ಉತ್ತರ ಪ್ರದೇಶಾಂತು ಕಾಶೀಂತ ಪವಿತ್ರ ಗಂಗಾ ನದಿಚ್ಯಾ ತೀರಾರ್ ಆಶಿಲ್ಲ್ಯಾ ಬ್ರಹ್ಮ ಘಾಟಾ ವಯ್ರಿ ಆಶಿಲ್ಲ್ಯಾ ಮೂಲ ಮಠಾಂತು, ಶ್ರೀ ಕಾಶೀ ಮಠ ಸಂಸ್ಥಾನಾಚೆ ಮಠಾಧಿಪತಿ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೊ ೨೫ವೊ ಚಾತುರ್ಮಾಸ ವ್ರತ, ಅಸಂಖ್ಯ ಭಕ್ತಾಂನಿ ಆನಿ ಅನುಯಾಯಿಂನಿ ವಾಂಟೊ ಘೆವ್ನು, ಶ್ರದ್ಧಾ-ಭಕ್ತಿಯೆನ್ ಆಚರಣ ಜಾತಾ ಆಸ್ಸಾ.
ಪೂಜ್ಯ ಶ್ರೀ ಸ್ವಾಮಿ ಮಹಾರಾಜ ಪಯ್ಲ್ಯಾ ಪಂತಾ ಶ್ರೀ ಕಾಶೀ ಮೂಲ ಮಠಾಂತು ಚಾತುರ್ಮಾಸ ವ್ರತ ಆಚರಣ ಕರೀತ ಆಸ್ಸಾತಿ. ಶ್ರೀ ಕಾಶೀ ಮಠಾಚೆ ಪೀಠಾಧಿಪತಿ ಶ್ರೀ ವ್ಯಾಸ ರಘುಪತಿ ನರಸಿಂಹ ಆನಿ ಶ್ರೀ ಲಕ್ಷ್ಮೀ ನರಸಿಂಹ, ಶ್ರೀ ಬಿಂದು ಮಾಧವ, ಶ್ರೀ ನವನೀತ ಕೃಷ್ಣ ಆನಿ ಶ್ರೀ ಬ್ರಹ್ಮೇಶ ಹ್ಯಾಂಚೆ ಆಶೀರ್ವಾದ ಆನಿ ಕೃಪಾಶೀರ್ವಾದ ಮೆಳೊವ್ಚೆ ಖಾತಿರ್ ಭಾರತಾಂತಲ್ಯಾ ಆನಿ ವಿದೇಶಾಂತಲ್ಯಾ ಭಕ್ತಾಂಚೆ ವ್ಹಡ ವ್ಹಡ ಗುಂಪು ಕಾಶೀಂತ ಪಾವೊಂಕ ಲಾಗ್ಲ್ಯಾತಿ. ತಶೆಂಚ, ಶ್ರೀಮದ್ ಉಪೇಂದ್ರ ತೀರ್ಥ ಸ್ವಾಮೀಜಿ ಪ್ರಥಮ, ಶ್ರೀಮದ್ ರಾಘವೇಂದ್ರ ತೀರ್ಥ ಸ್ವಾಮೀಜಿ ಆನಿ ಶ್ರೀಮದ್ ಉಪೇಂದ್ರ ತೀರ್ಥ ಸ್ವಾಮೀಜಿ ದ್ವಿತೀಯ (ಜಲಸಮಾಧಿ ಘೆತಲ್ಲೆ) ಹ್ಯಾಂಚ್ಯಾ ಸಮಾಧಿ ಸ್ಥಳಾಂಚೇರ ಪೂಜಾ-ಅರ್ಚನಾ ಕರ್ತಾತಿ.
ಸ್ವಾಮೀಜಿಂಚ್ಯಾ ಮಾರ್ಗದರ್ಶನ ಪ್ರಕಾರ, ಭಕ್ತಾಂಚ್ಯಾ ದೇಣಗಿ ಆನಿ ಸಹಕಾರಾಂತು ಸುಮಾರ್ ರೂ. ೧೦ ಕೋಟಿ ಖರ್ಚುನು ಮಠಾಚೆ ನವೀಕರಣ ಆನಿ ಅಭಿವೃದ್ಧಿ ಕೆಲಾಂ. ಆತಾಂ ಮಠಾಚೆ ಆಂತರಿಕ ಭಾಗ ಪರಂಪರಾಗತ ವೈಶಿಷ್ಟ್ಯ ಆನಿ ಆಧುನಿಕ ಸೌಕರ್ಯಾಂಚೊ ಸುಂದರ ಸಮನ್ವಯ ದಾಖಯತಾ.
