ಸಾಣೂರಾಂತು ೩೦ ವಿದ್ಯಾರ್ಥ್ಯಾಂಕ ವಿದ್ಯಾರ್ಥಿವೇತನ ವಾಂಟಿಲೆ

ಆರ್ಥಿಕ ರೀತ್ಯಾ ಮಾಕಶಿ ವ್ಹರಲೀಲೆ ಕುಟುಂಬಾಂಚ್ಯಾ ಪ್ರತಿಭಾವಂತ ವಿದ್ಯಾರ್ಥ್ಯಾಂಕ ಶೈಕ್ಷಣಿಕ ಪ್ರೋತ್ಸಾಹ ದಿವಚ್ಯಾ ಉದ್ದೇಶಾನ ಜಿ‌ಎಸ್‌ಬಿ ಸಮಾಜ ಹಿತರಕ್ಷಣಾ ವೇದಿಕೆ (ರಿ.), ಉಡುಪಿ ಜಿಲ್ಲೆ ಹಾಂಚ್ಯಾ ವತಿನ ಆಯೋಜಿತ್ 4ವೆಂ ವರ್ಷಾಚೆ ವಿದ್ಯಾರ್ಥಿವೇತನ ವಿತರಣ ಕಾರ್ಯಕ್ರಮ ಸಾಣೂರು ಸರಕಾರಿ ಪದವಿ ಪೂರ್ವ ವಿದ್ಯಾಲಯಾಚ್ಯಾ ಸಭಾಭವನಾಂತು ಸೆಪ್ಟೆಂಬರ್ ೨೨ಕ ಚಲ್ಲೆ.
ಸಾಣೂರು ಸರಕಾರಿ ಪ್ರೌಢಶಾಲೆಚ್ಯಾ ೧೦ವೆಂ ಇಯತ್ತೆಚ್ಯಾ ೧೦ ವಿದ್ಯಾರ್ಥ್ಯಾಂಕ, ಸಾಣೂರು ಸರಕಾರಿ ಪದವಿ ಪೂರ್ವ ವಿದ್ಯಾಲಯಾಚ್ಯಾ ಪ್ರಥಮ ಪಿಯುಸಿಚ್ಯಾ ೧೦ ವಿದ್ಯಾರ್ಥ್ಯಾಂಕ ಆನಿ ದ್ವಿತೀಯ ಪಿಯುಸಿಚ್ಯಾ ೧೦ ವಿದ್ಯಾರ್ಥ್ಯಾಂಕ, ಅಶೆಂ ಒಟ್ಟು ೩೦ ಪ್ರತಿಭಾವಂತ ವಿದ್ಯಾರ್ಥ್ಯಾಂಕ ಹರೇಕ್ಲ್ಯಾಂಕ ರೂ. ೩,೦೦೦/- ಪ್ರಮಾಣೆಂ ಒಟ್ಟು ರೂ. ೯೦,೦೦೦/- ವಿದ್ಯಾರ್ಥಿವೇತನಾಚೆ ಚೆಕ್ ವಿತರಣ ಕೆಲೆ.
ತಾಚೆಂ ಬರೋಬರ ಮಣಿಪಾಲ ಅಕಾಡೆಮಿ ಆಫ್ ಹೈಯರ್ ಎಜುಕೇಶನ್ (MAHE) ಹಾಂಚ್ಯಾ ವತಿನ ಶೈಕ್ಷಣಿಕ ಕಿಟ್ ವರೇನ ವಿದ್ಯಾರ್ಥ್ಯಾಂಕ್ ದಿಲ್ಲೆ.

೧೪ ವರ್ಸಾಂಸಾವನ್ ಸಮಾಜಮುಖಿ ಸೇವಾ
ಹೇ ವೇಳ್ಯಾರಿ ಉಲಯಿಲಿ ಜಿ‌ಎಸ್‌ಬಿ ಸಮಾಜ ಹಿತರಕ್ಷಣಾ ವೇದಿಕೆಚೆ ಪ್ರಧಾನ ಕಾರ್ಯದರ್ಶಿ ಸಾಣೂರು ನರಸಿಂಹ ಕಾಮತ್ ಹಾಂಣಿಂ “ವೇದಿಕೆನ್ ಗತ ೧೪ ವರ್ಸಾಂಸಾವನ್ ಉಡುಪಿ ಜಿಲ್ಲೆತಾಚ್ ಸಮಾಜಾಚ್ಯಾ ಚೌಕಟ್ಟಾಂತ್ ರಾವುನ್ ವೆಗವೆಗ್ಳ್ಯಾ ಸಮಾಜಮುಖಿ ಉಪಕ್ರಮಾಂಚೆಂ ಆಯೋಜನ್ ಕರೀತ ಆಯ್ಲಾ. ದಾನಿ ಲೋಕಾಂಗೆಲೊ ಸಹಕಾರಾನ ಹೇ ಕಾರ್‍ಯ ಆನಿ ವಿಸ್ತಾರಿತ್ ಜಾತ್ ಆಸಾತ್. ಸಮಾಜಾಂತ್ಲ್ಯಾ ಸಗ್ಳ್ಯಾ ವರ್ಗಾಂಚ್ಯಾ ವಿದ್ಯಾರ್ಥ್ಯಾಂಚ್ಯಾ ಶೈಕ್ಷಣಿಕ ಉನ್ನತಿ ಖಾತಿರ್ ಸಹಾಯಾಚೊ ಹಾತ್ ದಿತ್ ಆಸಾತ್ ಮ್ಹಳ್ಳೆ.
ಪ್ರತಿಭಾ ಆನಿ ಪರಿಶ್ರಮಾಕ ಆರ್ಥಿಕ ಅಡಚಣ್ ಅಡ್ಸರ್ ಜಾವ್ಚೆಂ ನಾ ಹ್ಯಾ ಉದ್ದೇಶಾನ ಫುಡ್ಲ್ಯಾ ದಿಸಾಂತ್ ಶೈಕ್ಷಣಿಕ ಸಾಧಕ್ ವಿದ್ಯಾರ್ಥ್ಯಾಂಕ್ ಆನಿ ಚಡ ಪ್ರೋತ್ಸಾಹ ದಿವ್ಚೆಂ ವೇದಿಕೆಚೆಂ ಧ್ಯೇಯ ಆಸಾ, ಅಶೆಂ ತಾನ್ನಿ ಸಾಂಗ್ಲೆಂ.

