ಕರಾವಳಿಚೆ ಸಾಂಪ್ರದಾಯಿಕ ಕಲೆಚೆ ಉರೊಪಚೆ ಆಣಿ ವಾಡೊಪಚೆ ಖಾತಿರಿ ನಿವಾಸಿಂಗೆಲೊ ಪ್ರಯತ್ನ
ಭಾರತ ದೇಶ ವಿವಿಧತೆಂತು ಏಕತಾ ಆಸ್ಸುಚೆ ದೇಶ ಜಾಲಯಾರಿ ತ್ಯಾ ಸಕ್ಕಡ ವಿವಿಧತಾ ಮಾತ್ರ ನ್ಹಂಹಿ ವಿದೇಶಿ ಸಂಸ್ಕೃತಿ ಪರಮೋಳು ವರೇನ ದೆಕ್ಕು ಪೊಧ್ಚೆ ಶಹರ ಆಸಲೇರಿ ತ್ಯಾ ಸಿಲಿಕ್ಯಾನ್ ವ್ಯಾಲಿ, ಗಾರ್ಡನ್ ಸಿಟಿ, ಸೈನ್ಸ್ ಸಿಟಿ ಮ್ಹೊಣು ಪೂರಾ ನಾಂವ ಪಾವ್ವಿಲೆ ಆಮ್ಹೆಲೆ ಬೆಂಗಳೂರು. ತಶ್ಶಿ ಆಸತನಾ ಕರಾವಳಿಚೆ ಗಂಡು ಕಲೆ ಮ್ಹೊಣು ನಾಂವ ಪಾವ್ವಿಲೆ ಯಕ್ಷಗಾನ ಬೆಂಗಳೂರಾಕ ಯಾನಾತ್ಲ್ಯಾರಿ ಕಶ್ಶಿ ನ್ಹಂಹಿವೇ? ಅಮ್ಗೆಲೆ ಕರ್ನಾಟಕಚೆ ಕರಾವಳಿ ಭಾಗಾಚೆ ಅಭಿಮಾನಾಚೆ ಸಾಂಪ್ರದಾಯಿಕ ಕಲಾ ಬೆಂಗಳೂರಾಂತು ಘೆಲೀಲೆ ಮಸ್ತ ವರಸಾಚಾನ ಮಸ್ತ ಸಂಘ-ಸಂಸ್ಥ್ಯಾ ತರಪೇನಿ ಬೆಂಗಳೂರಾಂತು ಪ್ರಸಾರ ಜಾತ್ತಾ ಆಸ್ಸ. ತಾಂತು ಆಮ್ಮೀ ಕಾಂಯಿ ಮಾಕಶಿ ನಾಂತಿ ಮ್ಹೊಣು ದಾಖೋನು ದಿವಚಾಕ ಅನಂತನಗರಾಚೆ ಜಿ.ಎಸ್.ಬಿ. ಲೋಕ, ಇತರ ಲೋಕಾಂಕ ಘೇವ್ನು ಯಕ್ಷಗಾನ ಪ್ರಚಾರಾ ಖಾತ್ತಿರಿ ಪಾವ್ಟಿ ಕಾಡ್ತಾ ಆಸ್ಸಾತಿ. ಯಕ್ಷಗಾನ ಕಲೆಚೆ ನೃತ್ಯ, ಸಂಗೀತ, ಅಭಿನಯ, ವೇಷಭೂಷಣ ಆಣಿ ಪೌರಾಣಿಕ ಕಥೆಂ ಮೇಳೊನು ನಿರಂತರ ಅಭ್ಯಾಸು ಕೊರನು ಪ್ರತಿ ವರ್ಷ ಏಕ್ಪೂಣಿ ಪ್ರದರ್ಶನ ದಿತ್ತಾ ಆಯಲೀಂತಿ. ಹೇ ಅಮೂಲ್ಯ ಕಲಾಪರಂಪರಾ ಉರೊವ್ನು, ವಾಡೊವ್ನು, ಮುಖಾವೈಲೆ ಪೀಳಿಗೆಕ ಪರಿಚಯ ಕರ್ಚೆ ಉದ್ದೇಶಾನ ಅನಂತನಗರಚೆ ನಿವಾಸಿಂನಿ ಹಾತ್ತಾ ತಾಕೂನು ದುಡ್ಡು ಖರ್ಚುನು ಬೆಂಗಳೂರ್‍ಚೆ ಕಿತ್ಲೆಕಿ ಕಡೇನ ಸಬಾರ ವರಸಾಚಾನ ಯಕ್ಷಗಾನ ಪ್ರದರ್ಶನ ಆಯೋಜನೆ ಕರ್ನು ಘೇವ್ನು ಯೆತ್ತಾ ಆಸ್ಸಾತಿ.
