ಮಹಾದಾನಿ, ಸರಸ್ವತಿ ಪ್ರಭಾ ಪುರಸ್ಕಾರ ಪುರಸ್ಕ್ಥತ ಮೈಸೂರ್ಚೆ ಶ್ರೀ ಜನಾರ್ಧನ ಭಟ್ಮಾಮು ಕೋಣಾಕ ಗೊತ್ನಾ? ಹಿಂದೂ ಧರ್ಮ, ಶಾಸ್ತ್ರ, ದೇವು ಸ್ವಾಮ್ಯಾಂಗೆಲೆ ವಯ್ರಿ ಅಪಾರ ಶೃದ್ಧಾ, ಭಕ್ತಿ, ಗೌರವು ದವರೂನು ಘೆತ್ತಿಲೆ ಹಾನ್ನಿ ಅಪರಿಚಿತ ಆನಿ ಅನಾಥ ಜಾವ್ನಾಸ್ಸುಚೆ ಕೋಟಿಗಟ್ಲೆ ಪ್ರೇತಾತ್ಮಚೆ ಸದ್ಘತಿ ಖಾತ್ತಿರಿ ವೆಗವೆಗಳೆ ಪುಣ್ಯ ಕ್ಷೇತ್ರಾಂತು ಲಾಕಗಟ್ಲೆ ರೂಪ್ಪಯಿ ಖರ್ಚುನು ಮೋಕ್ಷನಾರಾಯಣ ಬಲಿ ಇತ್ಯಾದಿ ಧಾರ್ಮಿಕ ವಿಧಿ-ವಿಧಾನ ಚಲೋನು ದಿವ್ಯಾತ್ಮಾಂಕ ಮೋಕ್ಷ/ ಪರಿಹಾರ ದಿವಯಿಲೆ ಆಸ್ಸಾ.
ತಾಜ್ಜೆ ಮುಖಾವಯ್ಲೆ ಭಾಗ ಜಾವ್ನು ಹಾನ್ನಿ ದಿನಾಂಕ. ೧೭ – ೨ – ೨೦೨೬, ಅಮಾಸೆ ದಿವಸು ಉತ್ತರ ಪ್ರದೇಶದ ವಾರಣಾಸಿಚೆ ಪಂಚ ಘಾಟ್ಚೆ ಮೋಕ್ಷ ಕ್ಷೇತ್ರಾಂತು ಏಕ ವೈಶಿಷ್ಠ್ಯಪೂರ್ಣ ಧಾರ್ಮಿಕ ವಿಧಿ-ವಿಧಾನ ಚಲಯಿಲೆ. ಕಾಶ್ಮೀರಾಚೆ ಪಹಲ್ಗಾಮ್ಂತು ಭಯೋತ್ಪಾದಕಾನಿ ೨೬ ಹಿಂದೂ ಲೋಕಾಂಕ ತಾಂಗೆಲೆ ಧರ್ಮ ವಿಚಾರ್ನು ಬಾಯ್ಲ,- ಚರಡುಂವಾಲೆ ಎದ್ರಾಕಚಿ ಹತ್ಯಾ ಕೆಲೀಲೆ ಅಮಾನುಷ ಕಾರ್ಯಾಕ ಭಾರತ ಸರಕಾರಾನಿ ಭಯೋತ್ಪಾದಕಾಂಗೆಲೆ ಫ್ಯಾಕ್ಟರಿ ಜಾಲೀಲೆ ಪಾಕಿಸ್ತಾನಾಂತುಲೆ ಸಬಾರ ಭಯೋತ್ಪಾದಕ ಶಿಬಿರ ನಾಶ ಕೆಲೀಲೆ ಸಕಡಾಂಕ ಗೊತ್ತಾಸ್ಸ.
