ತುಮ್ಮಿ ಆರತಾಂ ವೆಗವೆಗಳೆ ದೈನಿಕ ಪತ್ರ ನಾಂವೆ ಸೋಶಿಯಲ್ ಮೀಡಿಯಾಂತು ಹೇ ಘಟನಾ ವಾಜ್ಜೂನು ಆಸತಾತಿ. ೮೨ ವರ್ಷ ವಯಾಚೆ ಬಾಯ್ಲಮನ್ಶೆ ಏಕಳ್ಯಾಕ ಆಕಸ್ಮಿಕ ಜಾವ್ನು ಅಸಹನೀಯ ಪೊಟ್ಟಾಧೂಖಿ ಆಯ್ಲೆ. ಪಯಲೇಕ ಗ್ಯಾಸ, ಅಜೀರ್ಣ ಜಾಂವೊ ಆಹಾರಾಚೆ ಚ್ಹಡ ಕಮ್ಮೀನಿ ಪೊಟ್ಟಾ ಧೂಖಿ ಯವ್ನಾಸ್ಸುಕ ಪುರೊ ಮ್ಹೊಣು ನಿರ್ಲಕ್ಷ ಕರಲೆ. ಜಾಲಯಾರಿ ಖಂಚೇಯಿ ಘರಾ ವಾಕ್ದಾನಿ, ಧೂಕ್ಕಿಚೆ ಮಾತ್ರಿ ಘೆತಲ್ಯಾರಿಚಿ ಪೊಟ್ಟಾ ಧೂಖಿ ನಿವಾರಣ ಜಾಯ್ನಾತ್ತಿಲೆ ತೆದ್ನಾ ಡಾಕ್ಟ್ರಾಲೆ ಸಲಹೆ ಪ್ರಮಾಣೆ ಲ್ಯಾಬೋರೇಟರಿ ಪರೀಕ್ಷಾ ಕೆಲೀಲ ತೆದ್ನಾ ತಾಂಕೇಕ ಆಶ್ಚರ್ಯಾಚೆ ಆನಿ ಆಘಾತಾಚೆ ಖಬ್ಬರ ಆಯ್ಕುಕಾ ಪಡ್ಲೆ. ತಿಗೆಲೆ ಪೊಟ್ಟಾ ಭಿತ್ತರಿ ೪೦ ವರ್ಷಾ ಮಾಕಸೀಚೆ ಭ್ರೂಣ ಆಸ್ಸ ಮ್ಹಣಚೇಚಿ ತ್ಯಾ ಖಬ್ಬರ. ತ್ಯಾ ಪಿಂಡ ಕ್ಯಾಲಿಫೈಡ್ ಮ್ಹಳಯಾರಿ ಫಾತರ ಜಾವನು ಬದಲ್ಲ್ಯಾ ಮ್ಹಣ್ಚೆ ಆನ್ನೇಕ ವಿಸ್ಮಯ. ವೈದ್ಯಕೀಯ ಭಾಷೆಂತು ಲಿಥೋಪೀಡಿಯನ್ ಜಾಂವೊ ಫಾತರಾ ಚರಡು ಮ್ಹೊಣು ಹಾಕ್ಕಾ ಆಪಯತಾತಿ.
ತಶ್ಶೀ ಜಾಲ್ಲ್ಯಾರಿ ಲಿಥೋಪೀಡಿಯಾ ಮ್ಹಳಯಾರಿ ಕಸ್ಸಲೆ
ಆಮಕಾ ಸಕಡಾಂಕ ಗೊತ್ತಾಶ್ಶಿಲೆ ವರಿ ಹೇ ಶರೀರ ಏಕ ವಿಸ್ಮಯಾಚೆ ಆಗರ. ಹಾಂಗಾ ಜವಚಾಕ ತೋಂಡ ಆಸ್ಸಾ, ಉಸ್ರ ಕಾಡಚಾಕ ನಾಂಕ ಆಸ್ಸಾ, ಆಯ್ಕುಚಾಕ ಕಾನ ಆಸ್ಸಾ, ಹೇ ಸಕ್ಕಡ ಪ್ರಕೃತಿಚೆ ವಿಸ್ಮಯ, ತಶೀಚಿ ಹರ್ಯೇಕ ಬಾಯ್ಲ ಸಸ್ತನಿಂತು ಸಂತಾನ ವಾಡ್ಡೊಚಾಕ ಗರ್ಭಕೋಶ ಆಸ್ಸುಚೆ ಸಕಡಾಂಕ ಗೊತ್ತಾಶ್ಶಿಲೆ ವಿಷಯು. ಹರ್ಯೇಕ ಭ್ರೂಣ ಗರ್ಭಕೋಶ ಭಿತ್ತರಿ ವಚ್ಚುನೂಂಯಿ ವಾಡ್ಡೂನು ಭಾಯ್ರಿ ಯತ್ತಾ. ತಶ್ಶಿ ಗರ್ಭಧಾರಣ ಜಾವನು ಬಾಳಾಂತಿರೆ ಜಾವಚಾಕ ಅಮುಕಿತ್ಲೆ ಕಾಲ ಮ್ಹೋಣು ಆಸ್ಸಾ. ಮನುಷ್ಯಾಂತು ತ್ಯಾ ನವ್ವಾ ಮ್ಹಹಿನೋ ಜಾವ್ನಾಸ್ಸಾ. ಜಾಲಯಾರಿ ಕೆಲವ ಪಂತಾ ಗರ್ಭಕೋಶಾಂತು ಜಾಲೀಲೆ ಗರ್ಭಧಾರಣ ನಿಸರೂನು ಸಕಯ್ಲೆಚೆ ಪೊಟಾ(ಕಿಬ್ಬೊಟ್ಟೆ)ಂತು ಯವಚಾಕ ಪುರೊ. ತಾಕ್ಕಾ ಅಪಸ್ಥಾನೀಯ ಗರ್ಭಧಾರಣ ಮ್ಹಣತಾತಿ. ಅಸ್ಸಲೆ ವೇಳ್ಯಾರಿ ಭ್ರೂಣ ವಾಂಚೆಕ ಸಾಧ್ಯ ಜಾಯ್ನಾ ಮಾತ್ರ ನ್ಹಂಹಿ ಶರೀರ ತ್ಯಾ ಭಾಯ್ರಿ ಧೂಂಗುಳ್ಚಾಕ ವರೇನ ಅಸಮರ್ಥ ಜಾತ್ತಾ. ಜಾಲಯಾರಿ ತೆದ್ನಾ ತ್ಯಾ ಮೆಲ್ಲೀಲೆ ಭ್ರೂಣಾ ಕೂಸ್ಸುನು, ತಾಜ್ಜ ತಾಕೂನು ಗರ್ಭ ವ್ಹೋವ್ನು ಆಶ್ಶಿಲೆ ಬಾಯ್ಲಮನ್ಶೆಕ, ತಿಗೆಲೆ ಖಂಚೇಯಿ ಅಂಗಾಕ ಇನ್ಫೆಕ್ಷನ್ ಜಾಂವೊ ತ್ರಾಸು ಜಾವಚಾಕ ನಜ್ಜ ಮ್ಹೊಣು ಶರೀರ ಸ್ವಯಂ ಜಾವ್ನು ಭ್ರೂಣಾಚೆ ಸುತ್ಲೂ ಕ್ಯಾಲ್ಸಿಯಂ ಲೇಪನ ಲೆಪ್ಪಿತಾ. ತಾಜೇನ ಕಾಲಕ್ರಮೇಣ ತ್ಯಾ ಭ್ರೂಣ ಫಾತರಾ ತಶ್ಶಿ ಗಟ್ಟಿ ಜಾತ್ತಾ ಆನಿ ಖಂಚೇಯಿ ಲಕ್ಷಣ ದಾಖಯನಾಶಿ ವರ್ಷಾನುಗಟ್ಲೆ ಬಾಯ್ಲಮನ್ಶೆಲೆ ಶರೀರ ಭಿತ್ತರೀಚಿ ವ್ಹರ್ತಾ.
ವಯ್ರಿ ಸಾಂಗಿಲೆ ೮೨ ವರ್ಷಾಚೆ ಬಾಯ್ಲಮನ್ಶೆಲೆ ವಿಷಯ ಘೆತಲೇರಿ ತಿಗೆಲೆ ಪೊಟ್ಟಾ ಭಿತ್ತರಿ ತ್ಯಾ ಭ್ರೂಣ ಸುಮಾರ ೪೦ ವರ್ಷಾಚಾನ ಆಶ್ಶಿಲೆ. ವಜನ ಸುಮಾರ ಚಾರಿ ಪೌಂಡ ಆಶ್ಶಿಲೆ. (೧ ಪೌಂಡ ಮ್ಹಳಯಾರಿ ಸುಮಾರ ೦.೪೫೩೫೯೨೩೭ ಕೆ.ಜಿ. ನಾಂವೆ ೧ ಕೆ.ಜಿ. ಮ್ಹಳಯಾರಿ ೨.೨೦೪೬೨ ಪೌಂಡ) ಜಾಲಯಾರಿಚಿ ತಿಕ್ಕಾ ತ್ಯಾ ಕಳ್ನಿ. ಕೆದ್ನಾ ಅಸಹನೀಯ ಪೊಟ್ಟಾ ಧೂಖ್ಖಿಚೆ ನಿಮಿತ್ತ ತೀ ಲ್ಯಾಬೋರೇಟರಿ ತಪಾಸಾಕ ಘೆಲ್ಲಿಕಿ ತೆದ್ನಾ ಕಳೀತಾಕ ಆಯ್ಲೆ. ತೆದ್ನಾ ತ್ಯಾ ಭ್ರೂಣ ಫಾತರಾ ವರಿ ಗಟ್ಟಿ ಜಾವ್ನಾಶ್ಶಿಲೆ.
