ಅವುಂದು ಕೋಟೇಶ್ವರಾಂತು ಶ್ರೀ ಪಟ್ಟಾಭಿ ರಾಮಚಂದ್ರ ದೇವಳಾಂತು ಚಲೀಲೆ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸು ವೈಶಿಷ್ಠ್ಯ ಪೂರ್ಣ ಜಾವ್ನಾಶ್ಶಿಲೆ. ತಾಕ್ಕ ಕಾರಣ ಅವುಂದು ಆದಲೆಂ ಮಠಾಧೀಶ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮ ಶತಮಾನೋತ್ಸವ ವರ್ಷಾಚರಣ ಮ್ಹಳಯಾರಿ ಚ್ಹೂಖ ಜಾಯಸನಾ. ತತ್ಸಂಬಂಧ ಹೇ ಚಾತುರ್ಮಾಸ ವೇಳ್ಯಾರಿ ಶಂಬರ ದಿವಸು ಅಖಂಡ ಭಜನಾ, ಶತ ನಮನ ಶತ ಸ್ಮರಣ, ಶಂಬರ ಕಲಾವಿದ ತಾಕೂನು ಗಾಯನ ಆದಿ ಸಬಾರ ಕಾರ್ಯಕ್ರಮ ಚಲ್ಲೆ. ತಾಕ್ಕ ಸಕಡಾಕ ಮುಕುಟ ಪ್ರಾಯ ಜಾವನು ಶ್ರೀ ಕಾಶೀ ಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಚಾತುರ್ಮಾಸಾಚೆ ದಿಗ್ವಿಜಯ ಮಹೋತ್ಸವ ಅ. ೨೬ಕ ಮಹಾ ವೈಭವಾರಿ ಚಲ್ಲೆ.
ಪೂಜಾ, ಕರ್ನಾಟಕ, ಕೇರಳ ಮಾತ್ರ ನ್ಹಂಹಿಸಿ ದೇಶಾಚೆ ವೆಗವೆಗಳೆ ಬಗಲೇಚಾನ ಆನಿ ವಿದೇಶಾಚಾನ ವರೇನ ಆಯಲೀಲೆ ಹಜಾರಗಟ್ಲೆ ಸಮಾಜ ಬಾಂದವಾಂಕ ಅನ್ನದಾನ ಚಲ್ಲೆ. ಉಪರಾಂತ ಸಾಂಜವಾಳಾ ೬ ಘಂಟ್ಯಾಚಾನ ಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮೆಂ ಪುಷ್ಪಾಲಂಕೃತ ವಾಹನಾಂತು ಕೋಟೇಶ್ವರಾಚೆ ಪಬ್ಲಿಕ್ ಸ್ಕೂಲ್ ತಾಕೂನು ಭಾಯ್ರಿಸೊರನು ಎಂ.ವಿ. ರಸ್ತ್ಯಾ ಮೂಖಾಂತರ ಚೋಲ್ನು ಪರತೂನು ಶ್ರೀ ಪಟ್ಟಾಭಿ ರಾಮಚಂದ್ರ ದೇವಳಾಕ ಆಯ್ಲೆ. ಹೇ ವೇಳ್ಯಾರಿ ಉಡುಪಿ, ದ.ಕ., ಕೇರಳ, ಮಹಾರಾಷ್ಟ್ರ ಗೋವಾ ರಾಜ್ಯ ತಾಕೂನು ಆಯಲೀಲೆ ೧೦ ಹಜಾರಾ ಪಶಿ ಚ್ಹಡ ಸಮಾಜ ಬಾಂಧವಾನಿ ವಾಂಟೊ ಘೆತ್ತಿಲೆ. ಪೂಜ್ಯಾಂಗೆಲೆ ದಿಗ್ವಿಜಯ ಪ್ರಯುಕ್ತ ಸಗಳೇ ಕೋಟೇಶ್ವರ ಪೇಂಟಾಚೆ ಚಾರೀ ರಸ್ತ್ಯಾಕ ವಿಶೇಷ ಜಾವ್ನು ಶೃಂಗಾರ ಕೆಲೀಲೆ.
ವೆಗವೆಗಳೆ ಸ್ತಬ್ಧಚಿತ್ರ ಸಹಿತ ಚಲೀಲೆ ದಿಗ್ವಿಜಯಾಂತು ಅಯೋಧ್ಯಾ ರಾಮಮಂದಿರ, ವಾಘಾ ವೇಸು, ಪಂಚವಾದ್ಯ, ಹನುಮಂತು, ಬಾಯ್ಲಮನ್ಶೆ ತಾಕೂನು ಚಂಡೆವಾದನ, ಹರಿದಾಸ ಆದಿ ಕಾರ್ಯಕ್ರಮ ಮೆರ್‍ವಣಿಗೇಕ ವಿಶೇಷ ಶೋಭಾ ದಿಲ್ಲೇಲೆ. ತಮಾಶಾ ವಕ್ದಾ ಲಾಸ್ಸುಚೆ ಪ್ರದರ್ಶನಾಯಿ ಚಲ್ಲೆ. ದಿವಸ ಬಽರಿ ಕೋಟೇಶ್ವರಂತು ಪರಭೆಚೆ ಸಂಭ್ರಮು ಆಶ್ಶಿಲೆ. ಘೆಲೀಲೆ ಸಬಾರ ದಿವಸಾಚಾನ ಸಾಂಜವಾಳ ಜಾವ್ಚೆ ಭಿತ್ತರಿ ರೊಕಯತಾ ಆಶ್ಶಿಲೆ ಪಾವ್ಸಾನ ವರೇನ ವಿರಾಮ ದೀವ್ನು ಸಮಾಜ ಬಾಂದವಾಲೊ ಸಂಭ್ರಮು ದೋನ್ಪಟ್ಟ ಜಾವ್ಚೆ ವರಿ ಕೆಲ್ಲೊ. ಸ್ವಾಮ್ಯಾನಿ ಸಮಾಜ ಬಾಂದವಾಂಕ ಪ್ರಸಾದು ದಿಲ್ಲೊ.