ಅಕ್ಷಯತೃತೀಯಾ ಹಿಂದೂ ಲೋಕಾಂಕ ಮಸ್ತ ಶುಭಕರ ದಿವಸು. ಸಾಡಿ ತೀನ ಮೂರ್ತಾಂತು ಸಹಿತ ಹೇ ಎತ್ತಾ. ಮ್ಹಳಯಾರಿ ಹೇ ದಿವಸು ಖಂಚೇ ನವೀನ ಕಾಮ, ಘರಾ ಒಕ್ಕಲ, ವ್ಹಾರ್ಡಿಕ, ಮೂಂಜಿ ಇತ್ಯಾದಿಕ ಮೂರ್ತು ಪೊಳೋಕಾ ಮ್ಹೊಣು ಆಸ್ಸನಾ. ವೈಶಾಖ ಮಾಸ ಶುಕ್ಲ ಪಕ್ಷಾಚೆ ತೃತೀಯಾ ದಿವಸೂಚಿ ಅಕ್ಷಯ ತೃತೀಯಾ. ಹೆ ದಿವಸು ಕೊರಚೆ ಸಕ್ಕಡ ಪುಣ್ಯಕಾರ್ಯಾನಿ ಅತಿಶಯ ಪುಣ್ಯ ಪ್ರಾಪ್ತಿ ಜಾತ್ತಾ. ಹೇ ದಿವಸು ಅನಂತ ಕೋಟಿ ಬ್ರಹ್ಮಾಂಡಾಚೊ ಯಜ್ಮಾನು ಶ್ರೀ ಕೃಷ್ಣಾಕ ಗಂಧಲೇಪನ ಕೆಲಯಾರಿ, ತಾಗೆಲೆ ದೆವಳಾಕ ವಚೂನು ದರ್ಶನ ಕೆಲಯಾರಿ ಅನಂತ ಪುಣ್ಯ ಅಕ್ಷಯ ಜಾತ್ತ ಖಂಯಿ. (ಅಕ್ಷಯ ಮ್ಹಳಯಾರಿ ಖಾಲಿ ಜಾಯನಾತ್ತಿಲೆ ಮ್ಹೊಣೂ ಅರ್ಥು) ತಶ್ಶೀಚಿ ಹೇ ದಿವಸು ಕೆಲೀಲೆ ಪಾಪ ಕಾರ್ಯಾಕ ಸಹಿತ ಅಕ್ಷಯ ಪಾಪ ಗಾಂಟಿ ಪಡತಾ ಮ್ಹಣಚೆ ಸಹಿತ ವಿಸರಚಾಕ ನಜ್ಜ. ಬುಧ್ವಾರು, ಶ್ರವಣಾ, ರೋಹಿಣಿ ನಕ್ಷತ್ರ ಆಸ್ಸುಚೆ ದಿವಸು ಎವಚೆ ತೃತೀಯಾ ತಿಥಿ ಪರ್ವಕಾಲ ಮ್ಹಣೋನು ಘೆತ್ತಾ. ತ್ಯಾ ದಿವಸು ಕೆಲೀಲೆ ಪುಣ್ಯ ನಾಣ, ದಾನ ಅಕ್ಷಯ ಫಲ ದಿತ್ತಾ. ವೈಶಾಖಾಚೆ ಅಕ್ಷಯ ತೃತೀಯ ದಿವಸು ಚಾಂಗ ಕಾಮ ಕೊರನು ಅನಂತ ಫಲ ಆಸ್ಸ ಕೊರನು ಘೆತ್ತಿಲೆ ಮಸ್ತ ಉದಾಹರಣ ಆಮ್ಕಾ ಪುರಾಣಾಂತು ಮೆಳ್ತಾ.
ಸ್ವರ್ಗಾಧಿಪತಿ ಜಾಲೀಲೊ ಇಂದ್ರಾನಿ ತಾಕ್ಕಾ ಸೋಡ್ನು ಘೆಲೀಲೆ ಇಂದ್ರ ಪದವಿ, ಇಂದ್ರ ವೈಭೋಗ ಸಕ್ಕಡ ವೈಶಾಖಾ ಶುದ್ಧ ತೃತೀಯಾ ದಿವಸ ಪರತ ಘೇವ್ನು ಆಪಣಾಲೆ ರಾಜಧಾನಿ ಜಾಲೀಲೆ ಅಮರಾವತಿ ರಿಗಲೊ ಮ್ಹೊಣು ಸಾಂಗಲಾ.
