ಜಿ.ಎಸ್.ಬಿ. ಪರಿವಾರು, ಉತ್ತರಹಳ್ಳಿ, ಬೆಂಗಳೂರು ಹಾಂಗೆಲೆ ೧೫ವೇಂ ಸರ್ವ ಸದಸ್ಯಾಂಗೆಲೊ ಸಭಾ (ಎ.ಜಿ.ಎಂ.) ಬೆಂಗಳೂರ್ಚೆ ಬಣಗಿರಿ ಶ್ರೀ ವರಸಿದ್ಧಿ ವಿನಾಯಕ ದೇವಳಾಂತು ಚಲ್ಲೆ. ಸುರವೇಕ ದೇವಮಾಗಣಿ ಬರಶಿ ಸಭಾ ಸೂರು ಜಾಲ್ಲೆ. ಹೇ ವೇಳ್ಯಾರಿ ವಿಜಯನಗರ ಜಿಎಸ್ಬಿ ಸಭಾಚೆ ಅಧ್ಯಕ್ಷ ಶ್ರೀ ಕೆ. ರಘುವೀರ್ ಶೆಣೈ, NOBO ನಗರಾಚೆ ಶ್ರೀ ಮೋಹನದಾಸ್ ಕುಡ್ವ ಆನಿ ಪೀಣ್ಯ ದಾಸರಹಳ್ಳಿ ಜಿಎಸ್ಬಿ ಸಮಾಜಾಚೆ ಅಧ್ಯಕ್ಷ ಶ್ರೀ ವಿನಾಯಕ ಕಾಮತ್ ಉಪಸ್ಥಿತ ವ್ಹರಲೀಲೆ. ತಾನ್ನಿ ಸಕಡ್ಯಾನಿ ಮೇಳ್ನು ದೀಪ ಪ್ರಜ್ವಲನ ಕೊರನು ಎ.ಜಿ.ಎಂ. ಕ ಸುರುವಾತ ದಿಲ್ಲಿ. ಶ್ರೀ ರಾಜೇಶ್ ಎಲ್. ಭಟ್ ತಾನ್ನಿ ವೇದಘೋಷ ಪಠಣ ಕೆಲಯಾರಿ, ಮಾಸ್ಟರ್ ವ್ರಶಾಂಕ್ ಶೆಣೈ ತಾನ್ನಿ ಪ್ರಾರ್ಥನಾ ಮ್ಹಳ್ಳೆ. ಜಿ.ಎಸ್.ಬಿ. ಪರಿವಾರು ಹಾಜ್ಜೆ ಅಧ್ಯಕ್ಷ ಶ್ರೀ ಎಂ. ಸುರೇಂದ್ರ ನಾಯಕ್ ಸಭೆಚೆ ಉದ್ಘಾಟನ ಆಯ್ಯಿಲೆ ಗಣ್ಯ ಬರಶಿ ಮೇಳ್ನು ಕೆಲ್ಲಿ.
ಕಾರ್ಯದರ್ಶಿ ಶ್ರೀ ಕೆ. ಅಣ್ಣಪ್ಪ ಪ್ರಭು ತಾನ್ನಿ ಗತ ವರ್ಷಾಂತು ಸರಲೀಲೆ ಸದಸ್ಯಾಂಗೆಲೆ ಪಟ್ಟಿ ವಾಜ್ಜಿಲೆ. ಸರ್ವ ಸದಸ್ಯಾನಿ ಉಟಾನು ರಾಬ್ಬೂನು ಎಕ ಮಿನಿಟಿ ಮೌನ ವ್ಹರ್ನು ತಾಂಕಾ ಸಕಡ್ಯಾಂಕ ಶ್ರದ್ಧಾಂಜಲಿ ಪಾವಯಿಲಿ. ಶ್ರೀ ಅಣ್ಣಪ್ಪ ಪ್ರಭು ಮಾಮ್ಮಾನಿ ಸಕಡ್ಯಾಂಕ ಯೆವಕಾರ ಕೊರನು ಮಾಗಿರಿ ೨೦೨೫-೨೬ ವರಸಾಚೆ ಜಿಎಸ್ಬಿ ಪರಿವಾರ ಉತ್ತರಹಳ್ಳಿ ಹಾಜ್ಜೆ ವಾರ್ಷಿಕ ವರದಿ ಸಭಾ ಮುಖಾರಿ ಸಾದರ ಕೆಲ್ಲಿ.
