ಕಾರ್ಕಳಾಚೆ ಜಿಎಸ್ಬಿ ಸಮಾಜ ಹಿತರಕ್ಷಣಾ ವೇದಿಕೆಚೆ ಮಹತ್ವಾಕಾಂಕ್ಷಿ ಯೋಜನಾ “ವಯೋವಂದನ ಆತಿಥ್ಯ ಗೃಹ” ಹಾಜ್ಜೆ ಇಮಾರತ್ತಾಚೆ ಭೂಮಿ ಪೂಜಾ ಆನಿ ಶಿಲಾನ್ಯಾಸ ಕಾರ್ಯಕ್ರಮ ಪರಮಪೂಜ್ಯ ಶ್ರೀ ಕಾಶೀ ಮಠಾಧೀಶ ಜಾಲೀಲೆ ಶ್ರೀ ಶ್ರೀ ಶ್ರೀ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮ ನಕ್ಷತ್ರ ( ಸ್ವಾತಿ ನಕ್ಷತ್ರ ) ದಿವಸು ಜಾಲೀಲೆ ೨೦೨೬ಚೆ ಫೆಬ್ರುವರಿ ೮ ಕ ಆಯ್ತವಾರು ಉಡುಪಿ ಜಿಲ್ಲೆಚೆ ಬ್ರಹ್ಮಾವರ ತಾಲೂಕಾಚೆ ಉಪ್ಪೂರಾಂತು ಧೋಂಪಾರಾ ೧೨ :೪೫ಚೆ ಅಭಿಜಿನ್ ಲಗ್ನಾಚೆ ಸುಮಹೂರ್ತಾಂತು ಸಂಪನ್ನ ಜಾಲ್ಲೆ. ವೇದಮೂರ್ತಿ ಶ್ರೀ ಚೇಂಪಿ ರಾಮಚಂದ್ರ ಅನಂತ ಭಟ್ ತಾನ್ನಿ ಭೂಮಿ ಪೂಜಾಚೆ ವಿಧಿ ವಿಧಾನ ಚಲೋನು ವಯೋವಂದನ ಆತಿಥ್ಯ ಗೃಹಾಚೆ ಶಿಲಾನ್ಯಾಸ ಕಾರ್ಯ ಚಲೋಸೂನು ದಿಲೆ. ವಿದ್ವಾನ್ ಹರಿಪ್ರಸಾದ್ ಶರ್ಮ ಆನಿ ಶ್ರೀ ಸತ್ಯನಾರಾಯಣ ಭಟ್ ತಾನ್ನಿ ಸಹಕಾರ ದಿಲ್ಲಿ.
ತ್ಯಾ ದಿವಸು ಸಕ್ಕಾಣಿ ೯:೦೦ ಘಂಟ್ಯಾಕ ಉಪ್ಪೂರ್ಚೆ ಲಾಗ್ಗಿಚೆ ಅಮ್ಮುಂಜೆ ಶ್ರೀ ದಾಮೋದರ ದೇವಳಾಚಾನ ಶಿಲಾನ್ಯಾಸಾಚೆ ವಾಸ್ತು ಶಿಲಾ ಶೋಭಾ ಯಾತ್ರೆಂತು ಉಡುಪಿ, ದಕ್ಷಿಣ ಕನ್ನಡ, ಉತ್ತರ ಕನ್ನಡ ಆನಿ ಶಿವಮೊಗ್ಗ ಜಿಲ್ಲ್ಯಾಚಾನ ಆಯಲೀಲೆ ಹಜಾರೋಬಽರಿ ಸಮಾಜ ಬಾಂದವಾಲೊ ಉಪಸ್ಥಿತೀರಿ ಬೃಹತ್ ಮೆರ್ವಣಿಗೇರಿ, ಅಲಂಕೃತ ವಾಹನಾರಿ ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಅಮೃತ ಹಸ್ತಾನಿ ಪೂಜ್ಜುನು ದಿಲೀಲೆ ಆನಿ ಇತರ ಶಿಲೆಂಕ ದವರೂನು ಭಕ್ತಿ-ಗೌರವಾರಿ ಉಪ್ಪೂರ್ಚೆ ನಿವೇಶನ ಲಾಗ್ಗಿ ಘೇವ್ನು ಆಯ್ಲೆ.
