ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ಧಾಂಚೆ ಚಾತುರ್ಮಾಸ ವ್ರತ ಆರಂಭ ಆನಿ ಪೀಠಾರೋಹಣಾಚೆ ಪಾಂಚಾಚೆ ವಾರ್ಷಿಕೋತ್ಸವು ಅಗಸ್ಟ್ ೫, ೨೦೨೬ ಬುಧ್ವಾರ ದಿವಸು ಪರ್ತಗಾಳಿಚೆ ಕೇಂದ್ರ ಮಠಾಂತು ವೈಭವಾರಿ ಸಂಪನ್ನ ಜಾಲ್ಲೆ. ತತ್ಸಂಬಂಧ ಸಕ್ಕಾಣಿ ೧೦ ಘಂಟ್ಯಾಕ ಸಂಸ್ಥಾನಾಚೆ ದೇವತಾ ಮೂರ್ತಿಂಕ ಮಹಾಭಿಷೇಕ ಚಲ್ಲೆ. ಧೋಂಪಾರಾ ೧೨ ಘಂಟ್ಯಾಕ ಮಧ್ಯಾಹ್ನ ಮಹಾಪೂಜಾ ಚಲ್ಲಿ. ಸಾಂಜವಾಳಾ ೫ ಘಂಟ್ಯಾಕ ಪೂಜ್ಯ ಸ್ವಾಮ್ಯಾನಿ ವ್ಯಾಸ ಪೂಜನ ಪೂರ್ವಕ ಚಾತುರ್ಮಾಸ ವೃತ ಸ್ವೀಕಾರ ಕೆಲ್ಲಿ. ಹೇ ಸಂದರ್ಭಾರಿ ಮಠಾಚೆ ಕೇಂದ್ರ ಕಮಿಟಿ ಅಧ್ಯಕ್ಷ ಶ್ರೀ ಶ್ರೀನಿವಾಸ ದೆಂಪೋ ಆನಿ ಉಪಾಧ್ಯಕ್ಷ ಶ್ರೀ ರಾಮಚಂದ್ರ ರಂಗಪ್ಪಾ ಕಾಮತ ಹಾನ್ನಿ ಮೇಳ್ನು ಮೃತ್ತಿಕಾ ಪೂಜನ ಚಲಯಿಲೆ. ದಿವಸ ಬಽರಿ ನಾನಾ ನಮೂನ್ಯಾಚೆ ಧಾರ್ಮಿಕ ವಿಧಿ-ವಿಧಾನ ಆನಿ ಹರಿ ಸಂಕೀರ್ತನಾ, ಭಜನೇನ ಮಠಾಚೆ ಆವಾರಾಂತು ಅಮೋಘ ದೈವಿಕ ಕಳಾ ಉಟಾನು ದಿಸ್ತಾಶ್ಶಿಲೆ.
ಸಾಂಜವಾಳಾ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೊ ೧೦ವ್ಯಾ ಚಾತುರ್ಮಾಸ ಸ್ವೀಕಾರ ಆನಿ ಪಟ್ಟಾಭಿಷೇಕಾಚೆ ೫ವ್ಯಾ ವಾರ್ಷಿಕೋತ್ಸವ ಪ್ರಯುಕ್ತ ಸಭಾ ಕಾರ್ಯಕ್ರಮ ಚಲ್ಲೆ. ವೇದಿಕೇರಿ ಪೂಜ್ಯ ಸ್ವಾಮ್ಯಾಂಗೆಲೆ ಬರಶಿ ಗೊಂಯ್ಚೆ ಮಾಜಿ ಮುಖ್ಯಮಂತ್ರಿ ಶ್ರೀ ದಿಗಂಬರ ಕಾಮತ್, ಕೇಂದ್ರ ಮಠ ಕಮಿಟಿ ಅಧ್ಯಕ್ಷ ಶ್ರೀನಿವಾಸ ಥೆಂಪೊ, ಉಪಾಧ್ಯಕ್ಷ ರಾಮಚಂದ್ರ ರಂಗಪ್ಪಾ ಕಾಮತ, ಶಿವಾನಂದ ಸಾಲ್ಗಾಂವಕರ, ಶಶಿಕಾಂತ ಶಾನಭಾಗ, ಅನಿಲ ಪೈ, ವೈದಿಕ ವೃಂದ ಉಪಸ್ಥಿತ ವ್ಹರಲೀಲೆ.
