ಜಿ ಎಸ್ ಬಿ ಸಮಾಜ ಹಿತ ರಕ್ಷಣಾ ವೇದಿಕೆ (ರಿ .)ಉಡುಪಿ ಜಿಲ್ಲೆ ಹಾಂಗೆಲೆ ನೇತೃತ್ವಾರಿ ಬ್ರಹ್ಮಾವರ ತಾಲೂಕು ಉಪ್ಪೂರಾಂತು ೧.೧೧ ಎಕ್ರೆ ಜಾಗೆಂತು ನಿರ್ಮಾಣ ಜಾವ್ಚೆ ” ವಯೋವಂದನ ಆತಿಥ್ಯ ಗೃಹ” ಯೋಜನಾ ವಯೋವೃದ್ಧಾಂಗೆಲೆ ಸಂಧ್ಯಾಕಾಲಾಚೆ ಆಸರ ಜಾವಚೆ ಆಸ್ಸುನು, ಹೇ ನಿರ್ಮಾಣ ಕಾರ್ಯ ಆನಿ ತಾಜ ನಂತರ ನಿರ್ವಹಣೆಕ ವರೇನ ಸಮಸ್ತ ಜಿ.ಎಸ್.ಬಿ. ಸಮಾಜಾಚೆ ಸಹಭಾಗಿತ್ವ ಅತ್ಯಗತ್ಯ. ಜಿ ಎಸ್ ಬಿ ಸಮಾಜ ಹಿತ ರಕ್ಷಣಾ ವೇದಿಕೆ ಘೆಲೀಲೆ ೧೪ ವರ್ಷಾಚಾನ ಸಮಾಜ ಸಂಘಟನ ಆನಿ ಸಮಾಜಮುಖಿ ಕಾರ್ಯಾಂ ಮುಖಾಂತರ ಸಮಾಜಾಚೆ ಸರ್ವ ಲೋಕಾಂಗೆಲೆ ಮ್ಹೋಗು, ವಿಶ್ವಾಸವನ್ನು ಜೊಡಲೀಲೆ ಆಸ್ಸಾ, ಸಕ್ಕಡ ಅಡ್ಡಿ, ಆಡಬಳ, ಸವಾಲ ಎದೂರ್ಸುನು ಸಮಾಜಾಂತು ಗರಜ ಆಸ್ಸುಚೆ ಮ್ಹಾಲ್ಗಡ್ಯಾಂಕ ತಾಂಗೆಲೆ ಮಾಂತಾರ್ಪಣಾಂತು ಸಮಾಧಾನಾಂತು ವಾಂಚೆಕ ಸಮಾಧಾನಾಚೆ ಇಮಾರತ್ತಾಚೆ ನಿರ್ಮಾಣ ಆನಿ ಯಶಸ್ವಿ ಕಾರ್ಯನಿರ್ವಹಣಾ ಸಾಧ್ಯ ಜಾವ್ಚೆ ಆಸ್ಸಾ ಮ್ಹೊಣು ಶ್ಲಾಘನ ಕೆಲ್ಲಿ. ಹೇ ಯೋಜನೆಕ ವೈಯುಕ್ತಿಕ ಜಾವ್ನು ಆನಿ ಉಡುಪಿ ಶ್ರೀ ಲಕ್ಷ್ಮಿ ವೆಂಕಟೇಶ ದೇವಳಾಚೆ ತರಪೇನಿ ಸಂಪೂರ್ಣ ಸಹಕಾರ ಆನಿ ಸಹಭಾಗಿತ್ವ ದಿತ್ತ ಮ್ಹೊಣು ಉಡುಪಿ ಶ್ರೀ ಲಕ್ಷ್ಮಿ ವೆಂಕಟೇಶ ದೇವಳಾಚೆ ನೂತನ ವಿಶ್ವಸ್ಥ ಜಾಲೀಲೆ ಶ್ರೀ ಗುಜ್ಜಾಡಿ ಪ್ರಭಾಕರ್ ನಾಯಕ್ ತಾನ್ನಿ ಭರ್ವಸ ದಿಲ್ಲಿ. ತಾನ್ನಿ ಜೂನ್ ೨೮ ಆಯ್ತಾರು ಸಾಂಜವಾಳಾ ಉಡುಪಿಚೆ ಶ್ರೀ ಪದ್ಮಾವತಿ ಸಭಾಭವನಾಂತು ನಿರ್ಮಾಣ ಯೋಜನೆಚೆ ವಿವಿಧ ಸಮಿತಿಂಚೆ ರಚನಾ ಆನಿ ಸಮಾಲೋಚನಾ ಸಭೆ ಉದ್ಘಾಟನ ಕೊರನು ಉಲಯತಾಶ್ಶಿಲೆ.