ಉಪರಂತ ಸಕ್ಕಾಣಿ ೧೦:೦೦ ಘಂಟ್ಯಾಚಾನ ೧೧:೪೫ ಘಂಟ್ಯಾ ಪರಿಯಂತ ಸಭಾ ಕಾರ್ಯಕ್ರಮ ಚಲ್ಲೆ. ೧೨:೦೦ ಘಂಟ್ಯಾ ತಾಕೂನು ಬೆಂಗಳೂರ್ಚೆ ನಾಂವಾಧಿಕ ಗಾಯಕ ಶ್ರೀ ಶಂಕರ ಶಾನಭಾಗ ಆನಿ ಪಂಗಡಾ ತಾಕೂನು ವಿಶೇಷ ಭಕ್ತಿ ಸಂಗೀತ ಕಾರ್ಯಕ್ರಮ ಚಲ್ಲೆ.
ಸಭಾ ಕಾರ್ಯಕ್ರಮಾಂತು ಪ್ರಾಸ್ತಾವಿಕ ಜಾವನು ಉಲಯಿಲೆ ಜಿಎಸ್ಬಿ ಸಮಾಜ ಹಿತ ರಕ್ಷಣಾ ವೇದಿಕೆಚೆ ಸಂಚಾಲಕ ಶ್ರೀ ಆರ್ ವಿವೇಕಾನಂದ ಶೆಣೈ ಉಲಯತಾ “ಘೆಲೀಲೆ ೧೪ ವರ್ಷಾಚಾನ ಸಮಾಜ ಸಂಘಟನ ಆನಿ ಸಮಾಜಮುಖಿ ಕಾರ್ಯ ಯೋಜನಾಂ ಅನುಷ್ಠಾನಾಕ ಹಾಡತಾ ಆಸ್ಸುನು,
ಉಡುಪಿ, ದಕ್ಷಿಣ ಕನ್ನಡ, ಉತ್ತರ ಕನ್ನಡ ಆನಿ ಶಿವಮೊಗ್ಗ ಜಿಲ್ಲ್ಯಾಂತು ಆರ್ಥಿಕ ಜಾವ್ನು ಮಸ್ತ ಸಂಕಷ್ಟಾಂತು ಆಸ್ಸುಚೆ ಕುಟುಂಬಾಂಕ ದರ ಮ್ಹಹಿನೋ ತಾಂಗೆಲೆ ಬ್ಯಾಂಕ್ ಖಾತೆಕ ರೂ. ೧,೦೦೦/- ತಾಕೂನು ೨,೫೦೦/- ಪರಿಯಂತ ಸುಮಾರ ೧೯೨ ಕುಟುಂಬಾಂಕ ಕುಟುಂಬ ಚೈತನ್ಯ ನಿಧಿ ನಿಯಮಿತ ಜಾವ್ನು ಪಾವತಾ ಆಸ್ಸಾ, ಘೆಲೀಲೆ ವರ್ಷ ಯೋಜನೆಚೆ ದಶಮಾನೋತ್ಸವ ವೇಳ್ಯಾರಿ ದರ ಕುಟುಂಬಾಕ ರೂಪಾಯಿ ೧೨,೦೦೦/- ಆಪದ್ದನ ದಿವಚಾಕ ಘಽರ ಘಽರಾಕ ಭೆಟ್ಟಿಲೆ ತೆದ್ನಾ, ಸುಮಾರ ೧೬ ಕುಟುಂಬಾಂಕ ಸ್ವಂತ ಘಽರ ಜಾಂವೊ ಭಾಡೇ ಘರಾಂತು ಆಸ್ಸುಚಾಕ ಜಾಯನಾಶ್ಶಿಲೆ ಸ್ಥಿತಿಂತು ದುಸರ್ಯಾಲೆ ಆಶ್ರಯಾಂತು ಆಸ್ಸುಚೆ ದುಸ್ಥಿತಿ ಪಳೋನು ಮಸ್ತ ವೇದನಾ ಜಾಲ್ಲೆ. ಅಸ್ಸಾಲೆ ಸಂಕಷ್ಟಮಯ ಪರಿಸ್ಥಿತಿ ತಾಕೂನು ತ್ಯಾ ಕುಟುಂಬಾಂಕ ಭಾಯರಿ ಹಾಡ್ನು, ತಾನ್ನಿ ಮರ್ಯಾದೇರಿ ವಾಂಚೆಕ ಅನ್ಕೂಲ ಜಾವ್ಚೆ ವರಿ “ವಯೋವಂದನ ಆತಿಥ್ಯ ಗೃಹ ಯೋಜನಾ” ಹಾಜ್ಜೆ ಚಿಂತನಾ ಆಯ್ಲೆ ಆನಿ ಆತ್ತ ತ್ಯಾ ಕಾರ್ಯರೂಪಾಕ ಯತ್ತಾ ಆಸ್ಸಾ. ಮ್ಹಳ್ಳೆ.
