ಮಂಗ್ಳುರ್ಚ್ಯಾ ಸಾಂ ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯನ್ ಯುಜಿಸಿ ಶ್ರೇಣಿಬದ್ಧ್ ಸ್ವಾಯತ್ತತಾ ನೆಮಾಂಖಾಲ್ ಪ್ರತಿಷ್ಟಿತ್ ‘ಕೆಟಗರಿ-I’ ಸ್ಥಾನಮಾನ್ ಆಪ್ಣಾವ್ನ್ ಏಕ್ ಐತಿಹಾಸಿಕ್ ಧಾಖ್ಲೊ ರಚ್ಲಾ. ಹಿ ಮಾನ್ಯತಾ ವಿಶ್ವವಿದ್ಯಾಲಯಾಚ್ಯಾ 146 ವರ್ಸಾಂಚಿ ಶಿಕ್ಪಾ ಶ್ರೇಷ್ಠತಾ, ನವೆಂಸಾಂವ್, ಸಂಶೋಧನ್ ಆನಿ ರಾಷ್ಟ್ರ್ ನಿರ್ಮಾಣಾಚ್ಯಾ ಅದ್ಭುತ್ ಪಯ್ಣಾಂತ್ ಏಕ್ ಮುಖೆಲ್ ಮಯ್ಲಾ ಫಾತರ್ ಜಾವ್ನಾಸಾ.
ಭಾರತಾಂತ್ ಪ್ರಸ್ತುತ್ 1,292 ವಿಶ್ವವಿದ್ಯಾಲಯಾಂ ಆಸೊನ್, ತಾಂತ್ಲ್ಯಾ 157 ಪರಿಗಣಿತ್ ವಿಶ್ವವಿದ್ಯಾಲಯಾಂ ಪಯ್ಕಿ ಫಕತ್ 26 ವಿಶ್ವವಿದ್ಯಾಲಯಾಂ ಮಾತ್ರ್ ಕೆಟಗರಿ-I ಸ್ಥಾನಮಾನ್ ಆಪ್ಣಾಂವ್ಕ್ ಸಕ್ಲ್ಯಾಂತ್. ಹ್ಯಾ ವಿಶಿಷ್ಟ್ ಶಿಕ್ಪಾ ವ್ಯವಸ್ಥೆಂತ್, ಸಾಂ ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾನ್ ಯುಜಿಸಿಚ್ಯಾ ಶ್ರೇಣಿಬದ್ಧ್ ಸ್ವಾಯತ್ತತಾ ಚೌಕಟ್ಟಾ ಖಾಲ್ ರಚ್ಲ್ಲೆಂ ಶಿಕ್ಪಾ ಗುಣಮಟ್ಟ್ ಆನಿ ಸಾಂಸ್ಥಿಕ್ ಶ್ರೇಷ್ಠತೆಚೆ ಭೋವ್ ಉಂಚ್ಲೆಂ ಮಾಪ್ ಆಪ್ಣಾಯ್ಲೆಲ್ಯಾ ಖಾತಿರ್, ಕೆಟಗರಿ-I ಸ್ಥಾನ್ ಜೊಡ್ಲೆಲ್ಯಾ ದೇಶಾಂತ್ಲ್ಯಾ ದೋನ್ ಉಂಚ್ಲ್ಯಾ ಖಾಸ್ಗಿ ಸಂಸ್ಥ್ಯಾಂ ಪಯ್ಕಿ ಏಕ್ ಜಾಂವ್ಕ್ ಪಾವ್ಲ್ಯಾ.
