ಕರ್ಕಿಂತು ದೈವಜ್ಞ ಮಹಾಸ್ವಾಮ್ಯಾಂಗೇಲೆ ೨೭ವೇಂ ಪಟ್ಟಾಭಿಷೇಕ ಸಂಪನ್ನ

ಜಗದ್ಗುರು ಶಂಕರಾಚಾರ್ಯ ಸಂಸ್ಥಾನ ಶ್ರೀ ಜ್ಞಾನೇಶ್ವರೀ ಪೀಠಾಚೆ ಪರಮ ಪೂಜ್ಯ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಮಹಾಸ್ವಾಮ್ಯಾಂಗೆಲೆ ೨೭ವೇಂ ಪಟ್ಟಾಭಿಷೇಕ ವಾರ್ಷಿಕೋತ್ಸವ ಪ್ರಯುಕ್ತ ಆರತಾಂ (09-05-2026) ಶ್ರೀ ಮಠಾಂತು ಜಗನ್ಮಾತೆಕ ವಿಶೇಷ ರುದ್ರಾಭಿಷೇಕ, ಶ್ರೀ ಲಕ್ಷ್ಮೀ ಹವನಾಚೆ ಪೂರ್ಣಾಹುತಿಚೆ ಉಪರಾಂತ ಅತ್ಯಂತ ವೈಶಿಷ್ಟ್ಯ ಪೂರ್ಣ ಜಾವ್ನು ಚಲ್ಲೆ.

ಮನುಷ್ಯಾಲೆ ಜೀವನಾಂತು ಆಮ್ಗೆಲೆ ಶರೀರ, ಆಮ್ಮಿ ಜೋಡಲೀಲೆ ಸಂಪತ್ತ, ಅಧಿಕಾರ ಖಂಚೇಯಿ ಶಾಶ್ವತ ನ್ಹಂಹಿ. ಜಾಲಯಾರಿ ಆಮ್ಮಿ ಪ್ರೀತಿ ವಿಶ್ವಾಸ ಕೋಳ್ನು ಸದೃಹತೆನಿ ಕೆಲೀಲೆ ತ್ರಿಕರಣಪೂರ್ವಕ ಕಾರ್ಯ ಮಾತ್ರ ಶಾಶ್ವತ ಜಾವ್ನು ವ್ಹರ್‍ತಾ. ಸಮಾಜ ಬಾಂಧವಾನಿ ಹೇ ನಮೂನ್ಯಾಚೆ ಕಾರ್ಯ ಪ್ರೀತಿಪೂರ್ವಕ ಚಲಯಕಾ ಮ್ಹೊಣು ಪರಮಪೂಜ್ಯ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಮಹಾಸ್ವಾಮ್ಯಾನಿಂ ಆಪಣೇಲೆ ಆಶೀರ್ವಚನಾಂತು ಸಾಂಗ್ಲೆ.

ಸಕ್ಕಾಣಿ ಪಟ್ಟಾಭಿಷೇಕ ವಾರ್ಷಿಕೋತ್ಸವಾಚೆ ಅನ್ನದಾನಿ ಶ್ರೀಮತಿ ಕುಸುಮ ಆನಿ ಶ್ರೀ ಕೆ. ನಾರಾಯಣ ಶೇಟ್ ತಶೀಚಿ ಶ್ರೀಮತಿ ಮಂದಾರ ಆನಿ ಶ್ರೀ ಸಂತೋಷ ಎನ್. ಭಟ್ ಕುಟುಂಬಾಚೆ ಲೋಕಾನಿ ಪಾದುಕಾ ಪೂಜಾ ಚಲಯ್ಲೆ. ವೈದಿಕ ವೃಂದಾಚೆ ವೇದಘೋಷಾಚೆ ಉಪರಾಂತ ಚಲೀಲೆ ಸಭಾ ಕಾರ್ಯಕ್ರಮಾಂತು ಮಠಾಚೆ ಟ್ರಸ್ಟ್ ಉಪಾಧ್ಯಕ್ಷ ಶ್ರೀ ಆರ್.ಎಸ್. ರಾಯ್ಕರ್ (ಉಪ್ಪೋಣಿ) ತಾನ್ನಿ ಯೇವಕಾರ ಆನಿ ಪ್ರಾಸ್ತಾವಿಕ ಭಾಷಣ ಕೆಲ್ಲಿ. ಶ್ರೀ ಮಠಾಚೆ ಟ್ರಸ್ಟಿ ಜಾಲೀಲೆ ಶ್ರೀ ಅನಿಲ್ ಆರ್. ಚೋಡಣಕರ, ಶ್ರೀ ಎಂ.ಎಸ್. ಅರುಣಕುಮಾರ ಆನಿ ಶ್ರೀ ಪ್ರವೀಣ ಆರ್. ರೇವಣಕರ್ ತಾನ್ನಿ ಉಲಯಿಲೆ. ಶ್ರೀಯುತ ಆರ್.ಎಸ್.ರಾಯ್ಕರ್ ದಂಪತಿನಿ ಪೂಜ್ಯ ಸ್ವಾಮ್ಯಾಂಕ ವಜ್ರಖಚಿತ ಸ್ವರ್ಣ ಕಿರೀಟ ಘಾಲ್ನು, ರಾಜೋಪಚಾರ ಪೂಜಾ ಚಲಯಿಲೆ.

ಈ ವೇಳ್ಯಾರಿ ಸಮಾಜಾಚೆ ಪಾಂಚ ಲೋಕ ಮ್ಹಾಲ್ಗಡ್ಯಾಂಕ ಸನ್ಮಾನ ಕೆಲ್ಲೆ. ಶ್ರೀ ಮಠಾಚೆ ಜ್ಞಾನೇಶ್ವರೀ ಆಂಗ್ಲ ಮಾಧ್ಯಮ ಇಸ್ಕೂಲಾಂತು ಧಾಂಚೆ ಕ್ಲಾಸಾಂತು ಶೇಕಡಾ ೯೦ ಪಶಿ ಚ್ಹಡ ಅಂಕ ಘೆತ್ತಿಲೆ ವಿದ್ಯಾರ್ಥ್ಯಾಂಕ ಪೂಜ್ಯ ಸ್ವಾಮ್ಯಾ ತಾಕೂನು ಪ್ರೋತ್ಸಾಹ ಧನ ವಾಂಟಿಲೆ. ಗಂಗಾವತಿಯ ಸದ್ಭಾವನಾ ಸೇವಾ ಸಂಸ್ಥ್ಯಾನಿ ವರೇನ ವಿದ್ಯಾರ್ಥ್ಯಾಂಕ ಪುರಸ್ಕಾರ ಕೆಲ್ಲಿ. ಶ್ರೀ ಮಠಾಚೆ ಟ್ರಸ್ಟಿ, ರಾಜ್ಯಾಚೆ ವೆಗವೆಗಳೆ ಕಡೆಚಾನ ಆನಿ ಗೋಂಯ, ಮಹಾರಾಷ್ಟ್ರ ರಾಜ್ಯಾಚಾನಿ ಆಯಲೀಲೆ ಭಕ್ತಾಧಿ, ದೈವಜ್ಞ ಸಮಾಜ ಬಾಂದವ ವ್ಹಡ ಅಂಕಡ್ಯಾರಿ ಉಪಸ್ಥಿತ ವ್ಹರಲೀಲೆ.