ಭಕ್ತಾಂಖಾತಿರಿ ಅನ್ನದಾನ ಆನಿ ಉಪಾಹಾರಾಚಿ ಸೇವಾ ನಿಯಮಿತಪಣಾನ ಕರ್ತಾತಿ. ಪ್ರತಿ ದಿವಸು ಸಾಂಜೇರಿ ೪:೩೦ ಘಂಟ್ಯಾಕ ಕಾಶೀಂತಲ್ಯಾ ಸುಮಾರ ೧,೦೦೦ ಸ್ಥಳೀಯ ನಿವಾಸ್ಯಾಂ ಖಾತಿರಿ ಜೆವಣಾಚೆ ವ್ಯವಸ್ಥಾ ವರೇನ ಕರ್ತಾ ಆಸ್ಸಾತಿ.
ದೋನಿ ಮಹತ್ವಾಚೆ ಕಾರ್ಯಕ್ರಮ್
ಅಕ್ಟೋಬರ್ ೩೧: ಮಹಾಸಭಾ ಆನಿ ಸ್ಮರಣಾರ್ಥ ನಾಣ್ಯಾಚೊ ವಿಮೋಚನ
ಪೂಜ್ಯ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿಂಚ್ಯಾ ಜನ್ಮಶತಮಾನೋತ್ಸವಾಚ್ಯಾ ಸ್ಮರಣಾರ್ಥ ಭಾರತ್ ಸರಕಾರಾನ್ ಬಿಡುಗಡೆ ಕೆಲ್ಲೆ ರೂ. ೧೦೦ ಮೌಲ್ಯಾಚೆ ಸ್ಮರಣಾರ್ಥ ನಾಣ್ಯ, ಪರಮಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿನಿ ವಿಮೋಚನ ಅ.೩೧ಕ ವಿಮೋಚನ ಕೆಲ್ಲೆ.
ಕೇಂದ್ರ ಸರಕಾರಾನ ಹಾಜ್ಜೆ ಪಯ್ಲ್ಯಾಂಚ ಪರಮಪೂಜ್ಯ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೊ ಚಿತ್ರ ಆಶಿಲ್ಲೆ ಅಂಚೆ ಚೀಟಿ ಲೋಕಾರ್ಪಣ ಕೆಲೀಲೆ ಹಾಂಗಾ ಯಾದು ಕೊರನು ಘೆವಯೇತ. ಆತಾಂ ತಾಂಗೆಲೆ ಸ್ಮರಣಾರ್ಥ ನಾಣ್ಯಾಚೊ ವಿಮೋಚನ ಆನಿ ಏಕ್ ಮಹತ್ವಾಚೊ ಮೈಲಾಫಾತ್ತೊರು ಮ್ಹಣಯೇತ.
ಶ್ರೀ ಕಾಶೀಮಠಾಚೆ ತರಪೇನಿ ನವೆಂಬರ್ ೧: ಗಂಗಾ ವಂದನಾ
ಗಂಗಾ ನದಿಚ್ಯಾ ತೀರಾರ್ ಆಶಿಲ್ಲೆ ಕಾಶೀ ಮಠ ಆನಿ ಚಾತುರ್ಮಾಸ ಆಚರಣೇಚೆ ವಿಶೇಷ ಸಂಬಂಧಾಂತ್, ನವೆಂಬರ್ ೧ ರವಿವಾರ ಸಾಂಜೇರಿ ‘ಗಂಗಾ ವಂದನೆ’ ನಾವಾಚೊ ಏಕ್ ಅದ್ಭುತ ನದಿ ಮೆರವಣೂಕ ಕಾರ್ಯಕ್ರಮ್ ಚಲಯಚಾಕ ಠರಯಿಲಾ.