ಸಭಾ ಕಾರ್ಯಕ್ರಮ ಉದ್ಘಾಟನ ಕೆಲೀಲೆ ವೇದಿಕೆಚೆ ಮಾರ್ಗದರ್ಶಕ ಜಾಲೀಲೆ ಶ್ರೀ ಚೇಂಪಿ ರಾಮಚಂದ್ರ ಅನಂತ ಭಟ್ ತಾನ್ನಿ, ವೇದಿಕೆಚೆ ಪದಾಧಿಕಾರಿ ಸಮಾಜಮುಖಿ ಚಿಂತನಾ, ಸಾಮಾಜಿಕ ಕಳಕಳಿಚೆ ಯೋಜನಾ ಜನಮಾನಸಾಕ ಪಾವ್ಲೆ. ತಾಕ್ಕಾ ಸಮಾಜಾ ತಾಕೂನು ಅಭೂತಪೂರ್ವ ಸಮರ್ಥನ ಮೆಳ್ತಾ ಆಸ್ಸುಚೆ ಖಾತ್ತಿರಿ ಅಪಾರ ಆನಂದ ವ್ಯಕ್ತ ಕೆಲ್ಲೆ.
ಉಡುಪಿಚೆ ತ್ರಿಷಾ ವಿದ್ಯಾ ಕಾಲೇಜಾಚೆ ಸಂಸ್ಥಾಪಕ ಜಾಲೀಲೆ ಸಿಎ ಗೋಪಾಲಕೃಷ್ಣ ಭಟ್ ತಾನ್ನಿ ಉಲಯತಾ “ಮ್ಹಾಲ್ಗಡ್ಯಾಲೆ ಆರೈಕೆ ಸವಾಲಾಚೆ ಕಾಮ ಜಾವ್ನಾಸ್ಸುನು, ವೇದಿಕೆಚೆ ಪದಾಧಿಕಾರಿಂಗೆಲೆ ಸತತ ಪರಿಶ್ರಮ, ಸಮಾಜಾಚೆ ಸಹಯೋಗ ಆನಿ ದಾನಿಂಗೆಲೆ ಮದತ್ತಾನಿ ಹೇ ಮಹತ್ವಕಾಂಕ್ಷಿ ಯೋಜನಾ ಬೆಗ್ಗೀ ಅನುಷ್ಠಾನಾಕ ಯವೋ ಮ್ಹೊಣು ಸಾಂಗೂನು ದೇವು ಬರೆಂ ಕೊರೊಂ ಮ್ಹಳ್ಳೆ.
ಯೋಜನೆಚೆ ಮಾರ್ಗದರ್ಶಕ ಜಾಲೀಲೆ ಡಾ ಕಲ್ಯ ಸುರೇಶ್ ಶೆಣೈ ತಾನ್ನಿ ಕುಟುಂಬಾಚೆ ಮ್ಹಾಲ್ಗಡ್ಯಾಂಕ ಗೌರವಯುತ ಜಾವ್ನು ಜೀವನಾಚೆ ಅಖೇರಿಚೆ ದಿವಸಾಚೆ ಪರಿಯಂತ ಚಾಂಗ ಜಾವ್ನು ಪಳೋನು ಘೆವ್ಚೆ ಆಮ್ಗೆಲೆ ಸಕಡ್ಯಾಲೆ ಆದ್ಯ ಕರ್ತವ್ಯ. ಚರಡುಂವ ನಾಶ್ಶಿಲೆ ದಂಪತಿನಿ ಅನಿವಾರ್ಯ ಕಾರಣಾನಿ ಮಾಂತಾರ್ಪಣಾಂತು ಭೊಗಚೆ ಧೂಖಿ, ಸಂಕಟಾಂಕ ಹೇ ಯೋಜನಾ ನಿಮಿತ್ತ್ಯಾನಿ ಶಾಶ್ವತ ಪರಿಹಾರ ದಿವ್ಚೆ ಬರಶಿ ಸಮುದಾಯಾಚೆ ಜವಾಬ್ದಾರಿ ಕಸ್ಸಲೆ ಮ್ಹೊಣು ಉಡಗೋಸು ಕೊರನು ದಿತ್ತಾ ಮ್ಹೊಣು ಸಾಂಗ್ಲೆ. ವೇದಿಕೆಚೆ ಹೇ ಮಹತ್ಕಾರ್ಯಾಕ ಸಮಾಜಾಚೆ ನಿಮಿತ್ತ್ಯಾನಿ ಮದತ್ ಪೋವ್ನು ಯತ್ತಾ ಆಸ್ಸುಚೆ ಆನಂದಾಚೆ ವಿಚಾರ ಮ್ಹೊಣು ದೇವು ಬರೆಂ ಕೊರೊಂ ಮ್ಹಳ್ಳೆ.
