ಆಮಗೆಲೆ ಸಮಾಜಾಂತು ದೋನ ತರೇಚೆ ಮನುಷ್ಯ ಪಳೋವ್ಚಾಕ ಮೆಳ್ತಾತಿ. ಏಕ ತರೇಚೆ ಮ್ಹಳ್ಯಾರಿ-ಆಪುಣ ಆನಿ ಆಪಣ್ಯಾಲೆ ಕುಟುಂಬ ಹ್ಯಾ ಬದ್ದಲ ಮಾತ್ರ ವಿಚಾರ ಕರ್ತಲೆ. ದುಸರ್ಯಾಲೀ ಉಸಾಬರಿ ಆಮ್ಕಾಂ ಕಿತ್ಯಾಕ? ಮ್ಹಣತಲೆ. ಆನಿಯೇಕ ತರೇಚೆ ಮ್ಹಳ್ಯಾರಿ ಆಪಣ್ಯಾಲೆ ಕಾಮ ಪಣ ಯಶಸ್ವೀ ರೀತೀನ ಕರೀತ, ವೇಳ ಮೇಳಿಲ್ ತೆನ್ನಾ ಅಪಣ್ಯಾಕ ಸರ್ವ ತರೇಚೆಂ ಸುಖ, ಸಂತೋಷ ಆನಿ ಸಂತೃಪ್ತಿ ದಿಲ್ಲಿಲೆ ಅಪಣ್ಯಾಲೆ ಸುತ್ತೂ ಆಸೋಚೆ ಸಮಾಜಾ ಬದ್ದಲ ಭೀ ಕಾಳಜಿ ಘೇವ್ನು ಅಪಣ್ಯಾಲೆ ಹಾತ್ತಾನ ಜಾವ್ಚೋ ಸಹಾಯ ಕೋರ್ನು ತಾಂತು ತೃಪ್ತಿ ಪಾವ್ತಲೇ. ಹ್ಯಾ ದೋನ ತರೇಚೆ ಲೋಕಾಂತು ಮಸ್ತ ಕಷ್ಟಾನ ಸತತ ಕಾಮ ಕೋರ್ನು ಧರೀಲ್ಯಾ ವ್ಯವಸಾಯ ಆನಿ ಉದ್ಯೋಗಾಂತೂ ಯಶ ಪಾವ್ತೇಚಿ ಸದಾ ಸಮಾಜಸೇವಾ ಕಾಮಾಂತು ಭೀ ಆಸಕ್ತ ಜಾವ್ನು ಅನೇಕ ಸಮಾಜಮುಖೀ ಕಾಮಕೋರ್ನು ಶಾಭಾಸ್ಕಿ ಘೆತ್ತಿಲ್ಲೇ ಹುಬ್ಬಳ್ಳಿಚೆ ಶ್ರೀ ರಮೇಶ ಪಾಂಡುರಂಗ ನಾಯಕ ಏಕ ಆದರಣೀಯ ವ್ಯಕ್ತಿ ಜಾವ್ನು ಆಸ್ಸಾತಿ. ತಾಂಗೆಲೆಂ ಜೀವನ ಇತರ ಲೊಕಾಂಕ ಏಕ ಮಾದರೀ ಜಾವ್ನು ಪ್ರೇರಣಾದಾಯಕ ಜಾವನು ಆಸ್ಸಾ ಮ್ಹಣೇತ.
