ಸಂವ್ಸಾರಪಾಡ್ವೆ ದಿವಸು ಬೆಂಗಳೂರ್ಚೆ ಶ್ರೀ ಅನಂತನಗರಾಚೆ ಶ್ರೀ ವೆಂಕಟರಮಣ ದೇವಳಾಂತು ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಪರಾಭವ ನಾಮ ಸಂವತ್ಸರಾಚೆ ವಸಂತೋತ್ಸವು ವಿಜೃಂಭಣೆರಿ ಆರಂಭ ಜಾಲ್ಲೆ. ತತ್ಸಂಬಂಧ ಪೂಜ್ಯ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ದಿನಾಂಕ. ೧೯-೦೩-೨೦೨೬ ದಿವಸು ಶ್ರೀ ವೇದವ್ಯಾಸ ದೇವಾಕ ತೈಲಾಭಿಷೇಕ, ಪವಮಾನ ಅಭಿಷೇಕ, ಕನಕಾಭಿಷೇಕ ಆನಿ ಪಂಚಾಮೃತಾಭಿಷೇಕ ಚಲ್ಲೆ.
ಭೂ ವೈಕುಂಠಾಧಿಪತಿ ಶ್ರೀ ಅನಂತ ನಗರಾಚೆ ಶ್ರೀ ವೆಂಕಟರಮಣಾಕ ವರೇನ ವಿಶೇಷ ಅಲಂಕಾರ, ಪೂಜಾ ಚಲ್ಲೆ. ಮಾತ್ರ ನ್ಹಂಹಿ ಪೂಜ್ಯ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಶ್ರೀ ದೇವಳಾಂತು ತೀಸರೇಂ ವರಸಾಚೆ `ಭಜನೋತ್ಸವು ವರೇನ ಆರಂಭ ಜಾಲ್ಲೆ. ರಾಜ್ಯಾಚೆ ವೆಗವೆಗಳೆ ಗಾಂವ್ಚಾನ ಆಯ್ಯಿಲೆ ಭಜನಾ ತಂಡಾಚಾನ ನಿರಂತರ ಭಜನಾ ಸೇವಾ ಚಲ್ತಾ ಆಸ್ಸುನು, ಶ್ರೀ ವೆಂಕಟರಮಣ ದೇವಳಾಂತು ಭಕ್ತಿಸುಧಾ ನಿರಂತರ ಸಾಗರೋಪಾದಿ ಪಸರತಾ ಆಸ್ಸಾ. ರಾತ್ತೀಚೆ ಪೂಜೆ ಬರಶಿ ಅಲಂಕೃತ ಪಾಣ್ಣೆ ವಾಹನಾ ಪೂಜಾ ವರೇನ ಚಲ್ಲೆ.
ಹೇ ವೇಳ್ಯಾರಿ ರಾಜ್ಯಾದ್ಯಂತ ಮಾತ್ರ ನ್ಹಂಹಿ ಕೇರಳ, ಮಹಾರಾಷ್ಟ್ರ ಸಹಿತ ದೇಶಾದ್ಯಂತ ತಾಕೂನು ಆಯ್ಯಿಲೆ ಸಮಾಜ ಬಾಂದವ ವ್ಹಡ ಅಂಕಡ್ಯಾರಿ ಉಪಸ್ಥಿತ ವ್ಹರ್ನು ಹರಿಗುರು ಕೃಪೇಕ ಪಾತ್ರ ಜಾಲ್ಲೆ.
ಅವುಂದೂಚೆ ವಸಂತೋತ್ಸವ ಖಾತ್ತಿರಿ ಮಾರ್ಚ್ ೧೩ಕ ಪೂಜ್ಯ ಸ್ವಾಮ್ಯಾನಿ ಪುರಪ್ರವೇಶ ಕೆಲೀಲ ತೆದ್ದನಾ ತಾಂಕಾ ಮಸ್ತ ಭಕ್ತಿ-ಶೃದ್ಧಾ ಆನಿ ವೈಭವಾರಿ ಸುವಾಸಿನಿ ಬಾಯ್ಲಮನ್ಶೆಲೆ ಪೂರ್ಣಕುಂಭ ಸ್ವಾಗತಾ ಬರಶಿ ಯೆವಕಾರ ಕೊರನು ಘೆತ್ಲೆ. ಪೂಜ್ಯ ಸ್ವಾಮ್ಯಾಂಕ ಬಸಕರೆಯಿಲೆ ರಥಾಕ ವಿಶೇಷ ಅಲಂಕಾರ ಕೆಲೀಲೆ. ಹೇ ವೇಳ್ಯಾರಿ ವಾಜ್ಜಪ, ಅಪಾರ ಜನಸ್ತೋಮ ಆಶ್ಶಿಲೆ. ದೇವಳಾಕ ಆಪೋನು ಹಾಡ್ಲೆ ಮಾಗಿರಿ ಪೂಜ್ಯ ಸ್ವಾಮ್ಯಾಂ ತಾಕೂನು ದೇವದರ್ಶನ ಚೋಲ್ನು ದೇವಳಾಚೆ ಆಡಳಿತ ಕಮಿಟಿ ತರಪೇನ ಪಾದ್ಯಪೂಜಾ ಚಲ್ಲೆ.
ಮಾರ್ಚ್ ೧೫ಕ ಪೂಜ್ಯ ಸ್ವಾಮ್ಯಾಂಗೆಲೆ ಸಾನಿಧ್ಯಾರಿ ೨೦೦ವೇಂ ಮ್ಹಹಿನ್ಯಾಚೆ ಶ್ರೀ ಸತ್ಯನಾರಾಯಣ ವ್ರತ ಚಲ್ಲೆ. ಆನಿ ಲಕ್ಷ ಪ್ರದಕ್ಷಿಣ ವರೇನ ಶೂರ ಜಾಲ್ಲೆ. ಸಂವ್ಸಾರಪಾಡ್ಚೆಚಾನ ಪ್ರತಿದಿವಸು ಹಾಂಗಾ ವಾಹನಾ ಪೂಜಾ ಆಸ್ತಾ. ಆನಿ ಮಾರ್ಚ್ ೨೭ಕ ಶ್ರೀ ರಾಮನವಮಿ ಪ್ರಯುಕ್ತ ರಾಮರಕ್ಷಾ ಹವನ ಆಸ್ತಾ ಮ್ಹೊಣು ಕೋಳ್ನು ಆಯಲ್ಯಾ.