ಜಿ.ಎಸ್.ಬಿ. ಪರಿವಾರ ಉತ್ತರಹಳ್ಳಿ ಹಾಂಗೆಲೆ ತರಪೇನ ಪ್ರತೀ ಮ್ಹಹಿನೋ ದೊನ್ನೀಚೆ ಆಯ್ತವಾರು ಆಯೋಜನ ಕೊರನು ಘೇವ್ನು ಯವ್ಚೆ ವರಿ ಅಗಸ್ಟ್ ಮ್ಹಹಿನ್ಯಾಚೆ ಸಾರ್ವಜನಿಕ ಶ್ರೀ ಸತ್ಯನಾರಾಯಣ ವ್ರತ ದಿನಾಂಕ. 09-08-2026 ದಿವಸು ಬನಗಿರಿ ಶ್ರೀ ವರಸಿದ್ಧಿ ವಿನಾಯಕ ದೇವಳಾಂತು ವಿಜೃಂಭಣೆರಿ ಚಲ್ಲೆ. ಸುರವೇಕ ದೇವಮಾಗಣಿ ಚಲ್ಲೆ.
ಹೇ ಮ್ಹಹಿನ್ಯಾಚೆ ಶ್ರೀ ಸತ್ಯನಾರಾಯಣ ವ್ರತಾಚೆ ಸೇವಾದಾರ ಜಿ.ಎಸ್.ಬಿ. ಸಮಾಜ, ಪೀಣ್ಯ, ದಾಸರಹಳ್ಳಿ ಹಾನ್ನಿ ಆಶ್ಶಿಲೆ. ಪೀಣ್ಯ ದಾಸರಹಳ್ಳಿ ಜಿ.ಎಸ್.ಬಿ. ಸಮಾಜಾ ತರಪೇನಿ ವಿನಾಯಕ ಕಾಮತ್ ಆನಿ ಆಡಳಿತ ಸಮಿತಿಚೆ ಸರ್ವ ಸದಸ್ಯಾನಿ ವಾಂಟೊ ಘೆತ್ತಿಲೆ.ಹೇ ವೇಳ್ಯಾರಿ ಏಕದಂತ ಭಜನಾ ಮಂಡಳಿ ತರಪೇನ ಶೃದ್ದಾ-ಭಕ್ತೀರಿ ಭಜನಾ ಸೇವಾ ಚಲ್ಲಿ. ಶ್ರೀ ಗಣೇಶ್ ಶಂಕರ್ ಪೈ ಹಾನ್ನಿ ತತ್ವ ಸಂಕೀರ್ತನಾ ಕಾರ್ಯಕ್ರಮ ಚಲೋಸೂನು ದಿಲ್ಲಿ. ಹೇ ವೇಳ್ಯಾರಿ ನೈವೇದ್ಯ, ಮಹಾಮಂಗಳಾರ್ತಿ, ಪ್ರಸಾದ ವಾಂಟಪ ಚೋಲ್ನು ಆಯಯಿಲೆ ಸಕಟ ಸಮಾಜ ಬಾಂದವಾಂಕ ಅನ್ನ ಸಂತರ್ಪಣ ವರೇನ ಚಲ್ಲೆ.
ಉಪರಾಂತ ಧೋಂಪಾರಾ ೨ ಘಂಟ್ಯಾಕ ಸಮಾಜಾಚೆ ಪ್ರತಿಭಾವಂತ ಚರಡುವಾಂಕ ಪುರಸ್ಕಾರ ಆನಿ ಉಚಿತ ವಿದ್ಯಾರ್ಥಿ ವೇತನ ವಿತರಣಾ ಕಾರ್ಯಕ್ರಮ ಚಲ್ಲೆ.