ಶ್ರೀ ರಮೇಶ ನಾಯಕ ಹಾನ್ನಿ ಉತ್ತರ ಕನ್ನಡ ಜಿಲ್ಲಾ ಕುಮಟಾ ಗಾವಾಂತು, ಥಂಚೆ ಪ್ರಖ್ಯಾತ ರಾಮ ನಾಯಕ ಕುಟುಂಬಾಂತು ಶ್ರೀ ಪಾಂಡುರಂಗ ರಾಮ ನಾಯಕ ಆನಿ ಶ್ರೀಮತಿ ರುಕ್ಮಾಬಾಯಿ ನಾಯಕ ಹಾಂಗೆಲೆ ಪೂತು ಜಾವ್ನು 18-05-1966 ದಿಸ ಜಲ್ಮಲೆ. ಪ್ರಾಥಮಿಕ ಆನಿ ಹೈಸ್ಕೂಲ ಶಿಕ್ಷಣ ಕುಮಟೇಚ್ಯಾ ಗಿಬ್‌ ಹೈಸ್ಕೂಲಾಂತು ಆನಿ ಪದವಿ ಶಿಕ್ಷಣ ಕುಮಟಾ ಕೆನರಾ ಕಾಲೇಜಾಂತು ಘೆತ್ಲೆಂ. ತ್ಯಾ ವೇಳಾರಿ ಉತ್ತರ ಕನ್ನಡ ಜಿಲ್ಲೇಚೇ ಯಶಸ್ವೀ ಕಾಂಟ್ರ್ಯಾಕ್ಟರ್‌ ಜಾವ್ನು ನಾಂವ ಕಮಯ್ಯಿಲ್ಲೆ ಬಾಪಯ್‌ ಶ್ರೀ ಪಿ.ಆರ್.ನಾಯಕ ಹಾಂಗೆಲ ಬರ್ಶಿ ತಾನ್ನಿ ರೋಡ ಕೊರ್ಚೇ, ಅಸ್ಪಾಳ್ಟ ಕೊರಚೆ, ಸಿ.ಡಿ. ಆನಿ ಸಾಂಕೋವ್‌ ಬಾಂದೋವ್ಚೆ, ಸರಕಾರೀ ಆನಿ ಖಾಸಗಿ ಬಿಲ್ಡಿಂಗ್‌ ಬಾಂದೋವ್ಚೆ ಅಸಲ್‌ ಕಾಮಾಂತು ಮದತ್‌ ಕರತಾ ಕರತಾಂ ತಾಂತೂ ಅನುಭವ ಪಾವ್ಲೆ.
ತಾಜ್ಜೆ ಸಂಗಾತಾ ಕುಮಟೇಂತು ಹಾಂಗೆಲೆ ಕುಟುಂಬಾನ ಪ್ರಾರಂಭ ಕೆಲ್ಲಿಲ್ಯಾ “ಕೆನರಾ ಪೈಪ್ಸ ಇಂಡಸ್ಡ್ರೀ” ಹಾಂತು ಸಿಮೆಂಟ್‌ ಪೈಪ್ಸ ತಯಾರ ಕೊರ್ಚೆಕ, ಎಲೆಕ್ಟ್ರಿಕ್‌ ಪೋಲ್ಸ ನಿರ್ಮಾಣ ಕೊರ್ಚ್ಯಾಂತು ಭೀ ಅನುಭವ ಪ್ರಾಪ್ತ ಕೆಲೊ. ತ್ಯಾ ಸಂದರ್ಭಾಂತು ಹಾಂಕಾಂ ಹುಬ್ಬಳ್ಳಿ, ಬೆಳಗಾಂವ್‌,ಶಿಗ್ಗಾವಿ, ರಾಮನಗರ ಅಶ್ಶಿಂ ಉತ್ತರ ಕರ್ನಾಟಕಾಂತು ಮಸ್ತ ಇತ್ಲೆ ಕಾಂಟ್ರಾಕ್ಟ ಮೆಳಿಲ್ಯಾನ ಹಾನ್ನಿ ಕುಮಟೇಚ್ಯಾನ ಹುಬ್ಬಳ್ಳೀಕ ವಾಸ್ತವ್ಯ ಬದಲಾಯ್ಲೆಂ ಆನಿ ಹುಬ್ಳೀಂತು ಏವ್ನು ಸ್ಥಾಯಿಕ ಜಾಲ್ಲೆತ್ಯಾ ವೇಳಾರಿ ಹಾನ್ನಿ ಹುಬ್ಬಳ್ಳೀಂತು ಖರೀದಿ ಕೆಲ್ಲಿಲ್ಯಾ ಜಮೀನಿಂತು ಏಕ ಇಂಡಸ್ಟ್ರೀ ಸ್ಥಾಪನ ಕೊರ್ಚೋ ವಿಚಾರು ಹಾಂಗೇಲ ಬಾಪೈ ಶ್ರೀ ಪಿ.ಆರ್.ನಾಯಕ ಹಾಂಗೆಲ್ಯಾ ಮಾತ್ಯಾಂತು ಆಯ್ಲೋ ಆನಿ ತಾಜ್ಜಿ ಜವಾಬ್ದಾರಿ ರಮೇಶಮಾಮಾಕ ದಿಲ್ಲೀ.
