ಸಿದ್ದಾಪುರ್‍ಚೆ ಶ್ರೀ ವಿದ್ಯಾಧಿರಾಜ ಕಲಾ ಮಂದಿರಾಂತು ಉತ್ತರ ಕನ್ನಡ ಜಿಲ್ಲಾ ಜಿ.ಎಸ್.ಬಿ. ಸೇವಾ ವಾಹಿನಿಚೆ ರಜತ ಸಂಭ್ರಮ ಆನಿ ಜಿಲ್ಲಾ ಸಮಾವೇಶು ಮೇ.೨೫ಕ ಸಂಪನ್ನ ಜಾವಚೆ ಆಸ್ಸಾ ಮ್ಹಣಚೆ ಮಾಹಿತ ಸೇವಾ ವಾಹಿನಿಚೆ ರಜತ ಸಂಭ್ರಮ ಆನಿ ಜಿಲ್ಲಾ ಸಮಾವೇಶ ಸಮಿತಿ ಕಾರಾಧ್ಯಕ್ಷ ಶ್ರೀ ಕಾಶಿನಾಥ ಪೈ ತಾನ್ನಿ ಕಳಯಲಾ. ಸಿದ್ದಾಪುರ್‍ಚೆ ಶ್ರೀ ಲಕ್ಷ್ಮಿ ವೆಂಕಟೇಶ ದೇಳಾಚೆ ಶ್ರೀ ದ್ವಾರಕಾನಾಥ ಸಭಾ ಭವನಾಂತು ಆಯೋಜನ ಕೆಲೀಲೆ ಪತ್ರಿಕಾಗೋಷ್ಠಿಂತು ತಾನ್ನಿ ಸಮಾವೇಶಾಚೆ ಆಮಂತ್ರಣ ಪತ್ರಿಕಾ ಸಹಿತ ತಾನ್ನಿ ಉಲಯತಾಲೆ. ಹೇ ಸಮಾವೇಶ ಸಿದ್ದಾಪುರ ಗೌಡ ಸಾರಸ್ವತ ಸಮಾಜ ಆನಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಯುವಕ ಮಂಡಳಿ ಸಿದ್ದಾಪುರ ಹಾಂಗೆಲೆ ಸಹಯೋಗಾರಿ ಚಲ್ತಾ.
ಶ್ರೀ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಶ್ರೀಮದ್ ಶ್ರೀ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ಶುಭಾಶೀರ್ವಾದ ಬರಶಿ ಚೊಲಚೆ ಹೇ ಸಮಾವೇಶಾಂತು ಟಾಟಾ ಪ್ರೊಜೆಕ್ಟ್ ಲಿಮಿಟೆಡ ನ ಮ್ಯಾನೆಜಿಂಗ್ ಡೈರಕ್ಟರ್ ಆನಿ ಮುಖ್ಯ ಕಾರ್ಯ ನಿರ್ವಹಣಾಧಿಕಾರಿ(ಸಿ.ಇ.ಒ.) ವಿನಾಯಕ ಪೈ ತಾನ್ನಿ ಉತ್ತರ ಕನ್ನಡ ಜಿಲ್ಲಾ ಜಿ.ಎಸ್.ಬಿ. ಯುವ ವೇದಿಕೆಚೆ ರಜತ ಸಂಭ್ರಮ ಆನಿ ಸಮಾವೇಶ ಉದ್ಘಾಟನ ಕರತಾತಿ. ಉತ್ತರ ಕನ್ನಡ ಜಿಲ್ಲಾ ಜಿ‌ಎಸ್ ಬಿ ಸೇವಾ ವಾಹಿನಿಚೆ ಜಿಲ್ಲಾಧ್ಯಕ್ಷ ರಾಘವ ಬಾಳೇರಿ, ಆನಿ ಕಾರ್ಯದರ್ಶಿ ರವಿ ಶಾನಭಾಗ, ಪ್ರಸಿದ್ಧ ವಾಗ್ಮಿ ಶ್ರೀ ಎಚ್. ಎನ್. ಪೈ, ಹಳದೀಪುರ, ಜಿಲ್ಲೆಚೆ ಖ್ಯಾತ ಉದ್ಯಮಿ ಆನಿ ಸಮಾಜ ಸೇವಕ ಜಾವ್ನಾಸ್ಸುಚೆ ಉಪೇಂದ್ರ ಪೈ ಆನಿ ಪ್ರವೀಣ ಬಸರೂರು ತಾನ್ನಿ ಮುಖೇಲ ಸೊಯರೆ ಜಾವನು ಯತ್ತಾತಿ.
ಸಮಾವೇಶಾಕ ಸಮಾಜ ಬಾಂದವ ಉತ್ತರ ಕನ್ನಡ ಜಿಲ್ಲೆ ಆನಿ ರಾಜ್ಯಾಚೆ ವೆಗವೆಗಳೆ ಬಗಲೇಚಾನ ಯವಚೆ ನಿರೀಕ್ಷಾ ಆಸ್ಸುನು ಆಯ್ತವಾರ ಸಕ್ಕಾಣಿ ೯-೩೦ಕ ಶೋಭಾಯಾತ್ರೆ ಬರಶಿ ಸೂರು ಜಾವಚೆ ಸಮಾವೇಶಾಂತು ಸಂವಾದ ಗೋಷ್ಠಿ, ಸಂಗೀತ, ಸಾಂಸ್ಕೃತಿಕ ಕಾರ್ಯಕ್ರಮ ಚಲ್ತಾ. ೧೯೯೧ ಇಸ್ವೆಂತು ಸಮಾಜಾಚೆ ಸಾಮಾಜಿಕ, ಆರ್ಥಿಕ ಉನ್ನತಿ ಖಾತೇರಿ ಸೂರು ಜಾಲೀಲೆ ಜಿ‌ಎಸ್‌ಬಿ ಯುವ ವಾಹಿನಿ ಸಂಸ್ಥೋ ಮುಖಾವಯಲೆ ೨೫ ವರ್ಷಾಂತು ಸಬಾರ ಜನೋಪಯೋಗಿ ಕಾಠ್ಯಕ್ರಮ ಆಯೋಜನ ಕೊರನು ಘೇ‌ಔನು ಎತ್ತಾ ಆಸ್ಸುನು, ಅವುಂದು ಆಪಣೇಲೆ ರಜತ ಸಂಭ್ರಮಾಂತು ಸಬಾರ ಕಾಠ್ಯಕ್ರಮ ಘಾಲ್ನುಘೆತ್ಲ್ಯಾ ಮ್ಹೊಣು ತಾನ್ನಿ ಸಾಂಗಲೆ. ಪತ್ರಕಾಗೋಷ್ಠಿಂತು ದೇವಳಾಚೆ ಮೊಕ್ತೇಸರ ಕೆ ವಿ ಮಹಾಲೆ, ಸಮಾಜಾಚೆ ಉಪಾಧ್ಯಕ್ಷ ನರಸಿಂಹ ಕಾಮತ, ಕಾರ್ಯದರ್ಶಿ ವಿವೇಕ ಭಂಡಾರಕರ. ಯೋಗೀಶ ಐಗಳ, ವಿನಾಯಕ ಶಾನಭಾಗ, ಸುರೇಶ ಗುತ್ತಿಕರ, ಸವಿತಾ ಕಾಮತ, ವಿದ್ಯಾಧರ ಭಟ್ಟ ಆದಿ ಸಮಾಜ ಬಾಂದವ ಉಪಸ್ಥಿತ ವ್ಹರಲೀಲೆ.