ಹೆಂ, ಪಠ್ಯ್ಕ್ರಮ್ ವಿನ್ಯಾಸ್, ಶಿಕೊಂವ್ಚಿ-ಶಿಕೊನ್ ಘೆಂವ್ಚಿ ಪ್ರಕ್ರಿಯಾ, ಸಂಶೋಧನ್ ಉತ್ಪಾದಕತಾ, ಆಡಳ್ತೆಂ, ಮೂಳ್ ಸಾವ್ಲತಾಯೊ, ನವೆಂಸಾಂವ್, ವಿದ್ಯಾರ್ಥಿಂಚೊ ಪಾಟಿಂಬೊ, ಸಮುದಾಯಾಂ ಸಂಗಿಂ ಮೆತೆರ್ಪಣ್ ಆನಿ ಸಾಂಸ್ಥಿಕ್ ಮೊಲಾಂ ಸವೆಂ ಉಂಚ್ಲ್ಯಾ ಶಿಕ್ಪಾಚ್ಯಾ ಹರ್ಯೆಕಾ ಆಯಾಮಾಂನಿ ಆಸ್ಚಿ ಶ್ರೇಷ್ಠತಾ ಪಡ್ಬಿಂಬಿತ್ ಕರ್ತಾ.
ಯುಜಿಸಿ ನೆಮಾಂ ಪರ್ಮಾಣೆಂ, ಕೆಟಗರಿ-I ವಿಶ್ವವಿದ್ಯಾಲಯಾಂಕ್ ಶಿಕ್ಪಾ ನಿರ್ಧಾರ್ ಘೆಂವ್ಚ್ಯಾಂತ್ ಆನಿ ಸಾಂಸ್ಥಿಕ್ ಅಭಿವೃದ್ಧೆಂತ್ ಭಾರಿಚ್ಚ್ ಸ್ವಾತಂತ್ರ್ ಲಾಬ್ತಾ. ಮ್ಹಣ್ಜೆ, ವಿಶ್ವವಿದ್ಯಾಲಯಾಂಕ್ ಯುಜಿಸಿಥಾವ್ನ್ ಪರ್ವಣ್ಗಿ ಘೆನಾಸ್ತಾನಾಂಚ್ ನವಿಂ ಶಿಕ್ಪಾ ಕಾರ್ಯ್ಕ್ರಮಾಂ, ನವೆ ವಿಭಾಗ್, ನವ್ಯೊ ಶಾಳಾ, ನವಿಂ ಕೇಂದ್ರಾಂ, ನವೆ ಡಿಪ್ಲೊಮಾ ವಾ ಸರ್ಟಿಫಿಕೇಟ್ ಕೋರ್ಸ್, ಮುಕ್ತ್ ಆನಿ ಕರೆಸ್ಪೊಂಡೆನ್ಸ್ ಶಿಕ್ಪಾ ವಿಭಾಗ್ ಆನಿ ಅಂತರ್ಶಿಸ್ತೀಯ್ ಉಪಕ್ರಮಾಂ ಸುರ್ವಾತುಂಕ್ ಆವ್ಕಾಸ್ ಮೆಳ್ತಾ.ತಿತ್ಲೆಂಚ್ ನ್ಹಂಯ್, ಹೆಂ ಸ್ಥಾನ್ಮಾನ್— ಜೋಡ್ ಸಂಸೊಧ್ ಯೆವ್ಜಣೊ, ಜೋಡ್ ಆಸ್ರ್ಯಾಖಾಲ್ ಶಿಕ್ಪಾ ಕಾರ್ಯ್ಕ್ರಮಾಂ, ಶಿಕ್ಷಕಾಂಚೆಂ ವಿನಿಮಯ್, ವಿದ್ಯಾರ್ಥಿಂಚೆಂ ವಿನಿಮಯ್, ದ್ವಿ-ಪದ್ವಿ (Dual Degree) ಕಾರ್ಯಾಕ್ರಮಾಂ ಆಸಾ ಕರುಂಕ್ ಭೋವ್ಚ್ ಉಪ್ಕಾರಾಚೆಂ ಜಾವ್ನಾಸಾ.
ಡಾ. ರೊನಾಲ್ಡ್ ನಜರೆತ್ ಕುಲಸಚಿವರು (Regstrar), ರೆ. ಡಾ. ಪ್ರವೀಣ್ ಮಾರ್ಟಿಸ್, ಎಸ್.ಜೆ. ಕುಲಪತಿಗಳು (Vice Chancellor)