ಅಧಿಕಸ್ಯ ಅಧಿಕ ಫಲಂ ಪ್ರಿಯರೇ, ನಮ್ಮ ಬೈಂದೂರು ತಾ|| ಉಪ್ಪುಂದಾಚೆ ಆಲ್ತಾ-ಪೆಲ್ತಾಚೆ ಸುಮಾರನ ಗಾಂವ ಮೆಳೋನು ಘೇವನು ಉಪ್ಪುಂದ ಅಂಬಾಗಲ ಪೆಂಟಾಚೆ ಮಧೇಂತು ಸುಮಾರ ಸ (೬) ಪೀಳ್ಗಿಚಾನ “ಶ್ರೀ ಅಶ್ವತ್ಥ ರುಕ್ಕಾಂತು” ಗಣಪತಿ ಆಕಾರಾಂತು ಉದ್ಭವ ಜಾವನು ‘ಶ್ರೀ ಮೂಡುಗಣಪತಿ’ ಮ್ಹೊಣು ನಾಮಾಧಿಕ ಜಾವ್ನು ಸಕ್ಕಡೆ ಜನಜನಿತ ಜಾಲ್ಲ್ಯಾ. ಸುಮಾರ ೧೮ ವರ್ಷಾ ಮಾಕಶಿ ಜೀರ್ಣೋದ್ಧಾರ ಜಾವನು ಪುನರ್ ಪ್ರತಿಷ್ಠಾಪನ ಜಾಲೀಲೆ ದೇವಳ ಹೇ. ಹಾಂಗಾಚೆ ಸಾನ ಮೂರ್ತಿ, `ಮೂರ್ತಿ ಸಾನ ಜಾಲಯಾರೀಚಿ ಕೀರ್ತಿ ವ್ಹಡ ಮ್ಹಣ್ಚೆ ಆದ್ಗತಿ ಪ್ರಮಾಣೆ ಶ್ರೀ ದೇವಾಲೆ ಸನ್ನಿಧಿಂತು ಮಾಗ್ಗಿಲೆ ಮಾಗಣಿ ಅನುಗ್ರಹ ಕೊರಚೆ ನಮೂನೋ ಪವಾಡ ಸದೃಶ ಜಾವ್ನಾಸ್ಸಾ. ವಿಶೇಷ ಜಾವ್ನು ವ್ಯವಹಾರ ಉದ್ಯೋಗಾಕ ಸಂಬಂಧ ಪಾವ್ವಿಲೆ ವಿಘ್ನ, ವಿವಾಹ, ಸಂತತಿಕ ಆಡಬಳ, ಚರುಡುಂವಾಲೆ ಶಿಕ್ವಣ, ಆರೋಗ್ಯಾಂತು ಉದರ್ಗತಿ ಖಾತ್ತಿರಿ ಹಾಂಗಾ ಮಾಗ್ಗುನು, ಅನುಗ್ರಹಿತ ಜಾಲೀಲೆ ಹಜಾರ ಬಽರಿ ಭಕ್ತಾಂಗೆಲೆ ಉತ್ರಾಂತು ಶ್ರೀ ಮೂಡುಗಣಪತಿ ದೇವಾಲೊ ಮಹಿಮಾ ಆಯ್ಕತಾನಾ ಸಂತೋಷು ಆನಿ ರೋಮಾಂಚನ ಜಾತ್ತಾ. ಹಾಂಗಾ ಅಶ್ವತ್ಥ ರುಕ್ಕಾಚೆ ಮುಳಾಂತು ಬಲಮುರಿ ಗಣಪತಿಲೊ ಸನ್ನಿಧಾನ ಆಸ್ಸುಚೆ, ಬ್ರಹ್ಮ, ವಿಷ್ಣು, ಮಹೇಶ್ವರ ತ್ರಿಮೂರ್ತಿ ಸಾನಿಧ್ಯ ವ್ಹಯಿ. ಗರ್ಭಗುಡಿಂತು ಅಶ್ವತ್ಥ ರೂಕ ಆಸ್ಸುನು ಸುತ್ಲೂ ದೇವಳಾನಿ ಆವೃತ ಜಾವ್ನಾಸ್ಸಾ.
