ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚ್ಯಾ ವತಿನ ಆಕಾಡೆಮಿಚ್ಯಾ ಸಭಾಂಗಣಾಂತ್ ೧೦ ಅಕ್ಟೋಬರ್ ೨೦೨೬ ದಿಸಾ ಕಾವ್ಯಾಂ ವ್ಹಾಳೊ-೧೯ ಹ್ಯಾ ಶೀರ್ಷಿಕೆ ಖಾಲಾ ಕೊಂಕಣಿ ಕವಿಗೋಷ್ಠಿ ಆಯೋಜಿತ ಜಾಲೀಲೆ.
ಹ್ಯಾ ಕಾರ್ಯಕ್ರಮಾಚೆ ಅಧ್ಯಕ್ಷಪಣ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ಹಾಂಣಿಂ ಘೆತ್ತಿಲೆ. ಆಪ್ಲ್ಯಾ ಪ್ರಾಸ್ತಾವಿಕ ಉಲೋವಪಾಂತ್ ತಾಂಣಿಂ, “ಕಾವ್ಯಾಂ ವ್ಹಾಳೊ ಹೋ ಫಕ್ತ್ ಏಕ್ ಕೊಂಕಣಿ ಕವಿಗೋಷ್ಠಿ ಕಾರ್ಯಕ್ರಮ ನ್ಹಯ್, ತರ ಕೊಂಕಣಿಚ್ಯಾ ಸಗ್ಳ್ಯಾ ಸಮುದಾಯಾಂತಲ್ಯಾ ಲೋಕಾಂಕ್ ಅಕಾಡೆಮಿಚ್ಯಾ ಕಾರ್ಯಕ್ಷೇತ್ರಾಂತ್ ಹಾಡ್ಚೊ ಏಕ್ ಮಾರ್ಗ್ ಆಸ್. ಅಕಾಡೆಮಿ ಆನಿ ಕೊಂಕಣಿ ಜನಾಂ ಮಧೇಚೊ ಸಂಬಂಧ್ ಆನಿ ಘಟ್ಮುಟ್ ಕರಪಾಕ್ ಹಿ ಕವಿಗೋಷ್ಠಿ ಮಹತ್ತ್ವಾಚಿ ಭೂಮಿಕಾ ವಹಣ್ ಕರತಾ. ಸುಮಾರು ೧೫೦ ಪರಸ್ ಚಡ ಕೊಂಕಣಿ ಕವಿ-ಕವಯಿತ್ರಿಂಕ್ ಏಕತ್ರ್ ಹಾಡೂನ್ ಸಾಹಿತ್ಯ ಕ್ಷೇತ್ರಾಕ್ ತಾಂಚೆಂ ದೇಣಿಗಾ ಅರ್ಪಣ್ ಕರಪಾಚೊ ಮಾನ್ ಅಕಾಡೆಮಿಕ್ ಮೆಳ್ಳಾ ಅಶೆ ತಾಂಣಿಂ ಸಾಂಗ್ಲೆಂ. ಮಾಗೀರ್ ತಾಂಣಿಂ ಕವಿಗೋಷ್ಠಿಕ್ ಹಾಜರ್ ಆಶಿಲ್ಲ್ಯಾ ಸಗ್ಳ್ಯಾಂಚೆಂ ಸ್ವಾಗತ್ ಕೆಲ್ಲೊ.
ಮುಖೇಲ ಸೊಯರೋ ಆನಿ ಕರ್ನಾಟಕ ಕೊಂಕಣಿ ಲೇಖಕ ಸಂಘಾಚೆ ಸಂಚಾಲಕ್ ಶ್ರೀ ರಿಚ್ಚರ್ಡ್ ಮೊರಾಸ್ ಹಾಂಣಿಂ ಅಕಾಡೆಮಿನಿಂ ಪ್ರಕಾಶಿತ್ ಕೆಲ್ಲೆಂ ಕಾವ್ಯಾಂ ವ್ಹಾಳೊ-೩ ಕವಿತಾ ಪುಸ್ತಕ್ ಪ್ರಕಾಶನ್ ಕೆಲೊ. ತಾಂಚ್ಯಾ ಉಲೋವಪಾಂತ್ ತಾಂಣಿಂ, ಕನ್ನಡಾಂತಲ್ಯಾ ಪ್ರಸಿದ್ಧ ಕವಿ ದ.ರಾ. ಬೇಂದ್ರೆ ಹಾಂಣಿಂ ಸಾಂಗ್ಲ್ಯಾ ಪ್ರಮಾಣ್, ಕವಿತೆ ಕರುಳಿನಲ್ಲಿ ಹುಟ್ಟಬೇಕು, ಗಂಟಲಿನಲ್ಲಿ ನೆಲೆಯಾಗಬೇಕು. ಸಾಹಿತ್ಯ್ ಕೆದನಾಂಯಿ ರಾಬೀಲೆ ಉದಕ್ ನ್ಹಯ್; ತ್ಯಾ ನದಿಚ್ಯಾ ಪ್ರವಾಹಾ ಸಾಂಗಾತ್ ಸದಾಂ ಚಲನ್‌ಶೀಲ್ ಆಸೂಕ್ ಜಾಯ್. ಕವಿತೆ ಹಿ ಫಕ್ತ್ ಕಾಯಿ ಶಬ್ದಾಂಚಿ ಜೋಡಣಿ ನ್ಹಯ್, ತರ ಮನಾಂತಲ್ಯಾ ಅನುಭವಾಂಚೆಂ ಸುಂದರ್ ಅಭಿವ್ಯಕ್ತೀಕರಣ್ ಆಸ್ ಮ್ಹೊಣು ಸಾಂಗ್ಲೆಂ.