ಸಾಣೂರು ಪದವಿ ಪೂರ್ವ ವಿದ್ಯಾಲಯಾಂತ್ ಶಿಕುನ್ ಮೆರಿಟ್ ಆಧಾರಾಂತ್ ವೈದ್ಯಕೀಯ ಶಿಕ್ಷಣಾಕ್ ಪ್ರವೇಶ್ ಮೆಳೊವ್ಪಿ ವಿದ್ಯಾರ್ಥ್ಯಾಂಚೊ ಸಗ್ಳೊ ಶೈಕ್ಷಣಿಕ ಖರ್ಚ್ ಭರಪಾಚ್ಯಾ ದಿಶೆನ್ ವೇದಿಕೆನ್ ಪ್ರಯತ್ನ್ ಕರಪಾಚೊ ನಿರ್ಣಯ್ ಕೆಲಾ, ಅಶೆಂ ಕಾಮತ್ ಹಾಂಣಿಂ ಸಾಂಗ್ಲೆಂ.
ಕಾರ್ಯಕ್ರಮಾಚೆಂ ಅಧ್ಯಕ್ಷಸ್ಥಾನ ಸಾಣೂರು ಸರಕಾರಿ ಪದವಿ ಪೂರ್ವ ವಿದ್ಯಾಲಯಾಚೆ ಕಾರ್ಯಾಧ್ಯಕ್ಷ ಅಶೋಕ್ ಶೆಟ್ಟಿ ಹಾಂಣಿಂ ಘೆತ್ತಿಲೆ. ವಿದ್ಯಾಲಯಾಚ್ಯಾ ಪ್ರಾಂಶುಪಾಲ ಸುಚೇತಾ ಕಾಮತ್ ಹಾಂಣಿಂ ಕಾರ್ಯಕ್ರಮ್ ಸಂಯೋಜಿತ್ ಕೆಲೊ. ಸಾಣೂರು ಸರಕಾರಿ ಪ್ರೌಢಶಾಲೆಚ್ಯಾ ಮುಖ್ಯೋಪಾಧ್ಯಾಯ ಲವೀನಾ ಹಾಂಣಿಂ ಸಹಕಾರ್ ದಿಲೊ.

ವಿದ್ಯಾ ಪೋಷಕ ವಿದ್ಯಾರ್ಥಿವೇತನ ನಿಧಿಚೆ ಸಂಚಾಲಕ್, ಬೆಂಗಳೂರಾಚ್ಯಾ ಮಹಾಲಸಾ ಎಲೆಕ್ಟ್ರಿಕಲ್ಸ್‌ಚೆ ಶ್ರೀ ವಿಜಯಕುಮಾರ್ ಶೆಣೈ, ಮೂಡಬಿದ್ರೆ, ಆನಿ ವೇದಿಕೆಚೆ ಯುವ ಕಾರ್ಯಕರ್ತ ಶ್ರೀ ವರುಣ್ ಶೆಣೈ ಹಾಜಿರ್ ಆಶಿಲ್ಲೆ.
ಇಂಗ್ಲಿಷ್ ಉಪನ್ಯಾಸಕಿ ಡಾ. ಸುಮತಿ ಪಿ. ಹಾಂಣಿಂ ಸ್ವಾಗತ್ ಕೆಲೊ. ಗಣಿತ ಉಪನ್ಯಾಸಕಿ ಟೆಲ್ಮಾ ರೀನಾ ರಸ್ಕಿನ್ನಾ ಹಾಂಣಿಂ ವಿದ್ಯಾರ್ಥಿವೇತನ ಮೆಳೊವ್ಪ್ಯಾಂಚೆ ನಾಂವಾಂಚಿ ವಾಚನ್ ಕೆಲಿ. ಸಮಾಜಶಾಸ್ತ್ರ ಉಪನ್ಯಾಸಕ್ ವಿಶ್ವನಾಥ್ ಆರ್. ಹಾಂಣಿಂ ಕಾರ್ಯಕ್ರಮ್ ಚಲೋನು ಆಭಾರ್ ಮಾನ್ಲೆಂ.