ಲೇಖಕ: ವಿ. ರಾಜೇಶ್ ಮೋಹನ್ ರಾವ್, ಧರ್ಮಡಂ, ತಲಶ್ಶೇರಿ, ಕೇರಳ
ಮೊಬೈಲ್: ೯೮೯೫೪೯೬೪೩೫
ಭಾಶೆ ಮ್ಹಣಜೆ ಕೇವಲ ಸಂವಹನಾಚೊ ಏಕ್ ಮಾಧ್ಯಮ ನ್ಹಯ್. ಶಬ್ದಾಂತ ಜಪೂನ್ ದವರಿಲಿ ಏಕ್ ಸಂಸ್ಕೃತಿಯೆವಜಾರ, ಸ್ಥಳಾಂತರ, ಶ್ರದ್ಧಾ, ಸಾಹಿತ್ಯ ಆನಿ ಸಾಮೂಹಿಕ ಅನುಭವಾಂಚೊ ಏಕ್ ಅಮೂಲ್ಯ ಠೇವೊ. ಏಕಾದೆ ಭಾಶೆಚೊ ಆವಾಜ್ ಹರಪಲ್ಯಾರ್(ನಾಶಿ ಜಾಲಯಾರಿ), ತಿಚ್ಯಾ ಸಂಗಾತ್ ಇತಿಹಾಸಾಚೊ ಏಕ್ ಭಾಗ್ಚಿ ನಾಶಿ ಜಾತ್ತಾ.
೯೭ ವ್ಹರ್ಸಾಂಚ್ಯಾ ವಯಾತ್ ನಿಧನ್ ಪಾವ್ಲೆಲೆ ಎನ್. ಪುರುಷೋತ್ತಮ ಮಲ್ಯಾ ಹಾಂಚೆಂ ಜೀವಿತ್ ಕೇರಳಾಂತ್ ಕೊಂಕಣಿ ಭಾಶೆಚೊ ಆನಿ ಸಾಂಸ್ಕೃತಿಕ ಯೆವಜಾರಾಚೊ ಸಂರಕ್ಷಣ್ ಕರಪಾಚ್ಯಾ ಪ್ರಯತ್ನಾಂತಲೊ ಏಕ್ ಮಹತ್ವಾಚೊ ಅಧ್ಯಾಯ್ ಆಸಾ.
೭ ಮೇ ೧೯೨೯ ಹಾ ದಿಸಾ ಮಟ್ಟುಂಚೇರಿತ್ ಜನ್ಮ್ ಘೆತ್ಲೆಲೆ ಮಲ್ಯಾ ಹಾಂಚೆ ವಡೀಲ್ ನಾರಾಯಣ ಮಲ್ಯಾ ಆನಿ ಆಯಿ ಎನ್. ಎಂ. ಸರಸ್ವತಿ ಬಾಯಿ. ಆಯಿಶಿಕ್ಷಕಿಆಸ್ಲಿ. ಮಟ್ಟುಂಚೇರಿತ್ಲ್ಯಾ ಟಿ. ಡಿ. ಸ್ಕೂಲಾಂತ್ ಶಿಕ್ಶಣ್ ಜಾಲ್ಯಾ ಉಪರಾಂತ್ ತಾಂಣಿ ಎರ್ನಾಕುಳಂ ಗವರ್ನ್ಮೆಂಟ್ ಕಮರ್ಷಿಯಲ್ ಇನ್ಸ್ಟಿಟ್ಯೂಟ್ ಹಾಂತ್ಲ್ಯಾನ್ ಶಿಕ್ಶಣ್ ಘೆತ್ಲೆಂ. ಪುಢೆ ತಾಂಚೆ ಜೀವಿತ್ ಶಿಕ್ಷಕ್, ವಿದ್ವಾನ್, ಲೇಖಕ್, ಅನುವಾದಕ್ ಆನಿ ಸಾಂಸ್ಕೃತಿಕ ಸಂಘಟಕ್ ಮ್ಹಣೂನ್ ವಿಕಸಿತ್ ಜಾಲೆಂ. ತಾಂಚೆಂ ಜೀವಿತ್ ಕೊಚ್ಚಿಯಾಂತ್ಲ್ಯಾ ಕೊಂಕಣಿ ಭಾಶೆಚ್ಯಾ ಇತಿಹಾಸಾವಯ್ಲ್ಯಾನ್ ಅವಿಭಾಜ್ಯ್ ಜಾಲೆಂ.