ಅಧ್ಯಕ್ಷ ಶ್ರೀ ಎಂ ಸುರೇಂದ್ರ ನಾಯಕ್ ತಾನ್ನಿ ಉಲೋನು ಬೆಂಗಳೂರು ಬಿಡಿಎ ತರಪೇನಿ ಕೋಣನಕುಂಟೆ ಕ್ರಾಸ ಲಾಗ್ಗಿ ಖೋಡೇ ಕಾರ್ಖಾನೆ ಎದರಾಕ ಮೆಳೀಲೆ ಏಕ ಎಕ್ರೆ ಪರ್ಯಾಯ ನಿವೇಶನ ವಿಷಯು ಉಲೋನು ಸಂತೋಷ ವ್ಯಕ್ತ ಕೆಲ್ಲಿ. ಹೇ ಯೋಜನಾ ಪೂರ್ತಿ ಕೊರಚಾಕ ಹರಯೇಕ ಸದಸ್ಯಾನಿ ಆನಿ ಜಿ.ಎಸ್.ಬಿ. ಬಾಂದವಾನಿ ವ್ಹಡ ಮನ ಕೊರನು ಮುಖಾರಿ ಯವ್ನು ಹಾತು ಮೆಳೋವಕಾ ಮ್ಹೊಣು ತಾನ್ನಿ ಆಪೋವ್ಣಿ ದಿಲ್ಲಿ. ಆಡಿಟ್ ರಿಪೋರ್ಟ್ ವರೇನ ಕಾರ್ಯದರ್ಶಿ ಶ್ರೀ ಅಣ್ಣಪ್ಪ ಪ್ರಭುನಿ ಸಭಾಕ ಸಾದರ ಕೆಲ್ಲಿ. ಖಜಾಂಚಿ ಶ್ರೀ ಕೆ ದಾಮೋದರ ನಾಯಕ್ ತಾನ್ನಿ ೨೦೨೬-೨೭ವೇಂ ಸಾಲಾಚೆ ಅಂದಾಜು ಪತ್ರಿಕಾ ಸಭಾ ಮುಖಾರಿ ಮಂಡನ ಕೆಲ್ಲಿ.
ಜಿ.ಎಸ್.ಬಿ. ಪರಿವಾರು, ಉತ್ತರಹಳ್ಳಿ ಹಾನ್ನಿ ಬಿಡಿಎ ತಾಕೂನು ಸಿಎ ನಿವೇಶನ ಘೆತ್ತಿಲೆ ಪ್ರಯತ್ನ ಶ್ಲಾಘನ ಕೊರನು ಹಾಂಗೆಲೆ ಸರ್ವ ಯೋಜನೇಂಕ ಸಕಾಲಿಕ ಬೆಂಬಲ ದಿವ್ಚೆ ಭರ್ವಸ ವಿಜಯನಗರ ಜಿಎಸ್ಬಿ ಸಭಾಚೆ ಅಧ್ಯಕ್ಷ ಶ್ರೀ ಕೆ ರಘುವೀರ್ ಶೆಣೈ ತಾನ್ನಿ ಹೇ ವೇಳ್ಯಾರಿ ದಿಲ್ಲಿ. ಶ್ರೀ ಮೋಹನದಾಸ ಕುಡ್ವ ತಾನ್ನಿ ಉಲೋನು ನಿಧಿ ಕ್ರೋಢೀಕರಣಾಕ ಘೆವಚಾಕ ಸಾಧ್ಯ ಆಶ್ಶಿಲೆ ಉಪಕ್ರಮಾಚೆ ಮಾಹಿತಿ ದಿಲ್ಲಿ. ಮ್ಹಹಿನ್ಯಾಚೆ ಕಂತಾಂತು ದೇಣಿಗಾ ಘೆತಲೇರಿ ದಾನಿಂಕ ಆನಿ ಪರಿವಾರು ಹಾಂಕಾ ದೊಗ್ಗಾಂಕ ಸಹಾಯು ಜಾತ್ತಾ ಮ್ಹೊಣು ತಾನ್ನಿ ಸಾಂಗ್ಲೆ.
