ಉಡ್ಪಿಂತು `ಉತ್ಕರ್ಷ” ಸಾತ ದಿವ್ಸಾಚೆ ವೈಶಾಖಾಚೆ ಶಿಬಿರ ಸಂಪನ್ನ

ಉಡ್ಪಿಚೆ ಗೌಡ ಸಾರಸ್ವತ ಬ್ರಾಹ್ಮಣ ಯುವಕ ಮಂಡಳಿ ತಶೀಚಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳ ಉಡುಪಿ ಹಾಜ್ಜೇ ಸಂಯುಕ್ತ ಆಶ್ರಯಾರಿ ಆಯೋಜನ ಕೆಲೀಲೆಉತ್ಕರ್ಷ ಮ್ಹಣ್ಚೆ ಸಾತ ದಿವಸಾಚೆ ವೈಶಾಖಾಚೆ ಶಿಬಿರ ಮೇ 04 ತಾಕೂನು 10 ಪರಿಯಂತ ಚಲ್ಲೆ. ಮುಖೇಲ ಸೊಯರೊ ಜಾವನು ಸಂಸ್ಕೃತಿ ವಿಶ್ವ ಪ್ರತಿಷ್ಠಾನ ಗೌರವಾಧ್ಯಕ್ಷ ಜಾಲೀಲೆ ಶ್ರೀ ವಿಶ್ವನಾಥ ಶೆಣೈ ದಂಪತೀನಿ ದೀವೋ ಜಳೋನು, ಚರಡುಂವಾಲೆ ನೀತಿ ಬೋಧನಾ ಪುಸ್ತಕ ಉಗ್ತಾವಣ ಕೊರನು ವೈಶಾಖಾ ಶಿಬಿರಾಚೆ ಉದ್ಘಾಟನ ಕೊರನುಅಸ್ಸಾಲೆ ಶಿಬಿರ ಆಯ್ಚೆ ಚರಡುವಾಂತು ಭಾರತೀಯ ಸಂಸ್ಕೃತಿ, ಮೌಲ್ಯ ತಶೀಚಿ ಜೀವನ ಕೌಶಲ್ಯ ವಾಡ್ಡೇಚಾಂತು ಮುಖೇಳ ಪಾತ್ರ ಘೆತ್ತಾ ಮ್ಹೊಣು ಶಿಬಿರಾಕ ದೇವು ಬರೆಂ ಕೊರೊ ಮ್ಹಳ್ಳೆ.

ಏಕ ಹಪ್ತೆ ಪರ್ಯಂತ ಚಲೀಲೆ ಹೇ ವಿಶೇಷ ಶಿಬಿರಾಂತು ಚರಡುಂವಾಲೆ ಸರ್ವಾಂಗೀಣ ವ್ಯಕ್ತಿತ್ವ ವಿಕಸನಾಕ ಅನ್ಕೂಲ ಜಾವ್ಚೆ ತಸ್ಸಾಲೆ ಸಬಾರ ವೈವಿಧ್ಯಮಯ ಚಟುವಟಿಕಾ ಘಾಲ್ನು ಘೆತ್ತಿಲೆ. ಭಜನಾ, ಶ್ಲೋಕ ಪಠಣ, ಯೋಗಾಭ್ಯಾಸ, ಕಥಾ ವಾಚನ, ವ್ಯಕ್ತಿತ್ವ ವಿಕಾಸ ತರಬೇತಿ, ಸಾಂಸ್ಕೃತಿಕ ಸ್ಪರ್ಧಾ ತಶೀಚಿ ಸೃಜನಾತ್ಮಕ ಚಟುವಟಿಕೆ ಮುಖಾಂತರ ಚರಡುಂವಾಂತು ಶಿಸ್ತ, ಆತ್ಮವಿಶ್ವಾಸ, ಮುಖೇಲಪಣಾಚೆ ಗುಣ ಆನಿ ಮೇಳ್ನು ವಚ್ಚೆ ಭಾವನಾ ವಾಡ್ಡಯಚೆ ಪ್ರಯತ್ನ ಕೆಲ್ಲೆ.

ಬೌದ್ಧಿಕ ವಾಡಪಣಾಚೆ ಬರಶಿ ಚರಡುಂವಾಲೊ ದೈಹಿಕ ಕ್ಷಮತಾ ಆನಿ ಚುರ್‍ಕಪಣ ವಾಡಯಚೆ ಉದ್ದೇಶಾನಿ ವೆಗವೆಗಳೆ ದೇಶಿ ಖೇಳಾಂಚೆ ಒಳಕ ಆನಿ ತರಬೇತಿ ವರೇನ ದಿಲ್ಲಿ. ಸಂಪ್ರದಾಯಬದ್ಧ ಖೇಳಾ ಮುಖಾಂತರ ಚರಡುವಾಂತು ಸಹಕಾರ ಮನೋಭಾವನಾ, ಕ್ರೀಡಾಸ್ಫೂರ್ತಿ ತಶೀಚಿ ಆರೋಗ್ಯಕರ ಜೀವನಶೈಲಿಚೆ ಜ್ಞಾನ ಯವ್ಚೆ ವರಿ ಕೆಲ್ಲೆ.