ಮಲ್ಯಾ ಹಾಂಚೆ ವ್ಯಕ್ತಿತ್ವಾಚೊ ಆನಿ ಕಾರ್ಯಾಚೊ ಪೂರ್ಣ್ ಅರ್ಥ್ ಕಾಡಪಾಕ್ ಜಾಲ್ಯಾರ್, ಪಯ್ಲ್ಯಾಂ ಕೊಚ್ಚಿ ನಗರಾಚೆಂ ಸ್ವರೂಪ್ ಸಮಜೂನ್ ಘೆವ್ಚೆಂ ಪಡ್ತಾ. ಶೆಕಡ್ಯಾಂ ವ್ಹರ್ಸಾಂಚ್ಯಾ ಸ್ಥಳಾಂತರಾಂನಿ ಆನಿ ವಿಭಿನ್ನ ಸಂಸ್ಕೃತಿಂಚ್ಯಾ ದೇವಾಣ್-ಘೇವಾಣಾಂನಿ ಕೊಚ್ಚಿಚೆಂ ರೂಪ್ ಘಡಯ್ಲಾಂ. ಹ್ಯಾ ಅದ್ಭುತ ಸಾಂಸ್ಕೃತಿಕ ಮಿಶ್ರಣಾಂತ್ ಕೊಂಕಣಿಚೊ ಏಕ್ ಮಹತ್ವಾಚೊ ಧಾಗೊ ಆಸಾ. ವಿಶೇಷ್ ಕರುನ್ ಗೌಡ ಸಾರಸ್ವತ ಬ್ರಾಹ್ಮಣಾಂಚ್ಯಾ ಸಾರ್ಕ್ಯಾಂ ಸಮುದಾಯಾಂನಿ ಪಶ್ಚಿಮ್ ಕರಾವಳ್ಯೆವ್ಲ್ಯಾ ಕೆಲ್ಲ್ಯಾ ಐತಿಹಾಸಿಕ್ ಸ್ಥಳಾಂತರಾಂ ಬರೊಬರ್ ಆಪ್ಲಿ ವಿಭಿನ್ನ್ ಭಾಶಾ, ದೇವ್ಳಾಂ, ವಿದ್ವತ್ತಾ, ವ್ಯಾಪಾರ್ ಆನಿ ಸಾಮಾಜಿಕ್ ಸಂಸ್ಥಾಂಚೊ ವಾರಸೊ ಹಾಂಗೆ ಹಾಡೂನ್ ದಿಲ್ಯೊ.
ಪಣ್ ಕೊಚ್ಚಿತ್ಲ್ಯಾ ಕೊಂಕಣಿಚೊ ಇತಿಹಾಸ್ ಕೇವಲ ಏಕಾ ಸಮುದಾಯಾ ಪುರತೊ ಸೀಮಿತ್ ಕರೂಂ ಯೆನಾ. ವೆಗ್-ವೆಗ್ಳ್ಯಾ ಕೊಂಕಣಿ ಭಾಶೆವ್ಚ್ಯಾ ಸಮುದಾಯಾಂನಿ ತಿಚ್ಯಾ ಅಸ್ತಿತ್ವಾಕ್ ಆಧಾರ್ ದಿಲೊ. ಹಾ ವಿಶಾಲ್ ವಾರಸೊ ಮಲ್ಯಾ ಹಾಂಣೀ ಒಳುಖ್ಲೊ. ಕೊಂಕಣಿ ಕೇವಲ ಏಕಾ ಸಮುದಾಯಾಚಿ ಭಾಶೆ ನ್ಹಯ್, ತರ ಸಾಹಿತ್ಯಿಕ್, ಶೈಕ್ಷಣಿಕ್ ಆನಿ ಸಾಂಸ್ಕೃತಿಕ್ ಭಾಶೆ ಮ್ಹಣೂನ್ ತಿಕಾ ಭಾರತಾಚ್ಯಾ ಬಹುಭಾಶಿಕ್ ಪರಂಪರೇಂತ್ ಯೋಗ್ಯ್ ಸ್ಥಾನ ಮೆಳಪಾಕ್ ಜಾಯ್, ಹ್ಯಾ ಉದ್ದೇಶಾಂನಿ ತಾಂಣಿ ಕಾರ್ಯ್ ಕೆಲೆಂ.