ವೈಶಾಖ ಮಾಸ ಮಹಾತ್ಮೆಂತು ಅಕ್ಷಯ ತೃತೀಯಾ ದಿವಸು ಕೊರಚೆ ಪುಣ್ಯಕಾರ್ಯ, ಸ್ನಾನದಾನಾದಿ ಅಕ್ಷಯ ಫಲದಾಯಕ ಮಾತ್ರ ನ್ಹಂಯಿಸಿ ವಿಷ್ಣುಪ್ರೀತ್ಯರ್ಥ ಜಾವ್ನು ಜಪತಪಾದಿ ಹೋಮ ಹಾಂತು ಖಂಚೆತರಿ ಏಕ ಕರನಾ ಜಾಲ್ಯಾರಿ ಸಹಿತ ಪಾಪ ಹಜಾರ ಪಟ್ಟ ಚ್ಹಡ ಜಾತ್ತಾ ಮ್ಹೊಣು ಆಸ್ಸ. ಪರ್ವಕಾಲ ಜಾವ್ನಾಶ್ಶ ವೊಚ್ಚುನು ಪಿತೃಂಗೆಲೆ ಪ್ರೀತ್ಯರ್ಥ ಜಾವ್ನು ತಿಲತರ್ಪಣ ದಿವಚೆ ತಾಕೂನು ಪಿತೃಂಗೆಲೊ ಮೋಕ್ಷಾಕ ಕಾರಣ ಜಾತ್ತಾ. ವೈಶಾಖ ಮಾಸ ಪರ್ಯಂತರ ಶಾಲಿಗ್ರಾಮಾದಿ ಪರಮಾತ್ಮಾಲೆ ಮೂರ್ತಿಕ ಗಂಧಾಚೆ ಲೇಪನ ಕೊರಕಾ. ಹೇ ಜಾಯನಾ ಜಾಲಯಾರಿಚಿ ಅಕ್ಷಯ ತೃತೀಯಾ ದಿವಸು ಪೂಣಿ ಪರಮಾತ್ಮಾಲೆ ಮೂರ್ತಿಕ ಗಂಧಲೇಪನ ಕೊರಚೆ ತಾಕೂನು ಅಕ್ಷಯ ಫಲ ಮೆಳ್ತಾ.
ಮಂತ್ರಾಲಯಾಂತು ಅಕ್ಷಯ ತೃತೀಯಾ ದಿವಸು ಶ್ರೀ ರಾಘವೇಂದ್ರ ಸ್ವಾಮಿ ಸಹಿತ ಸಕ್ಕಡ ಬೃಂದಾವನಾಂಕ ಗಂಧಲೇಪನ ಕೊರಚೆ ಸಂಪ್ರದಾಯ ಮಾಕ್ಷಿ ತಾಕೂನು ಚೋಲ್ನು ಆಯಲಾ. ತ್ಯಾ ದಿವಸು ಶ್ರೀ ರಾಘವೇಂದ್ರ ಸ್ವಾಮಿಂಗೆಲೆ ಬೃಂದಾವನ, ಶ್ರೀ ಯೋಗೀಂದ್ರ ತೀರ್ಥಾನಿ ಪ್ರತಿಷ್ಠಿತ ಪ್ರಾಣದೇವು ತಶ್ಶೀಚಿ ಗ್ರಾಮದೇವತೆ ಮಂಚಾಲಮ್ಮ ದೇವಿ ಆನಿ ಶ್ರೀ ರಾಘವೇಂದ್ರ ಸ್ವಾಮೀಜಿನ ಪ್ರತಿಷ್ಠೆ ಕೆಲೀಲೆ ಶ್ರೀ ವೆಂಕಟೇಶ್ವರಾಕ ಅದ್ಭುತ ಜಾವ್ನು ಗಂಧಾಲಂಕಾರ ಕರತಾತಿ. ಅಕ್ಷಯ ತೃತೀಯ ದಿವಸು ಗೋಂವಾ (ಗೋದಿ)ಕ ಮಸ್ತ ಮಹತ್ವ ಆಸ್ಸ. ಹೇ ದಿವಸು ಗೋಂವು ದಾನ ಕೊರಚೆ ತಾಕೂನು, ಗೋಂವು ಕಾವಚೆ ತಾಕೂನು ಪಾಪ ಪರಿಹಾರ ಜಾತ್ತಾ. ಹೇ ದಿವಸಾ ತಾಕೂನು ೯೦ ದಿವಸ ಪರ್ಯಂತ ಶ್ರೀ ವೆಂಕಟೇಶ ಮಹಾತ್ಮ ಪುರಾಣ ಸಾಂಗೆತಾತಿ. ಅಕ್ಷಯ ತೃತೀಯ ಕೃತ ಯುಗ ಆನಿ ತ್ರೇತಾ ಯುಗಾಚೆ ಸುರವೇ ದಿವಸೂ ಮ್ಹಣಚೆ ನಂಬಿಗಾಯಿ ಆಸ್ಸ. ಹೇ ದಿವಸು ಕೆಲೀಲೆ ದಾನ, ಹವನ, ಜಪ, ತಪ ಕ್ಷಯ ಜಾಯ್ನಾ, ದೇವು ಆನಿ ಪಿತೃ ಖಾತ್ತಿರಿ ಕೆಲೀಲೆ ಕಾರ್ಯ ಅಕ್ಷಯ ಜಾತ್ತಾ ಮ್ಹೊಣು ಸಾಕ್ಷಾತ ಶ್ರೀ ಕೃಷ್ಣೂಚಿ ಧರ್ಮರಾಯಾಕ ಸಾಂಗತಾ.
ಪುರಾಣಾಂತು ಉಲ್ಲೇಖ ಜಾಲೀಲ್ವರಿ ಅಕ್ಷಯ ತೃತೀಯ ಮಹತ್ವ ಪಳೇಯಾ. ಭುರಿಶ್ರವಸ್ಸು ರಾಯಾಕ ಶ್ರೀ ಮಹಾವಿಷ್ಣುನ ದರ್ಶನ ದಿಲೀಲೆ ದಿವಸು. ವೇದವ್ಯಾಸಾನಿ ಶ್ರೀ ಗಣಪತಿಕ ಶ್ರೀ ಮನ್ಮಹಾಭಾರತ ಬರೋವಚಾಕ ಶೂರು ಕೆಲೀಲೆ ದಿವಸು. ಪರಶುರಾಮ ದೇವಾಲೆ ಅವತಾರ ಜಾಲೀಲೆ ದಿವಸು.
ಸಮುದ್ರಾಂತು ನಿಪ್ಪೂನು ದವರಚಾಕ ಘೆಲೀಲೆ ವೇದ ಹಾಡ್ನು ಪರತ ಬ್ರಹ್ಮ ದೇವಾಕ ದಿಲೀಲೆ ದಿವಸು. ಕುಚೇಲಾನಿ ಹಾಡಿಲೆ ಪೋವು ಶ್ರೀ ಕೃಷ್ಣಾನಿ ಸಂತೋಷಾನಿ ಸ್ವೀಕಾರ ಕೊರನು, ಕುಚೇಲಾಕ ಅನುಗ್ರಹ ಕೆಲೀಲೆ ದಿವಸು. ಮಸ್ತ ಮಾಕಸಿ ಕುಂಭಕೋಣಂಚೆ ೧೬ ವಿಷ್ಣು ದೇವಳಾಂತು ಒಟ್ಟು ಜಾವ್ನು ೧೬ ಗರುಡವಾಹನಾಂತು ಮಹಾವಿಷ್ಣುನಿ ದರ್ಶನ ದಿಲೀಲೆ ದಿವಸು. ಕೃತಯುಗ ಆರಂಭ ಜಾಲೀಲೆ ದಿವಸು.