ಸುರವೇಕ ಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮೆಂ ಆಪಣೇಲೆ ದಿವ್ಯ ಕರಕಮಲಾನಿ ದೀಪ ಪ್ರಜ್ವಲನ ಕೊರನು ಸಭಾ ಕಾರ್ಯಕ್ರಮಾಕ ಸುರುವಾತ ದಿಲ್ಲೆ. ಮಾಗಿರಿ ವೈದಿಕ ವೃಂದಾ ತರಪೇನ ವೇದಘೋಷ ಜಾಲ್ಲೆ. ಯೆವಕಾರ ಕೆಲೀಲೆ ಮಠ ಕಮಿಟಿ ಅಧ್ಯಕ್ಷ ಶ್ರೀ ಶ್ರೀನಿವಾಸ ದೆಂಪೊ ತಾನ್ನಿ ಮಠಾಚೊ ಇತಿಹಾಸು, ೫೫೦ ವರ್ಷಾ ವೇಳ್ಯಾರಿ ಪರ್ತಗಾಳಿಂತು ಘಡಲೀಲೆ ವಾಸ್ತು ನವೀಕರಣ, ಮಠ ಚಲೋನು ಘೆವ್ನು ಎತ್ತಾ ಆಸ್ಸುಚೆ ಆಧ್ಯಾತ್ಮಿಕ, ಧಾರ್ಮಿಕ ಜಾಗೃತಿ, ಮಠಾಚೆ ಆಧ್ಯಾತ್ಮಿಕ, ಸಾಂಸ್ಕೃತಿಕ, ಸಾಮಾಜಿಕ ಇತಿಹಾಸಾ ಖಾತೇರಿ ಸವಿವರ ಮಾಹಿತಿ ದಿವನು ಸಕಡ್ಯಾಂಕ ಯೆವಕಾರ ಕೆಲ್ಲೆ. ಮಾಗಿರಿ ತಾನ್ನಿ ಉಪಾಧ್ಯಕ್ಷ ಶ್ರೀ ಆರ್.ಆರ್. ಕಾಮತ್ ಹಾಂಗೆಲೆ ಬರಶಿ ಮೇಳ್ನು ಸ್ವಾಮ್ಯಾಂಗೆಲೊ ಪಾದಪೂಜಾ ಚಲಯಿಲೆ. ತಾಜ್ಜ ಉಪರಾಂತ ಚಾತುರ್ಮಾಸ ಕಮಿಟಿ ತರಪೇನಿ ಚಾತುರ್ಮಾಸ ಸಮಿತಿ ಅಧ್ಯಕ್ಷ ಶ್ರೀ ಅನಿಲ ಪೈ ತಾಂಗೆಲೆ ನೇತೃತ್ವಾರಿ ಆನ್ನೇಕ ಪಾದಪೂಜಾ ಚಲಯಿಲಿ.
ನವೀಕರಣ ಕೆಲೀಲೆ ಶ್ರೀ ಸಂಸ್ಥಾನ ಮಠಾಚೆ ವೆಬ್ಸೈಟ್ (ಜಾಲತಾಣ) ಹೇಂಚಿ ವೇಳ್ಯಾರಿ ಪೂಜ್ಯ ಸ್ವಾಮ್ಯಾನಿ ಲೋಕಾರ್ಪಣ ಕೆಲ್ಲಿ. ಅವಂದೂಚೆ ಚಾತುರ್ಮಾಸ ವೇಳ್ಯಾರಿ ದೋಳ್ಯಾಚೆ ತಪಾಸಣ, ಆರೋಗ್ಯಾಚೆ ತಪಾಸಣ, ರಕ್ತದಾನ ಶಿಬಿರಾ ತಸ್ಸಾಲೆ ಸಾಮಾಜಿಕ ಕಾರ್ಯಕ್ರಮ ಬರಶಿ ಹೋಮ-ಹವನ, ನಿರಂತರ ಭಜನಾ, ಕೀರ್ತನ, ಗಾನ, ನಾಚ ಆದಿ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮ ಚಲ್ತಾ ಮಾತ್ರ ನ್ಹಂಹಿ ದಕ್ಷಿಣಾಚೆ ಅಯೋಧ್ಯಾ ಮ್ಹೊಣು ಪ್ರವರ್ಧಮಾನಾಕ ಯತ್ತಾ ಆಸ್ಸುಚೆ ಪರ್ತಗಾಳಿಂತು ಘಡಿಲೆ ಸರ್ವ ಅಭಿವೃದ್ಧಿ ಕಾರ್ಯ ಸವಿವರ ಜಾವ್ನು ಪಳೋನು ದೋಳೆ ಭೊರನು ಘೆವಚಾಕ ಜಗಾಚೆ ಸಕ್ಕಡೆ ಆಸ್ಸುಚೆ ಮಠಾಚೆ ಶಿಷ್ಯಕೋಟಿಕ ಹೇ ಏಕ ಸದವಕಾಶ ಮೆಳ್ತಾ, ಸರ್ವಾನಿ ತಾಜ್ಜೊ ವಾಂಟೊ ಘೆವ್ಕಾ ಮ್ಹೊಣು ಸಭೆಂತು ಆಪೋವ್ಣಿ ದಿಲ್ಲಿ.
