ಭಾರತೀಯ ಚಿತ್ರರಂಗಾಂತ ಪಾಂಚ ದಶಕಾಂಚೆಂ ಅದ್ವಿತೀಯ ಕಲಾಸೇವಾ ಪಾವಯಿಲೊ; ಕೊಂಕಣಿ ಮಾತೃಭಾಷೆಚೊ ಅಭಿಮಾನಾಚೆ ಕಲಾವಂತ, ಹರ್ಯೇಕ ಕೊಂಕಣಿಗಾನಿ ಅಭಿಮಾನ ಪಾವ್ಕಾ ಜಾಲೀಲೆಂ `ಕಲಾರತ್ನ ಶ್ರೀ ಅನಂತನಾಗ ಹಾನ್ನಿ ಕೊಂಕಣಿಗಾಲೆ ಗರ್ವ, ಕೀರ್ತಿ ದೇಶಾಚೆ ದಶದಿಕ್ಕಾಂತು ಪಸರಚೆ ವರಿ ಕೆಲ್ಲ್ಯಾ.
ಕರ್ಣಾಟಕಾಚ್ಯಾ ಕರಾವಳಿ ಭಾಗಾಂತ ಜನ್ಮ ಘೆವ್ನ್, ಕೊಂಕಣಿ ಮಾತೃಭಾಷೆಚೆಂ ಸಂಸ್ಕಾರ ಮನಾಂತ ಜಪಲೊ, ಕನ್ನಡ ಚಿತ್ರರಂಗಾಂತ ಅಪೂರ್ವ ಛಾಪ ಆಸ್ಸುಚೆ ವರಿ ಕೇಲೀಲೆ, ತಶೀಚಿ ಭಾರತೀಯ ಚಿತ್ರರಂಗಾಂತ ಆಪ್ಲೆಂ ಪ್ರತಿಭೆಚೊ ವೇಗ್ಳೊ ಸಾಮರ್ಥ್ಯ ದಾಕೋನು ದಿಲೀಲೊ, ವಿವಿಧ ಕಲಾಕ್ಷೇತ್ರಂತು ಬಹುಮುಖ ಪ್ರತಿಭೆಚೆಂ ನಾಂವ್ ಮ್ಹಳಯಾರ ತ್ಯಾ ಅನಂತ ನಾಗ್. ಕಲಾವಿದ ಜಾವ್ನು ಮಾತ್ರ ನ್ಹಂಹಿ ರಾಜಕೀಯ ಕ್ಷೇತ್ರಾಂತೂ ತಾಂಗೆಲೆ ನಾಂವ ಆಸ್ಸಾ.
ಪನ್ನಾಸ ವರ್ಷಾಂ ಪಶಿ ಚ್ಹಡ ಕಾಳ ಭಾರತೀಯ ಚಿತ್ರರಂಗಾಚಿ ಸೇವಾ ಪಾವೋನು, ಅಭಿನಯಾಚ್ಯಾ ಸೂಕ್ಷ್ಮತೆಕ್, ಸಹಜತೆಕ್ ಆನಿ ನೈಸರ್ಗಿಕ ಅಭಿನಯಾಕ್ ವೇಗ್ಳೆಂ ಸ್ಥಾನ ದಿವ್ಪಾಚ್ಯಾ ಕಲಾವಂತಾಕ್ ಭಾರತ ಸರ್ಕಾರಾಚ್ಯಾ ವತಿನ ೨೦೨೪ ಸಾಲಾಚೊ ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ಜಾಹೀರ ಜಾಲೊ. ೨೨ ಸೆಪ್ಟೆಂಬರ್ ೨೦೨೬ ದಿಸಾ ಗುಜರಾತಾಚ್ಯಾ ಏಕ್ತಾ ನಗರಾಂತ ಜಾಲ್ಯಾ ೭೨ವ್ಯಾ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಸಮಾರಂಭಾಂತ ರಾಷ್ಟ್ರಪತಿ ದ್ರೌಪದಿ ಮುರ್ಮು ಹಾಂಗೆಲೆ ಹಸ್ತಾನ್ ಅನಂತ ನಾಗ್ ಹಾಂಕಾ ಹ್ಯಾ ಪ್ರತಿಷ್ಠಿತ ಪ್ರಶಸ್ತಿ ಪಾವಿತ ಜಾಲ್ಲೆ.