ಶ್ರೀ ಎಂ ವರದರಾಯ ಮಲ್ಯ ತಾನ್ನಿ ಹೇ ವೇಳ್ಯಾರಿ ಉಲಯಿಲಿ. ಆನಿ ಸರ್ಕಾರಿ ಸಂಸ್ಥೆಚಾನ ಜಿಎಸ್ಬಿ ಸಮುದಾಯಾಕ ಮೆಳೀಲೆ ಪಯಲೇಚೆ ಸಿಎ ಸೈಟ್ ಹೇ ಮ್ಹೊಣು ಹರ್ಷ ವ್ಯಕ್ತ ಕೆಲ್ಲಿ. ಕಟ್ಟಡ ಸಮಿತಿ ಅಧ್ಯಕ್ಷ ಶ್ರೀ ನಾಗರಾಜ ಪ್ರಭು ತಾನ್ನಿ ಉಲಯಿಲಿ ಸಕಡ್ಯಾಲೆ ಸಹಕಾರ ಮಾಗ್ಲಿ.
ಶಿಕ್ಷಣಾಂತು ಚಾಂಗ ಸಾಧನಾ ಕೆಲೀಲ್ಯಾಂಕ ಹೇಂಚಿ ವೇಳ್ಯಾರಿ ಪ್ರತಿಭಾ ಪುರಸ್ಕಾರ ಪ್ರಧಾನ ಕೆಲ್ಲಿ. ಗತ ವರಸಾಂತು ಜಿ.ಎಸ್.ಬಿ. ಪರಿವಾರು ಹಾಜ್ಜೆ ಸರ್ವ ಚಟುವಟಿಕಾ ಚಲೋಸೂವ್ನು ಘೇವನು ಯವಚಾಕ ಕಾರಣೀಭೂತ ಜಾಲೀಲೆ ಸಕಡ್ಯಾಂಕ ಆಬಾರ ಮಾನಲೀಲೆ ಕಾರ್ಯದರ್ಶೀ ಶ್ರೀ ಅಣ್ಣಪ್ಪ ಪ್ರಭು ಮಾಮ್ಮಾನಿ ಪರಿವಾರು ಹಾಜ್ಜೆ ಗೌರವಾನ್ವಿತ ಅಧ್ಯಕ್ಷ ಜಾಲೀಲೆ ಡಾ. ಎಂ. ಜಗನ್ನಾಥ್ ಶೆಣೈ ತಾನ್ನಿ ತಾಂಗೆಲೆ ಅಮೂಲ್ಯ ವೇಳು ದೀವ್ನು ವೆಗವೆಗಳೆ ಚಟುವಟಿಕಾ ಚಲೋಚಾಕ ಜಿಎಸ್ಬಿ ಪರಿವಾರಾಕ ಸಲ್ಲೋ ದಿಲೀಲೆ ಖಾತ್ತಿರಿ ವಿಶೇಷ ಜಾವ್ನು ಆಬಾರ ಮಾನ್ಲೆ. ಅಖೇರಿಕ ಶ್ರೀ ನಾಮದೇವ್ ಶೆಣೈ ತಾನ್ನಿ ಸಭಾಕ ಆಯಲೀಲೆ ಸಕಡ್ಯಾಂಕ ಧನ್ಯವಾದ ಪಾವಯಿಲಿ.
ಹೇಂಚಿ ದಿವಸು ಪ್ರಾಯೋಜಕಾಲೊ ಸಹಕಾರಾನಿ ಮ್ಹಹಿನ್ಯಾಚೆ ಶ್ರೀ ಸತ್ಯನಾರಾಯಣ ಪೂಜಾ, ಭಜನಾ ಕಾರ್ಯಕ್ರಮ, ಮಹಾಮಂಗಳಾರತಿ, ಪ್ರಸಾದ ವಾಂಟಪ ಚೋಲ್ನು ಅಖೇರಿಕ ಅನ್ನ ಸಂತರ್ಪಣ ಚಲ್ಲೆ.