ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ತರಪೇನಿ, ಅಕಾಡೆಮಿಚೆ ಸಭಾಂಗಣಾಂತು ಮೇ ೦೯, ೨೦೨೬ ದಿವಸು ‘ಕಾವ್ಯಾಂ ವ್ಹಾಳೊ-೧೪’ ಕವಿಗೋಷ್ಟಿ ಚಲ್ಲಿ. ಅಕಾಡೆಮಿ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಘೆತ್ತಿಲೆ. ತಾನ್ನಿ ಸಕಡಾಂಕ ಯೇವ್ಕಾರ ಕೊರನು ಪ್ರಾಸ್ತಾವಿಕ ಜಾವ್ನು ಉಲೋನು ಹರ್ಯೇಕ ಕೊಂಕಣಿಗಾನಿ ಕೊಂಕಣಿ ಅಕಾಡೆಮಿ ಬರಶಿ ನಿಕಟ ಸಂಪರ್ಕ ದವರೂನು ಘೆವ್ಕಾ ಮ್ಹಣ್ಚೆ ಆಪೋವ್ಣಿ ದಿಲ್ಲಿ.
ಮುಖೇಲ ಸೊಯರೆ ಜಾವ್ನು ಆಯಲೀಲೆ ‘ಪರಿಚಯ’ ಪಾಂಬೂರು ಹಾಜ್ಜೆ ಕಾರ್ಯದರ್ಶಿ ಶ್ರೀ ಪ್ರಕಾಶ್ ನೊರೊನ್ಹಾ ತಾನ್ನಿ ಉಲೋನು “ಖಂಚೇಯಿ ಭಾಸ ವಾಂಚಕಾ ಜಾಲಯಾರಿ ಕಸಲೇಯಿ ಬಂಧನಾ ದವರೂನು ಘೇನಾಶಿ, ವೇಳವೇಳ್ಯಾಕ ಬದಲಾವಣ ಮೇಳೊನು ಘೆತ್ತಾ ಮುಖಾರಿ ಸರಕಾ. ವೆಗವೆಗಳೆ ಭಾಷೆಚೆ ಶಬ್ದ ವಾಪರೂನು, ಆಮ್ಗೆಲೆ ಭಾಸ ಶುದ್ಧ ಜಾವನು ಉಲಯಚಾಕ ಪ್ರಯತ್ನ ಕೆಲಯಾರಿ ಭಾಸ ಉದರ್ಗತಿ ಪಾವ್ತಾ ಮ್ಹಳ್ಳೆ.
ಕೊಂಕಣಿ ಭಾಷೆಚೆ ಕುಡುಬಿ ಸಮುದಾಯಾಚೆ ಮ್ಹಾಲ್ಗಡೆ ಕಲಾವಿದ ಜಾಲೀಲೆ ಶ್ರೀ ಕೆ. ಸುಂದರ ಗೌಡ ಹಾಂಕಾ ಹೇ ವೇಳ್ಯಾರಿ ಸನ್ಮಾನ ಕೆಲ್ಲಿ. ನಾಮಾಧಿಕ ಕವಿ ಜಾಲೀಲೆ ಶ್ರೀ ಡಾ. ವೆಂಕಟೇಶ್ ನಾಯಕ್ ತಾನ್ನಿ ಕವಿಗೋಷ್ಟಿ ಚಲೋನು ದಿಲ್ಲೆ. ಅವಿಲ್ ರಸ್ಕಿನ್ಹಾ, ಕುಸುಮ ಕಾಮತ್, ಸಂಜನಾ ಮಥಾಯಸ್, ಜೆರಿ ಬೊಂದೆಲ್, ಸುಮಾ ವಸಂತ್, ಪ್ರವೀಣ್ ತಾವ್ರೊ, ವಿಸ್ಮಯಾ ಲೋಬೊ, ಡಾ. ಸುಮತಿ ಕಾರ್ಕಳ ಹಾನ್ನಿ ತಾಂಗತಾಂಗೆಲೆ ಕವಿತಾ ವಾಚನ ಕೆಲ್ಲಿ. ಅಕಾಡೆಮಿ ಸದಸ್ಯ ಜಾಲೀಲೆ ಶ್ರೀ ರೊನಾಲ್ಡ್ ಕ್ರಾಸ್ತಾ ತಾನ್ನಿ ಕಾರ್ಯಕ್ರಮ ನಿರೂಪಣ ಕೊರನು ಆಬಾರ ಮಾನಲೆ. ಆಕಾಡೆಮಿ ಸಾಂದೊ ಶ್ರೀ ನವೀನ್ ಲೋಬೊ ಉಪಸ್ಥಿತ ವ್ಹರಲೀಲೆ.