ಆಮ್ಗೆಲೆ ಶಾಸ್ತ್ರಾಂತು ಹೇ ದಿವಸಾಚೆ ವಿಶೇಷತಾ ಅಶ್ಶಿ ಸಾಂಗಲಾ. ಹೇ ದಿವಸು ಕೆಲೀಲೆ ಜಪತಪ ಅಕ್ಷಯ ಫಲ ದಿವಚಾ ವೊಚ್ಚುನು ಜಪತಪ, ದಾನ ಕೊರಕಾ. ಸೂರ್ಯ ಉದ್ದೆಚೆ ಪಶಿ ಪಯಲೇಚಿ ನ್ಹಂಯಿಂತು ನಾವಚೆ ತಾಕೂನು ವಿಶೇಷ ಫಲ ಪ್ರಾಪ್ತಿ ಜಾತ್ತಾ.
ಗುರು ತಾಕೂನು ಮಂತ್ರೋಪದೇಶ ಘೆವಚಾಕ ಮಸ್ತ ಚಾಂಗ ದಿವಸು. ವೇದ, ಉಪನಿಷತ್ ಪಾರಾಯಣ ಕೊರಚಾಕ ಚಾಂಗ ದಿವಸು. ಪಿತೃ ತರ್ಪಣ ದಿವಕಾ ಜಾಲೀಲೆ ದಿವಸು. ಕೆಲೀಲೆ ದಾನಾಕ ಅಕ್ಷಯ ಫಲ ಮೆಳಚೆ ದಿವಸು. ಲಕ್ಷ್ಮೀ ಸಾನಿಧ್ಯ ಆಸ್ಸುಚೆ ಬಾಂಗಾರ, ರುಪ್ಪೆ ಇತ್ಯಾದಿ ಖರೀದಿ ಕೊರಚಾಕ ಚಾಂಗ ದಿವಸು. ಖಂಚೇಯಿ ಶುಭ ಕಾರ್ಯ ಕೊರಚಾಕ ಚಾಂಗ ದಿವಸು. ಹೇ ದಿವಸು ಬಾಯ್ಲಮನ್ಶಾನ ಹಳದಿ-ಕುಂಕುಮು ವಾಂಟಿಕಾ. ಕೆಲವ ಲೋಕ ಚೈತ್ರ ಗೌರಿಕ ವಿಸರ್ಜನ ಕೊರನು ಹಳದಿ-ಕುಂಕುಮ ಕಾರ್ಯಕ್ರಮ ದವರೂನು ಘೆತ್ತಾತಿ. ಕ್ಷಯ ಮ್ಹಳಯಾರಿ ಕರಗೂನು ವಚ್ಚೆ ಜಾಲ್ಯಾರಿ ಅಕ್ಷಯ ಮ್ಹಳಯಾರಿ ನಾಶ ನಾತ್ತಿಲೆ. ಆನಿ ಕೆದ್ನಾ ಚ್ಹಡ ಜಾತ್ತಾ ವಚ್ಚೆ ಮ್ಹೊಣು ವೈಶಾಖ ಮಾಸಾಚೆ ಶುದ್ದ ತೃತೀಯ ಬರಶಿ ರೋಹಿಣಿ ನಕ್ಷತ್ರ ಆಸಲೇರಿ ತ್ಯಾ ಶಾಸ್ತ್ರ ಪ್ರಕಾರ ಆಚರಣ ಕೊರಚೆ ಅಕ್ಷಯ ತೃತೀಯ ಜಾತ್ತಾ. ರೋಹಿಣಿ ನಕ್ಷತ್ರ ಆನಿ ತಾಜ್ಜೊಟ್ಟು ತೃತೀಯ ಬುಧ್ವಾರು ಆಯ್ಯಿಲ ಜಾಲ್ಯಾರಿ ಹಜಾರ ಪಟ್ಟ ಚ್ಹಡ ಫಲ ಮೆಳ್ತಾ. ಖಾಲಿ ಬಾಂಗಾರ ಘೆವಚಾಕ ತಿತ್ಲೇಕ ಮಾತ್ರ ಅಕ್ಷಯ ತೃತೀಯ ಸೀಮಿತ ಜಾಯನಾಶಿ ತ್ಯಾ ಆಮ್ಗೆಲೆ ಆಧ್ಯಾತ್ಮಿಕ ಉದರ್ಗತಿಕ ಸಹಿತ ಮದತ್ ಕೊರಚೆ ವರಿ ಜಾಂವೊ. ಅವುಂದು ಅಕ್ಷಯ ತೃತೀಯ ತಿಥಿ ಎಪ್ರಿಲ್ ೧೯ಚೆ ಸಕ್ಕಾಣಿ ೧೦.೪೯ ತಾಕೂನು ಎ.೨೦ಕ ಸಕ್ಕಾಣಿ ಪೂಡೆ ೦೭.೨೭ ಪರ್ಯಂತ ಆಸ್ಸ.