ಹ್ಯಾ ಕಾರ್ಯಕ್ರಮಾಂತು ೧೨೫ ಹೋಡ್ಯೋ(ದೋಣಿಂಕ) ವಿಶೇಷ ಮಹತ್ವ ಆಸಾ. ತಾಂತು ೧೦೦ ಹೋಡ್ಯೋ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿಂಚ್ಯಾ ಜನ್ಮಶತಮಾನೋತ್ಸವಾಚಿ ಯಾದ್ ಕರೂನ್ ದಿತಾತ್, ಆನಿ ಉರ್ಲೆಲ್ಯೊ ೨೫ ಹೋಡ್ಯೋ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೀಜಿಂಚ್ಯಾ ೨೫ವ್ಯಾ ಚಾತುರ್ಮಾಸ ವ್ರತಾಚೆ ಪ್ರತೀಕ ಆಸಾತಿ. ಭಕ್ತಾಂಖಾತಿರಿ ಏಕ್ ಅವಿಸ್ಮರಣೀಯ ಅನುಭವ ಜಾವ್ಚೆ ಖಾತಿರಿ ಸರ್ವ ೧೨೫ ಹೋಡ್ಯೊಂಚಿ ವ್ಯವಸ್ಥಾ ಕರೂನ್ ದವರ್ಲ್ಯಾ.
ಯಾ ಐತಿಹಾಸಿಕ ಆನಿ ಭವ್ಯ ಕಾರ್ಯಕ್ರಮಾಕ ಸಾಕ್ಷಿ ಜಾವ್ಚೆ ಖಾತಿರ್ ಭಾರತ ಆನಿ ವಿದೇಶಾಂತಲ್ಯಾ ಜಿ‌ಎಸ್‌ಬಿ (ಗೌಡ ಸಾರಸ್ವತ ಬ್ರಾಹ್ಮಣ) ಸಮಾಜಾಚೆ ಭಕ್ತ್ ಬಾಂದವ ವ್ಹಡ ಅಂಕಡ್ಯಾನಿ ಕಾಶೀಂತ ಯವ್ನು ಪಾವ್ಲ್ಯಾತ್.
ಹಿ ಮೆರವಣೂಕ ಬ್ರಹ್ಮ ಘಾಟ್ ಹಾಂಗಾ ಸುರು ಜಾವ್ನು, ನಮೋ ಘಾಟ್ ಮಾರ್ಗಾನ ಅಸ್ಸೀ ಘಾಟ್ ಮೆರೆನ್ ಪಾವ್ತಲಿ. ಥಂಯಿ ಗಂಗಾ ಆರತಿ ಜಾವ್ನ್, ಮಾಗೀ ರಿ ಪರತ್ ಕಾಶೀ ಮಠಾಕ್ ಯೆತಲಿ. ಯಾ ವೇಳೆಕ್ ವಾಘಾವೇಸಾ ನೃತ್ಯ ಪ್ರದರ್ಶನ, ಆಕರ್ಷಕ ತಮಾಸಾ ವಾಕದಾಚೊ ಪ್ರದರ್ಶನ ಆನಿ ವಿವಿಧ ಭಜನಾ ಮಂಡಳಿಂಚ್ಯಾ ಭಕ್ತಿಪೂರ್ಣ ನೃತ್ಯ-ಭಜನಾ ಕಾರ್ಯಕ್ರಮಾಂಚೊ ಆಸ್ವಾದ್ ಘೆವ್ಚೆ ಮೆಳ್ತಲೊ.
ದೀಪಾವಳಿ ವಿಶೇಷ ರೀತಿನ್ ಆಚರಣ ಕರತಾಲೆ.
ಅಕ್ಟೋಬರ್ ೩೧ ತೇ ನವೆಂಬರ್ ೭ ಮೆರೆನ್ ಜಾವ್ಚ್ಯಾ ಸರ್ವ್ ವಿಶೇಷ ಸಾಂಸ್ಕೃತಿಕ ಕಾರ್ಯಕ್ರಮಾಂತ್ ಭಕ್ತಾಂನಿ ಮೊಟ್ಠ್ಯಾ ಸಂಖ್ಯೇನ್ ಭಾಗ್ ಘೆವ್ನ್ ಶ್ರೀ ಹರಿ-ಗುರುಗಳ ಆಶೀರ್ವಾದ ಮೆಳೊವ್ಚೆ, ಚಾತುರ್ಮಾಸ ಸಮಿತಿಚೆ ಕಾರ್ಯದರ್ಶಿ ಅತುಲ್ ಕುಡ್ವ ಹಾನ್ನಿ ಪತ್ರಿಕಾ ಪ್ರಕಟಣೆಯೆಂತ್ಲ್ಯಾನ್ ವಿನಂತಿ ಕೆಲ್ಯಾ.