ಉಡುಪಿಯ ತ್ರಿಶಾ ವಿದ್ಯಾ ಕಾಲೇಜಾಚೆ ಸಂಸ್ಥಾಪಕ ಸಿಎ ಗೋಪಾಲಕೃಷ್ಣ ಭಟ್ ಆನಿ ಮೂಡಬಿದ್ರೆ ವಿಜಯ್ ಕುಮಾರ್ ಶೆಣೈ ತಾನ್ನಿ ವಯೋವಂದನ ಯೋಜನೆಚೆ ಕಟ್ಟಡ ನಿರ್ಮಾಣಾಚೆ ಪೂರ್ವಭಾವಿ ಸಿದ್ಧತಾ, ಯೋಜನೆಚೆ ನಿರ್ವಹಣೆಚೆ ಖರ್ಚಾಚೆ ವಿವರಗ ದೃಶ್ಯ ಶ್ರಾವ್ಯ ಮಾಧ್ಯಮ ಮುಖಾಂತರ ಸಭೆಕ ಕಳಯ್ಲೆ.
ವೆಗವೆಗಳೆ ಸಮಿತಿ ರಚನಾ : ಹೇಂಚಿ ವೇಳ್ಯಾರಿ ವಯೋವಂದನ ಕಟ್ಟಡ ನಿರ್ಮಾಣ ಯೋಜನೆಚೆ ನಿರ್ಮಾಣ ಸಮಿತಿ ಅಧ್ಯಕ್ಷ ಜಾವ್ನು ಬೆಂಗಳೂರ್ಚೆ ಮಹಾಲಸಾ ಎಲೆಕ್ಟ್ರಿಕಲ್ ಹಾಜ್ಜೆ ಮಾಲಕ ಜಾಲೀಲೆ ಮೂಡಬಿದ್ರೆ ಶ್ರೀ ವಿಜಯಕುಮಾರ್ ಶೆಣೈ, ಸಂಚಾಲಕ ಜಾವ್ನು ಕಾಪು ಹರೀಶ್ ನಾಯಕ್, ಶ್ರೀ ಕೆ.ಸಿ. ಕಾಮತ್, ಹಣಕಾಸು ಸಮಿತಿ ಆನಿ ಲ್ಯಾಕಪತ್ರಾಚೆ ಉಸ್ತುವಾರಿ ಸಮಿತಿ ಅಧ್ಯಕ್ಷ ಸಿಎ ಗೋಪಾಲಕೃಷ್ಣ ಭಟ್, ಗೌರವ ಸಲಹೆಗಾರ ಜಾವ್ನು ಸಿಎ ಎಸ್ಎಸ್ ನಾಯಕ್ ಮಂಗಳೂರು, ಆನಿ ಸಂಚಾಲಕ ಜಾವ್ನು ಶ್ರೀ ನಾಗೇಶ್ ಕಾಮತ್ ಆನಿ ಶ್ರೀ ಮೋಹನದಾಸ ಶಾನುಭಾಗ್, ಕಟ್ಟಡ ನಿರ್ಮಾಣ ಸಾಮಗ್ರಿ ಸಂಗ್ರಹಣ ಆನಿ ಉಸ್ತುವಾರಿ ಸಮಿತಿ ಸಂಚಾಲಕ ಜಾವ್ನು ಬೆಳ್ಮಣ್ ವೆಂಕಟರಾಯ ಕಾಮತ್ ಆನಿ ಮೂಡಬಿದ್ರೆ ರಘುವೀರ್ ಶೆಣೈ ಹಾಂಕಾ ಜವಾಬ್ದಾರಿ ವಾಂಟೂನು ದಿಲ್ಲೆ.
ಇಮಾರತ್ತ ಬಾಂದಕಾಮ ಕಾಮ್ಮಾಚೆ ಕಂತ್ರಾಟ(ಗುತ್ತಿಗೆ) ಬೆಳ್ಮಣ್ ಕಾಮಾಕ್ಷಿ ಕನ್ಸ್ಟ್ರಕ್ಷನ್ ನ ಶ್ರೀ ಸುಧೀರ್ ಕಾಮತ್ ತಾಂಕಾ ದಿಲ್ಲೆ.
ಮುಖೇಲ ಸೊಯರೆ ಜಾವ್ನು ಡಾ. ರಾಜ್ ಗೋಪಾಲ್ ಶೆಣೈ,ಉಡುಪಿ ಆನಿ ಮಂಗಳೂರ್ಚೆ ನಾಮಾಧಿಕ ಲೆಕ್ಕ ಪರಿಶೋಧಕ ಜಾಲೀಲೆ ಸಿಎ ಎಸ್ಎಸ್ ನಾಯಕ್ ತಾನ್ನಿ ಉಲಯಿಲೆ.
