ದಾವಣಗೆರೆಂತು ದಿನಾಂಕ. ೨೦-೦೪-೨೦೨೬ಕ ಚನ್ನಗಿರಿ ವಿರೂಪಾಕ್ಷಪ್ಪ ಕಲ್ಯಾಣ ಮಂಟಪಾಂತು ರಾಜ್ಯಾಚೆ ವೆಗವೆಗಳೆ ಜಿಲ್ಲ್ಯಾಚಾನ ವಿಂಚಿಲೆ ವೆಗವೆಗಳೆ ಕ್ಷೇತ್ರಾಂತು ಸಾಧನಾ ಕೆಲೀಲೆ ೧೭೫ ಸಾಧಕಾಂಕ ಸರಸ್ವತಿ ಕನ್ನಡ ರತ್ನಪ್ರಶಸ್ತಿ ಪ್ರದಾನ ಕೆಲ್ಲೆ. ಸಾಲಿಗ್ರಾಮಾಚೆ ಶ್ರೀಮತಿ ಸರಸ್ವತಿ ದಾಸಪ್ಪ ಶೆಣೈ ಪ್ರತಿಷ್ಠಾನ ಆನಿ ದಾವಣಗೆರೆಚೆ ಕಲಾಕುಂಚ ಸಾಂಸ್ಕೃತಿಕ ಸಂಸ್ಥೆಚೆ ಮೇಳಾವಟ್ಟಾರಿ ಹೇ ಸಮಾರಂಭಾ ಆಯೋಜನ ಕೆಲೀಲೆ. ಸಮಾರಂಭಾಚೆ ಉದ್ಘಾಟನಾ ಬೀದರ್ಚೆ ವಿಶ್ವ ಕನ್ನಡಿಗರ ಸಂಸ್ಥೆಚೆ ಅಧ್ಯಕ್ಷ ಡಾ. ಸುಬ್ಬಣ್ಣ ಕರಕನಳ್ಳಿ ತಾನ್ನಿ ಕೊರನು ಘೆಲೀಲೆ ೩೬ ವರಸಾಚಾನ ಇತರ ಸಂಘ-ಸಂಸ್ಥ್ಯಾಂಚೆ ಸಹಕಾರಾನಿ ದಾವಣಗೆರೆ ಕಲಾಕುಂಚ ಸಂಸ್ಥ್ಯಾನಿ ಕೆಲೀಲೆ ನಾಡುನುಡಿ ಸೇವೆಚೆ ತಾರೀಪು ಕೆಲ್ಲಿ.
ಸಮಾರಂಭಾಚೆ ಅಧ್ಯಕ್ಷಪಣ ಕಲಾಕುಂಚ ಸಾಂಸ್ಕೃತಿಕ ಸಂಸ್ಥೆಚೆ ಅಧ್ಯಕ್ಷ ಜಾಲೀಲೆ ವಾಸುದೇವ ಲಕ್ಷ್ಮಣ್ ರಾಯ್ಕರ್ ತಾನ್ನಿ ಘೆತ್ತಿಲೆ. ತಾನ್ನಿ ಉಲೋನು ಘೆಲೀಲೆ ೩೬ ವರಸಾಚಾನ ಕಲಾಕುಂಚ ಸಂಸ್ಥೋ ಕೇವಲ ದಾವಣಗೆರೆಕ ಸೀಮಿತ ಜಾಯನಾಶಿ ವೆಗವೆಗಳೆ ಜಿಲ್ಲ್ಯಾಮಚೆ ಬರಶಿ ಕೇರಳ ಗಡಿನಾಡ ಶಾಖಾ ಸೂರು ಕೊರನು ಕಲಾ, ಸಾಹಿತ್ಯ, ಸಂಗೀತ, ಶಿಕ್ಷಣ,ಯಕ್ಷಗಾನ ಚಟುವಟಿಕಾ ಚಲೋನು ಹಾಡಲೀಲೆ ಮಾಹಿತ ದಿಲ್ಲೆ.
