“ಜೀವನಾಂತು ಸಂತೃಪ್ತಿ ಪಾವಚೇ ನಿಮಿತ್ತ್ಯಾನಿ ಜೀವನ ಸಾರ್ಥಕ ಜಾತ್ತಾ. ಚಾತುರ್ಮಾಸಾಚೆ ಸುಮಾರ ದೋನ ಮ್ಹಹಿನೋ ಕಾಳ ಮಸ್ತ ಲೋಕ ತ್ಯಾ ಕಾರಣಾನಿ ಖಂಚೆ ಖಂಚಕಿ ಗಾಂವ್ಚಾನ ರಾಮಸೇವಕಾ ಆನಿ ರಾಮಸೇವಿಕಿನಿ ಪರ್ತಗಾಳಿಕ ಯವ್ನು ನಿಃಸ್ವಾರ್ಥಪಣಾನಿ ಸೇವಾ ಪಾವಯಿಲೆ. ತಾಂಕ ಸಕಡ್ಯಾಂಕ ಪರಮಾತ್ಮು ತಾಜ್ಜೆ ಫಲ ದೀವ್ನೂ ದಿತ್ತಾ ಅಶ್ಶಿ ಮ್ಹೊಣು ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾನಿ ಸಾಂಗ್ಲೆ. ತಾನ್ನಿ ದಿನಾಂಕ ೨೭-೦೯-೨೦೨೬ ದಿವಸು ಸಾಂಜವಾಳಾ ಅವಂದೂ ವರಸಾಚೆ ಚಾತುರ್ಮಾಸ ವ್ರತಾಚೆ ಸಮಾಪ್ತಿ ಜಾಲೀಲೆ ಖಾತ್ತಿರಿ ಚಲೀಲೆ ವಿಜೃಂಭಣೆಚೆ ದಿಗ್ವಿಜಯ ಮೆರ್ವಣಿಗೆ ಉಪರಾಂತ ಜಮೀಲೆ ಸಭಾ ಕಾರ್ಯಕ್ರಮಾಂತು ಆಶೀರ್ವಚನ ದಿತ್ತಾ ಆಶ್ಶಿಲೆ
.
ಆಮ್ಮಿ ಆಶಾ ಪೂರ್ಣ ಜಾಲೀಲ ತೆದ್ನಾ ಮನಾಕ ಖೂಶಿ ಜಾತ್ತಾ ತ್ಯಾಂಚಿ ಸಂತೃಪ್ತಿ ಜಾಲೀಲ ತೆದ್ದನಾ ಮನ ಭೊರನು ಯತ್ತಾ. ಜೀವನಾಂತು ಮೆಳ್ಚೆ ದೇವು, ಸ್ವಾಮ್ಯಾಂಗೆಲೆ ಸೇವೆಚೆ ಕಾರ್ಯ ಕೊರಚೆ ಸರ್ವ ಶ್ರೇಷ್ಠ ಕಾರ್ಯ, ತಾಜೇನ ಅತ್ಯುತ್ತಮ ಪ್ರತಿಫಲ ಮೆಳ್ತಾ ಮ್ಹೊಣು ಪೂಜ್ಯ ಸ್ವಾಮ್ಯಾನಿ ಉದಾಹರಣೆ ಬರಶಿ ಸಾಂಗ್ಲೆ.
ವೇದಘೋಷಾ ಭರಿಸಿ ಸಭಾ ಕಾರ್ಯಕ್ರಮು ಆರಂಭ ಜಾಲ್ಲೆ. ಹೇಂಚಿ ಸಂದರ್ಭಾರಿ ಚಾತುರ್ಮಾಸ ವೇಳ್ಯಾರಿ ನ್ವಿಃಸ್ವಾರ್ಥಪಣಾನಿ ಸೇವಾ ಪಾವಯಿಲೆ, ಚಾತುರ್ಮಾಸ ಖಾತ್ತಿರಿ ಪ್ರತಿಫಲಾಕ್ಷಾಂಕ ನಾಶಿ ಮೊಲಾಧಿಕ ಮದದ್ ದಿಲೀಲೆ ಮಠಾಚೆ ನಿಷ್ಠಾವಂತ ಭಕ್ತಾಂಕ ಪೂಜ್ಯ ಸ್ವಾಮ್ಯಾನಿ ಆಶೀರ್ವಾದ ಪೂರ್ವಕ ಸನ್ಮಾನ ಕೆಲ್ಲೆ. ಹಾಜ್ಜೆ ಪಯ್ಲೆ ಮೃತ್ತಿಕಾ ವಿಸರ್ಜನಾ, ಚಾತುರ್ಮಾಸ ಕಮಿಟಿ ತರಪೇನಿ ಪೂಜ್ಯ ಸ್ವಾಮ್ಯಾಂಗೆಲೆ ಪಾದ್ಯಪೂಜಾ, ಪೂಜ್ಯ ಸ್ವಾಮ್ಯಾಂಗೆಲೆ ಅಮೃತ ಹಾತ್ತಾನಿ ದೀಪ ಪ್ರಜ್ವಲನ ಆದಿ ಧಾರ್ಮಿಕ ಕಾರ್ಯಕ್ರಮು ಚಲ್ಲೊ.
ದಿಗ್ವಿಜಯೋತ್ಸವಾಂತು ವೆಗವೆಗಳೆ ಟ್ಯಾಬ್ಲೋ, ವಾಜ್ಜಪ, ನಾಚ ಚೇಲ್ನೂ ತ್ಯಾ ವಿಜೃಂಭಣೆರಿ ಘಡ್ಲೆ. ಗೋಂಯ್ಚೆ ಭಕ್ತವೃಂದಾ ಭರಶಿ ಕರ್ನಾಟಕ, ಮಹಾರಾಷ್ಟ್ರ, ಕೇರಳ, ದೆಹಲಿ ಇತ್ಯಾದಿ ಗಾಂವ್ಚಾನ ಆಯಲೀಲೆ ಅಪಾರ ಭಕ್ತ ಹೇ ವೇಳ್ಯಾರಿ ವ್ಹಡ ಅಂಕಡ್ಯಾರಿ ಜಮೀಲೆ. ವೇದಿಕೇರಿ ಮಠ ಕೇಂದ್ರ ಕಮಿಟಿಚೆ ಉಪಾಧ್ಯಕ್ಷ ಶ್ರೀ ಆರ್. ಆರ್. ಕಾಮತ, ಶ್ರೀ ದಿನೇಶ ಪೈ, ಶ್ರೀ ವಿಜಯ ಸರ್ದೇಸಾಯಿ ಆದಿ ಗಣ್ಯ ಉಪಸ್ಥಿತ ವ್ಹರಲೀಲೆ.