ಚಾಂಗ ಆರೋಗ್ಯ ಆಸಲೇರಿ ಜೀವನಾಂತು ಕಸ್ಸಲೇ ಜಾಲಯಾರೀಚಿ ಸಾಧನಾ ಕೊರಯೇತ. ತ್ಯಾ ಖಾತ್ತಿರಿ ಚಾಂಗ ಆರೋಗ್ಯ ವಿಷಯಾಂತು ಚಡ್ತೆ ನಜರ ಘಾಲ್ಕಾ ಆನಿ ಆರೋಗ್ಯ ವಾಯ್ಟ ಜಾಯ್ನಾ ತಶ್ಶಿ ಪಳೋನು ಘೆವ್ಕಾ. ಹಾಕ್ಕಾ ನಿಯಮಿತ ಜಾವ್ನು ಆರೋಗ್ಯ ತಪಾಸಣಾ ಕೊರನು ಘೇವ್ನು ಸಮಾಧಾನಾನಿ ಜೀವನ ಚಲಯ್ಕಾ. ಅಸ್ಸಾಲೆ ಆರೋಗ್ಯ ತಪಾಸಣಾ ಶಿಬಿರಾಂಚೆ ಮುನಾಪೋ ಘೇವನು ಆಮ್ಗೆಲೆ ಆರೋಗ್ಯ ರಾಕ್ಕೂನು ಘೆವ್ಕಾಬಸ್ರೂರು ಶ್ರೀ ಮಹಾಲಸಾ ನಾರಾಯಣೀ ದೇವಳಾಚೆ ಮ್ಯಾನೇಜಿಂಗ್ ಟ್ರಸ್ಟಿ ಅಧ್ಯಕ್ಷ ಟಿ.ನಾರಾಯಣ ಪೈ ತಾನ್ನಿ ಸಾಂಗ್ಲೆ.
ಬಸ್ರೂರು ಶ್ರೀ ಮಹಾಲಸಾ ನಾರಾಯಣೀ ದೇವಸ್ಥಾನ ಟ್ರಸ್ಟ್ ತಶೀಚಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಬಸ್ರೂರು ಹಾಂಗೆಲೆ ಸಂಯುಕ್ತ ಆಶ್ರಯಾರಿ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಹಾಂಗೆಲೆ ಸಹಯೋಗಾನಿ ಬಸ್ರೂರು ಮಂಡಿಕೇರಿ ಶ್ರೀ ಮಹಾಲಸಾ ನಾರಾಯಣೀ ದೇವಳಾಚೆ ಸಭಾಂಗಣಾಂತು ಆಯೋಜನ ಕೆಲೀಲೆ ಉಚಿತ ಆರೋಗ್ಯ ತಪಾಸಣಾ ಶಿಬಿರಾಚೆ ಉದ್ಘಾಟನ ದಿನಾಂಕ. ೦೫-೦೪-೨೦೨೬ ದಿವಸು ಕೊರನು ತಾನ್ನಿ ಉಲೈತಾಶ್ಶಿಲೆ.
ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಬಸ್ರೂರು ಹಾಜ್ಜೆ ಅಧ್ಯಕ್ಷ ಬಿ.ಎನ್. ಪ್ರಭು ತಾನ್ನಿ ಕಾರ್ಯಕ್ರಮಾಚೆ ಅಧ್ಯಕ್ಷ ಪಣ ಘೆತ್ತಿಲೆ. ಮಣಿಪಾಲ ಕೆಎಂಸಿ ಆಸ್ಪತ್ರೆಚೆ ವೈದ್ಯ ಜಾಲೀಲೆ ಡಾ. ಸತೀಶ ಪ್ರಭು, ಡಾ.ಸಾಕೇತ್ ರಾವ್, ಡಾ.ಸಾಯಿ ಆಶಿಶ್, ಡಾ.ಶ್ವೇತಾ, ಡಾ.ಸಂಜನಾ, ಡಾ. ಅಥರ್ವ ಮಹೇಶ್, ದೇವಳಾಚೆ ಧರ್ಮದರ್ಶಿ ಮಂಡಳಿ ಸದಸ್ಯ, ಬಸ್ರೂರು ಜಿಎಸ್ಬಿ ಸಮಾಜಾಚೆ ಪದಾಧಿಕಾರಿ ಲೋಕ, ಸದಸ್ಯ, ಶಿಬಿರಾಕ ಆಯ್ಯಿಲೆ ಲೋಕ ಹೇ ವೇಳ್ಯಾರಿ ಉಪಸ್ಥಿತ ವ್ಹರಲೀಲೆ.
ಭಾವನಾ ಕಾಮತ್ ತಾನ್ನಿ ಯೆವಕಾರ ಕೊರನು ಕಾರ್ಯಕ್ರಮ ನಿರ್ವಹಣ ಕೆಲ್ಲಿ. ಶಿಬಿರಾಂತು ಚರ್ಮರೋಗ, ಮೂಳೆ ಸಂಬಂಧಿತ ತಪಾಸಣ, ರಕ್ತಾಂತುಂಲೆ ಸಾಕ್ರೆ ಅಂಶಾಚೆ ಪರೀಕ್ಷಾ, ಗೋಡಮೂತ ಪಾಯ್ಯಾಚೆ ಪರೀಕ್ಷಾ, ಶರೀರ ಸಂಯೋಜನೆಚೆ ವಿಶ್ಲೇಷಣ ತಶೀಚಿ ಇ.ಸಿ.ಜಿ. ಸಹಿತ ವೆಗವೆಗಳೆ ಆರೋಗ್ಯ ತಪಾಸಣ ಚಲಯಿಲಿ.