550 ವರ್ಷಾಂಚೊ ಭವ್ಯ ಪರಂಪರಾ ಆಸ್ಸುಚೊ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠ ದೇಶಬಽರ ಧಾರ್ಮಿಕ ಜಾಗೃತಿ ಬರಶಿ ವೇದ ಶಿಕ್ಷಣಾಚೆ ಮುಖೇಲ ಕೇಂದ್ರ ಜಾವ್ನು ಸಬಾರ ಮಹಾ ಮಹಾ ವಿದ್ವಾಂಸಾಂಕ, ವೇದಮೂರ್ತಿಂಕ ಪೋಷಣ ಕೊರನು ವಾಡ್ಡೆಲಾ. ಪುರಾತನ ಶಾಸ್ತ್ರೀಯ ವಿದ್ಯೆಚೆ ಪರಂಪರಾ ಸಮರ್ಥ ಜಾವ್ನು ವ್ಹರೋನು ಹಾಡ್ನು ದೇವಪೂಜಾ, ವೇದಕರ್ಮ, ಹೋಮ-ಹವನ ಶಾಸ್ತ್ರೀಯ ಜಾವ್ನು ಚೊಲ್ಚೆ ವರಿ ಕೊರನು, ಸಮಾಜ ಬಾಂದವಾಂತು ಧಾರ್ಮಿಕ ಪ್ರಜ್ಞಾ ವ್ಹರಯಿಲೆ ಆಸ್ಸಾ. ಜಗದ್ಗುರು ಶ್ರೀಮದ್ ಮಧ್ವಾಚಾರ್ಯಾನಿ ಪ್ರತಿಪಾದನ ಕೆಲೀಲೆ ದೈತ ತತ್ವ ಪಸರಚಾಂತು ಮಹತ್ವಾಚೆ ಭೂಮಿಕಾ ಘೆತ್ಲ್ಯಾ. ಆನಿ ಮಸ್ತ ಪುರಾತನ ದಾರ್ಶನಿಕ ಪರಂಪರೆಚೆ ನಿರಂತರ ಜಾವನು ರಾಕ್ಕುನು ಘೇವ್ನು ಆಯಲ್ಲ್ಯಾ.
ಗುರುಪರಂಪರೆಯ ೧೮ವೇಂ ಯತಿವರ್ಯ ಜಾಲೀಲೆ ಶ್ರೀಮದ್ ಶ್ರೀ ಪೂರ್ಣಪ್ರಜ್ಞ ತೀರ್ಥ ಸ್ವಾಮ್ಯಾಂಗೆಲೆ ಕಾಲಾರಿ ಸಬಾರ ನಾಮಾಧಿಕ ವಿದ್ವಾಂಸ ತಾಂಗೆಲೆ ಮಾರ್ಗದರ್ಶನಾರಿ ಹುಜ್ವಾಡ್ಲೆ. ವೇದ ಆನಿ ಶಾಸ್ತ್ರೀಯ ವಿದ್ಯೆಚೆ ಹೇ ವೈಭವ ಮುಖಾವಯ್ಲೆ ಪೂಜ್ಯ ಯತಿವರ್ಯ ವರೇನ ಸಮರ್ಪಕ ಜಾವನು ಮುಖಾರಸೂನು ಆಯ್ಲೆ.
೧೯೫೩ಂತು ಪರಂಪರೆಚೆ ೨೨ವೇಂ ಯತಿ ಜಾಲೀಲೆ ಶ್ರೀಮದ್ ಶ್ರೀ ದ್ವಾರಕಾನಾಥ ತೀರ್ಥ ಸ್ವಾಮ್ಯಾನಿಂ ಗೋಂಯ ಡಿಚೋಲಿಚೆ ವ್ಯಾಸಾಶ್ರಮಾಂತು ‘ಇಂದಿರಾಕಾಂತ ತೀರ್ಥ ಸಂಸ್ಕೃತ ಪಾಠಶಾಳಾ” ಸ್ಥಾಪನ ಕೆಲ್ಲಿ. ಮಾಗಿರಿ ಹೇ ಪಾಠಶಾಳಾ ಕರ್ನಾಟಕಾಚೆ ವೆಂಕಟಪುರಾಕ ಸ್ಥಳಾಂತರ ಕೆಲ್ಲಿ.
೧೯೭೨ ಇಸ್ವೆಂತು ಪರಂಪರೆಚೆ ೨೩ವೇಂ ಯತಿವರ್ಯ ಜಾಲೀಲೆ ಶ್ರೀಮದ್ ಶ್ರೀ ವಿದ್ಯಾಧೀರಾಜ ತೀರ್ಥ ಸ್ವಾಮ್ಯಾನಿಂ ಪಾಠಶಾಳೇಕ ಪರತೂನು ಗೊಂಯ್ಚೆ ಪರ್ತಗಾಳಿ ಕೇಂದ್ರ ಮಠಾಕ ಸ್ಥಳಾಂತರ ಕೆಲ್ಲಿ. ಆನಿ ತಾಕ್ಕಾ “ಜೀವೋತ್ತಮ ವೈದಿಕ ಸಂಸ್ಕೃತ ಪಾಠಶಾಳಾ’ ಮ್ಹೊಣು ಪರತೂನು ನಾಮಕರಣ ಕೆಲ್ಲಿ. ಹೇ ಪಾಠಶಾಳೆಚಾನ ೫೦೦ ಪಶಿ ಚ್ಹಡ ವಿದ್ಯಾರ್ಥ್ಯಾನಿ ಎದ್ದೊಳ ಭಿತ್ತರಿ ವೇದ ಶಿಕ್ಷಣ ಘೆತ್ಲ್ಯಾ. ಆಜೀಕ ತತ್ವಶಾಸ್ತ್ರಾಚೆ ಪ್ರಸಾರ ಆನಿ ಸಂರಕ್ಷಣೆಂತು ಮೇಳ್ನು ಆಸ್ಸಾತಿ.