ಹ್ಯಾ ಕೇವಳ್ ಏಕಳೋ ನಟಾಲೊ ಸನ್ಮಾನ್ ನ್ಹಯ್; ಸಮಸ್ತ ಕೊಂಕಣಿ ಭಾಷಿಕ ಸಮಾಜಾಂತಲ್ಯಾ ಏಕಾ ಪ್ರತಿಭಾವಂತ ಕಲಾವಂತಾಚ್ಯಾ ದೀರ್ಘ ಕಲಾಯಾತ್ರೆಕ್ ಮೆಳ್ಳೆಲ್ಲೊ ರಾಷ್ಟ್ರೀಯ ಗೌರವ್ ಆಸಾ.
ಕೊಂಕಣಿ ಸಾರಸ್ವತ ಕುಟುಂಬಾಂತ ಜಾಲ್ಲೊ ಜನ್ಮ
ಅನಂತ ನಾಗ್ ಹಾಂಚೆಂ ಪೂರ್ಣ ನಾಂವ್ ಅನಂತ ನಾಗರಕಟ್ಟೆ. ೪ ಸೆಪ್ಟೆಂಬರ್ ೧೯೪೮ ದಿಸಾ ಉತ್ತರ ಕನ್ನಡ ಜಿಲ್ಹ್ಯಾಚ್ಯಾ ಶಿರಾಲಿ ಹ್ಯಾ ಗಾಂವಾಂತ ತಾಂಚೊ ಜನ್ಮ ಜಾಲೊ. ತಾಂಚೊ ಕುಟುಂಬ್ ಕೊಂಕಣಿ ಭಾಷೆಚೆಂ ಸಾರಸ್ವತ ಕುಟುಂಬ್. ಬಾಲ್ಯಕಾಳಾಂತ ಉತ್ತರ ಕನ್ನಡ ಆನಿ ದಕ್ಷಿಣ ಕನ್ನಡ ಪ್ರದೇಶಾಂತ್ಲ್ಯಾ ಆಧ್ಯಾತ್ಮಿಕ ವಾತಾವರಣಾಂತ ತಾಂಚಿ ಚರಣಪಣ ಜಾಲಿ.
ತಾಂಚ್ಯಾ ಆವಯಿ ಆನಂದಿ ಹಾಂಚೆಂ ಜೀವನ ಆಧ್ಯಾತ್ಮಿಕ ಸಂಸ್ಕಾರಾಂತ್ ವಾಡ್ಲೆಂ. ಅನಂತ ನಾಗ್ ಹಾಂಚ್ಯಾ ಚರಡಪಣಾಚೆ ಉದ್ಗಾಸಾಂತು ಆನಂದಾಶ್ರಮ್ ಆನಿ ಚಿತ್ರಾಪುರ ಮಠಾಚೆಂ ಸಂಸ್ಕಾರ್ ಮಹತ್ವಾಚೆಂ ಆಶಿಲ್ಲೆಂ. ತಾಂಚೆಂ ಕುಟುಂಬ್, ಬಾಲ್ಯಾಚೆಂ ವಾತಾವರಣ್ ಆನಿ ಕರಾವಳಿ ಸಂಸ್ಕೃತಿ ಹಾಂಚ್ಯಾ ವ್ಯಕ್ತಿತ್ವಾಚ್ಯಾ ಉದರ್ಗತಿಕ ಮಹತ್ವಾಚೊ ಭಾಗ್ ಜಾಲೊ. ತಾಂಚೆಂ ಬಾಲ್ಯ ಶಿರಾಲಿ, ಹೊನ್ನಾವರ, ಭಟ್ಕಳ್ ಆನಿ ದಕ್ಷಿಣ ಕನ್ನಡಾಚ್ಯಾ ಪರಿಸರಾಂತ ಗೆಲ್ಲೆಂ. ಉಪರಾಂತ ತಾನ್ನಿ ಮುಂಬಯಿಕಂ ಶಿಕ್ಷಣ್ ಘೆವ್ಪಾಕ್ ಗೆಲ್ಲ್ಯಾ ಉಪರಾಂತ್, ತಾಂಕಾ ರಂಗಭೂಮಿಚೊ ಪರಿಚಯ್ ಜಾಲೊ. ನಾಟಕ್, ಸಾಹಿತ್ಯ್ ಆನಿ ಅಭಿನಯ್ ಹಾಂಚ್ಯಾ ಸಂಗಮಾಂತ ಅನಂತನಾಗ್ ಹಾಂಗೆಲೆ ಕಲಾಜೀವಿತ್ ಆಕಾರ್ ಘೆವಚಾಕಲಾಗ್ಲೆಂ.
ರಂಗಭೂಮಿತ್ಲ್ಯಾನ್ ಚಿತ್ರರಂಗಾಕ
ಚಿತ್ರರಂಗಾಂತ ಯೆವ್ಚ್ಯಾ ಪಯ್ಲ್ಯಾಂಚ್ ಅನಂತ ನಾಗ್ ರಂಗಭೂಮಿತ್ ಆಪ್ಲೆಂ ಅಭಿನಯ್ ಘಡಯ್ತಾಲೆ. ಕೊಂಕಣಿ, ಕನ್ನಡ, ಮರಾಠಿ ಆನಿ ಹಿಂದಿ ನಾಟಕಾಂತ್ ತಾನ್ನಿ ಅಭಿನಯ್ ಕೆಲೊ. ಸತ್ಯದೇವ ದುಬೆ, ಗಿರೀಶ್ ಕಾರ್ನಾಡ್ ಆನಿ ಇತರ ಪ್ರತಿಭಾವಂತ ರಂಗಕರ್ಮ್ಯಾಂಚ್ಯಾ ಸಹವಾಸಾಂತ ತಾಂಚ್ಯಾ ಅಭಿನಯಾಚೆಂ ರೂಪಾಂತರ್ ಜಾಲೆಂ.
ಅಭಿನಯ್ ಮ್ಹಣಲ್ಯಾರ್ ಕೇವಲ ಸಂಭಾಷಣ್ ಉಚ್ಚಾರೂನ್, ಭಾವ್ ಮುಖಾರ ಉಗ್ಡಾಯ್ಚೊ ನ್ಹಯ್; ಪಾತ್ರಾಚ್ಯಾ ಮನಾಂತ ಬುಡ್ಡುನು ತಾ ಪಾತ್ರ್ ಜೀವಂತ್ ಕರಪಾಚೆಂ ಹೀ ಕಲಾ ಅನಂತನಾಗ್ ಹಾನ್ನ್ನಿ ರಂಗಭೂಮಿತ್ ಶಿಕ್ಲೆ.
ಹ್ಯಾ ಕಲಾತ್ಮಕ ಪಾಯಾಂಚೆಂ ಫಲಿತ್ ತಾಂಚ್ಯಾ ಚಿತ್ರಪಟಾಂತ್ ಸ್ಪಷ್ಟ್ ದಿಸತಾ.