ಕೊಂಕಣಿ ಜಾನಪದ ಕಲಾವಿದ್ ಆನಿ ಸಂಗೀತಕಾರ್ ಶ್ರೀ ಮುಕುಂದ್ ಖಾರ್ವಿ ಹಾಂಣಿಂ ಅಕಾಡೆಮಿಚೊ ಸನ್ಮಾನ್ ಸ್ವೀಕಾರ್ ಕರೂನ್ ಉಲಯ್ತಾನಾ, “ಹಾಂವ್ ಏಕ್ ಮೊಟೊ ಕಲಾವಿದ್ ನಾಸ್ಲೊ ಜಾಲ್ಯಾರಿ, ಮಾಜ್ಯಾ ಲ್ಹಾನ್-ಮೋಠ್ಯಾ ಸಾಧನೆಚಿ ದಖಲ್ ಘೆವ್ನ್ ಮಾಕಾ ಸನ್ಮಾನಿತ್ ಕೆಲ್ಲ್ಯಾ ಖಾತಿರ್ ಹಾಂವ್ ಅಕಾಡೆಮಿಚೆಂ ಮನಃಪೂರ್ವಕ್ ಆಭಾರ್ ಮಾನ್ತಾಂ. ಹಾಂವ್ ಏಕ್ ಅದ್ಭುತ ವಕ್ತೊ ನ್ಹಯ್; ಪೂಣ್ ಮಾಜ್ಯಾ ಭಾವನಾ ಗೀತಾಂಚ್ಯಾ ಮಾಧ್ಯಮಾಂತ್ಲ್ಯಾನ್ ವ್ಯಕ್ತ್ ಕರೂಂಕ್ ಮಾಕಾ ಆವಡ್ತಾ, ಅಶೆ ಸಾಂಗೂನ್ ತಾಂಣಿಂ ಹ್ಯಾ ಪ್ರಸಂಗಾರ್ ಏಕ್ ಕೊಂಕಣಿ ಜಾನಪದ್ ಗೀತ್ ಸಾದರ್ ಕೆಲೊ.
ಖ್ಯಾತ ಕವಯಿತ್ರಿ ಶ್ರೀಮತಿ ಐರಿನ್ ರೆಬೆಲ್ಲೊ ಹಾಂಣಿಂ ಕವಿಗೋಷ್ಠಿಚೆಂ ಸಂಚಾಲನ್ ಕೆಲೊ. ತಾಂಣಿಂ ಕವಿ ಆನಿ ಕವಿತಾಂಚೆ ವಿಶಿಂ ಸವಿಸ್ತಾರ್ ಮಾಹಿತ್ ದಿಲೀ.
ಹ್ಯಾ ಕವಿಗೋಷ್ಠೀಂತ ರವೀಂದ್ರ ನಾಯಕ್ ಸಣ್ಣಕ್ಕಿಬೆಟ್ಟು, ಪ್ರಭಾ ರೇಗೊ, ವಿನ್ಸೆಂಟ್ ಪಿಂಟೊ ಆಂಜೆಲೊರ್, ಶ್ಯಾಮಲಾ ವಸಂತ್ ಕೊಂಪದವು, ಸ್ಟ್ಯಾನಿಸ್ಲವ್ಸ್ ಡಿಸೋಜ ಕಿರೆಂ, ಸಲೊಮಿ ಮೊಗರ್ನಾಡ್, ಮ್ಯಾಕ್ಸಿಂ ಲುದ್ರಿಗ್ ಬೊಂದೆಲ್, ಸತ್ಯವತಿ ಕಾಮತ್, ಆಲ್ವಿನ್ ದಾಂತಿ ಮತ್ತು ರೊಬರ್ಟ್ ಡಿಸೋಜ ಹಾಂಣಿಂ ಆಪಾಪ್ಲ್ಯಾ ಕವಿತಾಂ ವಾಚನ್ ಕೆಲೊ.
ಅಕಾಡೆಮಿಚೆ ಸದಸ್ಯ್ ಶ್ರೀ ರೊನಾಲ್ಡ್ ಕ್ರಾಸ್ತಾ ಹಾಂಣಿಂ ಕಾರ್ಯಕ್ರಮಾಚೆಂ ನಿರೂಪಣ್ ಆನಿ ಆಭಾರ್ ಪ್ರದರ್ಶನ್ ಕೆಲೊ.