೧೯೬೬ ವ್ಹರ್ಸಾಂತ್ ಮಟ್ಟುಂಚೇರಿತ್ ಕೊಂಕಣಿ ಭಾಶಾ ಪ್ರಚಾರ್ ಸಭಾ ಸ್ಥಾಪನ್ ಕರಪಾಂತ್ ತಾಂಣೀ ಮಹತ್ವಾಚೊ ವಾಟೊ ಘೆತ್ಲೊ. ಗೋವೇಭಾಯ್ರ್ ಕೊಂಕಣಿ ಭಾಶೆಚೊ ಪ್ರಚಾರ್ ಆನಿ ಪ್ರಸಾರ್ ಕರಪಾಚೆಂ ಹಾ ಸಂಸ್ಥೆ ಏಕ್ ಮಹತ್ವಾಚೆಂ ಕೇಂದ್ರ್ ಜಾಲೆಂ. ಕಿತ್ಲ್ಯಾಕ್ ದಶಕಾಂ ಮೆರೆನ್ ತಾಂಣಿ ಸಾಹಿತ್ಯಿಕ್ ಆನಿ ಸಾಂಸ್ಕೃತಿಕ್ ಸಂಸ್ಥಾಂಚ್ಯಾ ಮಾಧ್ಯಮಾಂತ್ಲ್ಯಾನ್ ಕೊಂಕಣಿ ಭಾಶೆಚೆ ಬೌದ್ಧಿಕ್ ಪಾಯ್ ಬಲಪಾಚೆಂ ಕಾಮ್ ಕೆಲೆಂ. ತಾಂಚಿ ನಿಷ್ಠಾ ಕೇವಲ ಭಾವನಾಂಚ್ಯಾ ಮಟ್ಟಾವಯ್ಲಿ ನ್ಹಯ್ ಆಸ್ಲಿ; ತಿ ಏಕ್ ಶಿಸ್ತಬದ್ಧ್ ಸಾಂಸ್ಕೃತಿಕ್ ಧ್ಯೇಯ್ ಆಸ್ಲಿ.
ಕೊಂಕಣಿ ಭಾಶೆಕ್ ಮಾನ್ಯತಾ ಮೆಳಪಾಚೊ ದೀರ್ಘ್ ಸಂಘರ್ಷ್ ೧೯೯೨ ವ್ಹರ್ಸಾಂತ್ ಏಕಾ ಮಹತ್ವಾಚ್ಯಾ ಟಪ್ಪ್ಯಾವಯ್ ಪಾವ್ಲೊ, ತೆನ್ನಾ ಕೊಂಕಣಿಕ್ ಭಾರತಾಚ್ಯಾ ಸಂವಿಧಾನಾಚ್ಯಾ ಆಠವ್ಯಾ ಅನುಸೂಚಿಂತ್ ಸ್ಥಾನ ಮೆಳ್ಳೆಂ. ಹಾ ಯೆಶ್ ಏಕಾ ಪೀಳ್ಗೆಚೊ ನ್ಹಯ್, ತರ ಪಿಡ್ಯಾನ್-ಪಿಡ್ಯಾನ್ ಲೇಖಕ್, ವಿದ್ವಾನ್ ಆನಿ ಭಾಶಾ ಕಾರ್ಯಕರ್ತಾಂಚ್ಯಾ ನಿರಂತರ ಪ್ರಯತ್ನಾಂಚೊ ಫಲಿತ್ ಆಸ್ಲೊ. ಕೊಂಕಣಿಕ್ ಆಪ್ಲಿ ಸ್ವತಂತ್ರ್ ಭಾಶಿಕ್ ಒಳುಖ್ ದೃಢ್ ಕರಪಾಕ್ ಪ್ರಯತ್ನ್ ಕೆಲ್ಲ್ಯಾ ತ್ಯಾ ಪೀಳ್ಗೆಂತ್ ಮಲ್ಯಾ ಹಾಂಚೊಯ್ ಏಕ್ ಮಹತ್ವಾಚೊ ಭಾಗ್ ಆಸ್ಲೊ.
