ವಿಜಯನಗರಾಚೆ ನಚಿಕೇತ ಕೇಂದ್ರಾಂತು ಶ್ರೀ ರಾಮ ಜಪ ಪಠಣ ಆನಿ ಕಾರ್ತಿಕ ದೀವೆಂ

ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೆ ಸಂಕಲ್ಪಾಚೆ ಶ್ರೀ ರಾಮ ನಾಮ ತಾರಕ ಮಂತ್ರ ಜಪ ಅಭಿಯಾನ ನಿಮಿತ್ತ್ಯಾನ ಗಾಂವ ಗಾಂವಾಂತು ಜಿ.ಎಸ್.ಬಿ. ಬಾಂದವ ಏಕತ್ರ ಜಾವನು, ಪರಸ್ಪರ ಲಾಗ್ಗಿ ಆಯಲೀಲೆ ಸಕಡಾಂಕ ಗೊತ್ತಾಶ್ಶಿಲೆ. ತಶ್ಶಿ ಶ್ರೀ ರಾಮನಾಮ ತಾರಕ ಮಂತ್ರ ಜಪ ಅಭಿಯಾನಾಂತು ವಾಂಟೊ ಘೆತ್ತಿಲೆ ಏಕ ಕೇಂದ್ರ ಬೆಂಗಳೂರು ದ್ವಾರಕಾನಾಥ ಭವನಾಕ ಮೇಳಯಿಲೆ ವಿಜಯನಗರಾಚೆ ನಚಿಕೇತ ಕೇಂದ್ರ, ಹಾಂಗಾ ಘೆಲೀಲೆ ವರಸಾಚೆ ರಾಮನವಮಿಚಾನ ನಿರಂತರ ಜಾವನು ಶ್ರೀ
ನಾಮ ತಾರಕ ಮಂತ್ರ ಜಪ ಅಭಿಯಾನ ಚಲ್ತಾ ಆಯಲಾ. ಸಕಡಾಂಕ ಗೊತ್ತಾಶ್ಶಿಲೆ ವರಿ ಹೇ ಅಭಿಯಾನ ಮುಕ್ತಾಯ ಜಾಲಯಾರೀಚಿ ಪೂಜ್ಯ ಸ್ವಾಮ್ಯಂಗೆಲೆ ಆದೇಶಾನುಸಾರ ನವಂಬರ್ ೨೬ ಪರಿಯಂತ ಅಭಿಯಾನ ಮುಖಾರಸೂನು ವ್ಹರಚಾಕ ಠರಯಿಲೆ ಆಸ್ಸುನು, ತತ್ಸಂಬಂಧ ಪಯ್ರಿ ನವಂಬರ 16 ತಾರೀಖೆ ದಿವಸು ನಚಿಕೇತ ಕೇಂದ್ರಾ ಶಂಬರ ಭಽರಿ ಸಮಾಜ ಬಾಂದವಾನಿ ಮೇಳ್ನು ಶ್ರೀ ರಾಮ ಜಪ ಪಠಣ ಆನಿ ಕಾರ್ತಿಕ ದೀಪೋತ್ಸವು ಕಾರ್ಯಕ್ರಮ ಚಲಯಿಲೆ.