ತೆದ್ನಾ ಮೆಲೀಲೆ ಹತಭಾಗ್ಯಾಲೆ ಸದ್ಘತಿ ಖಾತ್ತಿರಿ ತಶೀಚಿ ಆರತಾಂ ಬಾಂಗ್ಲಾ ದೇಶಾಂತು ಹತ್ಯಾ ಕೆಲೀಲೆ ನಾಂವೆ ಲಾಸ್ಸುನು ಕಾಡಲೀಲೆ ೧೫ ಲೋಕ ಹಿಂದೂ ಲೋಕಾಂಕ ಪ್ರೇತ ಯೋನಿ ತಾಕೂನು ಮೋಕ್ಷ ದಿವಚೆ ಖಾತ್ತಿರಿ ವಾರಣಾಶಿ ಕ್ಷೇತ್ರಾಚೆ ಪಂಡಿತಾ ತಾಕೂನು ಮೋಕ್ಷ ನಾರಾಯಣ ಬಲಿ ಚಲಯಿಲೆ. ಹೇ ವೇಳ್ಯಾರಿ ರಾಷ್ಟ್ರ ಸೇವೆ ಖಾತ್ತಿರಿ ಆಪಣೇಲೆ ಪ್ರಾಣ ತ್ಯಾಗ ಕೆಲೀಲೆ ಆಮ್ಗೆಲೆ ಭಾರತ ದೇಶಾಚೆ ಅರೆಸೈನಿಕಾಂಗೆಲೆ ಪ್ರೇತಾತ್ಮಾಂಕ ಮೋಕ್ಷ ಪ್ರಾಪ್ತಿ ಖಾತ್ತಿರಿ ಆಹ್ವಾನ ಕೆಲೀಲೆ. ತಶೀಚಿ ಕಾರ್ಗಿಲ್ ಯುದ್ಧ, ಸಿಂಧೂರ ಕಾರ್ಯಾಚರಣೆ ವೇಳ್ಯಾರಿ ಹುತಾತ್ಮ ಜಾಲೀಲೆ ದೇಶಾಚೆ ಹುತಾತ್ಮಾಂಕ ವರೇನ ಹೇ ಸಂದರ್ಭಾರಿ ಮೋಕ್ಷಪ್ರಾಪ್ತಿಕ ಧಾರ್ಮಿಕ ಕಾರ್ಯಕ್ರಮ ಚಲಯಿಲೆ. ಗರುಡ ಪುರಾಣ, ಸಾಂಖ್ಯ ಯೋಗ, (ದೇವಹೂತಿ- ಕರ್ದಮ), ನಿರ್ಣಯ ಸಿಂಧು, ಆದಿ ಇತರ ಪುರಾಣಾಂತು ಅಸ್ಸಾಲೆ ಧಾರ್ಮಿಕ ವಿಧಿ-ವಿಧಾನ ಚಲೋಚೆ ಅತ್ಯಗತ್ಯ ಮ್ಹೊಣು ಸಾಂಗ್ಲ್ಯಾ.
ನಾತಲೇರಿ ಪ್ರೇತ ಕಲಿಯುಗಾಚೆ ಅಖೇರಿಚೆ ಪರಿಯಂತ ನಿರಂತರ ಜಾವ್ನು ನರಳತಾ ವಾಯುಮಂಡಲಾಂತೂ ವ್ಹರ್ನು ಆಪಣೇಲೆ ಕುಟುಂಬ ಸದಸ್ಯಾಂಕ ತ್ರಾಸುದಿತ್ತಾ, ತಶ್ಶಿ ಜಾವಚಾಕ ನಜ್ಜ ಆನಿ ಆತ್ಮಘಾತ, ಅಪಘಾತ, ಅಲ್ಪಾಯುಷ್ಯ (ಅಲ್ಪಾಯು), ತೊಡೋವು ಜಾವ್ನು ಲಗ್ನ ಜಾಲಯಾರೀಚಿ, ಜಾಂವೊ ಲಗ್ನ ಜಾಯನಾಶಿ ಮೆಲೀಲೆ ಪ್ರೇತಾತ್ಮಾನಿ ನಿರಂತರ ತ್ರಾಸ ಭೊಗಚಾಕ ನಜ್ಜ ಮ್ಹಣ್ಚೆ ಸದಿಚ್ಛೆನಿ ಶ್ರೀ ಜನಾರ್ಧನ ಭಟ್ಮಾಮು ಮಸ್ತ ವರ್ಷಾಚಾನ ಅಸ್ಸಾಲೆ ಮೋಕ್ಷ ನಾರಾಯಣ ಬಲಿ ಸ್ವತಃ ಲಾಕಗಟ್ಲೆ ದುಡ್ಡು ಖರ್ಚುನು ಚಲಾಯಿಸೂನು ಘೇವ್ನು ಎತ್ತಾ ಆಸ್ಸಾತಿ. ಹೇ ಆಮ್ಗೆಲೆ ಸಮಾಜಾಚೆ ಆನಿ ದೇಶಾಚೆ ಭಾಗ್ಯ ಮ್ಹಳಯಾರಿ ಚ್ಹೂಖ ಜಾಯಸನಾ. ತಾಂಕಾ ದೇವಾನಿ ಆನ್ನೀಕೆ ಮಸ್ತ ಆಯು ಆನಿ ಆರೋಗ್ಯ ದೀವ್ನು ತಾಂಗೆಲೆ ತಾಕೂನು ಅಸ್ಸಾಲೇಚಿ ಆನ್ನೀಕೆ ಮಸ್ತ ಧಾರ್ಮಿಕ ಕಾರ್ಯ ಚಲೋವಚೆ ವರಿ ಕರೋ ಮ್ಹೊಣು ತ್ಯಾ ದೇವಾಲೆಂ ಮಾಗಣಿ ಕೊರ್ಯಾಂ.