ಹಾಂಗಾಚೆ ವಿಶೇಷ, ಪ್ರತಿ ಸಂಕಷ್ಟಿಂತೂ ಹಜಾರ ಬಽರಿ ಭಕ್ತ ಲೋಕಾನಿ ಯವ್ನು ಸೇವಾ ಪಾವಯಚೆ ಹೇ ಗಣಪತಿಲೆ ಸನ್ನಿಧಾನಾಂತು ತ್ಯಾ ಸಂಕಷ್ಟಿ ದಿವಸು ರಾತ್ತಿಕ ಚೊಲ್ಚೆ ವಿಶೇಷ ಪೂಜಾ, ಪಾಣ್ಣೆ ಉತ್ಸವು ಸೇವಾ ವಿಶೇಷ ಜಾವ್ನಾಸ್ಸುನು, ತ್ಯಾ ಖಾತ್ತಿರಿ ಮ್ಹಹಿನೋಗಟ್ಲೆ ಪಯಲೇಚಿ ನೋಂದ ಕೊರಕಾ ಪಡ್ತಾ ಮ್ಹಣ್ಚೆ ವಿಶೇಷ. ಕಲೌದುರ್ಗಾ ವಿನಾಯಕೌ ಮ್ಹಣ್ಚೆ ವರಿ ಕಲಿಯುಗಾಂತು ಮಸ್ತ ಶೀಘ್ರ ಫಲಪ್ರದಾಯಕ ಜಾವ್ನಾಸ್ಸುಚೆ ಶ್ರೀ ಮಹಾಗಣಪತಿ ದೇವು ಪರಮಾದ್ಭುತ ಪ್ರಶಸ್ತ ಜಾಲೀಲೆ ಅಧಿಕ (ಪುರುಷೋತ್ತಮ) ಮ್ಹಹಿನ್ಯಾಂತು ಅಧಿಕ ಫಲ ದಿವಚೆ ಮಹಾಗಣಪತಿ ಹವನ ತಶೀಚಿ ಸಕಲ ಪಾಪ ನಾಶಿ ಕೊರಚೆ ಅಪೂಪ ನೈವೇದ್ಯ ವಿಶೇಷ ಜಾವ್ನು ಉದಯಾಸ್ತಮಾನ ಸೇವೆ ಬರಶಿ ಅಧಿಕ ಮಾಸಾವದಿ ಪೂರ್ತಿ ಕೊರಕಾ ಮ್ಹೊಣು ತೀರ್ಮಾನು ಘೆತ್ತಿಲೆ ಆಸ್ಸಾ. ಹೇ ಲೋಕಕಲ್ಯಾಣಕರ ಜಾಲೀಲೆ ಕಾರ್ಯಾಂತು ಸರ್ವ ಸದ್ಭಕ್ತಾನಿ ವಾಂಟೊ ಘೇವ್ನು ಆಪಣಾಂಗೆಲೆ ಇಷ್ಟಾರ್ಥ ಪೂರ್ಣ ಕೊರಚೆ ಶ್ರೀ ದೇವಾಲೋ ಸಿರಿ ಮುಡಿ ಗಂಧ ಪ್ರಸಾದವನ್ನು ಸ್ವಿಕಾರ ಕೊರನು ಕೃತಾರ್ಥ ಜಾವ್ಚೆ ಬರಶಿ ದೇವಳಾಚೆ ಅಭಿವೃದ್ಧಿಕ ಸಹಕಾರ ದಿವ್ಕಾ ಮ್ಹೊಣು ವಿನಂತಿ ಆಸ್ಸಾ.
ದಿನಾಂಕ : ೧೭-೦೫-೨೦೨೬ ಆಯ್ತವಾರಾಚಾನ ೧೫-೦೬-೨೦೨೬ ಸೋಮವಾರ ಅಮಾಸೆ ಪರ್ಯಂತ ಶ್ರೀ ದೇವಾಲೆ ವಿಶೇಷ ಸಾನಿಧ್ಯ ಅಭಿವೃದ್ಧಿ ತಶೀಚಿ ಲೋಕ ಕಲ್ಯಾಣಾರ್ಥ ಜಾವ್ನು ಮಾಸಾವಾಧಿ ಅಪೂಪ ನೈವೇದ್ಯ ಸೇವಾ ಆನಿ ದಿನಾಂಕ : ೨೦-೦೫-೨೦೨೬ ಬುಧ್ವಾರು ಅಧಿಕ ಜೇಷ್ಠ ಚತುರ್ಥಿ ದಿವಸು ಅಷ್ಟೋತ್ತರ ಶತ ಅಷ್ಟದ್ರವ್ಯ ಗಣಯಾಗ ತಶೀಚಿ ವಿಶೇಷಾಲಂಕಾರ ಮಹಾರಂಗ ಪೂಜಾ ಆನಿ ಮಹಾಅನ್ನಸಂತರ್ಪಣ” ಚಲ್ತಾ. ಚಡ್ತೆ ಮಾಹಿತಿಕ ಶ್ರೀ ಯು. ಗಣೇಶ ಭಟ್ ಅರ್ಚಕ – ೯೬೬೩೫ ೦೪೦೩೭ ಹಾಂಕಾ ಸಂಪರ್ಕ ಕೊರಯೇತ.