ಉಡುಪಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು ಚಲ್ತಾ ಆಸ್ಸುಚೆ 125 ಸಪ್ತಾಹ ಮಹೋತ್ಸವಾಚೆ ಅಂಗ ಜಾವ್ನು, ೧೨೫ ದಿವಸಾಚೆ ಅಖಂಡ ಭಜನಾ ಮಹೋತ್ಸವಾಕ ಆನಿ ಶ್ರೀದೇವಳಾಕ ಮೇ 22 ಗುರುವಾರ ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಪರಮಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇಯ ಸ್ವಾಮ್ಯಾನಿಂ ಭೇಟಿ ದಿಲ್ಲಿ.
ದೇವಳಾಚೆ ತರಪೇನಿ ಪೂಜ್ಯ ಸ್ವಾಮ್ಯಾಂಕ ದೇವಳಾಚೆ ದ್ವಾರಬಾಗ್ಲಾಂತು ವೇದಘೋಷ, ಪೂರ್ಣಕುಂಭ ತಶೀಚಿ ವಾಜ್ಜಪೆ ಬರಶಿ ಸ್ವಾಗತ ಕೆಲ್ಲಿ. ಮಾಗಿರಿ ಸ್ವಾಮೆಂ ಶ್ರೀ ಲಕ್ಷ್ಮಿ ವೆಂಕಟೇಶ ದೇವಾಲೆ ದರ್ಶನ, ಭಜನಾ ಮಹೋತ್ಸವಾಚೆ ಶ್ರೀ ವಿಠೋಬ-ರುಕುಮಾಯಿ ದೇವಾಲೆ ದರ್ಶನ ಘೇವ್ನು ವಿಶೇಷ ಪೂಜಾ ಕೆಲ್ಲಿಂತಿ.
ದೇವಳಾಚೆ ಧಾ ಸಮಸ್ತಾ ತಾಕೂನು ಪೂಜ್ಯ ಸ್ವಾಮ್ಯಾಂಕ ವಿಶೇಷ ಪಾದ ಪೂಜಾ ಚಲ್ಲಿ. ಕಾಣಿಕಾ ಸಮರ್ಪಣ ಕೆಲ್ಲಿ.
ಪರಮಪೂಜ್ಯ ಸ್ವಾಮೆಂನಿ ಆಪಣೇಲೆ ಆಶೀರ್ವಚನಾಂತು “ಶ್ರೀದೇವಾಕ ಭಜನಾ-ಸಂಕೀರ್ತನ, ಜಪ ಆನಿ ಶ್ರದ್ಧಾ-ಭಕ್ತಿಯುತ ದೇವಮಾಗಣಿ ಮುಖಾಂತರ ಆನಿ ಇತ್ಲೆ ಸಮರ್ಪಣ ಪಾವೋವ್ಯಾ, ಅಸ್ಸಾಲೆ ಅಖಂಡ ಭಜನಾ ಸೇವಾ ಗಾಂವ್ಚೆ- ಪರಗಾಂವ್ಚೆ ಸರ್ವ ಭಕ್ತಾಧಿಂಕ ಶ್ರೀ ದೇವಾಕ ಸೇವಾ ಪಾವಯಚಾಕ ಆನಿ ಇತ್ಲೆ ಸ್ಪೂರ್ತಿ ದಿವೋ ಮ್ಹೊಣು ಆಶೀರ್ವಚನ ದಿಲ್ಲಿ.
ದೇವಳಾಂತು ನಿರಂತರ ಚಲ್ತಾ ಆಸ್ಸುಚೆ ಶ್ರೀರಾಮನಾಮ ಜಪ ಅಭಿಯಾನಾಚೆ ರಘುನಾಯಕ ಜಪಕೇಂದ್ರಾಕ ಪೂಜ್ಯ ಸ್ವಾಮೆಂ ಭೆಟ್ಟಿಲೆ. ೪೦೧ ದಿವಸ ಪೂರ್ಣ ಕೆಲೀಲೆ ಹೇ ವೇಳೆಂತು ಪೂಜ್ಯ ಶ್ರೀಮದ್ ವಿದ್ಯಾಧೀಶ ಸ್ವಾಮ್ಯಾಂಗೆಲೆ ದಿವ್ಯ ಉಪಸ್ಥಿತಿರಿ ವಿಶೇಷ ಶ್ರೀರಾಮನಾಮ ಜಪ ಚಲ್ಲೆ. ಮಾಗಿರಿ ಪೂಜ್ಯ ಸ್ವಾಮೆಂ ಶ್ರೀದೇವಾಕ ಆರತಿ ಕೊರನು, ಭಕ್ತಾಧಿಂಕ ಪ್ರಸಾದ ದಿವನು ಆಶೀರ್ವಾದ ಕೆಲ್ಲಿಂ. ಮಾಗಿರಿ ಆಪಣೇಲೆ ಮುಖಾವಯಲೆ ಮೊಕ್ಕಾಂಕ ಭಾಯ್ರಿಸೊರನು ಘೆಲ್ಲೆ.