ಗೌಡಸಾರಸ್ವತ ಸಮಾಜಾಚೆ ವಿದ್ಯಾರ್ಥ್ಯಾಂಕ ವೈದಿಕ ಶಿಕ್ಷಣ ದಿವಚೋ ಅವ್ಕಾಶ ಪ್ರಾಪ್ತ ಕೋರ್ನು ದಿವಚ್ಯಾ ಉದ್ದೇಶಾನ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳೀ ಜೀವೋತ್ತಮ ಮಠಾಂತು “ಜೀವೋತ್ತಮ ವಿದ್ಯಾಪೀಠಂ” ಶಿಕ್ಷಣ ಸಂಸ್ಥಾ ಆರಂಭ ಜಾಲ್ಯಾ. ಪರಮಪೂಜ್ಯ ಶ್ರೀಮದ್ ವಿದ್ಯಾಧೀಶತೀರ್ಥ ಸ್ಮಾಮಿ ಮಹಾರಾಜಾಲೇ ದಿವ್ಯ ಹಸ್ತಾನ ಬುಧವಾರ ದಿವಸು ತಾಜ್ಜೇಂ ಉಕ್ತಾವಣ ಜಾಲ್ಲೆಂ.
೫೫೦ ವರ್ಷಾಂಚೋ ಭವ್ಯ ಇತಿಹಾಸ ಆಶಿಲ್ಲೇ ಪರ್ತಗಾಳೀ ಮಠಾಂತು ಗೆಲ್ಲಿಲೇ ಅನೇಕ ವರ್ಷಾಂಪಾಸೂನ ಸಾಂಪ್ರದಾಯಿಕ ಗುರುಕುಲ ಪದ್ಧತೀಂತು ವೇದ ಆನಿ ಶಾಸ್ತ್ರಾಂಚೆ ಅಧ್ಯಯನ ಚಲತ ಆಯ್ಲ್ಯಾ. 1953 ವರ್ಷಾಂತು ಶ್ರೀಮದ್ ದ್ವಾರಕಾನಾಥ ತೀರ್ಥ ಸ್ವಾಮ್ಯಾನೀ ಆರಂಭ ಕೆಲಿಲ್ಯಾ ಸಂಸ್ಕೃತ ಪಾಠಶಾಲಾ ನಂತರ ಶ್ರೀಮದ್ ವಿದ್ಯಾಧಿರಾಜತೀರ್ಥ ಸ್ವಾಮ್ಯಾನ್ನೀ “ಜೀವೋತ್ತಮ ವೈದಿಕ ಪಾಠಶಾಲಾ” ಮ್ಹಳಿಲ್ಯಾ ನಾವಾನ ಚಲೋವ್ನ ಹಾಡ್ಲೇ. ಜಾಲ್ಯಾರಿ ನಂತರ ಆಧುನಿಕ ಶಿಕ್ಷಣಾಚೇ ಪ್ರಭಾವಾನ ವಿದ್ಯಾರ್ಥಿ ಜನಾಂಲೀ ಸಂಖ್ಯಾ ಊಣೆ ಜಾಲ್ಲಿಲ ಮಿತ್ತೀ 2015 ಇಸ್ವೀಂತು ತೀ ಪಾಠಶಾಲಾ ಸ್ಥಗಿತ ಜಾಲ್ಲೆಲಿ.