ಹಾನ್ನಿ ಏಕ ವರ್ಷಾ ಭಿತ್ತರಿ ರಾತ್ರ ದಿವಸ ಕಾಮ ಕೋರ್ನು ತೀ “ರಾಮ್ಸನ್ಸ ಇಂಡಸ್ಟ್ರೀ” ನಿರ್ಮಾಣ ಕೋರ್ನು ತಾಂತು ಹ್ಯೂಮ ಪೈಪಾಂಚೆ ಪ್ರೊಡಕ್ಶನ್‌ ಪಣ ಸ್ಟಾರ್ಟ ಕೆಲೆಂ. ತ್ಯಾ ನಂತರ ಭೀ ಪ್ರತಿ ದಿವಸ 200-250 ಕಿ.ಮೀ. ಪ್ರಯಾಣ ಕೋರ್ನು ಹುಬ್ಬಳ್ಳಿ ಆಸಪಾಸ ಆಶಿಲ್ಯಾ ಗಾವಾಂತುಲ್ಯಾನ ಒರ್ಡರ್‌ ಘೇವ್ನು ಆಪಣ್ಯಾಲೆಂ ಪ್ರೊಡಕ್ಶನ್‌ ವಾಡೈಲೆಂ ಆನಿ ಉದ್ದಿಮೆಂತು ಯಶ ಮೆಳೈಲೆಂ. ಬರೇ ಮಟಿರಿಯಲ್ಸ ವಾಪೋರ್ನು ಬರೇ ರೀತೀನ ಕ್ವಾಲಿಟಿ ರಾಕ್ಖೂನ ಹಾಡಿಲ್ಯಾನ ಹಾಂಗೆಲೆ ಪ್ರೋಡಕ್ಟಾಕ ಮಸ್ತ ಮಾಗಣೀ ಆಯ್ಲೀ ಆನಿ ಹಾಂಗೆಲ್ಯಾ ಉದ್ದಿಮೇಕ ಬರೇಂ ಯಶ ಪ್ರಾಪ್ತ ಜಾಲ್ಲೆಂ. ಪ್ರತಿನಿತ್ಯ ನವ ನವೀನ ವಿಚಾರಾಂತು ಆಸಕ್ತ ಜಾವ್ನು ಆಶಿಲ್ಲೇ ರಮೇಶಮಾಮ ಆಪಣ್ಯಾಲೆ ಉದ್ದಿಮೇಂತು ನವೀನ ತಂತ್ರಜ್ಞಾನ ಉಪಯೋಗ್‌ ಕೊರ್ಚ್ಯಾಂತು ಮನ ಘಾಲ್ನು ದುಸ್ರೆ ದುಸ್ರೇ ಗಾವಾಂತು ಜಾವ್ಚೆ ‘ಇಂಡಸ್ಟ್ರಿಯಲ್‌ ಎಕ್ಷಿಹಿಬಿಶನ್ನ” ಪಳೋವ್ನು ಥಂಚೆ ನವನವೀನ ತಾಂತ್ರಿಕ ಮಾಹಿತಿ ಘೆವ್ನು ತೇ ಸಗ್ಳೆ ಆಪಣ್ಯಾಲೆ ಉದ್ದಿಮೇಂತು ವಾಪರ್ತಾಲೆ.