ಮಲ್ಯಾ ಹಾಂಚಿ ಸಾಹಿತ್ಯಿಕ್ ದಿಶಾ ಕೇವಲ ಆಪ್ಲ್ಯಾ ಮಾತೃಭಾಶೆಪುರತಿ ಸೀಮಿತ್ ನ್ಹಯ್ ಆಸ್ಲಿ. ತಾಂಚ್ಯಾ ಮಹತ್ವಾಚ್ಯಾ ಕಾರ್ಯಾಂತ್ಲೊ ಏಕ್ ಮಹತ್ವಾಚೊ ಕಾರ್ಯ್ ಮ್ಹಣಜೆ ತಮಿಳ್ ಭಾಶೆಚ್ಯಾ ಮಹಾನ್ ಸಂತ್ ಕವಿ ತಿರುವಳ್ಳುವರ್ ಹಾಂಚ್ಯಾ ತಿರುಕ್ಕುರಳ್ ಹಾ ಪ್ರಸಿದ್ಧ್ ಗ್ರಂಥಾಚೊ ಕೊಂಕಣಿಂತ ಕೆಲ್ಲೊ ಅನುವಾದ್. ಏಕೂಣ್ ೧,೩೩೦ ಕುರಳಾಂಚೊ ಅನುವಾದ್ ತಾಂಣಿ ಕೆಲ್ಲೊ. ಕಿತ್ಲ್ಯಾಕ್ ವ್ಹರ್ಸಾಂಚ್ಯಾ ಪರಿಶ್ರಮಾಚೆಂ ಹಾ ಏಕ್ ಭವ್ಯ್ ಕಾರ್ಯ್ ಆಸ್ಲೆಂ. ಹಾ ಅನುವಾದ್ ೨೦೦೨ ವ್ಹರ್ಸಾಂತ್ ಪ್ರಕಟ್ ಜಾಲೊ ಆನಿ ೨೦೦೮ ವ್ಹರ್ಸಾಂತ್ ತಾಂಕಾ ಸಾಹಿತ್ಯ ಅಕಾಡೆಮಿ ಅನುವಾದ್ ಪಾರಿತೋಷಿಕ್ ಮೆಳ್ಳೆಂ.
ಹ್ಯಾ ಕಾರ್ಯಾಚೆಂ ಮಹತ್ವ್ ಕೇವಲ ಪಾರಿತೋಷಿಕಾಂ ರತೊ ನ್ಹಯ್. ಭಾರತೀಯ್ ಭಾಶಾಂನಿ ಏಕಾಮೇಕಾಂಪಾಸ್ನ್ ದೂರ್ ರಾವ್ಚೆಂ ನ್ಹಯ್, ಹೆಂ ಮಲ್ಯಾ ಹಾಂಣೀ ದಾಕೊವ್ನ್ ದಿಲೆಂ. ಏಕ್ ಭಾಶೆ ದಿಸರ್ಯಾ ಭಾಶೆ ಬರೊಬರ್ ಸಂವಾದ್ ಸಾಧತಾ ತಿತ್ಲ್ಯಾ ಪ್ರಮಾಣಾಂತ್ ತಿಚಿ ಶಕ್ತೀ ವಾಡ್ತಾ. ತಿರುಕ್ಕುರಳಾಚ್ಯಾ ಮಾಧ್ಯಮಾಂತ್ಲ್ಯಾನ್ ತಮಿಳ್ ಜ್ಞಾನಾಚೊ ಏಕ್ ನವೊ ಸಾಹಿತ್ಯಿಕ್ ಘರ್ ಕೊಂಕಣಿಕ್ ಮೆಳ್ಳೊ.