ಹೇ ತಂಡಾನ ಎದ್ದೊಳ ಭಿತ್ತರಿ ಚಂದ್ರಹಾಸ, ಕನಕಾಂಗಿ ಕಲ್ಯಾಣ, ಶ್ರೀಕೃಷ್ಣ ಪರಿಣಯ, ಸುಧನ್ವ ಮೋಕ್ಷ, ಭೀಷ್ಮ ವಿಜಯ, ಶಬರಿ, ಮಾಲೆ ಸ್ವಾಮಿ ಅಯ್ಯಪ್ಪ ಆಣಿ ದೇವಿ ಮಹಾತ್ಮೆ ಆದಿ ಕಿತ್ಲೆಕಿ ಯಕ್ಷಗಾನ ಪ್ರಸಂಗ ಪ್ರದರ್ಶನ ಕೆಲ್ಲ್ಯಾ. ಹೇ ಸಾಂಸ್ಕೃತಿಕ ಚಟುವಟಿಕೆಂತ್ ಚರಡುಂವ, ಯುವಕಾರ, ಬಾಯ್ಲಮನಶೆ ಆಣಿ ಅನಂತನಗರಾಚೆ ನಿವಾಸಿಂ ಲೋಕ ಮಸ್ತ ಆಸಕ್ತಿನ ವಾಂಟೊ ಘೆತ್ತಾ ಆಸ್ಸಾತಿ ಮ್ಹಣ್ಚೆ ವಿಶಿಷ್ಟ ಜಾವ್ನಾಸ್ಸಾ. ತಾಚೆ ಮೂಲಕ ಸಮುದಾಯಾಂತ ಯಕ್ಷಗಾನಾಚೆ ವಿಷಯಾಂತು ಆಸಕ್ತಿ ವಾಡೊವ್ಚೆ ಒಟ್ಟೂ ಸಾಂಪ್ರದಾಯಿಕ ಕಲೆಚೆ ಮಹತ್ವ ತರುಣಾಂಕ ಪರಿಚಯ ಕರೊವ್ನು ದಿತ್ತಾ ಆಸ್ಸಾತಿ.
ಬೆಂಗಳೂರ್‍ಚೆ ಅನಂತನಗರಚೆ ಶ್ರೀ ವೆಂಕಟರಮಣ ದೇವಸ್ಥಾನಾಂತ ಜಿ.ಎಸ್.ಬಿ. ವೆಲ್ಫೇರ್ ಅಸೋಸಿಯೇಷನ್ (ರಿ.), ಅನಂತನಗರ ಹಾಂಗೆಲೆ ಆಶ್ರಯಾಂತ ಆಯೋಜನೆ ಕೆಲ್ಲೆಲೆ ಶರನ್ನವರಾತ್ರಿ ಸಾಂಸ್ಕೃತಿಕ ಕಾರ್ಯಕ್ರಮಾಚೆ ಅಂಗ ಜಾವ್ನು, ಅನಂತನಗರಚೆ ನಿವಾಸಿಂ ತರಪೇನಿ ಶಶಿಪ್ರಭಾ ಪರಿಣಯ ನಾಂವಾಚೆ ಯಕ್ಷಗಾನ ಪ್ರಸಂಗ ೨೦೨೬ ಅಕ್ಟೋಬರ್ ೧೮ ಆಯ್ತವಾರು ದೀಸು ಸಾಂಜವಾಳಾ ೫:೩೦ ತಾಕೂನು ರಾತ್ರಿ ೮:೦೦ ಘಂಟ್ಯಾ ಪರ್ಯಂತ ದೇವಳಾಚೆ ರಾಜಾಂಗಣಾಂತ ಪ್ರದರ್ಶನ ಜಾವ್ನು ಅಪಾರ ಕಲಾಪ್ರೇಮಿ ಲೋಕಾ ತಾಕೂನು ಪ್ರಶಂಸೆಕ ಪಾತ್ರ ಜಾಲ್ಲೆ.
