ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೊ ಅವಂದೂಚೆ ಚಾತುರ್ಮಾಸು ಪುಣ್ಯಕ್ಷೇತ್ರ ಕಾಶೀಚೆ ಮೂಲ ಮಠಾಂತು ಅಗಸ್ಟ್ ೩ಕ ಸೂರು ಜಾವ್ನು ವೈಭವಪೇತ ಜಾವ್ನು ಚಲ್ತಾ ಆಸ್ಸಾ. ಅವಂದೂಚೆ ಪೂಜ್ಯ ಸ್ವಾಮ್ಯಾಂಗೆಲೆ ಸನ್ಯಾಸ ದೀಕ್ಷಾಚೆ ರೌಪ್ಯ (೨೫) ಚಾತುರ್ಮಾಸು ತಾನ್ನಿ ಪೀಠಾರೋಹಣ ಜಾವ್ನು ೧೦ ವರ್ಷ ಭರಲೀಲೆ ಮಹತ್ವಾಚ ಸಂದರ್ಭಾಚೆ ಚಾತುರ್ಮಾಸು ವರೇನ ವ್ಹಯಿ.
ಪುರಾಣಾಂತು ಪ್ರಸಿದ್ಧ ಜಾಲೀಲೆ ಶ್ರೀ ಕಾಶೀ ವಿಶ್ವನಾಥಾನಿ ಆಸ್ಸುಚೆ, ಪರಮ ಪವಿತ್ರ ಪುಣ್ಯ ಕ್ಷೇತ್ರ, ದೇವಭೂಂಯಿ ವಾರಣಾಸಿ ಮೂಲ ಮಠಾಂತು ಪರಾಭವ ನಾಮ ಸಂವತ್ಸರಾಚೊ ಚಾತುರ್ಮಾಸು ಮಸ್ತ ವಿಜೃಂಭಣೆರಿ ಘಡತಾ ಆಸ್ಸಾ. ತತ್ಸಂಬಂಧ ಕರಾವಳಿಚೆ ಹೆಯೇಕ ಗಾಂವ್ಚೆ ಜಿ.ಎಸ್.ಬಿ. ಬಾಂದವ ಮೇಳ್ನು ಯಾತ್ರಾ ರೂಪಾಂತು ಪವಿತ್ರ ಕಾಶೀ ವಾರಣಾಸಿ ಸಹಿತ ಉತ್ತರ ಭಾರತ ಯಾತ್ರಾ ಕೊರನು ಘೇವನು ಪರಮ ಪುನೀತ ಜಾವ್ನು ಎತ್ತಾ ಆಸ್ಸಾತಿ. ತ್ಯಾ ನಿಮಿತ್ತ್ಯಾನಿ ಪೂಜ್ಯ ಸ್ವಾಮ್ಯಾಂಗೆಲೆ ಚಾತುರ್ಮಾಸಾಂತು ವಾಂಟೋ ಘೇವ್ನು ಧಾರ್ಮಿಕ ಆನಿ ಸ್ವಯಂಸೇವಕಾ ಜಾವ್ನು ಸೇವಾ ಪಾವೋನು ಎತ್ತಾ ಆಸ್ಸಾತಿ.
ತಾಜ್ಜೆ ಅಂಗ ಜಾವ್ನು ಕಾಪು ಸಮಾಜ ಬಾಂದವಾಲೊ- ವಾರಣಾಸಿ ಯಾತ್ರಾ ಪ್ರಯುಕ್ತ ಕಾಪು ಪೇಂಟಾಚೆ ಸುಮಾರ ಚಾಳೀಸ ಸಮಾಜ ಬಾಂದವ ಆನಿ ಶ್ರೀ ಸಂಸ್ಥಾನ ಕಾಶೀ ಮಠಾಚೆ ಭಕ್ತಾಧಿ ಮೇಳ್ನು, ವಾರಣಾಸಿ ಮೂಲಮಠಾಂತು ಚಲ್ತಾ ಆಸ್ಸುಚೆ ಕಾಶೀ ಮಠಾಧಿಪತಿ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ೨೫ ವ್ಯಾ ಚಾತುರ್ಮಾಸ ಕಾರ್ಯಕ್ರಮಾಂತು ವಾಂಟೊ ಘೇವ್ನು ಶ್ರೀ ಮೂಲಮಠಾಂತು ಕಾಪು ಪೇಂಟಾಚೆ ತರಪೇನಿ ದುರ್ಗಾ ನಮಸ್ಕಾರ ಸೇವಾ, ಹರಿ ಗುರು – ಭಿಕ್ಷಾ ಸೇವಾ, ಸಾಮೂಹಿಕ ರುದ್ರಾಭಿಷೇಕ, ಗೋಪೂಜಾ, ದಂಪತಿ ಪೂಜಾ, ಗಂಗಾ ಪೂಜನ, ಭಜನಾ ಸೇವಾ, ನರಸಿಂಹ ಸ್ತುತಿ ಸಾಮೂಹಿಕ ನಮಸ್ಕಾರ, ಶ್ರೀ ಸ್ವಾಮೀಜಿ ಭೇಟಿ ಪಾದಪೂಜೆ ಸಹಿತ ವೆಗವೆಗಳೆ ಸೇವೆಂತು ವಾಂಟೊ ಘೇವ್ನು ಹರಿ-ಗುರು ಸೇವಾ ಪಾವೋನು ಪುನೀತ ಜಾಲ್ಲೆ.
ಹೇ ವೇಳ್ಯಾರಿ ಶ್ರೀ ಹರಿ ಗುರು ಚರಣಾಂತು ಕಾಪು ಪೇಂಟಾಚೆ ಸಮಾಜ ಬಾಂದವಾಲೊ ಶ್ರೇಯೋಭಿವೃದ್ಧಿ ಖಾತ್ತಿರಿ ಹತ್ತು ಸಮಸ್ತಾಲೆ ಖಾತ್ತಿರಿ ವಿಶೇಷ ಪ್ರಾರ್ಥನಾ ವರೇನ ಕೆಲ್ಲೆ