ಆಜಿ ಶ್ರೀ ಸಂಸ್ಥಾನಾಚೆ ಪ್ರಥಮ ಯತಿವರ್ಯ ಶ್ರೀಮದ್ ಯಾದವೇಂದ್ರ ಸ್ವಾಮ್ಯಾಂಗೆಂಲೆಂ ಪುಣ್ಯತಿಥಿ ತಶೀಚಿ ಟೀಕಾಚಾರ್ಯ ಜಯತೀರ್ಥ ತಾಂಗೆಲೆ ಪುಣ್ಯ ತಿಥಿ ವರೇನ ಜಾವ್ನಾಸ್ಸಾ. ಜಯತೀರ್ಥ ಮಧ್ವಾಚಾರ್ಯಾಂಗೆಲೆ ಧ್ವೈತ ಸಿದ್ಧಾಂತ ಪ್ರಚಾರ ಕೆಲೀಲ್ಯಾಂತು ವ್ಹಡ ನಾಂವ ಘೆತ್ಲ್ಯಾ. ಅಸ್ಸಾಲೆ ಸುಸಂದರ್ಭಾರಿ ಹೇ ಕಾಶೀಚೆ ಪುಣ್ಯಕ್ಷೇತಾಂತು ಆಸ್ಸುಚೆ ಆಮ್ಗೆಲೆ ಮೂಲಮಠಾಂತು ಚಾತುರ್ಮಾಸ ವ್ರತ ಘೆತ್ತಾ ಆಸ್ಸುಚೆ ವ್ಹಡ ಯೋಗಾಯೋಗ. ಅಶ್ಶಿ ಮ್ಹೊಣು ಶ್ರೀ ಸಂಸ್ಥಾನ ಕಾಶೀಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿಂ ಸಾಂಗ್ಲೆ. ತಾನ್ನಿ ದಿನಾಂಕ. ೦೩-೦೮-೨೦೨೬ ದಿವಸು ಕಾಶೀಚೆ ಬ್ರಹ್ಮಘಾಟಾಂತು ಆಸ್ಸುಚೆ ಮೂಲಮಠಾಂತು ೨೫ವ್ಯಾ ವರಸಾಚೆ ರೌಪ್ಯ ಚಾತುರ್ಮಾಸ ವ್ರತ ಸ್ವೀಕಾರ ಕೊರನು ಮಾಗಿರಿ ಚಲೀಲೆ ಸಭಾ ಕಾರ್ಯಕ್ರಮಾಂತು ಆಶೀರ್ವಚನ ದಿತ್ತಾ ಆಶ್ಶಿಲೆ.
ಮುಖಾರಿ ಉಲಯಿಲೆ ತಾನ್ನಿ ಮಹಾಮಹಿಮ ೬೪ ವಿದ್ಯಾ ಗೊತ್ತಾಶ್ಶಿಲೆ ಶ್ರೀಮದ್ ವಿಜಯೇಂದ್ರ ತೀರ್ಥಾನಿ ದಕ್ಷಿಣಾಚೆ ಕರಾವಳಿಚಾನ ಸಮಾಜಾಚೆ ಏಕಳೋ ವಟುಕ ಹೇ ಕಾಶೀ ಕ್ಷೇತ್ರಾಕ ಆಪೋನು ಹಾಡ್ನು ಸಂನ್ಯಾಸ ದೀಕ್ಷಾ ದೀವ್ನು ಮಠ ಸ್ಥಾಪನ ಕೆಲೀಲೆ ಖಂಚಕಿ ಏಕ ವಿಶೇಷ ಕಾರಣಾನಿ ಮ್ಹೊಣು ಆಮ್ಮಿ ಸಮಜೂಕಾ. ಆನಿ ರಾಷ್ಟ್ರಾಚೆ ಸಕ್ಕಡೆ ಸಂಸ್ಥಾನಾಚೆ ಕೀರ್ತಿ ಪಸರ್ಲೇರಿಚಿ ಆಜಿಕಂಯಿ ಕಾಶೀಂತೂಲೆ ಮೂಲ ಮಠಾಚೆ ಕೀರ್ತಿ ದೀಸಾಂದೀಸಾಕ ಸಕ್ಕಡೆ ಪಸರತಾ ಆಸ್ಸಾ. ಆಜಿ ಚಾತುರ್ಮಾಸ ಆರಂಭ ಜಾಲ್ಲ್ಯಾ. ಮಠಾಚೆ ತಶೀಚಿ ಶಾಖಾ ಮಠಾಚೆ ದೇವಾಂಕ ನಾನಾ ವಿಧಾಚೆ ಅಭಿಷೇಕ, ಹವನ ಚಲ್ಲ್ಯಾ. ವಿಶೇಷ ಮ್ಹಳಯಾರಿ ಆಜಿ ಚಾತುರ್ಮಾಸಾಚೆ ಸುರುವಾತಾ ದಿವಸು ಜನಾನಿ ಅನುಷ್ಟಾನ ಕೆಲ್ಲ್ಯಾ. ಆಮ್ಗೆಲೆ ಘರಾಂತು ಬರೇಪಣ ಜಾವ್ಕಾ, ಸಮಾಜಾಂತು ಬರೇಪಣ ಜಾವ್ಕಾ, ದೇಶಾಂತು ಬರೇಪಣ ಜಾವ್ಕಾ, ಸಕ್ಕಡೆ ಪ್ರೀತಿ ವೃದ್ಧಿ ಜಾವ್ಕಾ, ಮ್ಹಣ್ಚೆ ಉದ್ದೇಶಾನಿ ಅವುಂದು ಆಮ್ಮಿ ಕಾಶೀಕ್ಷೇತ್ರಾಂತು ಚಾತುರ್ಮಾಸ ವ್ರತ ಕರತಾ ಆಸ್ಸಾತಿ. ದೇವಾನಿ ಚಂದ ರೂಪಾರಿ, ವೈಭವಾರಿ, ಕೋಣಾಂಕ ಕಷ್ಟ ನಾತ್ತಿಲೆ ತಶ್ಶಿ ಕೊರೋನು ಚಾಂಗ ಮನಾನಿ ದೇವಾಲೆ ದಯೇಕ ಪಾತ್ರ ಜಾವಚೆ ವರಿ ಜಾತ್ತಾ ಮ್ಹಣ್ಚೆ ವಿಶ್ವಾಸಾನಿ ಹಾಂಗಾಕ ಆಯ್ಯಿಲೆ ಸರ್ವಾಂಕ ದೇವಾನಿ ಸರ್ವ ಸೌಭಾಗ್ಯ ದಿವ್ಕಾ ಮ್ಹೊಣು ಪ್ರಾರ್ಥನಾ ಪೂರ್ವಕ ಪೂಜ್ಯ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿಂ ದೇವಾಲೆಂ ಮಾಗ್ಗುನು ಸರ್ವಾಂಕ ಬರೆಂ ಜಾಂವೊ ಮ್ಹೊಣು ಆಟಯ್ಲೆ.
ಮಾಗಿರಿ ಧಾ ಸಮಸ್ತಾಂಕ ಫಲಮಂತ್ರಾಕ್ಷತ ದೀವ್ನು ಸರ್ವಾಂಕ ಆಶೀರ್ವಾದ ಕೆಲ್ಲೊ. ಹಾಜ್ಜೆ ಪಶೀ ಪಯ್ಲೆ ಸಕ್ಕಾಣಿ ಪೂಡೆ ಚಾತುರ್ಮಾಸ ಪ್ರಯುಕ್ತ ಶ್ರೀ ಕಾಶೀ ಮೂಲ ಮಠಾಂತು ದಿವಸ ಬಽರಿ ಧಾರ್ಮಿಕ ತಶೀಚಿ ನಿರಂತರ ಭಜನಾ, ಹರಿಸ್ಮರಣಾ ಕಾರ್ಯಕ್ರಮ ಚಲ್ಲೆ. ಮಠಾಚೆ ದೇವಾಕ ಕನಕಾಭಿಷೇಕ, ಪಂಚಾಮೃತಾಭಿಷೇಕ, ವಿವಿಧ ಕಲಶಾಭಿಷೇಕ, ಲಘುವಿಷ್ಣು ಹವನ, ಮುದ್ರಾಧಾರಣ ತಶ್ಶೀಚಿ ಮೃತ್ತಿಕಾ ಪೂಜನ ಚೋಲ್ನು ಪೂಜ್ಯ ಶ್ರೀಮದ್ ಸಂಯಮೀಂದ್ರ ಸ್ವಾಮ್ಯಾನಿ ಆಪಣೇಲೆ ೨೫ವ್ಯಾ ವರ್ಷಾಚೊ ರೌಪ್ಯ ಚಾತುರ್ಮಾಸ ವ್ರತ ಅಧಿಕೃತ ಜಾವ್ನು ಸ್ವೀಕರ್ಲೆ. ವೈದಿಕಾಲೊ ಪ್ರಾರ್ಥನೆ ಬರಶಿ ಸಭಾ ಕಾರ್ಯಕ್ರಮ ಸೂರು ಜಾಲ್ಲೆ. ಪೂಜ್ಯ ಸ್ವಾಮ್ಯಾನಿಂ ವೈದಿಕಾಂಕ ದಕ್ಷಿಣ ದಿವನು ಜಾಲ್ಲೆ ನಂತರ ವೈದಿಕಾಲೊ ವೇದಘೋಷ ಮಧೇ ಚಾತುರ್ಮಾಸ ಸಮಿತಿ ಅಧ್ಯಕ್ಷ ಶ್ರೀ ಪ್ರಭಾಕರ ಕಾಮತ, ಕಾರ್ಕಳ ಆನಿ ಉಪಾಧ್ಯಕ್ಷ ಶ್ರೀ ರಘುವೀರ ಭಂಡಾರಕಾರ್ ಮಾಮ್ಮಾನಿ ಭಕ್ತಿ-ಶೃದ್ಧೇನಿ ಚಾತುರ್ಮಾಸ ಸಮಿತಿಚೆ ಪದಾಧಿಕಾರಿ ಬರಶಿ ಮೇಳ್ನು ಪೂಜ್ಯ ಸ್ವಾಮ್ಯಾಂಗೆಲೆ ಪಾದ್ಯ ಪೂಜಾ ಚಲಯಿಲೆ.
ದೇಶಾದ್ಯಂತಾ ತಾಕೂನು ಆಯಲೀಲೆ ದೇವಳ, ಮಠ, ಮಂದಿರ, ಸಮಾಜಾಚೆ ಪ್ರತಿನಿದಿನಿ ತಾಂಗತಾ ತಾಂಗೆಲೆ ದೇವಳಾಂತು ವಿಶೇಷ ಪೂಜಾ ಚಲೋನು ಹಾಡಲೀಲೆ ಪ್ರಸಾದು ಪೂಜ್ಯಾಂಕ ದೀವನು, ಮಾಲಾರ್ಪಣ ಕೊರನು ಗೌರವ ಕೆಲ್ಲಿ. ಚಾತುರ್ಮಾಸ ಸಮಿತಿ ಅಧ್ಯಕ್ಷ ಶ್ರೀ ಪ್ರಭಾಕರ ಕಾಮತ್ ತಾನ್ನಿ ಜಮೀಲೆ ಸಕಡ್ಯಾಂಕ ಯೇವಕಾರ ಕೆಲ್ಲಿ. ಪ್ರಾಸ್ತಾವಿಕ ಜಾವನು ಉಲಯಿಲೆ ಕಾರ್ಯದರ್ಶಿ ಶ್ರೀ ಕುಡ್ವ ಮಾಮ್ಮಾನಿದೇವಾನಿ ಬಹು ವಿಜೃಂಭಣೇನಿ ಚಾತುರ್ಮಾಸ ವ್ರತ ಚಲಯಚಾಕ ಅನುಗ್ರಹ ಕೆಲ್ಲ್ಯಾ. ಪೂಜ್ಯ ಸ್ವಾಮ್ಯಾನಿ ಲೋಕಾಂಕ ದೇವಾಲೆ ಬಗಲೇನ ತಾಂಗೆಲೆ ಮನ ವಚ್ಚೆವರಿ ಅನುಗ್ರಹ ಕೊರ್ಕಾ ಮ್ಹೊಣು ಸಾಂಗ್ಲೆ. ಸೇವಾ ಮಂಡಲಾಚೆ ಕನ್ವೀನರ್ ಶ್ರೀ ಆರ್.ಜಿ. ಭಟ್ ತಾನ್ನಿ ಉಲೋನು ಚಾತುರ್ಮಾಸ ವ್ರತಾಚೆ ಪೂರ್ವ ತಯಾರಿ ಕಶ್ಶಿ ಜಾಲ್ಲೆ, ಕೋಣ ಕೋಣೆ ಕಶ್ಶಿ ಸೇವಾ ಪಾವಯಿಲೆ ಮ್ಹಣ್ಚೆ ವಿಷಯು ಸಭೆಕ ಕಳಯಿಲೆ. ಹೇಂಚಿ ವೇಳ್ಯಾರಿ ವಿಶೇಷ ಸೇವಾ ದಿಲೀಲೆ ಶ್ರೀ ರಾಜೀವ ವದ್ಯಾರ ಸಹಿತ ಇತರಾಂಕ ಪೂಜ್ಯ ಸ್ವಾಮ್ಯಾನಿ ಶಾಲು ಪಾಂಗೂರ್ನು, ಫಲಮಂತ್ರಕ್ಷತಾ ದಿವನು ಆಶೀರ್ವಾದ ಕೆಲ್ಲಿ.
