ಗಂಗೊಳ್ಳಿಚೆ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಂತು ಪುರುಷೋತ್ತಮ ಮಾಸಾಚೆ ಪ್ರಯುಕ್ತ ಆಯೋಜನ ಕೆಲೀಲೆ ಮಾಸಾವಧಿ ಅಖಂಡ ಭಜನಾ ಮಹೋತ್ಸವಾಕ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ದೀಪ ಪ್ರಜ್ವಲನೆ ಬರಶಿ ದಿನಾಂಕ. ೧೭-೦೫-೨೦೨೬ ದಿವಸು ಚಾಲನಾ ದಿಲ್ಲಿ.
ಸಕ್ಕಾಣಿ ಶ್ರೀ ವೆಂಕಟರಮಣ ದೇವಾಕ ವಿಶೇಷ ಪೂಜಾ ಪಾವೋನು ಶ್ರೀ ದೇವಾಲೆ ಸನ್ನಿಧಾನಾಂತು ವಿಶೇಷ ದೇವಮಾಗಣಿ ಪಾವಯಿಲೆ. ಮಾಸಾವಧಿ ಅಖಂಡ ಭಜನಾ ಮಹೋತ್ಸವಾಚೆ ವೆಗವೆಗಳೆ ಧಾರ್ಮಿಕ ಕಾರ್ಯಕ್ರಮ ದೇವಳಾಚೆ ಪ್ರಧಾನ ಅರ್ಚಕ ಎಸ್.ವೆಂಕಟರಮಣ ಆಚಾರ್ಯ ಆನಿ ತಾಂತ್ರಿಕ ಜಿ.ವಸಂತ ಭಟ್ ತಾಂಗೆಲೆ ನೇತೃತ್ವಾರಿ ಚಲ್ಲೆ.
ಪುರುಷೋತ್ತಮ ಮಾಸಾಚೆ ಪ್ರಯುಕ್ತ ಸಕ್ಕಾಣಿಪುರುಷೋತ್ತಮ ಅಷ್ಟೋತ್ತರ ತಾಕೂನು ಶ್ರೀದೇವಾಕ ೧೦೮ ಪ್ರದಕ್ಷಿಣಾ ಸೇವಾ, ಧೋಂಪಾರಾ ಅಪೂಪದಾನ ದೀಪದಾನ ಸೇವಾ, ಉಭಯ ದೇವಾಂಕ ಮಹಾಪೂಜಾ, ಮಹಾಸಮಾರಾಧನಾ, ಸಾಂಜವಾಳ ಉಭಯ ದೇವಾಲೆ ಸನ್ನಿಧಿಂತು ದೀಪಾರಾಧನ ಸೇವಾ ಆನಿ ಇತರ ಧಾರ್ಮಿಕ ಕಾರ್ಯಕ್ರಮ ಸಂಪನ್ನ ಜಾಲ್ಲೆ.
ದೇವಳಾಚೆ ಆಡಳಿತ ಮೊಕ್ತೇಸರ ಎನ್.ಸದಾಶಿವ ನಾಯಕ್, ಜಿ.ವೆಂಕಟೇಶ ನಾಯಕ್, ಆಡಳಿತ ಮಂಡಳಿ ಸದಸ್ಯ, ಪುರೋಹಿತ, ವೈದಿಕ, ಗಾಂವ್ಚೆ ಧಾ ಸಮಸ್ತ, ಗಾಂವ್ಚೆ, ಪರಗಾಂವ್ಚೆ ಸಮಾಜ ಬಾಂಧವ, ಸೇವಾದಾರ ಆದಿ ಲೋಕ ಉಪಸ್ಥಿತ ವ್ಹರಲೀಲ.