ತಾಂಚೆಂ ಸಂಶೋಧನ್ ಕೇರಳಾಚ್ಯಾ ಬೌದ್ಧಿಕ್ ಇತಿಹಾಸಾಂತ್ಲ್ಯಾನ್ ಪುಢೆ ವತ್ತಲೆಂ. Hortus Malabaricus ಹಾಂಚ್ಯಾ ಸಂಧರ್ಭಾಂತ್ ಕೊಂಕಣಿ ಲೋಕಾಂಚೆಂ ಯೋಗದಾನ್ ಕಿತ್ಯಾಕ್ ಆಸ್ಲೆಂ ಹ್ಯಾವಯ್ಲ್ಯಾ ತಾಂಣಿ ಕೆಲ್ಲೆಲ್ಯಾ ಸಂಶೋಧನಾಂನಿ, ಇತಿಹಾಸಾಂತ್ ಯೋಗ್ಯ್ ಮಾನ್ಯತಾ ನ ಮೆಳ್ಳೆಲ್ಯಾ ಆವಾಜಾಂಕ್ ಪುನಃ ಉಜ್ವಾಡಾಂತ್ ಹಾಡಪಾಚಿ ತಾಂಚಿ ತಳಮಳ್ ದಿಸೂನ್ ಯೆತಾ. ಶಿಕ್ಷಣ್, ಇತಿಹಾಸ್, ಪುರಾತತ್ವ್, ಓರಿಯಂಟಲ್ ಸ್ಟಡೀಸ್ ಆನಿ ಸಾಂಸ್ಕೃತಿಕ್ ವಾರಸೊಹ್ಯಾ ಸಗ್ಳ್ಯಾಂತ್ ತಾಂಚೊ ಆಸಕ್ತ್ ಆಸ್ಲೊ.
೧೯೫೮ ವ್ಹರ್ಸಾಂತ್ ಮಲ್ಯಾ ಹಾಂಣೀ ರಾಮಕೃಷ್ಣ ಟೆಕ್ನಿಕಲ್ ಇನ್ಸ್ಟಿಟ್ಯೂಟ್ ಸ್ಥಾಪನ್ ಕೆಲೆಂ. ಕೊಂಕಣಿ ಅಧ್ಯಯನಾಂಕ್ ಆನಿ ಕೇರಳಾಚ್ಯಾ ಬೌದ್ಧಿಕ್ ಆನಿ ಸಾಂಸ್ಕೃತಿಕ್ ಜೀವಿತಾಕ ಸಂಬಂಧಿತ್ ಆಸ್ಲೆಲ್ಯಾ ಸಬಾರ ಶೈಕ್ಷಣಿಕ್ ಆನಿ ಸಾಂಸ್ಕೃತಿಕ್ ಸಂಸ್ಥಾಂಬರೊಬರ್ ತಾಂಚೊ ದೀರ್ಘ್ ಸಂಬಂಧ್ ಆಸ್ಲೊ. ಭಾಶಾ ಆನಿ ಸಂಸ್ಕೃತಿಕಾಯ್ ದಿಲ್ಲ್ಯಾ ತಾಂಚ್ಯಾ ದೀರ್ಘ್ ಸೇವೆಚಿ ರಾಷ್ಟ್ರೀಯ್ ದಾಖಲ್ ೨೦೧೫ ವ್ಹರ್ಸಾಂತ್ ಪದ್ಮಶ್ರೀ ಪಾರಿತೋಷಿಕಾಂನಿ ಜಾಲಿ.ಪಣ್ ಏಕಾ ಜೀವಿತಾಚೆಂ ಪೂರ್ಣ್ ಮಾಪ್ ಕೇವಲ ಪಾರಿತೋಷಿಕಾಂನಿ ಕರುಂ ಯೆನಾ.