ಭ್ರೂಣ ಲಿಥೋಪೀಡಿಯಾ ಅವಸ್ಥೆಕ ಕೆದ್ನಾ ಬದಲ್ತಾ ಮ್ಹೊಣು ಸ್ಪಷ್ಟ ಜಾವ್ನು ಸಾಂಗಚಾಕ ಜಾಯ್ನಾ. ಗರ್ಭಾವಸ್ಥೆಚೆ ೧೪ ಹಪ್ತೆಚಾನ ಪೂರ್ಣಾವಧಿ ಮಧೇ ಕೆದ್ನಾಯಿ ಅಸ್ಸಾಲೆ ಸ್ಥಿತಿ ಘಡಚಾಕ ಪುರೊ. ಆನಿ ಲಿಥೋಪೀಡಿಯಾ ಜಾಲೀಲೆ ಬಾಯ್ಲಮನಶೆಲೆ ವಯ ೫೫ ತಾಕೂನು ೧೦೦ ವರ್ಷಾ ಮಧೇ ತ್ಯಾ ಕೋಳ್ನು ಆಯಲಾ ಮ್ಹಣ್ಚೆ ಆನ್ನೇಕ ವಿಶೇಷ. ಮ್ಹಳಯಾರಿ ಋತುಬಂಧ ಜಾಲ್ಲ ಮಾಗಿರಿ ಕೋಳ್ನು ಆಯ್ಲೆ ಮ್ಹಣಯೇತ. ಆನ್ನೇಕ ವಿಶೇಷ ಮ್ಹಳಯಾರಿ ಕಿತ್ಲಕಿ ಬಾಯ್ಲಮನ್ಶೆ ಲಿಥೋಪೀಡಿಯಾ ಅವಸ್ಥೆಂತೂ ದುಸರೇ ಪಂತಾ ಗುರ್ಭಿಣ ಜಾವ್ನು ಆರೋಗ್ಯಪೂರ್ಣ ಚರಡುವಾಂಕ ಬಾಳಂತಿ ಜಾಲೀಲೆ ಉದಾಹರಣ ವರೇನ ಆಸ್ಸಾ.
ಏಕ ಅಧ್ಯಯನ ವರದಿ ಪ್ರಕಾರ ಸಾಂಗ್ಚೆ ಜಾಲಯಾರಿ ಘೆಲೀಲೆ ೪೦೦ ವರ್ಷಾಂತು ವೈದ್ಯಕೀಯ ರಂಗಾಂತು ದೆಕ್ಕು ಪಡಲೀಲೆ ಲಿಥೋಪೀಡಿಯಾ ಪ್ರಕರಣಾಂಚೆ ಅಂಕಡೆ ಕೇವಲ ೩೦೦ ಮಾತ್ರ. ಜಾಲಯಾರಿ ೧೧,೦೦೦ ಗರ್ಭಧಾರಣೆಂತು ಸಕಯ್ಲೆಚೆ ಪೋಟ್ಟಾಂತು ಜಾವ್ಚೆ ಗರ್ಭಧಾರಣೆ ೧ ಮಾತ್ರ. ತಾಂತೂಯಿ ಸಕ್ಕಡ ಭ್ರೂಣ ಲಿಥೋಪೀಡಿಯಾ ಜಾವ್ನು ಬದಲ್ನಾ. ಕೇವಲ ೧.೫% ತಾಕೂನು ೧.೮% ಪ್ರಕರಣಾಂತು ಮಾತ್ರ ಲಿಥೋಪೀಡಿಯಾ(ಫಾತರಾಚೆ ಚರಡು) ಜಾವ್ನು ವಾಡಚಾಕ ಪುರೊ. ಇತ್ತುಲೆ ಕಾಲಾಚೆ ಅಧ್ಯಯನಾಂತು ತಪಾಸ ಕೆಲೀಲೆ ನವ್ವಾ ಪ್ರಕರಣಾಂತು ವಿಷಯು ಕೊಳ್ಚೆ ಪಶಿ ಪಯ್ಲೆ ಪನ್ನಾಸ ವರ್ಷಾ ಪಶಿ ಚ್ಹಡ ಕಾಳ ಲಿಥೋಪೀಡಿಯಾ (ಫಾತರಾಂ ಚರಡಾಕ)ಂಕ ವ್ಹೋವ್ನು ಘೇವ್ನಾಶ್ಶಿಲೆ ಬಾಯ್ಲಮನ್ಶೆಲೆ ಮಾಹಿತಿ ಮೆಳ್ಳಾ.