ಹೇ ಸಮಾರಂಭಾಕ ಮುಖೇಲ ಸೊಯರೆ ಜಾವನು ಆಯಲೀಲೆ ಪೀಣ್ಯ ದಾಸರಹಳ್ಳಿ ಜಿ.ಎಸ್.ಬಿ. ಸಮಾಜಾಚೆ ತರಪೇನಿ ಆಯಲೀಲೆ ಶ್ರೀ ವಿನಾಯಕ ಕಾಮತ್ ಮಾಮ್ಮಾನಿ ಜಿ.ಎಸ್.ಬಿ. ಪರಿವಾರು, ಉತ್ತರಹಳ್ಳಿ ಹಾಂಗೆಲೆ ವಿದ್ಯಾನಿಧಿಕ ರೂ. ೭೫,೦೦೦ ಉದಾರ ದೇಣಿಗಾ ದಿಲ್ಲಿ. ಆನಿ ಉಲಯತಾ ವಿನಾಯಕ್ ಕಾಮತ್ ತಾನ್ನಿ ಮ್ಹಳ್ಳೆ ವಿದ್ಯಾನಿದಿಕ ದೇಣಿಗಾ ದಿವಚೆ ಅನೇಕ ದಾನಿ ಲೋಕ ಆಸ್ಸಾತಿ. ಜಿ.ಎಸ್.ಬಿ. ಪರಿವಾರು, ಉತ್ತರಹಳ್ಳಿ ಹಾನ್ನಿ ಸಮಾಜಾಚೆ ಬರೇಪಣಾ ಖಾತ್ತಿರಿ ಕಾಮ ಕರತಾ ಆಸ್ಸಾತಿ. ತಾನ್ನಿ ದಾನಿಂಗೆಲೆ ದುಡ್ಡು ಪರಿಣಾಮಕಾರಿ ಜಾವ್ನು, ಗರಜ ಆಶ್ಶಿಲೆ ಚಾಂಗ ಕಾರ್ಯಾಂಕ ಮಾತ್ರ ವಾಪರತಾತಿ. ವಿದ್ಯಾರ್ಥಿ ಲೋಕಾನಿ ಆಪಣೇಲೆ ಅತ್ಯುತ್ತಮ ಪ್ರಯತ್ನ ಕೊರಕಾ, ಶ್ರಮ ಘಾಲ್ಕಾ ಮ್ಹಣ್ಚೆ ಆಪೋವ್ಣಿ ದಿವನು ಸಕಡ್ಯಾಂಕ ದೇವು ಬರೆಂ ಕೊರೊಂ ಮ್ಹಳ್ಳೆ.
ಜಿ.ಎಸ್.ಬಿ. ಪರಿವಾರು ಉತ್ತರ ಹಳ್ಳಿ ಹಾಜ್ಜೆ ಅಧ್ಯಕ್ಷ ಶ್ರೀ ಸುರೇಂದ್ರ ಸುರೇಂದ್ರ ನಾಯಕ್ ಮಾಮ್ಮಾನಿ ಅಧ್ಯಕ್ಷ ಪಣ ಘೇವ್ನು ಪರಿವಾರಾಚೆ ಕಾರ್ಯಚಟುವಟಿಕೆಚೆ ಮಾಹಿತ ದಿಲ್ಲಿ. ಆನಿ ಪೋಷಕಾನಿ ಆನಿ ವಿದ್ಯಾರ್ಥಿ ಲೋಕಾನಿ ಪರಿವಾರಾಚೆ ಸರ್ವ ಕಾರ್ಯಾಂತು ವಾಂಟೊ ಘೆವ್ಕಾ, ತಾಂಗೆಲೆ ತಾಕೂನು ಜಾಲೀಲೆ ತಿತ್ತುಲೆ ತನುಮನಾ, ಧನಾಚೆ ಸೇವಾ ಪಾವೋನು ಸಮಾಜಾಚೆ ಬರೇಪಣಾ ಖಾತ್ತಿರಿ ವಾವರೋ ಕೊರಕಾ ಮ್ಹೊಣು ವಿನಂತಿ ಕೆಲ್ಲಿ.