ಆತ್ತ ೫೫೦ ವರ್ಷಾಚರಣೆಚೆ ವೇಳ್ಯಾರಿ ಶ್ರೀ ಮಠ ಸಂಪೂರ್ಣ ಜಾವ್ನು ನವೀಕರಣ, ವಿಸ್ತಾರ, ವಿಶ್ವಪ್ರಸಿದ್ಧ ಜಾಲೀಲೆ ಸಕಡಾಂಕ ಗೊತ್ತಾಸ್ಸ. ಹೇ ವೇಳ್ಯಾರಿ ವೇದ ಶಿಕ್ಷಣಾಚೆ ವಯ್ರಿ ನವೀನ ಉಮೇದ, ದೈತ ತತ್ವಶಾಸ್ತ್ರಾಚೆ ಪ್ರಸಾರ, ಸಂಸ್ಕೃತ ಭಾಷೆಕ ಪ್ರೋತ್ಸಾಹ ತಶೀಚಿ ಪುರಾತನ ಹಸ್ತಪ್ರತಿಂಚೆ ಸಂಶೋಧನೆಕೆ ಆದ್ಯತಾ ದಿವಚೆ ಖಾತ್ತಿರಿ ಆಧುನಿಕ ಸೌಲಭ್ಯ ಸಹಿತ ಆತ್ತಾಚೆ ೨೪ವೇಂ ಯತಿವರ್ಯ ಶ್ರೀಮದ್ ಶ್ರೀ ವಿದ್ಯಾಧೀಶ ತೀರ್ಥ ಸ್ವಾಮೆಂ ಹೇ ವೇದ ಶಿಕ್ಷಣ ಸಂಸ್ಥೆಕ “ಜೀವೋತ್ತಮ ವಿದ್ಯಾಪೀಠ” ಮ್ಹಣಚೆ ನಾಂವ ದಿವನು ಪುನರುಜ್ಜಿವನ ಕರತಾ ಆಸ್ಸಾತಿ.
ಹೇ “ಜೀವೋತ್ತಮ ವಿದ್ಯಾಪೀಠ” ಪರಾಭವ ನಾಂವ ಸಂವತ್ಸರಾಚೆ ಜೇಷ್ಠ ಶುದ್ಧ ದಶಮಿ, ಮ್ಹಳಯಾರಿ ೨೪ ಜೂನ್ ೨೦೨೬ ದಿವಸು ಅಧಿಕೃತ ಜಾವ್ನು ಶೂರ ಜಾತ್ತಾ. ಜೀವೋತ್ತಮ ವಿದ್ಯಾಪೀಠಾಕ ವರೇನ ಜಗದ್ಗುರು ಶ್ರೀಮದ್ ಮಧ್ವಾಚಾರ್ಯಾನಿ ಬೋಧನ ಕೆಲೀಲೆ ದೈತ ತತ್ವ ಆನಿ ವೈಷ್ಣವ ಸಂಪ್ರದಾಯ ಆಧಾರ ಜಾವ್ನಾಸ್ಸುನು, ವೇದಜ್ಞಾನ, ಸಂಸ್ಕೃತ ಭಾಸ ತಶೀಚಿ ಸಾಂಪ್ರದಾಯಿಕ ಶಾಸ್ತ್ರೀಯ ವಿದ್ಯೆಚೆ ಸಂರಕ್ಷಣ ಆನಿ ಪ್ರಸಾರ ಖಾತ್ತಿರಿ ಸಮರ್ಪಿತ ಜಾವ್ನು ಕಾಮ ಕರತಾ.
ಹೇ ಜೀವೋತ್ತಮ ವಿದ್ಯಾಪೀಠಾಚೆ ವೆಗವೆಗಳೆ ವೇದಶಿಕ್ಷಣಾಚೆ ಕೋರ್ಸಾ ಖಾತ್ತಿರಿ ಅರ್ಜಿ ಆಹ್ವಾನ ಕೆಲ್ಲ್ಯಾ. ೧೩ ವರ್ಷಾಪಶಿ ಚ್ಹಡ ವಯ ಜಾಲೀಲೆ ವಿದ್ಯಾರ್ಥ್ಯಾನಿ ಅರ್ಜಿ ಘಾಲಯೇತ. ೩೧, ಮಾರ್ಚ್ ೨೦೨೬ ಪಶಿ ಪಯಲೇಚಿ ಅರ್ಜಿ ಧಾಡ್ಕಾ. ಚಡ್ತೆ ಮಾಹಿತಿಕ ಶ್ರೀ ಸಂತೋಷ ಆಚಾರ್ಯ (ಮೊಬೈಲ್ : ೯೧೧೦೮೮೨೫೪೦) ಹಾಂಕಾ ಸಂಪರ್ಕ ಕೊರಯೇತ.