“ದೇವಾಲೆಂ ಸೇವಾ ಕೊರಚೆ ಆಮ್ಗೆಲೆ ಭಾಗ್ಯ ಮ್ಹೊಣು ಸಮಜಿಯಾ, ದೇವಾಕ ಆಮ್ಮಿ ಕಶ್ಶಿ ಶರಣ ಜಾತ್ತಾತಿಕಿ ತಶೀಚಿ ಆಮಕಾ ಸಕ್ಕಡ ಚಾಂಗ ಜಾತ್ತಾ ಮ್ಹೊಣು ಶ್ರೀ ಸಂಸ್ಥಾನ ಕಾಶಿ ಮಠಾಧೀಶ ಜಾಲೀಲೆ ಶ್ರೀಮದ್ ಸಂಯಮಿಂದ್ರ ತೀರ್ಥ ಸ್ವಾಮ್ಯಾನಿ ಸಾಂಗ್ಲೆ. ತಾನ್ನಿ ಫೆ.೧೪ಕ ಶಿವಮೊಗ್ಗಾಚೆ ಗೌಡ ಸಾರಸ್ವತ ಸಮಾಜಾಚೆ ಶ್ರೀ ಲಕ್ಷ್ಮಿ ವೆಂಕಟರಮಣ ದೇವಮಂದಿರಾಚೆ ೧೨ವೇಂ ಪ್ರತಿಷ್ಠವರ್ದಂತಿ ತಶೀಚಿ ವೆಗವೆಗಳೆ ಧಾರ್ಮಿಕ ಕಾರ್ಯಕ್ರಮ ಪ್ರಯುಕ್ತ ಆಪಣೇಲೆ ಪಾಂಚ ದಿವಸಾಚೆ ವಾಸ್ತವ್ಯಾಚೆ ವೇಳ್ಯಾರಿ ಆಶೀರ್ವಚನ ದಿತ್ತಾಲೆ.
ಗೌಡ ಸಾರಸ್ವತ ಸಮಾಜಾಚೆ ಮ್ಹಾಲ್ಗಡೆ ಪಯಲೆಚಾನ ದೇವಾಲೆ ವಯರಿ ಅಚಲ ವಿಶ್ವಾಸ ಆನಿ ಶೃದ್ಧಾ ಭಕ್ತಿ ದವರೂನು ಘೇವನು ಆಯಲಿಂತಿ. ತ್ಯಾ ಖಾತೆರಿ ಗೌಡ ಸಾರಸ್ವತ ಸಮಾಜ ಸಕ್ಕಡ ನಮೂನ್ಯಾನಿ ಉದರ್ಗತಿ ಪಾವ್ತಾ ಆಯಲಾ. ಪ್ರತಿ ನಿತ್ಯ ದೇವಳಾಕ ವಚಕಾ, ದೇವಾಲೆ ಸೇವಾ ಕೊರಕಾ, ದೇವಳಾಂತು ಕೋಯರು ಕಾಡಲೇರಿಚಿ ತ್ಯಾ ಅಪಮಾನ ನ್ಹಂಹಿ. ದೇವಾಕ ಕಾಣಿಕಾ ಘಾಲ್ಲ ಸತ್ತಾ ಜಾಯ್ನಾ, ಮೈಲ್‌ಗಟ್ಲೆ ಜಾಗಿಂಗ್ ವಚ್ಚೆ ಪಶಿ ಪ್ರತಿ ದಿವಸು ಸಕ್ಕಾಣಿ ಚ್ಹೊಖ ಜಾವ್ನು ದೇವಳಾಕ ಯಯ್ಯಾತಿ. ದೇವಾಲೆಂ ಭಕ್ತಿನಿ ಮಾಗ್ಗಾ, ದೇವಾಲೆ ಸೇವಾ ಕರಾ. ತುಮಗೆಲೆ ಸಕ್ಕಡ ಕಷ್ಟ ದೂರ ಜಾತ್ತಾ. ಮ್ಹಳ್ಳೆ.
