ಜಿ.ಎಸ್.ಬಿ. ಸಮಾಜಾಚೆ ಧಾ ಸಮಸ್ತಾಲೆ ಕಾಸರಕೋಡ ಶ್ರೀ ಗೋಪಾಲಕೃಷ್ಣ ದೇವಳಾಂತು ಪ್ರತಿ ವರಸಾ ಮ್ಹಣಕೆ ಅಖಂಡ ಭಜನಾ ಸಪ್ತ ಮಹೋತ್ಸವು ಅಗಸ್ಟ್ ೨೯ ಚಾನ ಸೆಪ್ಟಂಬರ್ ೬ ಪರಿಯಂತ ಚಲ್ತಾ ಮ್ಹಣ್ಚೆ ಮಾಹಿತಿ ಮೆಳ್ಳಾ. ಅವಂದೂಚೆ ಸತತ೧೩೬ ವ್ಯಾ ವರಸಾಚೆ ಭಜನಾ ಸಪ್ತ ಮಹೋತ್ಸವು ಜಾವ್ನಾಸ್ಸಾ. ಅಗಸ್ಟ್ ೨೯ಕ ಸಕ್ಕಾಣಿ ೧೦.೦೦ ಘಂಟ್ಯಾಕ ಆಖಂಡ ದೀಪ ಪ್ರಜ್ವಲನ ಜಾವ್ನು ತಾಳನಾದ ಬರಶಿ ಭಜನಾ ಮಹೋತ್ಸವು ಸೂರು ಜಾತ್ತಾ. ಅಗಸ್ಟ್ ೪ಕ ಶ್ರೀ ಕೃಷ್ಣಜನ್ಮಾಷ್ಟಮಿ ಪ್ರಯುಕ್ತ ಸಮಾಜ ಬಾಂದವಾ ತಾಕೂನು ದೇವಾಲೆ ಸನ್ನಿಧಿಂತು ತುಳಸಿ ಅರ್ಚನಾ ಆನಿ ರಾತ್ತಿಕ ಮಹಾಪೂಜಾ ಚಲ್ತಾ.
ಸಪ್ಟಂಬರ್ ೫ ಶ್ರಾವಣ ಕೃಷ್ಣ ನವಮಿ, ತ್ಯಾ ದಿವಸು ಸಕ್ಕಾಣಿ ೧೦-೦೦ ಘಂಟ್ಯಾಕ ತಾಳ ವಿಸರ್ಜನೆ ಬರಶಿ ಅವಂದೂಚೆ ಭಜನಾ ಸಪ್ತಾ ಸಮಾಪ್ತ ಜಾತ್ತಾ. ತಾಜ್ಜೆ ಹೆರ್ದೀಸು ಸಪ್ಟಂಬರ್ ೬ಕ ಶ್ರೀ ಗೋಪಾಲಕೃಷ್ಣ ದೇವಾಕ ಶಿಯಾಳಾ ಅಭಿಷೇಕ, ಧೋಂಪಾರಾ ಮಹಾನೈವೇದ್ಯ, ಮಹಾಮಂಗಳಾರ್ತಿ, ಮಹಾಸಂತರ್ಪಣ ಚಲ್ತಾ. ರಾತ್ತಿಕ ೮-೦೦ ಘಂಟ್ಯಾಕ ನಗರೋತ್ಸವು ಚೋಲ್ನು ಮಾಗಿರಿ ಮಹಾಪೂಜಾ, ಪ್ರಸಾದ ವಾಂಟಪ ಆಸ್ತಾ. ಪ್ರತಿ ದಿವಸು ಧೋಂಪಾರಾ ೧-೦೦ ಘಂಟ್ಯಾಕ ಧೋಂಪಾರಾ ಪೂಜಾ ಆನಿ ಸಂತರ್ಪಣ(ಶ್ರೀ ಕೃಷ್ಣಾಷ್ಟಮಿ ದಿವಸು ಸೋಡ್ನು) ಆಸ್ತಾ.
ಭಜನೆಂತು ವಾಂಟೊ ಘೆವಚಾಕ ಯವಚೆ ಭಜನಾ ತಂಡಾಚಾಂಕ ತಾನ್ನಿಕ, ಜವಣ, ಪರಸ್ಥಳೀಕ ಜಾಲಯಾರಿ ವಾಸ್ತವ್ಯಾಚೆ ವ್ಯವಸ್ಥಾ ವರೇನ ಭಜನಾ ಮಂಡಳಿಚಾನ ಕರತಾತಿ. ತಾನ್ನಿ ಯವ್ಚೆ ದಿವಸು ಆನಿ ವೇಳ್ಯಾಚೆ ಮಾಹಿತಿ ಪಯಲೇಚಿ ಭಜನಾ ಸಪ್ತ ಮಂಡಳಿಕ ಕಳೋವ್ಕಾ ಮ್ಹೊಣು ವಿನಂತಿ ಆಸ್ಸಾ. ಭಜನಾ ಸಪ್ತ ದಿವಸು ಸೇವಾ ಪಾವಯಚಾಕ ಜಾಂವೊ ಭಜನಾ ಸಪ್ತಾಂತು ವಾಂಟೊ ಘೆವ್ಚೆ ಖಾತ್ತಿರಿ ಚಡ್ತೆ ಮಾಹಿತಿಕ ೯೧೧೦೪೫೨೪೯೦ ನಾಂವೆ ೯೭೪೧೩೭೨೧೨೩ ಹಾಂಕಾ ಸಂಪರ್ಕ ಕೊರಯೇತ.