ಸಮಾರಂಭಾಚೆ ಅಧ್ಯಕ್ಷ ಪಣ ಘೆತ್ತಿಲೆ ಸಿಎಎಸ್ಎಸ್ ನಾಯಕ್ ತಾನ್ನಿ “ಜೀವನಾಚೆ ಸಂಕಷ್ಟಾಚೆ ವೇಳ್ಯಾರಿ ವೇದನಾ ಖಾಲೀಲೆ ಶಂಬರ ಬಽರಿ ಮ್ಹಾಲ್ಗಡ್ಯಾಂಕ ಸಮಾಜಾಚೆ ದಾನಿಂಗೆಲೆ ಮದತ್ತಾನಿ ಫುಕಟ್ ಜಾಲೀಲೆ ಆಶ್ರಯ ದಿವಚೆ ಯೋಜನಾ ಸಮುದಾಯಾಚೆ ಸಹಭಾಗಿತ್ವಾನಿ ಯಶಸ್ವಿ ಜಾವ್ನು ಮುಖಾರ ಸರೋ ಮ್ಹೊಣು ದೇವು ಬರೆಂ ಕೊರೊಂ ಮ್ಹಳ್ಳೆ.
ಈ ವೇಳ್ಯಾರಿ ವೇದಿಕೆರಿ ಅಮ್ಮುಂಜೆಚೆ ಶ್ರೀ ದಾಮೋದರ ದೇವಳಾಚೆ ಆಡಳಿತ ಧರ್ಮದರ್ಶಿ ಜಾಲೀಲೆ ಶ್ರೀ ವಿನೋದ ನಾಯಕ್, ಸಮಾಜಾಚೆ ಗಣ್ಯ ಜಾಲೀಲೆ ಮುಂಬೈಚೆ ಉದ್ಯಮಿ ಶ್ರೀ ಮಧು ಭಂಡಾರ್ಕರ್, ಬೆಂಗಳೂರ್ಚೆ ಶ್ರೀಮತಿ ಸತ್ಯಭಾಮ ಕಾಮತ್ , ಶ್ರೀಮತಿ ಕುಂಬ್ಳೆ ಶ್ರೀಮತಿ ನಾಯಕ್, ಶ್ರೀ ವಿಜಯಕುಮಾರ್ ಶೆಣೈ, ಲೇಖಕಿ ಶ್ರೀಮತಿ ಪ್ರಜ್ವಲಾ ಶೆಣೈ, ಶ್ರೀಮತಿ ರಮ್ಯಾ ನಾಯಕ್, ನಂದ್ಯಾಲ ರಘುವೀರ ಶೆಣೈ ದಂಪತಿ, ದಾನಿ ಜಾಲೀಲೆ ಶ್ರೀ ವೀರ ಸಿಂಹ ನಾಯಕ್ ದಂಪತಿ, ಮಂಗಳೂರ್ಚೆ ಶ್ರೀ ಸುಬ್ರಹ್ಮಣ್ಯ ಪ್ರಭು, ಉಡುಪಿಚೆ ಶ್ರೀ ಎಚ್ .ನಾಗೇಶ್ ಕಾಮತ್ ಉಪಸ್ಥಿತ ವ್ಹರಲೀಲೆ.
ವೇದಿಕೆಚೆ ಅಧ್ಯಕ್ಷ ಶ್ರೀ ಜಿ ಸತೀಶ್ ಹೆಗ್ಡೆ ತಾನ್ನಿ ಯೇವಕಾರ ಕೆಲ್ಲಿ. ಪ್ರಧಾನ ಕಾರ್ಯದರ್ಶಿ ಸಾಣೂರು ನರಸಿಂಹ ಕಾಮತ್ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೊರನು ಅಖೇರಿಕ ಆಬಾರ ಮಾನಲೆ.