ಗೊಂಯ್ಚೆ ಮಾಜಿ ಮುಖ್ಯಮಂತ್ರಿ ಆನಿ ಆತ್ತಾಚೆ ಪಿ.ಡಬ್ಲ್ಯೂಡಿ ಮಂತ್ರಿ ಶ್ರೀ ದಿಗಂಬರ ಕಾಮತ ಮಾಮ್ಮಾನಿ ಹೇ ವೇಳ್ಯಾರಿ ಉಲಯತಾ ಪರಮ ಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾನಿ ಜಗಾಂತೂ ಊಂಚಾಯಾಚೆ (೭೭ ಫೀಟ್ ಊಂಚ) ಭಗವಾನ ಶ್ರೀ ರಾಮಚಂದ್ರ ದೇವಾಲೆ ಮೂರ್ತಿ ಸ್ಥಾಪನ ಕೊರನು, ತಾಜ್ಜೆ ಉದ್ಘಾಟನೆಕ ವಿಶ್ವ ವಿಖ್ಯಾತ ಜಾಲೀಲೆ ದೇಶಾಚೆ ಬಹುಮಾನ್ಯ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿಂಕ ಆಪೋನು ಲೋಕಾರ್ಪಣ ಕರಯಿಲೆ ಸರ್ವ ಸಮಾಜ ಬಾಂದವಾನಿ ಗರ್ವ ಪಾವಕಾ ಜಾಲೀಲೆ ವಿಷಯು. ಥೊಡೆ ಮ್ಹಹಿನ್ಯಾ ಭಿತ್ತರಿ ಚಾತುರ್ಮಾಸ ಮಹೋತ್ಸವು ವರೇನ ಹಾಂಗಾ ವೈಭವಾರಿ ಘಡ್ತಾ ಮ್ಹಳಯಾರಿ ಕೆಲವೇ ಮ್ಹಹಿನ್ಯಾ ಭಿತ್ತರಿ ಅಸ್ಸಾಲೆ ದೋನಿ ಅತ್ಯಪರೂಪಾಚೆ ಕಾರ್ಯಕ್ರಮ ಅತೀವ ವೈಭವಾರಿ ಚಲಯಚೆ ಮ್ಹಳಯಾರಿ ಹೇ ಸಾನ ವಿಷಯು ನ್ಹಂಹಿ, ಅಭೂತಪೂರ್ವ ಕಾಮ. ಪೂಜ್ಯ ಸ್ವಾಮ್ಯಾಂಗೆಲೆ ಹೇ ವರಸಾಚೆ ಚಾತುರ್ಮಾಸ ವ್ರತ ಚಾರಿತ್ರಿಕ ಜಾವ್ನು ಕೊರಚಾಕ ಆಮ್ಮಿ ಸಕಡಾನಿ ಮೇಳ್ನು ಪ್ರಯತ್ನ ಕೊರಕಾ ಮ್ಹಣ್ಚೆ ಆಪೋವ್ಣಿ ದಿಲ್ಲಿ. ಶ್ರೀ ಶಿರೀಶ ಪೈ ತಾನ್ನಿ ಆಬಾರ ಮಾನಲೆ.