ಆಮ್ಗೆಲೆ ಮಾತೃಭಾಷೆ ಕೊಂಕಣಿ. ಘರ್‍ಕಡೆ ಸಕಡಾನಿ ಕಡ್ಡಾಯ ಜಾವನು ಕೊಂಕಣಿ ಉಲಯಾ. ಮಾತೃಭಾಸ ವಿಸಲೇರಿ ಭಾಸ ನಾಮಾವಶೇಷ ಜಾತ್ತಾ, ಬುದ್ದೊಂತಿಕ ಕಮ್ಮಿ ಜಾತ್ತಾ, ಮಾತೃಭಾಷೆಂತು ಆಮ್ಗೆಲೆ ಆಚಾರ, ವಿಚಾರ, ಸಂಸ್ಕೃತಿ ಆಸ್ಸಾ. ಸಂಧ್ಯಾವಂದನ(ಸಂಧಿ) ಕರಾ, ಹಾಜೇನ ಸೂರ್ಯ ಭಗವಾನಾಲೆ ಅನುಗ್ರಹ ಮೆಳ್ತಾ. ಆರೋಗ್ಯ ವೃದ್ಧಿ ಜಾತ್ತಾ. ಖಂಚೇಯಿ ಕಾರಣಾಕ ಆಮ್ಗೆಲೆ ಮಾತೃಭಾಷಾ, ಆಮ್ಗೆಲೆ ಸಂಸ್ಕಾರ, ಆಮ್ಗೆಲೆ ಸಂಸ್ಕೃತಿ, ಆಮ್ಗೆಲೆ ಮ್ಹಾಲ್ಗಡ್ಯಾಂಕ, ಗುರೂಂಕ ಆನಿ ದೇವಾಕ ವಿಸರಚಾಕ ನಜ್ಜ ಮ್ಹಳ್ಳೆ.
ಕೆದನಾಂಯಿ ಧನಾತ್ಮಕ ಚಿಂತನಾ ಕೊರಕಾ, ಸಕಡಾಂಕ ಸದಽ ಚಾಂಗ ಜಾವಕಾ ಮ್ಹಣಚೆ ಸನಾತನ ಧರ್ಮಾಚೆ ಚಿಂತನಾ. ಆಮ್ಗೆಲೆ ಸಮಾಜ ಸದಽಕಾಲ ದೇವು ಆನಿ ಧರ್ಮಾಚೆ ಖಾತೇರಿ ತಶೀಚಿ ಮ್ಹಾಲ್ಗಡ್ಯಾಲೆ ಖಾತೆರಿ ಗೌರವ ದಾಖಯತಾ ಆಸ್ಸುಚೆ ನಿಮಿತ್ತ್ಯಾನಿ ಕಿತ್ತುಲೆ ಕಷ್ಟ ಆಯಲೇರಿಚಿ, ಖಂಯಕ ಘೆಲಯಾರೀಚಿ ವಯ್ರಿ ಎತ್ತಾತಿ, ಜೀಕತಾತಿ, ತ್ಯಾ ಖಾತೆರಿ ದೇವಾಲೆ ವಯ್ರಿಚಿ ಅಚಲ ನಂಬಿಗಾ, ವಿಶ್ವಾಸ ಆಸ್ಸೊ ಮ್ಹೊಣು ಸಾಂಗ್ಲೆ.
ಹೇ ವೇಳ್ಯಾರಿ ಸಮಾಜಾಚೆ ಅಧ್ಯಕ್ಷ ಜಾಲೀಲೆ ಭಾಸ್ಕರ್ ಜಿ ಕಾಮತ್. ಕಾರ್ಯದರ್ಶಿ ಸದಾನಂದ ನಾಯಕ್. ಮಾಜಿ ಅಧ್ಯಕ್ಷ ದೇವದಾಸ್ ನಾಯಕ್ ಸಹಿತ ಸಮಾಜಾಚೆ ಆಡಳಿತ ಮಂಡಳಿ ಸದಸ್ಯ ತಶೀಚಿ ಸಮಾಜ ಬಾಂಧವ ಉಪಸ್ಥಿತ ವ್ಹರಲೀಲೆ.