ಸಂಕಲ್ಪ ತೇಂ ಅಂಕುರ್ ಸಿನೆಮಾಂತ್ಲೊ ಆರಂಭ್
೧೯೭೩ ವಸ್ರಾಂತ ಅನಂತನಾಗ್ ಹಾನ್ನಿ ಕನ್ನಡ ಚಿತ್ರ `ಸಂಕಲ್ಪ ಹ್ಯಾ ಸಿನೆಮಾಂತ್ಲ್ಯಾನ್ ಚಿತ್ರರಂಗಾಂತ ಪಾವ್ ದವರಲೊ. ತಾಚ್ಯಾ ಉಪರಾಂತ್ ಶ್ಯಾಮ್ ಬೆನೆಗಲ್ ಹಾಂಚ್ಯಾ ಅಂಕುರ್ ಹ್ಯಾ ಮಹತ್ವಾಚ್ಯಾ ಹಿಂದಿ ಚಿತ್ರಾಂತ್ ಅಭಿನಯ್ ಕರೂನ್ ಸಮಾಂತರ ಚಿತ್ರರಂಗಾಂತ ಆಪ್ಲೆಂ ವೇಗ್ಳೆಂ ಸ್ಥಾನ ನಿರ್ಮಾಣ್ ಕೆಲೊ.
ಅಂಕುರ್, ನಿಶಾಂತ್, ಮಂಥನ್, ಭೂಮಿಕಾ, ಕೊಂಡುರಾ, ಕಲಯುಗ್ ಹಾಂವ್ಚ್ಯಾ ಚಿತ್ರಾಂತ್ ಅನಂತನಾಗ್ ಹಾಂಚೆಂ ಅಭಿನಯ್ ಸಾಮರ್ಥ್ಯ ಪ್ರೇಕ್ಷಕಾಂಕ್ ಆನಿ ವಿಮರ್ಶಕಾಂಕ್ ಕಳೀತಾಕ ಆಯ್ಲಿ.
ಹ್ಯಾ ಚಿತ್ರಾಂತ್ ತಾನ್ನಿ ಕೇವಲ ನಾಯಕಾಚಿ ಪಾತ್ರಾಂ ಕರೂನು ರಾಬ್ಬನಿ. ಸಮಾಜಾಂತ್ಲ್ಯಾ ಸಾಮಾನ್ಯ ಮನುಷ್ಯಾಚೆಂ ಜೀವನ, ತಾಚೆಂ ದುಃಖ್, ತಾಚ್ಯಾ ಮನಾಂತ್ಲ್ಯಾ ಭಾವನಾ ಆನಿ ತಾಚ್ಯಾ ಜೀವನಾಚೆಂ ವಾಸ್ತವ್ ಹ್ಯಾ ಸಗ್ಳ್ಯಾಂಕ್ ಅಭಿನಯಾಂತ್ ದಾಕೊನು ದಿಲ್ಲಿ.
ಕನ್ನಡ ಚಿತ್ರರಂಗಾಂತ್ಲೊ ಅನಂತ ನಾಗ್ ಹ್ಯಾ ನಾಂವಾಚೊ ಪ್ರತ್ಯೇಕ್ ಠಸೊ
ಕನ್ನಡ ಚಿತ್ರರಂಗ್ ಅನಂತನಾಗ್ ಹಾನ್ನಿ ಆಪ್ಲೆಂ ಮನಾಪಾಸೂನ್ ಸ್ವೀಕಾರ್ ಕೆಲೊ.
ಬಯಲು ದಾರಿ, ಕನ್ನೇಶ್ವರ ರಾಮ, ನಾ ನಿನ್ನ ಬಿಡಲಾರೆ, ಚಂದನದ ಗೊಂಬೆ, ಬೆಂಕಿಯ ಬಲೆ, ಹೆಂಡ್ತಿಗೆ ಹೇಳ್ಬೇಡಿ, ಗಣೇಶನ ಮದುವೆ, ಗೌರಿ ಗಣೇಶ, ಮುಂಗಾರು ಮಳೆ, ಗೋಧಿ ಬಣ್ಣ ಸಾಧಾರಣ ಆಂಗ್ವಟ ಹ್ಯಾಂಚ್ಯಾ ವಿವಿಧ ಚಿತ್ರಾಂತ್ ತಾನ್ನಿ ವೇಗ್ಳ್ಯಾ ಧಾಟಿಂಚ್ಯಾ ಪಾತ್ರಾಂಕ ಜಿವಂತ್ ಕೆಲ್ಯಾಂ.