अक्षयाचॆ पावसु पॊडचॆ `अक्षय तृतीया‘
अक्षयतृतीया हिंदू लोकांक मस्त शुभकर दिवसु. साडि तीन मूर्तांतु सहित हे ऎत्ता. म्हळयारि हे दिवसु खंचे नवीन काम, घरा ऒक्कल, व्हार्डिक, मूंजि इत्यादिक मूर्तु पॊळोका म्हॊणु आस्सना. वैशाख मास शुक्ल पक्षाचॆ तृतीया दिवसूचि अक्षय तृतीया. हॆ दिवसु कॊरचॆ सक्कड पुण्यकार्यानि अतिशय पुण्य प्राप्ति जात्ता. हे दिवसु अनंत कोटि ब्रह्मांडाचॊ यज्मानु श्री कृष्णाक गंधलेपन कॆलयारि, तागॆलॆ दॆवळाक वचूनु दर्शन कॆलयारि अनंत पुण्य अक्षय जात्त खंयि. (अक्षय म्हळयारि खालि जायनात्तिलॆ म्हॊणू अर्थु) तश्शीचि हे दिवसु कॆलीलॆ पाप कार्याक सहित अक्षय पाप गांटि पडता म्हणचॆ सहित विसरचाक नज्ज. बुध्वारु, श्रवणा, रोहिणि नक्षत्र आस्सुचॆ दिवसु ऎवचॆ तृतीया तिथि पर्वकाल म्हणोनु घॆत्ता. त्या दिवसु कॆलीलॆ पुण्य नाण, दान अक्षय फल दित्ता. वैशाखाचॆ अक्षय तृतीय दिवसु चांग काम कॊरनु अनंत फल आस्स कॊरनु घॆत्तिलॆ मस्त उदाहरण आम्का पुराणांतु मॆळ्ता.
स्वर्गाधिपति जालीलॊ इंद्रानि ताक्का सोड्नु घॆलीलॆ इंद्र पदवि, इंद्र वैभोग सक्कड वैशाखा शुद्ध तृतीया दिवस परत घेव्नु आपणालॆ राजधानि जालीलॆ अमरावति रिगलॊ म्हॊणु सांगला.
वैशाख मास महात्मॆंतु अक्षय तृतीया दिवसु कॊरचॆ पुण्यकार्य, स्नानदानादि अक्षय फलदायक मात्र न्हंयिसि विष्णुप्रीत्यर्थ जाव्नु जपतपादि होम हांतु खंचॆतरि एक करना जाल्यारि सहित पाप हजार पट्ट च्हड जात्ता म्हॊणु आस्स. पर्वकाल जाव्नाश्श वॊच्चुनु पितृंगॆलॆ प्रीत्यर्थ जाव्नु तिलतर्पण दिवचॆ ताकूनु पितृंगॆलॊ मोक्षाक कारण जात्ता. वैशाख मास पर्यंतर शालिग्रामादि परमात्मालॆ मूर्तिक गंधाचॆ लेपन कॊरका. हे जायना जालयारिचि अक्षय तृतीया दिवसु पूणि परमात्मालॆ मूर्तिक गंधलेपन कॊरचॆ ताकूनु अक्षय फल मॆळ्ता.