ಮಲ್ಯಾ ಹಾಂಚೆಂ ಖರೆಂ ಯೋಗದಾನ್ ಮ್ಹಣಜೆ ಪರಂಪರಾ ಆನಿ ವಿದ್ವತ್ತೆಚ್ಯಾ ಮಧ್ಯೆಂ, ಸಮುದಾಯ್ ಆನಿ ಸಮಾಜಾಚ್ಯಾ ಮಧ್ಯೆಂ, ಕೊಂಕಣಿ ಆನಿ ದಿಸರ್ಯಾ ಭಾರತೀಯ್ ಭಾಶಾಂಚ್ಯಾ ಮಧ್ಯೆಂ, ಯೆವಜಾರ ಆನಿ ಆಧುನಿಕ್ತೆಚ್ಯಾ ಮಧ್ಯೆಂ ತಾಂಣಿ ಉಬಾರ್ಲೊ ಏಕ್ ಸೇತೂ. ಆಪ್ಲ್ಯಾ ಮಾತೃಭಾಶೆವಯ್ಲೊ ಗಾಡ್ ಅಭಿಮಾನ ಧರಪಾಕ್ ದಿಸರ್ಯಾ ಸಂಸ್ಕೃತಿಂಪಾಸ್ನ್ ದೂರ್ ಜಾಪಾಚಿ ಗರ್ಜ್ ನಾಸಾ, ಹೆಂ ತಾಂಣಿ ದಾಕೊವ್ನ್ ದಿಲೆಂ. ಉಲ್ಟೆಂ, ಆಪ್ಲ್ಯಾ ಭಾಶೆವಯ್ಲೊ ಅಭಿಮಾನ ದಿಸರ್ಯಾ ಸಗ್ಳ್ಯಾ ಭಾಶಾಂವಯ್ಲ್ಯಾ ಆದರಾ, ಸಂವಾದಾ ಆನಿ ಒಪಣೇಕಾಯ್ ಜೊಡೂನ್ ರಾವೂಂ ಶಕ್ತಾ.
ಕೊಚ್ಚಿಚ್ಯಾ ಸಂಧರ್ಭಾಂತ್ ಹಾ ವಿಚಾರ್ ವಿಶೇಷ್ ಮಹತ್ವಾಚೊ ಆಸಾ. ಕೊಚ್ಚಿಚಿ ಒಳುಖ್ ಕದೀ ಏಕಾ ಭಾಶಿಕ್ ಕಿಂವಾ ಧಾರ್ಮಿಕ್ ಸಮುದಾಯಾಂನಿ ಏಕಟ್ಯಾನಿ ಘಡಯ್ಲಿ ನ್ಹಯ್. ಮಲಯಾಳಂ, ಕೊಂಕಣಿ, ತಮಿಳ್, ತುಳು, ಗುಜರಾತಿ, ಇಂಗ್ಲಿಶ್ ಆನಿ ಇತರ ಕಿತ್ಲ್ಯಾಕ್ ಪರಂಪರಾಂನಿ ಹಾ ಶಹರಾಚ್ಯಾ ಸಾಂಸ್ಕೃತಿಕ್ ಸ್ವರೂಪಾಕ್ ಆಕಾರ್ ದಿಲಾ. ಏಕಾ ಭಾಶೆಚೆಂ ಸಂರಕ್ಷಣ್ ಕರಪಾಂನಿ ದಿಸರ್ಯಾ ಭಾಶೆಚೆಂ ಮಹತ್ವ್ ಕಮಿ ಜಾಯ್ನಾ. ಜಿತ್ಲ್ಯಾ ಭಾಶಾ ಆಮ್ಚ್ಯಾ ಯೆವಜಾರಾಂತ್ ಜಿವಂತ್ ರಾವ್ತಾತ್, ತಿತ್ಲ್ಯಾ ಪ್ರಮಾಣಾಂತ್ ನಗರಾಚ್ಯಾ ಸಾಮೂಹಿಕ್ ಸ್ಮರಣೇಕ್ ಏಕ್ ನವೊ ಆಯಾಮ್ ಮೆಳ್ತಾ.