ಏಕ್ಕಡೆ ಗಂಭೀರ ಪಾತ್ರ್, ಆನ್ನೇಕ್ಕಡೆ ಹಾಸ್ಯಪೂರ್ಣ ಪಾತ್ರ್, ಆನಿ ಕೆಲವಪಂತಾ ಹಾಜ್ಜಪಶಿ ಪ್ರತ್ಯೇಕ ಜಾಲೀಲೆ ಕುಟುಂಬಾಂತ್ಲೊ ಜವಾಬ್ದಾರ್ ಮನುಷ್ಯ್, ಸಮಾಜಾಚ್ಯಾ ವಾಸ್ತವಾಂಕ್ ದಾಕೋನು ದಿವ್ಚಿ ಮನುಷ್ಯಾಲೆ ಪಾತ್ರ್, ಪಾತ್ರ ಕಶ್ಶಿ ಆಸ್ತ್ಯಾರಿಚಿ ತಶೆಂ ಸ್ವತಃಕ್ ಅಭಿನಯ ಬದಲಾಯ್ಸುಚಿ ತಾಂಗೆಲೆ ಸಾಮರ್ಥ್ಯ್ ಅತ್ಯಪೂರ್ವ. ಒಟ್ಟಾರೆ ತಾಂಚ್ಯಾ ಅಭಿನಯಾಚಿ ಖಾಸಿಯತ್ ಮ್ಹಣಲ್ಯಾರ್ ಸಹಜತಾ.
ಸಮಾಜಾಚೆ ಸೀದಾ ಸಾದಾ ಮನೀಷಾ ವರಿ ಅತಿರೇಕ್ ನ್ಹಯ್, ಕೃತಕತೆ ನ್ಹಯ್. ದೋಳ್ಯಾಚ್ಯಾ ಚಲನವಲನಾ, ತೊಂಡಾಚೆ ಭಾವನಾ, ಸ್ವರಾತ್ಲೊ ಏಕ್ ಸಾನ ಬದಲಾವ್ ಹ್ಯಾ ಸಗ್ಳ್ಯಾಂ ಮೂಖಾಂತರ ತಾನ್ನಿ ಪಾತ್ರಾಚೆಂ ಮನೋಭಾವ ಪ್ರೇಕ್ಷಕಾಂಕ ಕಳಯಚೆ ಕಲಾಸಾಮ್ರಾಟ.
ಹಾಸ್ಯಪಾತ್ರಾಂತ್ಹಿ ತಿತ್ಲೆಂಚ್ ಯೆಶಸ್ವಿ
ಅನಂತ ನಾಗ್ ಹಾಂಕ್ ಕೇವಳ್ ಗಂಭೀರ ಅಭಿನಯಾಚ್ಯಾ ಖಾತಿರ ಒಳ್ಕತಾತಿ, ಅಶೆಂ ನ್ಹಯ್. ಹಾಸ್ಯಚಿತ್ರಾಂತ್ಹಿ ತಾನ್ನಿ ಆಪ್ಲಿ ವೇಗ್ಳಿ ಛಾಪ್ ಉಮ್ಟಯ್ಲಿ.
ಗಣೇಶನ ಮದುವೆ, ಗೌರಿ ಗಣೇಶ, ಉದ್ಭವ್ ಹ್ಯಾ ಚಿತ್ರಾಂತು ತಾಂಚ್ಯಾ ಹಾಸ್ಯಾಚೊ ಟೈಮಿಂಗ್ ಆನಿ ಸಹಜ ಅಭಿನಯ್ ಪ್ರೇಕ್ಷಕಾಂಕ್ ಖೂಬ ಆವಡ್ಲೊ. ಹಾಸ್ಯ ಕರ್ತನಾ ಪಾತ್ರಾಚಿ ಮರ್ಯಾದಾ ವಿಸರೂನು ನಾಟಕೀಯ್ ಜಾವ್ಚೆ ಅಭಿನಯ ತಾಂಗೆಲೆ ನ್ಹಂಹಿ. ತಶೆಂಚ್ ಗಂಭೀರ ಪಾತ್ರಾಂತ್ ಅತಿರೇಕ್ ಭಾವನಾವಿವಶ್ ಜಾವ್ಪಾಚೆಂ ನ್ಹಯ್, ಹೀ ಸಮತೋಲನ ತಾನ್ನಿ ಸದಾಂ ದಾಖಯಲಾ.
ಮಾಲ್ಗುಡಿ ಡೇಸ್ ಆನಿ ಶಂಕರ ನಾಗ್
ಅನಂತ ನಾಗ್ ಹಾಂಚ್ಯಾ ಕಲಾಜೀವಿತಾಂತ್ ತಾಂಚ್ಯಾ ಧಾಕ್ಟ್ಯಾ ಭಾವಾಚೊ ಶಂಕರ ನಾಗ್ ಹಾಂಚೊ ಉಲ್ಲೇಖ್ ಕರಪಾಚೊ ಜಾಯಿ. ಶಂಕರನಾಗ್ ಹಾನ್ನಿ ನಿರ್ದೇಶನ ಕೆಲ್ಲ್ಯಾ ಪ್ರಸಿದ್ಧ್ ಮಾಲ್ಗುಡಿ ಡೇಸ್ ಹ್ಯಾ ದೂರದರ್ಶನ್ ಮಾಲಿಕೇಂತ ಅನಂತ ನಾಗ್ ಹಾಂಚ್ಯಾ ಅಭಿನಯಾಕ್ ಪ್ರೇಕ್ಷಕಾಂನಿ ಆವಡೀನ್ ಘೆತ್ಲೊ. ಆರ್. ಕೆ. ನಾರಾಯಣ್ ಹಾಂಚ್ಯಾ ಕಥಾಂಚ್ಯಾ ಆಧಾರಾರ್ ತಯಾರ್ ಜಾಲ್ಲ್ಯಾ ಹ್ಯಾ ಮಾಲಿಕೇನ್ ಭಾರತೀಯ್ ದೂರದರ್ಶನಾಚ್ಯಾ ಇತಿಹಾಸಾಂತ್ ವೇಗ್ಳೊ ಠಸೊ ಉಮ್ಟಯ್ಲೊ. ದೋನ್ ಭಾವಾಂಚ್ಯಾ ಕಲಾತ್ಮಕ ಸಹಕಾರಾಚೆಂ ಹ್ಯಾ ಅಧ್ಯಾಯಾಕ್ ಕನ್ನಡಿಗ್ ಪ್ರೇಕ್ಷಕಾಂಚ್ಯಾ ಮನಾಂತ್ ಆಜ್ ಮೆರೆನ್ ಸ್ಥಾನ ಆಸಾ.
ಪ್ರಶಸ್ತಿ ಆನಿ ಸನ್ಮಾನ್
ಅನಂತ ನಾಗ್ ಹಾಂಕ್ ತಾಂಚ್ಯಾ ದೀರ್ಘ್ ಅಭಿನಯ್ ಕಾರಕಿರ್ದೀಂತ್ ಅನೇಕ್ ಪ್ರಶಸ್ತಿ ಆನಿ ಸನ್ಮಾನ್ ಮೆಳ್ಳ್ಯಾತ್.
ಕರ್ಣಾಟಕ ರಾಜ್ಯ್ ಚಲನಚಿತ್ರ ಪ್ರಶಸ್ತಿ, ಫಿಲ್ಮ್ಫೇರ್ ಪ್ರಶಸ್ತಿ ಆನಿ ಇತರ ಅನೇಕ್ ಸನ್ಮಾನ್ ತಾಂಚ್ಯಾ ಕಲಾಸೇವೇಕ್ ಮೆಳ್ಳ್ಯಾತ್. ೨೦೧೩ ವಸ್ರಾಂತ ಕರ್ಣಾಟಕ ಸರ್ಕಾರಾನ್ ತಾಂಕ್ ಡಾ. ವಿಷ್ಣುವರ್ಧನ್ ಪ್ರಶಸ್ತಿ ದಿವ್ನ್ ಗೌರವ್ ಕೆಲೊ. ೨೦೨೫ ವರ್ಸಾಂತ ತಾಂಕಾ ಪದ್ಮಭೂಷಣ್ ಸನ್ಮಾನ್ ಜಾಲೊ.
ಹ್ಯಾ ಸಗ್ಳ್ಯಾಂತ್ ಸರ್ವಾತ್ ಮಹತ್ವಾಚೊ ಆನಿ ಭಾರತೀಯ್ ಚಿತ್ರರಂಗಾಂತ ಸರ್ವೋಚ್ಚ್ ಜೀವನಗೌರವ್ ಪ್ರಶಸ್ತಿ ಮ್ಹಣೂನ್ ಒಳಕೂಚೊ ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ತಾಂಕ್ ೨೦೨೪ ವರ್ಸಾಚ್ಯಾ ತಾಂಗೆಲೆ ಅಭಿನಯ ಶ್ರೇಷ್ಠತೆ ಖಾತಿರ್ ಮೆಳ್ಳೊ.
ಭಾರತ್ ಮಾಜೀ ಜನ್ಮಭೂಮಿ, ಕರ್ಣಾಟಕ್ ಮಾಜೀ ಕರ್ಮಭೂಮಿ
ದಾದಾಸಾಹೇಬ್ ಫಾಲ್ಕೆ ಪ್ರಶಸ್ತಿ ಸ್ವೀಕಾರ್ ಕರ್ತನಾ ಅನಂತ ನಾಗ್ ಹಾನ್ನಿ ಕರ್ಣಾಟಕಾಚ್ಯಾ ಋಣಾಚೆಂ ಸ್ಮರಣ್ ಕೆಲೊ. “ಭಾರತ್ ಆಪ್ಲಿ ಜನ್ಮಭೂಮಿ ಆನಿ ಕರ್ಣಾಟಕ್ ಆಪ್ಲಿ ಕರ್ಮಭೂಮಿ ಅಶೆಂ ತಾಂವ್ನಿ ಉಕ್ತ್ ಕೆಲೊ. ಹ್ಯಾ ಶಬ್ದಾಂತ್ ತಾಂಚ್ಯಾ ಕಲಾಜೀವಿತಾಚೊ ಸಾರಾಂಶ್ ದಿಸತಾ.
