ಆರ್ಟ್ ಆಫ್ ಲಿವಿಂಗ್ ಸಂಸ್ಥೆಕ ೪೫ ವರ್ಷ ಆನಿ ಗುರುದೇವ ಶ್ರೀ ಶ್ರೀ ರವಿಶಂಕರ್ ತಾಂಗೆಲೆ ೭೦ವೇ ಜಾಯದಿವಸಾಚೆ ಉಡಗಾಸಾಕ “ಅನ್ಸಂಗ್ ಎವೆರಿಡೇ ಹೀರೋಸ್” ಮ್ಹೊಣು ಸಮಾಜಾಂತು ಉದರ್ಗತಿಕ ಕಾರಣ ಜಾಲೀಲೆ ಮೌನ ಸಾಧಕಾಂಕ ಸೊದ್ದುನು ಹೇ ಪ್ರಶಸ್ತಿ ದೀವ್ನು ತಾಂಗೆಲೆ ಕಾರ್ಯಾಕ ಮಾನ ದಿವ್ಚೆ ಕಾರ್ಯ ರಾಷ್ಟ್ರವ್ಯಾಪಿ ಸೂರ ಕೆಲೀಲೆ ಆಸ್ಸಾ. ಹಾಂತು ಸಮಾಜಾಕ ಅಸಾಧಾರಣ ದೇಣಿಗಾ ದಿತ್ತಾ ಆಸ್ಸುಚೆ ಲೋಕಾಂಕ ಜಾಂವೊ ಸಂಘಟನೆಕ ಹೇ ಪ್ರಶಸ್ತಿ ಪಾವಿತ ಜಾತ್ತಾ. ಹಾಂತು ಮುಖೇಲ ಜಾವ್ನು ಕ್ರೀಡಾ, ಉದ್ಯಮ ಆನಿ ಯುವಮುಖೇಲ ಮ್ಹಣ್ಚೆ ತೀನಿ ವಿಭಾಗಾಂತು ಹೇ ಪ್ರಶಸ್ತಿ ಸಾಧಕಾಂಕ ವಿಂಚೂನು ಗೌರವ ಕರತಾತಿ.
ತಶೀಚಿ ಅವುಂದು ಹೇ ಪ್ರಶಸ್ತಿಕ ಉತ್ತರ ಕನ್ನಡ ಜಿಲ್ಲ್ಯಾಚಾನ ಉದ್ಯಮಿ ಆನಿ ಸಮಾಜ ಸೇವಕ ಕುಮಟಾಚೆ ಶ್ರೀ ಮುರಲೀಧರ ಪ್ರಭು ಹಾಂಕಾ ವಿಂಚಿಲಾ ಮ್ಹಣ್ಚೆ ಸಮಸ್ತ ಜಿ.ಎಸ್.ಬಿ. ಲೋಕಾಂಕ ಗರ್ವಾಚೆ ವಿಷಯು. ಶ್ರೀ ಮುರಲೀಧರ ಪ್ರಭು ಮಾಮ್ಮಾನಿ ಕುಮಟಾಂತು ಕಾಜ್ಜುಬಿ ಉದ್ಯಮ ಆರಂಭ ಕೊರನು, ಸಗಳೇ ಜಿಲ್ಲ್ಯಾಂತು ಕಾಜ್ಜುಬಿ ಉದ್ಯಮ ಉದರ್ಗತಿ ಪಾವಚಾಕ ಅಪಾರ ಸೇವಾ ಪಾವಯಲಾ. ಮಾತ್ರ ನ್ಹಂಹಿ ಹಾನ್ನಿ ಶಿಕ್ಷಣ ತಜ್ಞಭಿ ವ್ಹಯಿ. ಕುಮಟಾಚೆ ಕೊಂಕಣ ಶಿಕ್ಷಣ ಸಂಸ್ಥೆಚೆ ಕಾರ್ಯದರ್ಶಿ ಜಾವ್ನೂ ನಿಃಸ್ವಾರ್ಥಪಣಾನಿ ಸೇವಾ ಪಾವಯತಾ ಆಸ್ಸಾತಿ. ತಾಜ್ಜ ಬರಶಿ ಉತ್ತರ ಕನ್ನಡಾಚೆ ಇತರ ಮಸ್ತ ಸಂಸ್ಥ್ಯಾಂತು ವರೇನ ಸೇವಾ ಪಾವಯಚೆ ಸಾಮಾಜಿಕ ಕಾರ್ಯಕರ್ತ ವರೇನ ಜಾವ್ನಾಸ್ಸತಿ.
ಆರ್ಟ್ ಆಫ್ ಲಿವಿಂಗ್ ಸಂಸ್ಥೆಚೆ “ಅನ್ಸಂಗ್ ಎವೆರಿಡೇ ಹೀರೋಸ್” (ತೆರೆಮರೆಯ ಸಾಧಕ) ಪ್ರಶಸ್ತಿ ಪ್ರಧಾನ ಸಮಾರಂಭ ದಿನಾಂಕ. ೩೧-೦೫-೨೦೨೬ ದಿವಸು ಮಂಗಳೂರ್ಚೆ ಶ್ರೀ ಶ್ರೀ ರವಿಶಂಕರ ವಿದ್ಯಾಮಂದಿರಾಂತು ಚಲ್ಲೆ. ಮುಖೇಲ ಸೊಯರೆ ಜಾವ್ನು ಮಂಗಳೂರು ಪೊಲೀಸ್ ಸಹಾಯಕ ಆಯುಕ್ತ ಗೀತಾ ಕುಲಕರ್ಣಿ ತಾನ್ನಿ ಆಯಲೇರಿ, ಸಮಾರಂಭಾಚೆ ಅಧ್ಯಕ್ಷಪಣ ಆರ್ಟ್ ಆಫ್ ಲಿವಿಂಗ್ ಎಪೆಕ್ಸ್ ಸಮಿತಿಚೊ ಸದಸ್ಯ ನರಸಿಂಹ ಪಂಡಿತಾನಿ ಘೆತ್ತಿಲೆ. ಮಾನಾಚೆ ಸೊಯರೆ ಜಾವ್ನು ಆನ್ನೇಕ್ಳೆ ಅಪೆಕ್ಸ್ ಸದಸ್ಯ ರಮಾನಂದರಾವ್ ತಶೀಚಿ ವಿದ್ಯಾಮಂದಿರಾಚೆ ಪ್ರಾಂಶುಪಾಲ ಸುರೇಶ ಮಹಾಲಿಂಗಪುರ ಆಯಲೀಲೆ. ಹೇ ವೇಳ್ಯಾರಿ ಉತ್ತರ ಕನ್ನಡ ಜಿಲ್ಲಾ ಆರ್ಟ ಆಫ್ ಲಿವಿಂಗ್ ಕುಮಟಾ ಬಳಗಾಚೆ ತರಪೇನಿ ಶ್ರೀ ಎಂ.ಬಿ. ಪೈ ಹಾನ್ನಿ ಕಾರ್ಯಕ್ರಮಾಂತು ವಾಂಟೊ ಘೆತ್ತಿಲೆ.