ಪರಿವಾರಾಚೆ ಕಾರ್ಯದರ್ಶಿ ಶ್ರೀ ಅಣ್ಣಪ್ಪ ಪ್ರಭು ಮಾಮ್ಮಾನಿ ಉಲೋನುಹರ್ಯೇಕ ವಿದ್ಯಾರ್ಥಿನಿ ಚಾಂಗ ಶಿಕ್ಕೂನು ಮುಖಾರ ಯವ್ಕಾ, ತಶೀಚಿ ಯುವಕಾರಾನಿ ಮುಖಾರಿ ಯವ್ಕಾ. ಸಮಾಜಾಚೆ ಸರ್ವ ಕಾರ್ಯಾಂತು ವಾಂಟೊ ಘೆವ್ಕಾ. ಆಮ್ಗೆಲೆ ಕಾಲಾಂತು ಮಸ್ತ ಕಷ್ಟ ಆಶ್ಶಿಲೆ ಜಾಲಯಾರಿ ಆಜಿ ಕಾಲ ಬದಲ ಜಾಲ್ಲ್ಯಾ, ಆಯ್ಚೆ ಆವಯಿ -ಬಾಪಯಿ ಆಮ್ಮಿ ಕಷ್ಟ ಕಾಳ್ಯಾ, ಆಮ್ಗೆಲೆ ಚರಡುವಾನಿ ಕಷ್ಟ ಕಾಡ್ಚೆ ನಾಕ್ಕಾ ಮ್ಹಣ್ಚೆ ಸಮಜೂನು ಆಸತಾತಿ. ತ್ಯಾ ಸಮ್ಮ ನ್ಹಂಹಿ ಕಷ್ಟಾಚೆ ಅನುಭವು ಆಶ್ಶಿಲೊ ಮಾತ್ರ ಸುಖಾಚೆ ಆನಂದ ಪಾವಚಾಕ ಸಾಧ್ಯ ಆಸ್ಸಾ. ತ್ಯಾ ಅನುಭವ ಘೆವ್ಚೆ ಖಾತ್ತಿರಿ ಚರಡುವಾಂಕ ಸಮಾಜಾಚೆ ಆಪೋನು ಹಾಜ್ಜೆ ಪರಂಪರಾ ದವರೂನು ಘೆವ್ಕಾ. ಚರಡುಂವಾನಿ ವರೇನ ಚಾಂಗ ಜಾವ್ನು ಶಿಕೂನು ಸಮಾಜಾಕ, ರಾಜ್ಯಾಕ, ದೇಶಾಕ ಕೀರ್ತಿ ಹಾಡಕಾ ಮ್ಹಣ್ಚೆ ಆಪೋವ್ಣಿ ದಿಲ್ಲಿ.
ಜಿ.ಎಸ್.ಬಿ. ಪರಿವಾರು ಹಾಜ್ಜೆ ಕಟ್ಟಡ ಸಮಿತಿ ಅಧ್ಯಕ್ಷ ಶ್ರೀ ನಾಗರಾಜ್ ಪ್ರಭು ತಾನ್ನಿ ಉಲೋನು “ವಿದ್ಯಾರ್ಥಿ ಲೋಕಾನಿ ಶಿಕ್ಷಣ ಪೂರ್ತಿ ಜಾವ್ನು ಭವಿಷ್ಯಾಂತು ಜೊಡಚಾಕ ಲಾಗ್ಲೆ ನಂತರ ಸಮಾಜಾಕ ವಿಸರಚಾಕ ನಜ್ಜ. ತಾಂಗೆಲೆ ತನು, ಮನ ಆನಿ ಧನ ಪೂರ್ವಕ ಸೇವಾ ಸಮಾಜಾಕ ಪರತೂನು ದಿವ್ಕಾ ಮ್ಹೊಣು ಸಾಂಗ್ಲೆ.
ಹೇ ವೇಳ್ಯಾರಿ ಸಮಾಜಾಚೆ 58 ಚರಡುವಾಂಕ ವಿದ್ಯಾರ್ಥಿವೇತನ ಆನಿ ಪ್ರತಿಭಾ ಪುರಸ್ಕಾರ ಕೊರನು ಪ್ರೋತ್ಸಾಹ ದಿಲ್ಲೆ ಮ್ಹೊಣು ಜಿ.ಎಸ್.ಬಿ. ಪರಿವಾರು, ಉತ್ತರಹಳ್ಳಿ ಹಾಜ್ಜೆ ಕಾರ್ಯದರ್ಶಿ ಶ್ರೀ ಅಣ್ಣಪ್ಪ ಪ್ರಭು ಹಾನ್ನಿ ಕಳಯಲಾ.