ಆತ್ತಾಂ ವಿದ್ಯಮಾನ ಗುರುವರ್ಯ ಶ್ರೀಮದ್ ವಿದ್ಯಾಧೀಶ ಸ್ವಾಮಿವರ್ಯಾಂಲೇ ವಿಶೇಷ ಆಸಕ್ತೀ ನಿಮಿತ್ಯಾನ ತೀ ಪಾಠಶಾಲಾ ““ಜೀವೋತ್ತಮ ವಿದ್ಯಾಪೀಠಂ” ನಾವಾನ ಪುನರಾರಂಭ ಜಾವ್ನು ಸಮಾಜಾಚೆ ವಿದ್ಯಾರ್ಥ್ಯಾಂಕ ನವೀನ ಚೈತನ್ಯದಾಯೀ ಜಾಲ್ಯಾ. ಹ್ಯಾ ಸಂಸ್ಥೇಚೇ ಉದ್ಘಾಟನ ಕೋರ್ನು ಶ್ರೀ ಸ್ವಾಮ್ಯಾನ್ನೀ ತಾಂಗೆಲೆ ಆಶೀರ್ವಚನಾಂತು “ ಪಾಂಚ ವರ್ಷಾಂಚೇ ವೈದಿಕ ಪಠ್ಯಕ್ರಮಾಂತುಂ ಸಂಸ್ಕೃತ, ವೇದ, ಕರ್ಮಾಂಗ, ಆನಿ ಜ್ಯೋತಿಷ್ಯ ಹ್ಯಾವಿಷಯಾಂಚೆ ಅಧ್ಯಯನ ಆಸ್ತಾ. ಧಾ ವರ್ಷಾಂಚೇ ಪಠ್ಯಕ್ರಮಾಂತು ಸಂಸ್ಕೃತ, ವೇದ, ಕರ್ಮಾಂಗ, ಜ್ಯೋತಿಷ್ಯ ವಿಷಯಾಂ ಒಟ್ಟೂ ನ್ಯಾಯ, ವ್ಯಾಕರಣ ಆನಿ ವೇದಾಂತ ಹ್ಯಾ ಸಗ್ಳೆ ವಿಷಯಾಂಚೇ ಅಧ್ಯಯನಾಕ ಅವಕಾಶ ಮೆಳ್ತಲೇ ಮ್ಹಣ್ಣು ತಾನ್ನೀ ಸಾಂಗ್ಲೆಂ.
ಹ್ಯಾ ವಿದ್ಯಾಪೀಠಾಂತು ಸಂಸ್ಸೃತ ಶಿಕೋವ್ಚಾಕ ವೇ.ಮೂ.ಗಣೇಶ ಭಟ್ಟ ಗೋಕರ್ಣ, ಆನಿ ರಘೋತ್ತಮ ಆಚಾರ್ಯ ಬೆಂಗಳೂರ, ವೇದಶಿಕ್ಷಣ ವಿಭಾಗಾಕ ಅಥರ್ವ ಭಾಂಡೇಕರ ಆನಿ ಮಖ್ಯೋಪಾಧ್ಯಾಯ ಜಾವ್ನು ವೇ.ಮೂ. ಲಕ್ಷ್ಮೀಕಾಂತ ಭಟ್ಟ ಹಾಂಕಾಂ ನೇಮಣೂಕ ಕೆಲ್ಯಾ ಮ್ಹಣ್ ಸ್ವಾಮಿ ಮ್ಹಳಾಲೆ. ಹ್ಯಾ ಉಕ್ತಾವಣೇ ಕಾರ್ಯಾಂತು ಪದ್ಮಶ್ರೀ ಪುರಸ್ಕೃತ ಮೋಹನದಾಸ ಪೈ, ಆರ್.ಎಸ್.ಶಾನಭಾಗ, ಶ್ರೀನಿವಾಸ ಧೇಂಪೆ, ರಾಮಚಂದ್ರ ಆರ್. ಕಾಮತ, ಅನಿಲ ಪೈ, ದಿನೇಶ ಪೈ, ಯೋಗೀಶ ಕಾಮತ ಆನಿ ಇತರ ಗಣ್ಯ ನಾಗರಿಕ ಆನಿ ಸಮಾಜ ಬಾಂಧವ ಉಪಸ್ಥಿತ ಆಶಿಲ್ಲೇ.
ವರದಿ : ವಾಸುದೇವ ಶಾನಭಾಗ ಶಿರಸಿ.