ಉಪರಾಂತ ಪೂಜ್ಯ ಸ್ವಾಮೆಂನಿ ಆಶೀರ್ವಚನ ದಿತ್ತಾ “ಪಟ್ಟಾಭಿಷೇಕಾಚೊ ವಾರ್ಷಿಕೋತ್ಸವ ದಿವಸು ಆನಿ ಚಾತುರ್ಮಾಸ ವ್ರತಾರಂಭಾಚೆ ದಿವಸು ದೊನ್ನೀ ಏಕ್ಕಾ ದಿವಸು ಆಯಲೀಲೆ ದೇವಾನಿ ದಿಲೀಲೆ ಭಾಗ್ಯ, ನವೀನ ವಾಸ್ತು ವಿಸ್ತರಣ ಆದಿ ಕಾರಣಾನಿ ಆನವಾಳಪಣಾಂತು ಚ್ಯುತಿ ಯತ್ತ ಮ್ಹೊಣು ಅಡ್ಡೇಸ ವರ್ಷ ಬಾಯ್ರಿ ಪ್ರಯಾಣಾಂತು ಕಾಡ್ಕಾ ಪಡಲೆ. ವ್ಹರಲೀಲೆ ಮಠಾಚೆ ಕಾರ್ಯ, ಆರತಾ ಸುರುವಾತ ಕೆಲೀಲೆ ಸಂಸ್ಕೃತ ಪಾಠಶಾಲೆಚೆ ಕಾರ್ಯ ವಾಡ್ಡೋನು ಘೇವನು ವಚ್ಚಾಕ ಆನಿ ಶ್ರೀ ರಾಮದೇವಾಕ ದೋಳೆ ಭೊರನು ಪಳಯತಾ ಪೂಜಾ ಕೊರಕಾ ಮ್ಹಣ್ಚೆ ಉತ್ಕಟೇಚ್ಛೆನಿ ಆನಿ ಸಂಖ್ಯಾಶಾಸ್ತ್ರಚೆ ಕಾರಣಾನಿ ವರೇನ ಅವಂದೂಚೆ ಚಾತುರ್ಮಾಸ ವ್ರತ ಕೇಂದ್ರ ಮಠ ಜಾಲೀಲೆ ಪರ್ತಗಾಳಿಂತು ಕೊರಚಾಕ ಠರಯಿಲೆ. ಮಾತ್ರ ನ್ಹಂಹಿ ಪರ್ತಗಾಳಿಂತು ಮಠ ಬಾಂದೂನು ಅವಂದೂಕ ೩೭೦ ವರ್ಷ ಜಾತ್ತಾ. ಥೊಡೆ ವರ್ಷ ಮಾಕಶಿ ಪರ್ತಗಾಳಿಕ ರಾನ ಮ್ಹಣ್ತಾಲೆ ಹಾಂಗಾ ಶ್ರೀ ರಾಮಚಂದ್ರ ದೇವಾಲೆ ಮೂರ್ತಿ ಸ್ಥಾಪನ ಜಾಲ್ಲ ಮಾಗಿರಿ ದಕ್ಷಿಣ ಅಯೋಧ್ಯಾ ಮ್ಹಣ್ಚೆ ನಾಂವ ಯವ್ಚೆ ವರಿ ಜಾಲ್ಲೆ.
ಸಂನ್ಯಾಸಿನಿ ಚಾತುರ್ಮಾಸ ವೇಳ್ಯಾರಿ ಹಿಂಸಾ ತಾಕೂನು ದೂರ ವ್ಜರ್ಕಾ ಮ್ಹಣ್ಚೆ ಖಾತ್ತಿರಿ ಏಕ್ಕಡೇಚಿ ರಾಬಚೆ ಏಕ ಕಾರಣ ಜಾಲಯಾರಿ ತ್ಯಾ ಚಾರಿ ಮ್ಹಹಿನೋ ಜಾಂವೊ ಚಾರಿ ಪಕ್ಷ ಕಾಳ ಯತಿವರ್ಯಾನಿ ಏಕ್ಕಡೆಚಿ ವ್ಹರ್ಚೆ ನಿಮಿತ್ತ್ಯಾನಿ ತ್ಯಾ ಗಾಂವ್ಚೆ, ಆನಿ ಥೈಕ ಯವ್ಚೆ ಭಕ್ತಕೋಟಿ ವಯ್ರಿ ಯತಿವರ್ಯಾಲೆ ಪುಣ್ಯಭಾಗ ಗ್ರಹಸ್ಥಾಂಕಯಿ ಪ್ರಾಪ್ತ ಜಾತ್ತಾ.