ತ್ಯಾ ಖಾತ್ತೇರಿ ಹಾನ್ನಿ ಚೀನಾ ದೇಶಾಚೆ ಏಕ ಕಂಪನಿ ಪಳೋವ್ಚ್ಯಾಕ ಸ್ಪೇನ್‌ ದೇಶಾಕ ವರೇಕ ವಚ್ಚೂನು ಪಳೋವ್ನ ಆಯ್ಲೇಚಿ. ತ್ಯಾ ನಂತರ ಡೆನ್ಮಾರ್ಕ ದೇಶಾಚೆ ಏಕ ಕಂಪನಿ ಬರ್ಶಿ ಸಂಪರ್ಕ ಕೋರ್ನು ತಾಂಗೆಲೆ ತಂತ್ರಜ್ಞಾನಾನ ಕುಮಟೇಂತು ಭಾರತಾಂತು ಪ್ರಥಮ ಜಾವ್ನು ವರ್ಟಿಕಲ್‌ ಹ್ಯೂಮ ಪೈಪ ತಯಾರ ಕೊರ್ಚೇಕ ಪ್ರಾರಂಭ ಕೆಲ್ಲಿ ಕೀರ್ತಿ ಹಾಂಗೆಲೆ ಕುಟುಂಬೇಕ ಫಾವಿತ ಜಾತ್ತಾ.
ಪರಿಸರ ಪ್ರೇಮಿ ಜಾವ್ನು ಆಶಿಲ್ಲೆ ರಮೇಶ ನಾಯಕ ಹಾನ್ನಿ ಹುಬ್ಬಳ್ಳೀಂತು ಆಪಣ್ಯಾಲೆ ಇಂಡಸ್ಟ್ರೀ ಆಶಿಲ್ಲೆ ಕಡೇನ ಖಾಲಿ ಆಶಿಲ್ಯಾ ಜಗ್ಯಾಂತು ಸುತ್ತು ಆಂಬ್ಯಾ ಝಾಡ್ಡಾಂ ರೋವ್ನು,ಮಧ್ಯೆಂತು ಗ್ರೀನ ಹೌಸ್‌ ಕೋರ್ನು ಥಂಯಿಂ ಗೋಂಡೆ, ಶೇವಂತಿ ಫುಲ್ಲಾಂಚೆ ನಂದನವನ ಕೆಲ್ಲಾಂ. ಸಾವಯವ ಗೊಬ್ಬರಾ ಖಾತ್ತೇರಿ ಗೊರ್ವಾಂಕ ಪೊಸ್ಸೂನು ದವರ್ಲ್ಯಾಂ. ಆಶ್ಸೀಂ ತಾನ್ನಿ ಪರ್ಯಾವರಣ ರಕ್ಷಣೇಚೆಂ ಕಾಮ ಭೀ ಕರ್ತೋ ಆಸಾಚಿ.
ಹೇ ಸರ್ವ ಉದ್ಯೋಗ ವ್ಯವಹಾರ ಕರತ ಆಸ್ಸೂನು ಭೀ ಸಮಾಜ ಸೇವೇಂತು ಮನ ಗುಂತೋವ್ನು ತಾಂಗೆಲೆ ಏಕ ಚಾರ್ಟರ್ಡ ಎಕೌಂಟಂಟಾಲೆ ಪ್ರೇರಣೇನ ೩೦ ವರ್ಷಾಂ ಪೈಲೇಂಚಿ ಹುಬ್ಬಳ್ಳಿ ರೊಟರಿ ಕ್ಲಬ್‌ ಸದಸ್ಯ ಜಾವ್ನು ಅನೇಕ ಸಮಾಜಮುಖೀ ಕಾಮಾಂತು ಹಾತಭಾರ ಲಾಯ್ಲಾ.ಇತ್ಲೇಂ ನ್ಹಂಯಿ, 1945 ಇಸ್ವೀಂತು ಪ್ರಾರಂಭ ಜಾವ್ನು ಖೂಪ ವರ್ಷಾಂಧೋರ್ನು ಸಕ್ರಿಯ ಜಾವ್ನು ಕಾಮ ಕರೀತ ಆಸೋಚ್ಯಾ “ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜ” ಹಾಜ್ಜೆ ಸದಸ್ಯ ಜಾವ್ನು ಮಸ್ತ ವರ್ಷ ಸಮಾಜಸೇವಾ ಕೆಲ್ಯಾ. ಗೆಲ್ಲಿಲ್ಲೆ ಚಾರ ವರ್ಷ ಧೋರ್ನು ಹಾನ್ನೀ ಹುಬ್ಬಳ್ಳಿ ಜಿ.ಎಸ್.ಬಿ. ಸಮಾಜಾಚೆ ಅಧ್ಯಕ್ಷ ಜಾವನು ಅತ್ಯಂತ ಸಮರ್ಥ ರೀತೀನ ಕಾಮ ಕರೀತ ಆಸ್ಸಾತಿ.