ವೇದಿಕೆರಿ ಉಡುಪಿಚೆ ಖ್ಯಾತ ಸರ್ಜನ್ ಡಾ. ಸುರೇಶ್ ಶೆಣೈ, ಕಲ್ಯಾಣಪುರ ಶ್ರೀ ವೆಂಕಟರಮಣ ದೇವಳಾಚೆ ವಿಶ್ವಸ್ಥ ಜಾಲೀಲೆ ಶ್ರೀ ಕೆ. ರಾಮರಾಯ ಕಿಣಿ, ಉಡುಪಿ ಶ್ರೀ ಲಕ್ಷ್ಮಿ ವೆಂಕಟೇಶ ದೇವಳಾಚೆ ವಿಶ್ವಸ್ಥ ಶ್ರೀ ಮಹೇಶ ಶೆಣೈ , ಯುವಕ ಮಂಡಳಿಚೆ ಅಧ್ಯಕ್ಷ ನಿತೇಶ್ ಶೆಣೈ, ಆನಿ ಕಲ್ಯಾಣಪುರ ಶ್ರೀ ವೆಂಕಟರಮಣ ದೇವಳಾಚೆ ಮಹಿಳಾ ಮಂಡಳಿ ಅಧ್ಯಕ್ಷ ಶ್ರೀಮತಿ ಸೀಮಾ. ಎಸ್. ಪೈ ಉಪಸ್ಥಿತ ವ್ಹರಲೀಲೆ.
ಸನ್ಮಾನ : ಜಿಎಸ್ಬಿ ಸಮಾಜ ಹಿತರಕ್ಷಣಾ ವೇದಿಕೆಚೆ ಪರಿಕಲ್ಪನಾ ಆನಿ ಸಂಯೋಜನೆಂತು ತಯ್ಯಾರ ಜಾಲೀಲೆ “ಡಾ .ಪಿ. ದಯಾನಂದ ಪೈ ಸಾರ್ಥಕ ಬದುಕಿನ ಸಾಕ್ಷಾತ್ಕಾರ ” ಮ್ಹಣ್ಚೆ ಪುಸ್ತಕಾಚೆ ಸಂಪಾದಕಿ ಜಾಲೀಲೆ ಕಾರ್ಕಳಾಚಿ ಪ್ರತಿಭಾನ್ವಿತ ಲೇಖಕಿ ಶ್ರೀಮತಿ ಪ್ರಜ್ವಲಾ ಶೆಣೈ ತಾಂಕಾ ಸನ್ಮಾನ ಕೊರನು, ಗೌರವಾರ್ಪಣ ಕೆಲ್ಲಿ.
ಸಮಾರಂಭಾಚೆ ಅಧ್ಯಕ್ಷಪಣ ಘೆತ್ತಿಲೆ ವೇದಮೂರ್ತಿ ಶ್ರೀಚೇಂಪಿ ರಾಮಚಂದ್ರ ಅನಂತ ಭಟ್ಟ ತಾನ್ನಿ, ವೇದಿಕೆಚೆ ಮಹತ್ವಕಾಂಕ್ಷಿ ಯೋಜನೆಕ ಸಮಾಜಾಕ ದಾನಿ ಲೋಕಾನಿ ಇತ್ತುಲೆ ಭಿತ್ತರೀಚಿ ಚಾಂಗ ಪ್ರತಿಕ್ರಿಯೆ ದಾಖಯಲಾ. ಜಾಲೀಲೆ ತಿತ್ತುಲೆ ಬೆಗ್ಗಿ ನಿರ್ಮಾಣ ಕಾರ್ಯ ಸಂಪೂರ್ಣ ಜಾವ್ನು ಸಮಾಜಾಚೆ ಮ್ಹಾಲ್ಗಡ್ಯಾಂಗೆಲೆ ಜೀವನಾಕ ಹೇ ಯೋಜನಾ ಆಸರಾ ಜಾಂವೊ ಮ್ಹೊಣು ದೇವು ಬರೆಂ ಕೊರೊಂ ಮ್ಹಳ್ಳೆ.
ಜಿಎಸ್ಬಿ ಸಮಾಜ ಹಿತರಕ್ಷಣಾ ವೇದಿಕೆ ಅಧ್ಯಕ್ಷ ಶ್ರೀ ಜಿ. ಸತೀಶ್ ಹೆಗಡೆ ಹಾನ್ನಿ ಯೆವಕಾರ ಕೆಲ್ಲಿ, ವೇದಿಕೆಚೆ ಸಂಚಾಲಕ ಜಾಲೀಲೆ ಆರ್. ವಿವೇಕಾನಂದ ಶೆಣೈ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲಯಿಲೆ. ವೇದಿಕೆಚೆ ಪ್ರಧಾನ ಕಾರ್ಯದರ್ಶಿ ಸಾಣೂರು ನರಸಿಂಹ ರಾಮತ್ ತಾನ್ನಿ ಕಾರ್ಯಕ್ರಮ ನಿರೂಪಣ ಕೆಲಯಾರಿ,ಕಾಪು ಹರೀಶ್ ನಾಯಕ್ ತಾನ್ನಿ ಆಬಾರ ಮಾನಲೆ.
- ವರದಿ : ದೇವದಾಸ ಕಾಮತ