ಚಡ್ತೆ ಸಂದರ್ಭಾರಿ ದುಸರೇ ದೈಹಿಕ ಸಮಸ್ಯೆನ ಎಕ್ಸ್-ರೇ ಜಾಂವೊ ಸ್ಕ್ಯಾನಿಂಗ್ ಕೆಲೀಲೆ ತೆದ್ದನಾ ಹೇ ಸಮಸ್ಯಾ ಕೋಳ್ನು ಆಯ್ಲ್ಯಾ. ೧೦ವೇಂ ಶೇಕಡ್ಯಾಂತು ಸ್ಪ್ಯಾನಿಷ್ ವೈದ್ಯಾನಿ ಬರೆಯಿಲೆ ಗ್ರಂಥಾಂತು ಹಾಜ್ಜೆ ಉಲ್ಲೇಖ ಆಸ್ಸ. ಲಿಥೋಪೀಡಿಯನ್ ಪ್ರಕರಣ ಮನುಷ್ಯಾಂತು ಮಾತ್ರ ನಂಯಿ ಕಾಂಬಳಕೂರ, ಕಾಂಸವಾಂತು ವರೇನ ಅಸ್ಸಾಲೆ ಪ್ರಕರಣಾಚೆ ಉಲ್ಲೇಖ ಕೆಲ್ಲ್ಯಾ ೧೮೮೦ ಇಸ್ವೆಂತು ೪೭ ಪ್ರಕರಣ ಪರಿಶೀಲನ ಕೆಲೀಲೆ ಫ್ರೆಡ್ರಿಕ್ ಕುಚೆನ್ಮಿಸ್ಟರ್ ಮ್ಹಣ್ಚೆ ಜರ್ಮನ್ ವೈದ್ಯಾನಿ ಲಿಥೋಪೀಡಿಯಾಚೆ ತೀನಿ ಪಂಗಡ ವಿಂಗಡಣ ಕೊರನು ಸಾಂಗ್ಲ್ಯಾ. ಜರಾಯು ಜಾಂವೊ ಭ್ರೂಣಾಚೆ ಸುತ್ತೂ ಆಸ್ಸುಚೆ ವಾರ ಹಾಂಗಾ ಮಾತ್ರ ಕ್ಯಾಲ್ಸಿಫಿಕೇಶನ್ ಘಡಲೇರಿ ಲಿಥೋಕೆಲಿಫೋಸ್(ಫಾತರಾಚೆ ಕವಚ).
ಗರ್ಭಕೋಶ ಜಾಂವೊ ಅಂಡಾಶಯ ಛಿದ್ರತೇನಿ ಸಕಯ್ಲೆಚೆ ಪೋಟ್ಟಾ ಭಿತ್ತರಿ ರಿಗ್ಲೆ ನಂತರ ಭ್ರೂಣ ಸ್ವಯಂ ಕ್ಯಾಲ್ಸಿಫೈಡ್ ಜಾಲಯಾರಿ ಹಾಕ್ಕಾ ಲಿಥೋಟೆಕ್ನಾನ್ (ಫಾತರಾಚೆ ಚರಡು), ಭ್ರೂಣ ಆನಿ ವಾರಿ (ಚೀಲ) ದೊನ್ನೀಯಿ ಕ್ಯಾಲ್ಸಿಫೈಡ್ ಜಾಲೀಲ್ಯಾಕ ಲಿಥೋಕೆಲಿಫೋಪೀಡಿಯನ್ (ಫಾತರಾಚೆ ಕವಚ ಆನಿ ಚರಡು) ಮ್ಹೊಣು ವಿಂಗಡಣ ಕೆಲ್ಲ್ಯಾ.
ಜಾಲಯಾರೀಚಿ ಶರೀರ ತ್ಯಾ ಬಾಯ್ಲಮನಶೆಕ ಏಕಚೂರು ಅನಾರೋಗ್ಯ ಜಾಂವೊ ತ್ರಾಸ ಜಾಯನಾ ತಶ್ಶಿ ರಾಕತಾ ಮ್ಹಳಯಾರಿ ಹೇ ವಿಜ್ಞಾನ ವಿಸ್ಮಯ ಮಾತ್ರ ನ್ಹಂಹಿ ನಿಸರ್ಗಾನಿ ಮನುಷ್ಯಾ ವಯ್ರಿ ದಿವಚೆ ಕಾಳಜಿ, ಮ್ಹೋಗು ಮ್ಹೊಣು ದೀಸ್ನಾವೇ?