ಆಗಸ್ಟ್ 9 ದಿಸಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಆನಿ ರಂಗ್ ತರಂಗ್, ಮೂಡಬಿದಿರೆ ಹಾಂಚ್ಯಾ ಸಹಯೋಗಾಂತ ಗಂಟಾಲ್ಕಟ್ಟೆ ಚರ್ಚ್ ವಠಾರಾಂತ್ ದಕ್ಷಿಣ ಕನ್ನಡ ಜಿಲ್ಲೆ ಮಟ್ಟಾಚೊಕೊಂಕ್ಣಿ ಸಂಭ್ರಮ್ ಕೊಂಕಣಿ ಸಮ್ಮೇಳನ ವಿಜೃಂಭಣೇನ ಜಾಲೊ.
ಸಮ್ಮೇಳನಾಧ್ಯಕ್ಷ್ ಮ್ಹಣೂನ್ ಕೊಂಕಣಿಚೆ ಜ್ಯೇಷ್ಠ ಸಾಹಿತಿ ಶ್ರೀ ಡೊಲ್ಫಿ ಎಫ್. ಲೋಬೊ ಹಾಜರ್ ಆಸ್ಲೆ. ತ್ಯಾಂಣಿ ಸಭೆಚೆ ಉದ್ದೇಶೂನ್ ಉಲಯ್ತಾನಾ ಅಕಾಡೆಮಿಚ್ಯಾ ಕೆಲಸಾಂಚಿ ಮೆಚ್ಚುಗೆ ದಾಕಯ್ಲಿ.
ಅಕಾಡೆಮಿಚೆ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ಹಾಂಣಿ ಸಭೆಂತ್ ಜಮ್ಲೆಲ್ಲ್ಯಾಂಚೆ ಸಕಡ್ಯಾಂಕ ಸ್ವಾಗತ್ ಕೆಲೆಂ. ಕೊಂಕಣಿ ಭಾಶೆಕ್ ಖಂಚೇಚಿ ಲಿಪಿಚೊ ಹಂಗ್ ನಾ. ಹಿ ಭಾಶಾ ಮುಖ್ಯತಃ ಪಾಚ ಲಿಪಿಂತ್ ಬರಯ್ತಾತ್. ಕನ್ನಡ, ರೋಮನ್, ಪರ್ಸೊ-ಅರೆಬಿಕ್, ನಾಗರಿ ಆನಿ ಮಳಯಾಳಂ ಲಿಪಿಂಚೆ ಬರಶಿ ಗುಜರಾತಿ ಲಿಪಿಂತ್ಸುದಾಂ ಕೊಂಕಣಿ ಬರಯ್ತಾತ್. ಕೊಂಕಣಿ ಭಾಶಾ ಏಕ್ ಸುಂದರ್ ಫುಲಾಂಚೊ ಬಾಗ್ ಆಸ್ಲ್ಯಾ ಸಾರ್ಖೀ ಆಸ್ಸಾ, ಅಶೆ ಸಾಂಗೂನ್ ತ್ಯಾಂಣಿ ಅಕಾಡೆಮಿಚ್ಯಾ ಆತಾಂಪರ್ಯಂತ್ ಜಾಲ್ಲ್ಯಾ ಕೆಲಸಾಂಚೊ ಏಕ್ ವರದಿ ಸಭೆಚ್ಯಾ ಮುಖಾರ ದವರಲಿ.
ಮುಖೇಲ ಸೊಯರೆ ಮ್ಹಣೂನ್ ಶ್ರೀ ಗುರು ಬಾಳಿಗಾ ಹಾಂಣಿ ಸಭೆಕ್ ಉದ್ದೇಶೂನ್ ಉಲಯ್ತಾ ಶುಭಾಶಯ್ ದಿಲೆ.