ಜೂ. ೧೬ ದಿವಸು ಸಕ್ಕಾಣಿ ದೀಪ ವಿಸರ್ಜನೆ ಬರಶಿ ಮಾಸಾವಧಿ ಅಖಂಡ ಭಜನಾ ಮಹೋತ್ಸವ ಮುಕ್ತಾಯ ಜಾತ್ತಾ. ಹೇ ಮಹೋತ್ಸವಾಂತು ರಾಜ್ಯ ಆನಿ ಭಾಯ್ಚೆರಾಜ್ಯ ತಾಕೂನು ವೆಗವೆಗಳೆ ಭಜನಾ ಮಂಡಳಿ ತಶೀಚಿ ಕಲಾವಿದಾನಿ ಯವ್ನು ಭಜನಾ ಸೇವಾ ಸಮರ್ಪಣ ಕರತಾತಿ.
ಮಲ್ಯರಮಠ ಶ್ರೀ ವೆಂಕಟರಮಣ ಭಜನಾ ಮಂಡಳಿಉದ್ಘಾಟನ
ಹಾಜ್ಜೆ ಫುಳ್ದೀಸು ಗಂಗೊಳ್ಳಿಚೆ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಚೆ ಮೊಕ್ಕಾಂ ಆಶ್ಶಿಲೆ ಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾನಿಂ ಮಲ್ಯರಮಠ ಶ್ರೀ ವೆಂಕಟರಮಣ ಭಜನಾ ಮಂಡಳಿಉದ್ಘಾಟನ ಕೆಲ್ಲಿ. ಹೇ ವೇಳ್ಯಾರಿ ಆಪಣೇಲೆ ಆಶೀರ್ವಚನಾಂತು ಪೂಜ್ಯ ಸ್ವಾಮ್ಯಾನಿಂ “ದೇವಾಲೆ ಸೇವಾ ಕೊರಚೆ ಸದುದ್ದೇಶಾನಿ ಸೂರು ಜಾಲೀಲೆ ಶ್ರೀ ವೆಂಕಟರಮಣ ಭಜನಾ ಮಂಡಳಿ, ದೇವಾಲೆ ವಯ್ರಿ ಭಕ್ತಿ, ಶ್ರದ್ಧಾ, ವಿಶ್ವಾಸ ಘೇವ್ನು ನಿರಂತರ ಜಾವ್ನು ಭಕ್ತಿನಿ ಭಜನಾ ಮುಖಾಂತರ ದೇವಾಲೊ ಸೇವಾ ಕೊರಚೆ ತಶ್ಶಿ ಜಾವ್ಕಾ, ಹಾಜೇನಿ ಸಕಡ್ಯಾಂಕ ಚಾಂಗ ಜಾತ್ತಾ, ದೇವಾಲೆಂ ಆಶೀರ್ವಾದ ಕೃಪೆನಿ ಸನ್ಮಂಗಲ ಜಾತ್ತಾ ಮ್ಹಳ್ಳೆ.
ಹೇ ವೇಳ್ಯಾರಿ ದೇವಳಾಚೆ ಆಡಳಿತ ಮೊಕ್ತೇಸರ ಎನ್.ಸದಾಶಿವ ನಾಯಕ್, ಜಿ.ವೆಂಕಟೇಶ ನಾಯಕ್, ಯು. ನಾರಾಯಣ ಪೈ, ಡಾ.ಕಾಶೀನಾಥ ಪೈ, ಜಿ.ನಿತ್ಯಾನಂದ ಶೆಣೈ, ಜಿ.ವಿಜಯ ಶೆಣೈ, ಬಾಲಕೃಷ್ಣ ಶೆಣೈ, ರಾಮಕೃಷ್ಣ ಶೆಣೈ, ಜಿ.ಗಣಪತಿ ನಾಯಕ್, ವಿಜೇಶ ಭಂಡಾರ್ಕಾರ್, ಎಂ.ಗಣೇಶ ಪೈ, ಮನೋಹರ ಶೆಣೈ, ಬಿ.ಗಣೇಶ ಶೆಣೈ, ಮಂಡಳಿ ಸದಸ್ಯ, ಭಜಕ ಉಪಸ್ಥಿತ ವ್ಹರಲೀಲೆ.