ಕೊಂಕಣಿ ಕುಟುಂಬಾಂತ ಜನ್ಮುನು, ಕರಾವಳಿ ಸಂಸ್ಕಾರಾಂತ್ ವಾಡ್ಡುನು, ಮುಂಬಯಿಚ್ಯಾ ರಂಗಭೂಮಿತ್ ಕಲಾಜೀವಿತಾಚಿ ಸುರವಾತ್, ಕನ್ನಡ ಆನಿ ಹಿಂದಿ ಸಿನೆಮಾಂತ್ ರಾಷ್ಟ್ರೀಯ್ ಮಟ್ಟಾಚಿ ಒಳಕ, ಆನಿ ಅಖೇರ್ ಭಾರತೀಯ್ ಚಿತ್ರರಂಗಾಚ್ಯಾ ಸರ್ವೋಚ್ಚ್ ಜೀವನಗೌರವಾನ್ ಸನ್ಮಾನಿತ್ ಜಾವ್ಚಿ ಹೀ ಏಕಾ ಕಲಾವಂತಾಚಿ ದೀರ್ಘ್ ಆನಿ ಪ್ರೇರಣಾದಾಯಿ ಯಾತ್ರಾ ಆಸಾ. ಕೊಂಕಣಿ ಸಮಾಜಾಕ್ ಅಭಿಮಾನಾಚೊ ಕ್ಷಣ್
ಅನಂತ ನಾಗ್ ಹಾಂವ್ಚ್ಯಾ ಅಭಿನಯಾಂತ್ ಏಕಾ ಗೋಷ್ಟಿಚೆಂ ವಿಶೇಷ್ ಮಹತ್ವ್ ಆಸಾ ಪಾತ್ರ್ ಬದಲ್ತಾತ್, ಕಾಲ್ ಬದಲ್ತಾ, ಚಿತ್ರಪಟಾಂಚಿ ಶೈಲಿ ಬದಲ್ತಾ; ಪಣ್ ಉತ್ತಮ್ ಅಭಿನಯಾಚಿ ಸಹಜತಾ ಕೆದ್ನಾ ಬದಲ್ನಾ.
ಹ್ಯಾ ಸಹಜತೆಚೆಂ, ಶಿಸ್ತೀಚೆಂ ಆನಿ ಕಲಾಪ್ರೇಮಾಚೆಂ ಪ್ರತೀಕ್ ಮ್ಹಣೂನ್ ಅನಂತ ನಾಗ್ ಹಾಂಚೆಂ ನಾಂವ್ ಭಾರತೀಯ್ ಚಿತ್ರರಂಗಾಂತ ಸದಾಂ ಆದರಾನ್ ಘೆತ್ಲೆಂ ವಚ್ಪಾಚೆಂ.
ಹ್ಯಾ ಸಹಜತೆಚೆಂ, ಶಿಸ್ತೀಚೆಂ ಆನಿ ಕಲಾಪ್ರೇಮಾಚೆಂ ಪ್ರತೀಕ್ ಮ್ಹಣೂನ್ ಅನಂತನಾಗ್ ಹಾಂಚೆಂ ನಾಂವ್ ಭಾರತೀಯ್ ಚಿತ್ರರಂಗಾಂತ ಸದಾಂ ಅಜರಾಮರ ಜಾವ್ನು ವ್ಹರ್ತಾ. ತಾಂಗೆಲೆ ಹ್ಯಾ ಕಲಾಯಾತ್ರಾ ಸಮಗ್ರ ಕೊಂಕಣಿ ಭಾಷಿಕಾಂಕ ಖೂಬ ಪ್ರೇರಣ ದಿವೋ ಮ್ಹಣಚೆ ಆಮ್ಗೆಲೆ ಅಪೇಕ್ಷಾ.
ಹ್ಯಾ ಗೌರವಾಚ್ಯಾ ಕ್ಷಣಾಂತ್ ಸಗ್ಳ್ಯಾ ಕೊಂಕಣಿ ಭಾಷಿಕ ಸಮಾಜಾಚ್ಯಾ ವತಿನ ೩೦೦ + ಚಲನಚಿತ್ರಂತು ಅಭಿನಯ ದಿಲೀಲೆ ಶ್ರೀ ಅನಂತನಾಗ್ ಹಾಂಕ್ ಮನಾಪಾಸೂನ್ ಅಭಿನಂದನ್! ದೇವು ತಾಂಕಾ ಆನ್ನೀಕೆ ದೀರ್ಘ ಆಯುಷ್ಯ ಆನಿ ಆರೋಗ್ಯ ದಿವೋ ಮ್ಹೊಣು ಆಶಾ ಕರತಾ. ತಾಂಕಾ ದೇವು ಬರೆಂ ಕೊರೊ.