ಶ್ರೀ ಶಂಕರ್ ಬಾಲಕುದ್ರು ಹಾಂಗೆಲೆ ಮಾರ್ಗದರ್ಶನಾಂತ ಕಲಾವಿದಾಂನಿ ಯಕ್ಷಗಾನಾಕ ಗರಜ್ ಆಸ್ಸಿಲೆ ತರಬೇತಿ ಘೆವ್ನು ಅವುಂದು ಶಶಿಪ್ರಭಾ ಪರಿಣಯ ಯಕ್ಷಗಾನ ಪ್ರಸಂಗ ಪ್ರದರ್ಶನ ಕೆಲ್ಲೆ. ತಾಂಗೆಲೆ ಮಾರ್ಗದರ್ಶನ, ಪ್ರೋತ್ಸಾಹ ಆಣಿ ಸಹಕಾರಾ ಖಾತಿರಿ ತಂಡಾನ ಹರದೆ ಭೊರನು ಧನ್ಯವಾದ ಅರ್ಪಣ ಕೆಲ್ಯಾ. ತಾಂತು ಭಾಗ್ವತಿಕ: ರೇಖಾ ಕಿರಣ್ ನಾಯಕ್. ಮದ್ದಳೆ ವಾದನ ನಾರಾಯಣ ಭಟ್ ಆಣಿ ಚೆಂಡೆ ವಾದನ ಮನೋಜ್ ಆಚಾರ್ಯ ತಾನಿ ವಾಜ್ಜಿಲೆ. ಕಲಾವಿದಾಂಗೆಲೆ ವೇಷಭೂಷಣಾಚೆ ಜವಾಬ್ದಾರಿ ಯಕ್ಷ ಸಂಭ್ರಮ, ಹುಳಿಮಾವು, ಬೆಂಗಳೂರು ಹಾನ್ನಿ ಘೆತ್ತಿಲೆ.
ಪೂಡೆ ತಾಕೂನು ಈ ಕಾರ್ಯಕ್ರಮಾಕ ನಿರಂತರ ಪ್ರೋತ್ಸಾಹ ಆಣಿ ಬೆಂಬಲ ದಿಲ್ಲೆಲೆ ಜಿ.ಎಸ್.ಬಿ. ವೆಲ್ಫೇರ್ ಅಸೋಸಿಯೇಷನ್ ಆಡಳಿತ ಮಂಡಳಿಚಾಂಕ ಯಕ್ಷಗಾನ ತಂಡಾನ ವಿಶೇಷ ಧನ್ಯವಾದ ಅರ್ಪಣೆ ಕೆಲ್ಲ್ಯಾ. ಸಂಘಾಚೆ ಅಧ್ಯಕ್ಷ ಜಾವ್ನಾಸ್ಸಿಲೆ ಶ್ರೀ ವೆಂಕಟೇಶ್ ಎಚ್. ಪ್ರಭು, ಕಾರ್ಯದರ್ಶಿ ಜಾವ್ನಾಸ್ಸಿಲೆ ಶ್ರೀ ಅರ್ಲಾ ಪ್ರಕಾಶ್ ಪ್ರಭು, ಖಜಾಂಚಿ ಜಾವ್ನಾಸ್ಸಿಲೆ ಶ್ರೀ ಎಂ. ನರಸಿಂಹ ಶೆಣೈ ಆಣಿ ಸಮಿತಿಚೆ ಸಕ್ಕಡ ಸಾಂದ್ಯಾಂಗೆಲೆ ಸಹಕಾರಾಕ ಮನಭೊರನು ಸ್ಮರಣ ಕೆಲ್ಲೊ.
೨೦೨೬ಂಚೆ ಸಂವ್ಸಾರಪಾಡ್ವೆಚಾನ ಶ್ರೀ ಕಾಶೀ ಮಠಾಧೀಶ ಪರಮಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ವಸಂತ ಮಾಸಾಚೆ ವೇಳ್ಯಾರಿ ನಿರ್ಮಾಣ ಜಾಲ್ಲೆಲೆ ವಿಶಾಲ ರಾಜಾಂಗಣಾಂತ ಯಕ್ಷಗಾನ ಪ್ರದರ್ಶನ ಕೊರಚಾಕ ಅವಕಾಶು ಮೆಳ್ಳೆಲೆ ಕಲಾವಿದಾಂಕ ಮಸ್ತ ಸಂತೋಶಾಚೆ ವಿಷಯ ಜಾವ್ನಾಸ್ಸಾ.