मंत्रालयांतु अक्षय तृतीया दिवसु श्री राघवेंद्र स्वामि सहित सक्कड बृंदावनांक गंधलेपन कॊरचॆ संप्रदाय माक्षि ताकूनु चोल्नु आयला. त्या दिवसु श्री राघवेंद्र स्वामिंगॆलॆ बृंदावन, श्री योगींद्र तीर्थानि प्रतिष्ठित प्राणदेवु तश्शीचि ग्रामदेवतॆ मंचालम्म देवि आनि श्री राघवेंद्र स्वामीजिन प्रतिष्ठॆ कॆलीलॆ श्री वॆंकटेश्वराक अद्भुत जाव्नु गंधालंकार करताति. अक्षय तृतीय दिवसु गोंवा (गोदि)क मस्त महत्व आस्स. हे दिवसु गोंवु दान कॊरचॆ ताकूनु, गोंवु कावचॆ ताकूनु पाप परिहार जात्ता. हे दिवसा ताकूनु ९० दिवस पर्यंत श्री वॆंकटेश महात्म पुराण सांगॆताति. अक्षय तृतीय कृत युग आनि त्रेता युगाचॆ सुरवे दिवसू म्हणचॆ नंबिगायि आस्स. हे दिवसु कॆलीलॆ दान, हवन, जप, तप क्षय जाय्ना, देवु आनि पितृ खात्तिरि कॆलीलॆ कार्य अक्षय जात्ता म्हॊणु साक्षात श्री कृष्णूचि धर्मरायाक सांगता.
पुराणांतु उल्लेख जालील्वरि अक्षय तृतीय महत्व पळेया. भुरिश्रवस्सु रायाक श्री महाविष्णुन दर्शन दिलीलॆ दिवसु. वेदव्यासानि श्री गणपतिक श्री मन्महाभारत बरोवचाक शूरु कॆलीलॆ दिवसु. परशुराम देवालॆ अवतार जालीलॆ दिवसु.
समुद्रांतु निप्पूनु दवरचाक घॆलीलॆ वेद हाड्नु परत ब्रह्म देवाक दिलीलॆ दिवसु. कुचेलानि हाडिलॆ पोवु श्री कृष्णानि संतोषानि स्वीकार कॊरनु, कुचेलाक अनुग्रह कॆलीलॆ दिवसु. मस्त माकसि कुंभकोणंचॆ १६ विष्णु देवळांतु ऒट्टु जाव्नु १६ गरुडवाहनांतु महाविष्णुनि दर्शन दिलीलॆ दिवसु. कृतयुग आरंभ जालीलॆ दिवसु.
आम्गॆलॆ शास्त्रांतु हे दिवसाचॆ विशेषता अश्शि सांगला. हे दिवसु कॆलीलॆ जपतप अक्षय फल दिवचा वॊच्चुनु जपतप, दान कॊरका. सूर्य उद्दॆचॆ पशि पयलेचि न्हंयिंतु नावचॆ ताकूनु विशेष फल प्राप्ति जात्ता. गुरु ताकूनु मंत्रोपदेश घॆवचाक मस्त चांग दिवसु. वेद, उपनिषत् पारायण कॊरचाक चांग दिवसु. पितृ तर्पण दिवका जालीलॆ दिवसु. कॆलीलॆ दानाक अक्षय फल मॆळचॆ दिवसु. लक्ष्मी सानिध्य आस्सुचॆ बांगार, रुप्पॆ इत्यादि खरीदि कॊरचाक चांग दिवसु. खंचेयि शुभ कार्य कॊरचाक चांग दिवसु. हे दिवसु बाय्लमन्शान हळदि-कुंकुमु वांटिका. कॆलव लोक चैत्र गौरिक विसर्जन कॊरनु हळदि-कुंकुम कार्यक्रम दवरूनु घॆत्ताति. क्षय म्हळयारि करगूनु वच्चॆ जाल्यारि अक्षय म्हळयारि नाश नात्तिलॆ. आनि कॆद्ना च्हड जात्ता वच्चॆ म्हॊणु वैशाख मासाचॆ शुद्द तृतीय बरशि रोहिणि नक्षत्र आसलेरि त्या शास्त्र प्रकार आचरण कॊरचॆ अक्षय तृतीय जात्ता. रोहिणि नक्षत्र आनि ताज्जॊट्टु तृतीय बुध्वारु आय्यिल जाल्यारि हजार पट्ट च्हड फल मॆळ्ता. खालि बांगार घॆवचाक तित्लेक मात्र अक्षय तृतीय सीमित जायनाशि त्या आम्गॆलॆ आध्यात्मिक उदर्गतिक सहित मदत् कॊरचॆ वरि जांवॊ. अवुंदु अक्षय तृतीय तिथि ऎप्रिल् १९चॆ सक्काणि १०.४९ ताकूनु ऎ.२०क सक्काणि पूडॆ ०७.२७ पर्यंत आस्स.