`ಆಧುನಿಕ ತಂತ್ರವಿಜ್ಞಾನಾಚ್ಯಾ ಹ್ಯಾ ಕಾಳಾಂತ ಇತಲೇ ಆವಿಶ್ಕಾರ ಆನೀ ಸಂಶೋಧನ ಜಾಲೇ ತರೀ ಫಕತ ರಗತಾಚೇರ ಸಂಶೋಧನ ಕರಪಾಕ ಆಜ ಪರಿಯಂತ ಶಕ್ಯ ಜಾಯನಿ. ರಗತಾಕ ಪರ್ಯಾಯ ನಾ. ಆಪತ್ಕಾಲೀನ ಪರಿಸ್ಥಿತೀಂತ ರೋಗಿಂಕ ಜಾಯ ಆಶಿಲ್ಲೇಂ ರಗತ ಪುರವಣ ಕರಪಾಕ ಆನೀ ಅಮೂಲ್ಯ ಜೀವು ವಾಂಚೆಚಾಕ ಸ್ವಯಂಸೇವೀ ರಗತದಾನ ಮದತ ಕರತಾ. ದೇಖೂನ ಸ್ವ‌ಇಚ್ಛೆನಿ ರಗತದಾನ ಕರೂನ ರೋಗಿಲೆ ಜೀವ ವಾಂಚೆಚ್ಯಾ ಉದಾತ್ತ ವಾವರಾಂತ ಸಗಳ್ಯಾಂನೀ ಹಾತ ಮೇಳೋವಚೋ ಅಶೇಂ ಮ್ಹೊಣು ಮಲ್ಯರಮಠ ಶ್ರೀ ವೇಂಕಟರಮಣ ದೇವಳಾಚೇ ಆಡಳಿತ ಮೊಕ್ತೇಸರ ಶ್ರೀ ಸದಾಶಿವ ನಾಯಕ ತಾನ್ನಿ ಸಾಂಗ್ಲೆ.
ಮಲ್ಯರಮಠ ಶ್ರೀ ವೆಂಕಟರಮಣ ದೇವಸ್ಥಾನ ಗಂಗೊಳ್ಳಿ ಹಾಂಗೆಲೆ ಆಶ್ರಯಾರಿ ಇಂಡಿಯನ್ ರೆಡ್‌ಕ್ರಾಸ್ ಸೊಸೈಟಿ ರಕ್ತನಿಧಿ ಕೇಂದ್ರ ಕುಂದಾಪುರ ಹಾಂಗೆಲೆ ಮೇಳಾವಟ್ಟಾರಿ ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮ್ಯಾಂಗೆಲೊ ಜನ್ಮ ದಿನೋತ್ಸವ ಪ್ರಯುಕ್ತ ಗಂಗೊಳ್ಳಿ ಮಲ್ಯರಮಠ ಶ್ರೀ ವೆಂಕಟರಮಣ ದೇವಳಾಚೆ ವಿದ್ಯಾಧಿರಾಜ ಸಭಾಗೃಹಾಂತು ಚಲೀಲೆ ಸ್ವಯಂಪ್ರೇರಿತ ರಕ್ತದಾನ ಶಿಬಿರ ೧೨-೧೦-೨೦೨೫, ಆಯ್ತವಾರ ಉದ್ಘಾಟನ ಕೊರನು ತಾನ್ನಿ ಉಲಯತಾಲೆ.
ಇಂಡಿಯನ್ ರೆಡ್‌ಕ್ರಾಸ್ ಸೊಸೈಟಿ ರಕ್ತನಿಧಿ ಕೇಂದ್ರ ಕುಂದಾಪುರ ಹಾಜ್ಜೆ ಸುಜಯಾ ತಾನ್ನಿ ಉಲಯಿಲೆ. ಆಡಳಿತ ಮಂಡಳಿಚೆ ಜಿ.ವೆಂಕಟೇಶ ನಾಯಕ್ ಉಪಸ್ಥಿತ ವ್ಹರಲೀಲೆ.
ಪತ್ರಕರ್ತ ಬಿ.ರಾಘವೇಂದ್ರ ಪೈ ತಾನ್ನಿ ಯೇವಕಾರ ಕೊರನು ಕಾರ್ಯಕ್ರಮಾಚೆ ನಿರ್ವಹಣ ಕೆಲ್ಲಿ. ಶ್ರೀ ವೆಂಕಟರಮಣ ದೇವಳಾಚೆ ಪ್ರಧಾನ ಅರ್ಚಕ ಎಸ್.ವೆಂಕಟರಮಣ ಆಚಾರ್ಯ ತಾನ್ನಿ ಪ್ರಾಸ್ತಾವಿಕ ಜಾವ್ನು ಉಲಯಿಲೆ. ದೇವಳಾಚೆ ವ್ಯವಸ್ಥಾಪಕ ಬಿ.ಗಣೇಶ ಶೆಣೈ ತಾನ್ನಿ ಸಹಕಾರ ದಿಲ್ಲಿ. ಎನ್.ಅಶ್ವಿನ್ ನಾಯಕ್ ತಾನ್ನಿ ಆಬಾರ ಮಾನ್ಲೆ.