ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ತರಪೇನಿ, ಅಕಾಡೆಮಿ ಸಭಾಂಗಣಾಂತು ಜೂನ್ ೦೬, ೨೦೨೬ ಕಕಾವ್ಯಾಂ ವ್ಹಾಳೊ-೧೫’ ಶೀರ್ಷಿಕೆಚೆ ಕವಿಗೋಷ್ಟಿ ಚಲ್ಲೆ. ಅಕಾಡೆಮಿ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ತಾನ್ನಿ ಕಾರ್ಯಾವಳಿಚೆ ಅಧ್ಯಕ್ಷ ಪಣ ಘೆತ್ತಿಲೆ. ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲೋನು ಕೊಂಕಣಚೆ ಸಂಗೀತ, ಸಾಹಿತ್ಯ, ನಾಟಕ ತಶೀಚಿ ವೆಗಳೆ ಸಾಂಸ್ಕೃತಿಕ ಆನಿ ಶೈಕ್ಷಣಿಕ ಕ್ಷೇತ್ರಾಂತು ಸಾಧನಾ ಕೆಲೀಲೆ ಕೊಂಕಣಿ ಸಮುದಾಯಾಚೆ ಮನುಷ್ಯಾಕ ಗುರ್ತು ಕೊರನು ತಾಂಗೆಲೆ ಕಾರ್ಯ ಕ್ಷೇತ್ರಾಂತು ತಾನ್ನಿ ಕೆಲೀಲೆ ಸಾಧನೆ ಖಾತ್ತಿರಿ ಸನ್ಮಾನ ಕೊರಚೆ ಕಾಮ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಕರತಾ ಆಸ್ಸಾ. ಮ್ಹೊಣು ಆನಂದ ವ್ಯಕ್ತ ಕೊರನು, ಜಮೀಲೆ ಸಕಡ್ಯಾಂಕ ಯೆವಕಾರ ಕೆಲ್ಲಿ.
ಮುಖೇಲ ಸೊಯರೆ ಜಾಲೀಲೆ ಸಂತ ಅಲೋಶಿಯಸ್ (ಪರಿಗಣಿತ ವಿಶ್ವವಿದ್ಯಾಲಯ), ಮಂಗಳೂರು ಹಾಂಗಾಚೆ ಅಸಿಸ್ಟೆಂಟ್ ಪ್ರೊಫೆಸರ್ ಡಾ. ವಿಜಯಲಕ್ಷ್ಮೀ ನಾಯಕ್ ತಾನ್ನಿ ಉಲೋನು ಕೊಂಕಣಿ ಏಕ ಮಹಾನ್ ಭಾಸ. ಭಾರತ ಸಂವಿಧಾನಾಚೆ ೮ ವೇಂ ಪರಿಚ್ಛೇದಾಂತು ಆಸ್ಸಾ ಆನಿ ಭಾರತಾಚೆ ಅಧಿಕೃತ ಜಾವ್ನು ಮಾನ್ಯತೆ ಘೆತ್ತಿಲೆ ಭಾಸ ಜಾವ್ನಾಸ್ಸ ಮ್ಹೊಣು ಕೊಂಕಣಿ ಭಾಷೆಚೆ ವ್ಹಡಪಣಾಚೆ ತಾರೀಪು ಕೆಲ್ಲೆ. ಕೊಂಕಣಿ ಅಕಾಡೆಮಿ ಸನ್ಮಾನ ಸ್ವೀಕಾರ ಕೊರನು ಉಲಯಿಲಿ ಡೆಪ್ಯೂಟಿ ಚೀಫ್ ಟ್ರಾಫಿಕ್ ವಾರ್ಡನ್ ಜಾವ್ನಾಸ್ಸುಚೆ ಶ್ರೀ ಫ್ರಾನ್ಸಿಸ್ ಮ್ಯಾಕ್ಸಿಮ್ ಮೊರಾಸ್ ಹಾನ್ನಿಹೇ ಲೋಕಾಂತು ಜನ್ಮಿಲೆ ಮಾಗಿರಿ ಸಮಾಜಾಕ ಖಾಂಯತರಿ ಚಾಂಗ ಕಾಮ ಕೊರನು, ದುಸರ್ಯಾಂಕ ಉಪಕಾರಿ ಜಾವ್ನಾಸ್ಸುಕಾ ಮ್ಹಣ್ಚೆ ಆಪೋವ್ಣಿ ದಿಲ್ಲಿ.
ಖ್ಯಾತ ಕವಯಿತ್ರಿ ಶ್ರೀಮತಿ ಫೆಲ್ಸಿ ಲೋಬೊ ದೆರೆಬಯ್ಲ್ ತಾನ್ನಿ ಕವಿಗೋಷ್ಟಿ ಚಲೋನು ದಿಲ್ಲಿ. ಕವಿ, ಕಾವ್ಯಾ ಖಾತ್ತೀರಿ ಸವಿಸ್ತಾರ ವಿವರ ದಿಲ್ಲೆ. ವಲೇರಿಯನ್ ಮೊರಾಸ್ ತಾಕೊಡೆ, ಸ್ಮಿತಾ ಶೆಣೈ, ರೆಮಿ ಕಾಟಿಪಳ್ಳ, ಡಾ.ಫ್ಲಾವಿಯಾ ಕ್ಯಾಸ್ತೆಲಿನೊ, ಅನಿಲ್ ಜೆ. ಕುವೆಲ್ಲೊ, ರಾಧಿಕ ಪೈ, ಪೆದ್ರು ಪ್ರಭು ತಾಕೊಡೆ, ಮರ್ಲಿನ್ ಮಸ್ಕರೇನ್ಹಸ್, ಅಲ್ರೀಶಾ ರೊಡ್ರಿಗಸ್ ಆನಿ ಲವೀನ ದಾಂತಿ ಹಾನ್ನಿ ಆಪಣಾಂಗೆಲೆ ಕವಿತಾ ವಾಚನ ಕೆಲ್ಲಿ. ಅಕಾಡೆಮಿ ಸದಸ್ಯ ಶ್ರೀಮತಿ ಸಪ್ನಾ ಮೇ ಕ್ರಾಸ್ತಾ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೊರನು, ಆಬಾರ ಮಾನಲೆ. ಸದಸ್ಯ ಜಾಲೀಲೆ ಶ್ರೀ ನವೀನ್ ಲೋಬೊ ಉಪಸ್ಥಿತ ವ್ಹರಲೀಲೆ.