ಶಿಬಿರಾಚೆ ಮುಖೇಲ ಆಕರ್ಷಣ ಜಾವ್ನು ಮಾತೃಪೂಜನ ಕಾರ್ಯಕ್ರಮ ಭಕ್ತಿಭಾವಾನಿ ಚಲ್ಲೆ. ಆವಯಿಲೀ ಮಹತ್ವ ಚರಡುಂವಾಂಕ ಮಾಹಿತಿ ಕೊರನು ದಿವಚೆ ಕಾರ್ಯಕ್ರಮ ಸಕಡ್ಯಾಂಕ ಪಸಂದ ಜಾಲ್ಲೆ. ನ್ಹಂಹಿಸಿ ಶಿಬಿರಾರ್ಥಿಂಗೆಲೆ ಸಾಮೂಹಿಕ ಜಾಯಿದಿವಸು ಆಚರಣ ಮಸ್ತ ಸಂಭ್ರಮಾರಿ ಚಲ್ಲೆ. ಚರಡುವಾಂತು ಒಕ್ಕಟ್ಟ ಆನಿ ಆನಂದಾಚೆ ವಾತಾವರಣ ನಿರ್ಮಾಣ ಜಾವ್ಚೆ ವರಿ ಕಾರ್ಯಕ್ರಮ ವಿನೂತನ ಜಾವ್ನು ಆಯೋಜನ ಕೆಲೀಲೆ.

ಹೇ ವೇಳ್ಯಾರಿ ವಿಶೇಷ ಆಕರ್ಷಣ ಜಾವ್ನು ಪುರಾಣ ಆನಿ ಇತಿಹಾಸ ಪ್ರಸಿದ್ಧ ವ್ಯಕ್ತಿಂಗೆಲೆ ವೇಷಭೂಷಣ ಘಾಲ್ನು ಘೇವ್ನು ಚರಡುಂವಾನಿ ರ್ಯಾಂಪ್‌ವಾಕ್ ಕೆಲ್ಲೆ. ರಾಮಾಯಣ, ಮಹಾಭಾರತ ತಶೀಚಿ ಭಾರತೀಯ ಇತಿಹಾಸಾಚೆ ವೆಗವೆಗಳೆ ಪಾತ್ರಾಂಚೆ ವೇಷಾಂತು ಚರಡುಂವ ಸಕಡ್ಯಾಲೆ ನಜರಾಕ ಘೆಲ್ಲೆ. ಸಕಡ್ಯಾನಿ ತಾಂಕಾ ತಾರೀಪು ಕೆಲ್ಲೆ.

ಶಿಬಿರಾಲ ಶ್ರೀಮತಿ ಶಕುಂತಲ ಆರ್. ಶೆಣೈ ಆನಿ ತಾಂಗೆಲೆ ತಂಡಾಚಾನಿ ಸಮರ್ಪಕ ಜಾವ್ನು ಚಲೋನು ದಿಲ್ಲೆ.
ಶಿಬಿರಾಚೆ ಸಮಾರೋಪ ಸಮಾರಂಭ ವೈಭವಾರಿ ಚಲ್ಲೆ. ಶ್ರೀಮತಿ ಉಷಾ ಪೈ ಮುಖೇಲ ಸೊಯರೆ ಜಾವ್ನು ವಾಂಟೊ ಘೇವ್ನು ಚರಡುಂವಾಲೆ ಪ್ರತಿಭಾ ಆನಿ ಶಿಸ್ತುಬದ್ಧ ಪ್ರದರ್ಶನ ದಿಲೀಲೆ ಖಾತ್ತಿರಿ ಶ್ಲಾಘನ ಕೆಲ್ಲಿ. ವಿಶ್ವಸ್ಥ ಮಂಡಳಿಚೆ ಶ್ರೀ ದಿನೇಶ್ ಪೈ ದಂಪತಿಂಗೆಲೆ ಅಧ್ಯಕ್ಷತೆರಿ ಚಲೀಲೆ ಕಾರ್ಯಕ್ರಮಾಂತು ಶಿಬಿರಾರ್ಥಿನಿ ನಾಚ(ನೃತ್ಯ), ಗಾಯನ, ಭಜನಾ ತಶೀಚಿ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮ ಪ್ರದರ್ಶನ ಕೊರನು ಪ್ರೇಕ್ಷಕಾಂಕ ಖುಷಿ ದಿಲ್ಲಿ.

ದೇವಳಾಚೆ ಆಡಳಿತ ಮೊಕ್ತೇಸರ ಶ್ರೀ ಗುಜ್ಜಾಡಿ ಪ್ರಭಾಕರ ನಾಯಕ್ , ಜಿ ಎಸ್ ಬಿ ಯುವಕ ಮಂಡಳಿಚೆ ನಿತೀಶ್ ಶೆಣೈ  ಯುವಕ   ಮಂಡಳಿಚೆ ಸದಸ್ಯ, ವಿಶ್ವಸ್ಥ, ಸ್ವಯಂಸೇವಕ, ಕಾರ್ಯಕ್ರಮಾಂತು ಉಪಸ್ಥಿತ ವ್ಹರಲೀಲೆ. ಸರ್ವ  ಶಿಬಿರಾರ್ಥಿಂಕ ಪ್ರಮಾಣಪತ್ರ ವಾಂಟುನು ಅಭಿನಂದನ ಪೂರ್ವಕ ಪ್ರೋತ್ಸಾಹ ಕೆಲ್ಲಿ.