ತ್ಯಾ ದಿವಸು ಸಾಂಜವಾಳಾ ೫-೩೦ ತಾಕೂನು ೬-೩೦ ಪರಿಯಂತ ಶ್ರೀ ಅಶೋಕ ಮಲ್ಲ್ಯಾ ಹಾಂಗೆಲೆ ಮುಖಾಲಪಣಾರಿ ಚಲೀಲೆ ಶ್ರೀ ರಾಮನಾಮ ಪಠಣಾಂತು ಒಟ್ಟು ಏಕ ಲಾಕ ಆಠ ಹಜರಾ ಪಶಿ ಚ್ಹಡ ಜಪ ಪಠಣ ಚಲ್ಲೆ. ಮಾಗಿರಿ ಚಲೀಲೆ ದೀಪೋತ್ಸವಾಂತು ಬಾಯ್ಲಮನ್ಶೆ, ಧಾರಲೆಂ, ಚರಂಡುವ ಮ್ಹಣಚೆ ಬೇಧನಾಶೀ ಸಕಡಾನಿ ಮೇಳ್ನು ಹಜಾರ ಬಽರಿ ಪಣ್ತಿ ಲಾವ್ನು ತಾಜ್ಜೇನ ಪ್ರಜ್ವಲಿತ ಹುಜ್ವಾಡಾನಿ ಸಂಭ್ರಮ ಪಾವ್ಲೆ. ಪಾಂಡುರಂಗ ದೇಸಾಯಿ ಮಾಮ ಕುಟುಂಬ ಮತ್ತು ರಾಮಚಂದ್ರ ಕಿಣಿ ಮಾಮ ಕುಟುಂಬ ಹೇ ದಿವಸಾಚೆ ಸೇವಾದಾರ ಜಾವ್ನಾಶ್ಶಿಲೆ. ಶಾರದಾ ಶಾಂತರಾಮ ಕಾಮತ್ ಹಾನ್ನಿ ಉಪಸ್ಥಿತ ಸಕಡಾಂಕ ಪ್ರಸಾದ ರೂಪಾಂತು ಬೊಂದಿಲಾಡು ತಶೀಚಿ ಕಮಲಾಕ್ಷ ಕಿಣಿ ಹಾನ್ನಿ ಸೇಬು ವಾಂಟಿಲೆ. ವಸಂತ ಶೆಣೈನಿ ಹನುಮಕಾಣಿಕಾ ದಿಲ್ಲೆ. ನವೆಂಬರ್ ೨೩ಕ ಪ್ರತಿಮಾ ವಿಸರ್ಜನಾ ಚೊಲ್ಚೆ ಆಸ್ಸುನು ತಾಜ್ಜೆ ಮಾಹಿತಿ ದಿವನು ರಾಮಚಂದ್ರ ಕಿಣಿ ತಾನ್ನಿ ಆಬಾರ ಮಾನ್ಲೆ.

ಹೇ ವೇಳ್ಯಾರಿ ಭಜನೆ ಬರಶಿ ದಿವಲಿಚೆ ಸುತ್ತೂ ಡಿಂಡಿ ನರ್ತನ, ಜೈ ಶ್ರೀ ರಾಮ್ ಘೋಷ ಚಲ್ಲೆ. ಅಶೋಕ ಮಲ್ಲ್ಯಾ ತಾಕೂನು ಮಂಗಳಾರತಿ. ಸೇವಾದಾರಾಂಕ ಪ್ರಸಾದ್ ವಾಂಟಪ, ಪ್ರಸಾದ ರೂಪಾಂತು ಲಘು ಉಪಾಹಾರ ಸಮರ್ಪಣ ಚಲ್ಲೆ.
ಕಾರ್ತಿಕ ದಿವ್ಲೆಚೆ ಅದ್ಭುತ ಆನಿ ಸುಂದರ ಜೋಡಣಾ ಸ್ಮೃತಿ ಶೇಣ್ವಿ, ಅಪರ್ಣ ಶೇಣ್ವಿ, ಶಿಲ್ಪಾ ಶೇಣ್ವಿ , ಸ್ವಾತಿ ಶೇಣ್ವಿ, ಕೀರ್ತನಾ ಶಾನಬಾಗ್, ಕಾಮಾಕ್ಷಿ ಪೈ ಆನಿ ಮನೋರಮ ಕಾಮತ್ ತಂಡಾಚಾನ ಕೆಲೀಲೆ. ತಾಂಕಾ ಸಂಘಟಕಾನಿ ಆಬಾರ ಮಾನಲೆ.

ಹೇ ವೇಳ್ಯಾರಿ ಪ್ರಧಾನ ಸಂಚಾಲಕ ಅಶೋಕ ಮಲ್ಯ, ಆನಿ ಅನಿಲ ಶೇಣ್ವಿ, ಸಹ ಸಂಚಾಲಕ ಎ ಜಿ ಪೈ , ವಿಲಾಸ ಕಾಮತ್, ದಯಾನಂದ ಸೇಟಿಯೆ, ಅರವಿಂದ ಭಟ್, ಸುರೇಶ್ ಶೇಣ್ವಿ, ಗಣಪತಿ ಭಟ್. ಶಾಖಾ ಪ್ರಮುಖ ನರಸಿಂಹ ಶೆಣೈ. ಉಪ ಶಾಖಾ ಪ್ರಮುಖ ಪ್ರಭಾಕರ ಕಶ್ಯಪ್ ಸಹಿತ ಶಂಬರ ಬಽರ ಸಮಾಜ ಬಾಂದವ ಹರಿ-ಗುರು ಕಾರ್ಯಕ್ರಮಾಂತು ವಾಂಟೊ ಘೇವ್ನು ಪುನೀತ ಜಾಲ್ಲೆ.