ಮನುಷ್ಯಾಲೆ ಭಾವನೇಕ ಸಮ್ಮ ಜಾವ್ನು ಪರಮಾತ್ಮು ಫಲ ದಿತ್ತಾ, ಜೀವನಾಂತು ಸಂಯಮ, ಸಮಾಧಾನ ವಾಡ್ಡೊನು ಘೆವ್ಚೆ ಗರಜ ಆಸ್ಸಾ. ಹರ್ಯೇಕ ಜೀವಿನಿ ಪೂರ್ವ ಜನ್ಮಾಂತು ಕೆಲೀಲೆ ಕರ್ಮಫಲ ಕರ್ಗನಾಶಿ ಚಾಂಗ ಫಲ ಮೇಳ್ನಾ ಮ್ಹಣ್ಚೆ ನಜರಾಂತು ದವರೂನು ಘೆವ್ಕಾ. ತ್ಯಾ ಖಾತ್ತಿರಿ ಪುಣ್ಯಕಾರ್ಯ ಕೊರ್ಕಾ, ದೇವಾಲೆ ನಾಮಸ್ಮರಣೆಂತು ವಾಂಟೊ ಘೇವ್ಕಾ, ಹರಿ-ಗುರು ಸೇವಾ ಭಕ್ತಿ-ಶೃದ್ಧೇನಿ ಕೊರಕಾ ಆನಿ ನಿರಂತರ ಪ್ರಯತ್ನ ಕರತಾಚಿ ಉರಕಾ. ಕೆದನಾಂಯಿ ಕಷ್ಟಽಚಿ ಯತ್ತಾ ಆಸ್ಸಾ ಮ್ಹಳಯಾರಿ ತಾಜ್ಜೆ ಘಾಟಿಭೂಂಯಿ(ಹಿನ್ನೆಲೆ) ಕೋಳ್ನು ಘೆವ್ಕಾ. ತಾಕ್ಕಾ ಪರಿಹಾರ ಕೊರನು ಘೆವ್ಕಾ. ಏಕ ನ್ಹಂಹಿ ಏಕ ದಿವಸು ತುಮ್ಗೆಲೆ ಪ್ರಯತ್ನಾಕ ಫಲ ಮೇಳ್ನೂ ಮೆಳ್ತಾ.
ದೇವಾಲೆ ನೇಮು ಅತಿಕ್ರಮಣ ಕೊರಚಾಕ ಕೋಣಾ ನಿಮಿತ್ತ್ಯಾನಿ ಸಾಧ್ಯನಾ ಮ್ಹಣಚೆ ವಿಸರೂಕ ನಜ್ಜ. ಮ್ಹೊಣು ಸಕಡ್ಯಾಂಕ ಬರೇಂ ಜಾಂವೊ ಮ್ಹೊಣು ಆಶೀರ್ವಾದ ಕೊರನು ಆಪಣೇಲೆ ಆಶೀರ್ವಚನ ಸಮಾಪ್ತ ಕೆಲ್ಲಿ. ಮಾಗಿರಿ ದಂಡಧಾರಿಜಾವ್ನು ಸರ್ವಜ್ಞ ಪೀಠಾರಿ ಬೈಸೂನು ಸಕಡ್ಯಾಂಕ ಫಲಮಂತ್ರಾಕ್ಷತ ದಿವನು ಆಶೀರ್ವಾದ ಕೆಲ್ಲೆ. ಹೇ ವೇಳ್ಯಾರಿ ಗೋಂಯ, ಕರ್ನಾಟಕ, ಕೇರಳ, ಮಹಾರಾಷ್ಟ್ರ ಮಾತ್ರ ನ್ಹಂಹಿಸಿ ದೇಶವಿದೇಶಾಚಾನ ವ್ಹಡ ಅಂಕಡ್ಯಾರಿ ಮಠಾಚೆ ಶಿಷ್ಯ ಕೋಟಿ ಉಪಸ್ಥಿತ ವ್ಹರಲೀಲೆ.