ಹಾಂಗೆಲ್ಯಾ ಕಾಲಕೀರ್ದೀಂತು ಸಮಾಜಾಚೆ ಸರಸ್ವತಿ ಸದನ ಆನಿ ಲಕ್ಷ್ಮೀ ಸದನ ಹ್ಯಾ ಬಿಲ್ಡಿಂಗಾಚೇರಿ ಸೋಲಾರ ಪೆನಲ್‌ ಘಾಲ್ನು ಸಗ್ಳೇ ಇಮಾರತೀಕ ವಿದ್ಯುತ್‌ ಪೂರಣ ಕೊರ್ಚಿ ವ್ಯವಸ್ಥಾ ಕೆಲ್ಯಾ. ತಾಜ್ಜಾನ ಪ್ರತಿ ಮ್ಹೈನ್ಯಾಕ ಹಜಾರಾನಿ ರುಪೈಯೋ ಉಳಿತಾಯ ಜಾಲ್ಯಾಂ. ಇತ್ಲೇಂ ನ್ಹಂಯ್‌, ಹಾಂಗೆಲ್ಯಾ ಬಾಪೈ ಶ್ರೀ ಪಿ. ಆರ್. ನಾಯಕ ಕುಮಟಾ ಹಾಂಗೆಲ್‌ ನಾವಾನ 10 ಲಾಖ ರುಪೈ ದೇಣಿಗಿ ದೀವ್ನು ತಾಜ್ಜೆ ವಾಡೀನ ಪ್ರತಿವರ್ಷ ಸಮಾಜಾಚೆ ಗರೀಬ ಲೊಕಾಂಕ ಶೀಕ-ಸಂಕಟ ಜಾಲ್ಯಾರಿ, ಎಸ್.ಡಿ.ಎಂ. ಆಸ್ಪತ್ರೇಂತು ತಾನ್ನಿ ಎಡ್ಮಿಟ್‌ ಜಾಲ್ಯಾರಿ, ಥಂಚೆ ಖರ್ಚ್ಯಾಚೆ ಅರ್ಧ ಬಿಲ್‌ ದೀವ್ನು ಮದ್ದತ್‌ ಕರ್ತಾ ಆಸಾತಿ. ಇತ್ಲೆಂ ನ್ಹಂಯ್‌ ಪ್ರತಿವರ್ಷ ಸಮಾಜಾ ವತೀನ ಗಣೇಶ ಚೌತಿ, ನವರಾತ್ರಿ ಶಾರದಾ ಪೂಜಾ, ಸಮಾಜ ದಿವಸ್‌ ಅಶ್ಶಿಂ ಅನೇಕ ಕಾರ್ಯಕ್ರಮ ಚಲೈತ ಆಯ್ಲ್ಯಾತಿ. ಗೆಲ್ಲಲ್ಯಾ ಜೂನ 6 ತಾರಿಖೇಕ ಸಮಾಜಾಚೆ ಯುವ ಲೊಕಾಂಕ ಎಂ.ಎಸ್. ಎಂ.ಇ ಕಾರ್ಯಾಗಾರ ಆಯೋಜನ ಕೋರ್ನು ಖೂಪ ಯುವಕ ಲೊಕಾಂಕ ಮದ್ದತ ಕೆಲ್ಯಾ.