ತಶೆಂಚ್ ವೇದಿಕೆರ್ ಗಂಟಾಲ್ಕಟ್ಟೆ ಚರ್ಚೆಚೆ ಪ್ರಧಾನ ಧರ್ಮಗುರು ವಂ. ಸ್ವಾ. ರೊಕ್ ಡೆಸಾ, ರಂಗ್ ತರಂಗ್, ಮೂಡಬಿದಿರೆ ಹಾಂಚೆ ಮುಖಂಡ್ ಶ್ರೀ ಲೋಯ್ಡ್ ರೇಗೊ ಉಪಸ್ಥಿತ ಆಸ್ಲೆ.
ಹ್ಯಾ ವೇಳಾರ್ ಜುಲೈ ೨೫ ದಿಸಾಪಾಸೂನ್ ಸುರೂ ಜಾಲ್ಲೆಂ ೧೫ ದಿಸಾಂಚೆ ರಂಗ್ ಪರ್ಯಟನ್ ಕೊಂಕಣಿ ಕರಾವಳೀಂತ್ ಚಿತ್ರಕಲಾ ಪರ್ಯಟನ್ ಹಾಚೊ ಸಮಾರೋಪ್ ಕಾರ್ಯಕ್ರಮುಂ ಜಾಲೊ. ಹ್ಯಾ ಪರ್ಯಟನಾಂತ್ ಭಾಗ್ ಘೆತ್ಲೆಲ್ಲ್ಯಾ ೬ ಚಿತ್ರಕಲಾವಿದಾಂಕ್ ಸನ್ಮಾನ್ ಕೆಲೊ.
ಸಭಾ ಕಾರ್ಯಕ್ರಮುಚ್ಯಾ ಆದೀ ವಿಭಿನ್ನ್ ಸ್ಪರ್ಧಾಂಚೆ ಆಯೋಜನ್ ಕೆಲ್ಲೆಂ ಆನಿ ವಿಜೆತ್ಯಾಂಕ್ ಬಹುಮಾನಾಂ ದಿಲ್ಲೆ.
ಸಭಾ ಕಾರ್ಯಕ್ರಮಾನಂತರ ಕೊಂಕಣಿ ಕಾಲ್, ಆಯ್ಜ್ ಆನಿ ಫುಡಾಂ ಹ್ಯಾ ವಿಷಯಾಚೆರ್ ಟಾಯ್ಟಸ್ ನೊರೊನ್ಹಾ, ತಾರಾ ಲವೀನ ಮಸ್ಕರೇನ್ಹಸ್ ಆನಿ ರರ್ಯಾನ್ಸನ್ ಸ್ಟೀಫನ್ ಕುಟಿನ್ಹಾ ಹಾಂಚ್ಯಾ ಭಾಗೀದಾರಿತ್ವಾಂತ್ ವಿಚಾರ್ ಸಂಕಿರಣ್ ಜಾಲೊ.
ಅಸ್ತಿತ್ವ (ರಿ.), ಮಂಗಳೂರು ಹಾಂಚ್ಯಾ ಕಲಾವಿದಾಂನಿ ಕೊಂಕಣಿ ನಾಟಕ್ ಜುಗಾರಿ ಸಾದರ್ ಕೆಲೊ. ವಿನ್ಸ್ಟನ್ ಜೋಯೆಲ್ ಸಿಕ್ವೇರಾ ಹಾಂಣಿ ಕಾರ್ಯಕ್ರಮುಚೆ ನಿರೂಪಣ್ ಕೆಲಾಂ, ಆನಿ ಕಾರ್ಯಕ್ರಮ್ ಸಂಚಾಲಕ್ ಶ್ರೀ ಪ್ರವೀಣ್ ಅರಾನ್ಹಾ ಹಾಂಣಿ ಆಭಾರ್ ಮಾನ್ಲೆ. ಅಕಾಡೆಮಿ ಸದಸ್ಯ್ ಶ್ರೀ ರೊನಾಲ್ಡ್ ಕ್ರಾಸ್ತಾ ಹಾಂ ಸುದಾಂ ಕಾರ್ಯಕ್ರಮಾಂತು ಹಾಜರ್ ಆಶ್ಶಿಲೆ.