ಯಕ್ಷಗಾನ ಕಲಾವಿದೊ: ಗಿರೀಶ್ ಪೈ, ಧನುಷ್, ರಜತ್ ಶೆಟ್ಟಿ, ರಾಘವೇಂದ್ರ ಪ್ರಭು, ಸೃಷ್ಟಿ ಹುಲೇಕಲ್, ಪ್ರಾರ್ಥನಾ ಶೆಣೈ, ಭರತ್ ಪೈ, ಯೋಗೀಶ್ ಶೆಣೈ, ಕಿರಣ್ ನಾಯಕ್, ಆದ್ಯಾ ಮಲ್ಯ, ಕವನಾ ನಾಯಕ್, ಸಿಂಧು ಶೆಣೈ, ಗಣೇಶ ಹೆಗಡೆ ಆಣಿ ಪ್ರತೀಕ್ಷಾ ಪೈ.
ಕಾರ್ಯಕ್ರಮ ಆಯೋಜಕ: ಯೋಗೀಶ್ ಶೆಣೈ, ಕಿರಣ್ ನಾಯಕ್ ಆಣಿ ಭರತ್ ಪೈ.
ಮುಖಾವಯ್ಲೆ ದಿವಸಾಂತೂ ಮಸ್ತ ಯಕ್ಷಗಾನ ಪ್ರಸಂಗ ಪ್ರದರ್ಶನ ಕೊರ್ಚೆ, ಭುರ್ಗ್ಯಾಂಕ್ ಆಣಿ ಚ್ಹಡ ಚ್ಹಡ ನಿವಾಸಿಂಕ್ ಈ ಕಲೆಂತು ವಾಂಟೊ ಘೆವ್ಚಾಕ ಪ್ರೋತ್ಸಾಹ ಕೊರ್ಚೆ ಆನಿ ಅಮ್ಚೆ ಕರಾವಳಿಚೆ ಈ ಅಮೂಲ್ಯ ಕಲಾಪರಂಪರಾ ಭವಿಷ್ಯಾಚೆ ಪೀಳ್ಗಿಚಾಂಕ ಉರೊವ್ನು, ವಾಡೊವ್ಚೆ ತಂಡಾಚೆ ಆಶಾ ಜಾವ್ನಾಸ್ಸಾ.
ಹೇ ಪ್ರದರ್ಶನಾಕ ಅವಕಾಶ ದಿಲೀಲೆ, ಮುಖಾರೀಚಿ ದಿವ್ಚೆ ಜಿ.ಎಸ್.ಬಿ. ವೆಲ್ಫೇರ್ ಅಸೋಸಿಯೇಷನ್‌ಚೆ ಆಡಳಿತ ಮಂಡಳಿ ಆನಿ ಸರ್ವ ಸದಸ್ಯಾಂಕ ತಶೀಚಿ ಸಹಕಾರು ದಿಲ್ಲೆಲೆ ಸಕ್ಕಡ ಲೋಕಾಂಕ ಬೆಂಗಳೂರ್‍ಚೆ ಅನಂತನಗರ ನಿವಾಸಿಂಗೆಲೆ ಯಕ್ಷಗಾನ ತಂಡಾನ ಮನಪೂರ್ವಕ ಧನ್ಯವಾದ ಅರ್ಪಣ ಕೆಲ್ಲ್ಯಾ. ಕೋಣ್ತರಿ ಹಾಂಗೆಲೆ ತಾಕೂನು ಯಕ್ಷಗಾನ ಖೇಳೋನು ಹಾಂಕಾ ಪ್ರೋತ್ಸಾಹ ದಿವ್ಕಾ ಮ್ಹೊಣು ಇಚ್ಛಾ ಆಶ್ಶಿಲ್ಯಾನಿ ಬೆಂಗಳೂರ್‍ಚೆ ಬಡಾಬಾಳು ಯೋಗೀಶ ಶೆಣೈ ಹಾಂಕಾ (ಮೊ : ೯೯೦೦೫ ೯೦೫೯೫) ಸಂಪರ್ಕ ಕೊರಯೇತ.