ವಿಟ್ಠಲ ಶಾನಭಾಗ ಹಾನ್ನೀಪಣ ಗುರುವರ್ಯಾಂಕಡೇನ ಫಲಮಂತ್ರಾಕ್ಷತೇಚೋ ಆಶೀರ್ವಾದ ಘೆತ್ಲೋ. ದೇವಸ್ಥಾನಾಂತು ಜಾಲ್ಲಿಲ್ಯಾ ಸಾಂಸ್ಕೃತಿಕ ಕಾರ್ಯಕ್ರಮಾಂತು ಕಲಾಪ್ರದರ್ಶನ ಕೇಲ್ಲಿಲ್ಯಾ ಕುಮಾರಿ ಅವನಿ, ಇನಿಕಾ. ಆರುಷಿ ಆನಿ ಅಮೃತಾ ಪೈ ಹಾಂಕಾಭೀ ಸ್ವಾಮ್ಯಾನ್ನೀ ಮಂತ್ರಾಕ್ಷತೆ ದೀವ್ನು ಅನುಗ್ರಹ ಕೆಲ್ಲೊ. ಕೊಂಕಣಿ ನಾಟಕ ಪ್ರದರ್ಶನ ಕೆಲಿಲ್ಯಾ ಕಲಾವಿದಾಂಕ ಭೀ ಶ್ರೀಗುರುಲೋ ಆಶೀರ್ವಾದ ಮೆಳ್ಳೊ. ಅರುಣ ಮೋಹನ ನಾಯಕ ಹಾನ್ನೀ ಸನ್ಮಾನಿತಾಂಲೋ ಪರಿಚಯ ಕೆಲ್ಲೊ. ಕಾರ್ಯದರ್ಶಿ ಪಾಂಡುರಂಗ ಪೈ ಹಾನ್ನೀ ವಂದನಾರ್ಪಣೆ ಕೆಲ್ಲೀ. ರಾಮು ಹರಿ ಕಿಣಿ ಆನಿ ವಾಸುದೇವ ಶಾನಭಾಗ ಹಾನ್ನೀ ನಿರೂಪಣೆ ಕೆಲ್ಲೆಲಿ. ಅಶೋಕ ಪೈ, ಗುರುರಾಜ ಬಾಳೂರ, ಮದನ ನಾಯಕ, ದೀಪಕ ಭಟ್ಟ, ದಯಾನಂದ ಚಿತ್ರಗಿ ಹಾನ್ನೀ ವೇದಿಕೇಚೇರಿ ಉಪಸ್ಥಿತ ಆಶಿಲ್ಲೆ. ಭಗವಾನ ಶಾನಭಾಗ ಆನಿ ಪ್ರಕಾಶ ನೇತ್ರಾವಳಿ ಹಾನ್ನೀ ಸಹಕಾರ ದಿಲ್ಲೊ. ನಂತರ ಶ್ರೀಸ್ವಾಮೀವರ್ಯಾಂಲೇಂ ಆಶೀರ್ವಚನ ಜಾವ್ನು ಕಾರ್ಯಕ್ರಮ ಸಂಪನ್ನಜಾಲ್ಲೋ.