ಗೆಲ್ಲಿಲ ವರ್ಷ ಸಂಸ್ಥಾನ ಗೋಕರ್ಣ ಪರ್ತಗಾಳೀ ಜೀವೋತ್ತಮ ಮಠಾಧೀಶ ಶ್ರೀಮದ್‌ ವಿದ್ಯಾಧೀಶ ಸ್ವಾಮಿ ಮಹಾರಾಜಾಂಲೆ ಆದೇಶಾ ಪ್ರಮಾಣೆ ಹುಬ್ಬಳ್ಳಿ ಸಮಾಜಾಂತು “ರಾಜೀವಲೋಚನ ಜಪ ಕೇಂದ್ರ” ಸ್ಥಾಪನ ಕೋರ್ನು ಹುಬ್ಬಳ್ಳಿ ಸಮಾಜಾಚೆ ಸರ್ವ ಜಿ.ಎಸ್.ಬಿ. ಸಮಾಜಬಾಂಧವಾಲೇ ಸಹಕಾರಾನ ಧಾ ಕೋಟಿಪೇಕ್ಷಾಂ ಜಾಸ್ತಿ ಶ್ರೀರಾಮನಾಮ ಜಪಾನುಷ್ಠಾನ ಕೋರ್ನು ದೇವಗುರು ಕೃಪೇಕ ಪಾತ್ರ ಜಾಲ್ಯಾಚಿ.ಅಶ್ಶೀಂ ಸ್ವ ಉದ್ಯೋಗ ಯಶಸ್ವಿ ರೀತೀನ ಚಲೈತ ಇತರ ಸಮಾಜ ಸೇವಾ ಕಾರ್ಯಾಂತ್‌ ಪಣ ಲಕ್ಷ ಘಾಲ್ನು ಅಪರಿಮಿತ ಲೋಕೋಪಕಾರ ಕರೀತ ಅಸ್ಸೋಚೆ ಶ್ರೀ ರಮೇಶ ಪಾಂಡುರಂಗ ನಾಯಕ ಹಾಂಕಾ ತಾಂಗೆಲೆ ಪ್ರತಿಯೇಕ ಸಾಧನೇಕ ಫಾಟ್ಟಿಬಲಾಕ ರಾಬ್ಬೂನು ಸಂಗಾತ ದಿಲ್ಲಿಲ್ಯಾ ಪತ್ನಿ ಸುಮನ ನಾಯಕ ಹಾಂಗೆಲೋ ಸಹಕಾರೂಚಿ ಕಾರಣ ಮ್ಹಣ್ಣುಹಾನ್ನಿ ಸಾಂಗ್ತಾತಿ.
ತಾಕಾಂ ದೋನಿ ಚೆಲ್ಲೀ ಚೆರ್ಡುವಾಂ. ಮ್ಹಾಲಗಡಿ ಚೆಲ್ಲಿ ಪೂಜಾ ಬಿ.ಇ. ಎಂ.ಬಿ.ಯೇಂತು ಭಾಂಗ್ರಾ ಪದಕ ಘೇವ್ನು ಉತ್ತೀರ್ಣ ಜಾವ್ನು ಪ್ರಸ್ತುತ ಸಿ.ಎ. ಪ್ರತೀಕ ಭಟ್ಟ ಹಾಂಗೆಲ ಬರ್ಶಿ ಲಗ್ನ ಜಾವ್ನು ಹುಬ್ಳೀಂತೂ ವಾಸ್ತವ್ಯ ಕೋರ್ನು ಆಸ್ಸಾ. ಧಾಕ್ಲಿ ಧೂವ ಪ್ರಾರ್ಥನಾ ವಿದೇಶಾಂತು ಇಂಜಿನಿಯರಿಂಗ್‌ ವಿಷಯಾಂತು ಎಂ.ಎಸ್. ಶಿಕ್ಷಣ ಘೇಯ್ತ ಆಸ್ಸಾ. ಅಶ್ಶೀಂ ಹುಬ್ಬಳ್ಳಿ ಗಾವಾಂತೂ ಏಕ ಗೌರವಾನ್ವಿತ ವ್ಯಕ್ತಿ ಜಾವ್ನು ಆಶಿಲ್ಲೇ ಶ್ರೀ ರಮೇಶ ಪಾಂಡುರಂಗ ನಾಯಕ ಹಾನ್ನಿ ಆಯ್ಚ್ಯಾ ಯುವ ಪೀಳಿಗೇಕ ಏಕ ಆದರ್ಶ ವ್ಯಕ್ತಿ ಜಾವ್ನು ಅನುಕರಣೀಯ ಜಾವ್ನು ಆಸಾಚಿ. ತಾಂಕಾಂ ದೇವ ಬರೇಂ ಕೊರೋಂ.
ಲೇಖಕ : ವಾಸುದೇವ ಶಾನಭಾಗ ಶಿರಸಿ