ಮಲ್ಯಾ ಹಾಂಚೆಂ ನಿಧನ್ ಮಣಜೆ ಕೇವಲ ಏಕಾ ಪ್ರಸಿದ್ಧ್ ಕೊಂಕಣಿ ವಿದ್ವಾನಾಚಿ ಉಣೀವ್ ನ್ಹಯ್. ಕೊಂಕಣಿಕ್ ಸಮುದಾಯಾಚ್ಯಾ ಯೆವಜಾರಾಂತ್ಲ್ಯಾನ್ ಸಂಘಟಿತ್ ಸಾಹಿತ್ಯಿಕ್, ಶೈಕ್ಷಣಿಕ್ ಆನಿ ರಾಷ್ಟ್ರೀಯ್ ಮಾನ್ಯತೇಚ್ಯಾ ದಿಶೆನ್ ವತ್ತಪಾಚ್ಯಾ ಏಕಾ ಮಹತ್ವಾಚ್ಯಾ ಪೀಳ್ಗೆಬರೊಬರ್ ಆಸ್ಲೆಲೊ ಏಕ್ ಜಿವಂತ್ ದುವೊ ಸರಲೊ.
ತಾಂಚೊ ದೀರ್ಘಕಾಲ್ ಜಿವಂತ್ ರಾವ್ಪಾಚೊ ಸಂದೇಶ್ ಸೋಪೊ, ಪಣ್ ಗಹನ್ ಆಸಾಏಕಾದಿ ಭಾಶೆ ಫಕ್ತ್ ಆಮ್ಕಾಂ ತಿ ಆಠವತಾ ಮ್ಹಣೂನ್ ಜಿವಂತ್ ರಾವ್ನಾ; ತಿ ಉಚ್ಚಾರ್ಲಿ ಜಾಯ್, ಬರಯ್ಲಿ ಜಾಯ್, ಶಿಕಯ್ಲಿ ಜಾಯ್, ಅನುವಾದ್ ಜಾಯ್ ಆನಿ ಫುಡ್ಲ್ಯಾ ಪೀಳ್ಗೆಕ್ ಸೋಪೊವ್ನ್ ದಿಲಿ ಜಾಯ್, ತೇನ್ನಾಚ್ ತಿಚೆಂ ಖರೆಂ ಜೀವಿತ್ ಟಿಕ್ತಾ.
ಮ್ಹಣೂನ್ ಎನ್. ಪುರುಷೋತ್ತಮ ಮಲ್ಯಾ ಹಾಂಚ್ಯಾ ಸ್ಮರಣಾರ್ಥ್ ಉಬಾರ್ಪಾಚೆಂ ಸಗ್ಳ್ಯಾಂತ್ ಅರ್ಥಪೂರ್ಣ್ ಸ್ಮಾರಕ್ ಕೇವಲ ಏಕ್ ಫಲಕ್ ಕಿಂವಾ ಸ್ಮಾರಕ್ ನ್ಹಯ್. ತಿ ಆಸ್ಪಾಕ್ ಜಾಯ್ಕೊಚ್ಚಿಚ್ಯಾ ಘರಾಂತ್, ತಿಚ್ಯಾ ದೇವ್ಳಾಂತ್ ಆನಿ ಸಂಸ್ಥಾಂತ್, ಸಾಹಿತ್ಯಾಂತ್ ಆನಿ ವಿದ್ವತ್ತೆಂತ್, ಆನಿ ಸಗ್ಳ್ಯಾಂತ್ ಮಹತ್ವಾಚೆಂ ಮ್ಹಣಜೆ ತಿಚ್ಯಾ ತರುಣ್ ಪೀಳ್ಗೆಚ್ಯಾ ಆವಾಜಾಂತ್ ಕೊಂಕಣಿ ಭಾಶೆಚೆಂ ನಿರಂತರ ಜಿವಿತ್.
ಅಶೆಂ ಜಾಲ್ಯಾರ್ಚಿ ಏಕ್ ಭಾಶೆ ಆಪ್ಲ್ಯಾ ಲೋಕಾಂಕ್ ಆಠವತಾಆನಿ ಏಕ್ ಲೋಕ ಆಪ್ಲ್ಯಾ ಭಾಶೆಚ್ಯಾ ಮಾಧ್ಯಮಾಂತ್ಲ್ಯಾನ್ ಕಾಯ್ಮ್ ಆಠವಣೇಂತ್ ರಾವ್ತಾ.