ಶ್ರೀ ಸಂಸ್ಥಾನಾಚೆ ಮೂಲ ಮಠಾಂತು ೪೦,೦೦೦ ಸ್ಕ್ವೇರ್ಫೂಟ್ ಬಾಂದಕಾಮ ಆಸ್ಸುನು ವಿಶಾಲ ಜಾಲೀಲೆ ಸ್ಥಳಾವಕಾಶ ಆಸ್ಸಾ. ಆನಿ ನವಂಬರ ೧೭ ಪರಿಯಂತ ಪೂಜ್ಯ ಸ್ವಾಮೆಂ ಹಾಂಗಾ ಮೊಕ್ಕಾಂ ವ್ಹರತಾಲೆ. ಹೇ ವೇಳ್ಯಾರಿ ಪ್ರತಿದಿವಸು ಪಂಚಗವ್ಯ ಪ್ರಾಶನ ತಶೀಚಿ ಪಂಚಗವ್ಯ ಹವನ, ಗಂಗಾ ಪೂಜನ, ಶ್ರೀ ಕಾಶಿ ಮೂಲ ಮಠಾಂತು ಆಸ್ಸುಚೆ ಶ್ರೀ ಬ್ರಹ್ಮೇಶ ದೇವಾಕ ಪ್ರತಿನಿತ್ಯ ರುದ್ರಾಭಿಷೇಕ, ನಾರಿಕೇಳ ಗಣಯಾಗ ತಶೀಚಿ ಮೂಲ ಮಂತ್ರ ಹವನ, ಧೋಂಪಾರಾ ವಿಷ್ಣು ಸಹಸ್ರನಾಮ ಪಾರಾಯಣ, ಅರ್ಚನಾ, ಪಠಣ ಚಲ್ತಾ. ಸಾಂಜವಾಳಾ ಗಂಗಾರತಿ, ನರಸಿಂಹ ಸ್ತುತಿ ನಮಸ್ಕಾರ, ಸುವಾಸಿನಿ ಬಾಯ್ಲಮನಶೆ ತಾಕೂನು ದೀಪಾರಾಧನ, ಕುಂಕುಮಾರ್ಚನ, ಹೋಂಟಿ ಭೊರಚೆ, ಪುಷ್ಪಾಂಜಲಿ ಸೇವಾ, ವೈದಿಕ ತಾಕೂನು ಸಪ್ತಶತಿ ಪಾರಾಯಣ ಚಲ್ತಾ. ಮಾತ್ರ ನ್ಹಂಹಿ ಶ್ರೀ ನರಸಿಂಹ, ಶ್ರೀ ವ್ಯಾಸ, ಶ್ರೀ ರಾಮಚಂದ್ರ ದೇವಾಲೆ ಖಾತ್ತಿರಿ ವಿಶೇಷ ಧಾರ್ಮಿಕ ಅನುಷ್ಟಾನ ವರೇನ ಚೊಲ್ಚೆ ಆಸ್ಸಾ.