ಮುಖೇಲ ಸೊಯರ ಜಾವ್ನು ಹುಬ್ಬಳ್ಳಿಚೆ ವಿಶ್ವದರ್ಶನ ಕನ್ನಡ ದೈನಿಕಾಚೆ ಪ್ರಧಾನ ಸಂಪಾದಕ ಡಾ.ಎಸ್.ಎಸ್. ಪಾಟೀಲ್, ರಾಯಚೂರ್ಚೆ ಸಂಜೆವಾಹಿನಿ ಕನ್ನಡ ದೈನಿಕಾಚೆ ಪ್ರಧಾನ ಸಂಪಾದಕ ಅಣ್ಣಪ್ಪ ಮೇಟಿಗೌಡ, ಜಮಖಂಡಿಚೆ ಯುವ ಕವಯತ್ರಿ, ಸಾಹಿತಿ, ಡಾ. ಶ್ರೀದೇವಿ ಸೂರ್ಯಕಂತ ಸುವರ್ಣ ಖಂಡಿ, ದಾವಣಗೆರೆ ವಿಸ್ಮಯ ವಾಣಿ ಪ್ರಾದೇಶಿಕ ಕನ್ನಡ ದೈನಿಕಾಚೆ ಪ್ರಧಾನ ಸಂಪಾದಕ ಡಾ. ಬಿ.ವಾಸುದೇವ ಕಲಾಕುಂಚ ಸಾಂಸ್ಕೃತಿಕ ಸಂಸ್ಥೆ ಗೌರವ ಅಧ್ಯಕ್ಷರಾದ ಕೆ.ಹೆಚ್.ಮಂಜುನಾಥ್ ಆಯಲೀಲೆ. ಖಂಚೇಯಿ ರಾಜಕೀಯ ನಾಶಿ, ಸರಕಾರಾಚೆ ಅನುದಾನಾಕ ರಾಕ್ನಾಶಿ ಕಲಾಕುಂಚ ಸಂಸ್ಥೆನ ಕೊರಚ ವಿವಿಧ ಸೇವೆಕ ತಾನ್ನಿ ತಾರೀಪು ಕೆಲ್ಲಿ. ಆನಿ ಹಾಕ್ಕಾ ಕಾರಣೀಕರ್ತ ದಾವಣಗೆರೆಚೆ ಸಾಂಸ್ಕೃತಿಕ ರಾಯಭಾರಿ ಮ್ಹೊಣು ನಾಮಾಧಿಕ ಜಾಲೀಲೆ ಸಾಲಿಗ್ರಾಮ ಗಣೇಶ್ ಶೆಣೈಂಗೆಲೆ ಅಪಾರ ಸಾಧನೆಕ ವರೇನ ತಾನ್ನಿ ಶ್ಲಾಘನ ಕೆಲ್ಲಿ.
ಸುರವೇಕ ವಿದುಷಿ ಶ್ರೀಮತಿ ನೇತ್ರಾವತಿ ಸಾಯಿಪ್ರಕಾಶ್ ತಾನ್ನಿ ಪ್ರಾರ್ಥನಾ ಮ್ಹಳ್ಳೆ. ಶ್ರೀಮತಿ ಪುಷ್ಪ ಮಂಜುನಾಥ್ ತಾನ್ನಿ ಯೆವಕಾರ ಕೆಲ್ಲಿ. ಕಲಾಕುಂಚಾಚೆ ಸಂಸ್ಥಾಪಕ ಜಾಲೀಲೆ ಸಾಲಿಗ್ರಾಮ ಗಣೇಶ್ ಶೆಣೈ ತಾನ್ನಿ ಪ್ರಾಸ್ತಾವಿ ಉತ್ರ ಉಲಯಿಲಿ. ಕಲಾಕುಂಚ ಮಹಿಳಾ ವಿಭಾಗಾಚಿ ಸಂಸ್ಥಾಪಕ ಶ್ರೀಮತಿ ಜ್ಯೋತಿ ಗಣೇಶ್ ಶೆಣೈ ತಾನ್ನಿ ವೇದಿಕೆರಿ ಉಪಸ್ಥಿತ ವ್ಹರಲೀಲೆ. ಕವಿಯತ್ರಿ, ಸಾಹಿತಿ ಶ್ರೀಮತಿ ಶೈಲಾ ವಿನೋದ್ ದೇವರಾಜ ತಾನ್ನಿ ಸ್ವರಸಂಚಾಲನ ಕೆಲ್ಲಿ. ಅಖೇರಿಕ ಕಲಾಕುಂಚಾಚೆ ಪ್ರಧಾನ ಕಾರ್ಯದರ್ಶಿ ಕೆ.ಸಿ. ಉಮೇಶ್ ತಾನ್ನಿ ಆಬಾರ ಮಾನಲೆ.