ಕರ್ನಾಟಕ ಕೋಂಕಣೀ ಸಾಹಿತ್ಯ ಅಕಾದಮೀ ತಶೀಚಿ ಕೋಂಕಣೀ ಖಾರ್ವಿ ಸಮಾಜ ಆನೀ ಕೋಂಕಣೀ ಖಾರ್ವೀ ಕಲಾಮಂಡ್, ಭಟಕಳ ಹಾಂಚ್ಯಾ ಸಂಯುಕ್ತಪಣಾನ ಆಯೋಜೀತ ಕೇಲ್ಲ್ಯಾ ಸಿಗ್ಮೇ ಪೋರಾಬ-೨೦೨೬ ಹ್ಯಾ ನಾಂವಾನ ಕೋಂಕಣೀ ಲೋಕ ಮಹೋತ್ಸವಾಚೀ ಸುರವಾತ 28 ಫೇಬ್ರುವಾರೀ 2026 ದಿಸಾ ಭಟಕಳ ಬಂದರಾಂತ ಭವ್ಯ ಮೆರ್ವಣಿಗೇನ ಸುರೂ ಜಾಲೀ. ಮೀನುಗಾರಿಕೆ, ಬಂದರು, ಒಳನಾಡು ಜಲಸಾರಿಗೆ ಆನಿ ಉತ್ತರ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ಜಾಲೀಲೆ ಶ್ರೀ ಮಂಕಾಳ ಎಸ್. ವೈದ್ಯ ಹಾನ್ನಿ ದಿವೋ ಪೇಟೋವನ ಸಿಗ್ಮೇ ಪೋರಾಬ-2026 ಉದ್ಘಾಟನ ಕೆಲ್ಲಿ. “ನುಸ್ತೇಂಮಾರೀ(ಮಾಸೋಳಿ ಧೊರಚೆ) ಹೋ ಫಕತ ಕೋಂಕಣೀ ಖಾರ್ವೀ ಸಮಾಜಾಚೋ ವೇವಸಾಯ ಮಾತ್ರ ನ್ಹಯ, ತರ ಏಕ ಪ್ರವೃತ್ತೀ, ಕಲಾ, ಸಂಸ್ಕೃತಾಯ ಆನೀ ಜಿವೀತ ಜಾಲ್ಲ್ಯಾ. ದೇಖೂನ ಸಮಾಜಾಚೋ ಏಕವಟ ಹೋ ತಾಂಚೋ ತಾಕತ್ತ, ಕೋಂಕಣೀ ಭಾಶೇಚೀ ಸೋಬೀತಕಾಯ ಜಮನೀಚ್ಯಾ ಆನೀ ಉದಕಾಚ್ಯಾ ಮರ್ಯಾದೇ ಭಾಯರ ಪಾತಳತ ಆಸಾ ಅಶೀ ತಾನ್ನಿ ಉಲಯಿಲೀ.
ಕರ್ನಾಟಕ ಕೋಂಕಣೀ ಸಾಹಿತ್ಯ ಅಕಾದೇಮೀಚೇ ಅಧ್ಯಕ್ಷ ಶ್ರೀ ಜೋಕಿಂ ಸ್ಟ್ಯಾನಿ ಆಲ್ವಾರಿಸ್ ಹಾಂಣೀ ಸಗಳ್ಯಾಂಕ ಯೇವಕಾರ ದಿವನ ಮ್ಹಣಲೇಂ, ಕೋಂಕಣೀ ಹೀ ಖಂಚೇಯಿ ಪ್ರತ್ಯೇಕ್ಯ ಧರ್ಮಾಚೀ ವಾ ಪ್ರದೇಶಾಚೀ ಭಾಸ ಉರಲೀ ನಾ, ಪೂಣ ಜಾತೀ-ಧರ್ಮ, ಸಮಾಜ, ವೇವಸಾಯ, ಆನೀ ಪ್ರದೇಶ ಹಾಂಚ್ಯಾ ಮರ್ಯಾದೇ ಭಾಯರ ವಾಡಲ್ಯಾ. ಕರ್ನಾಟಕ ಕೋಂಕಣೀ ಸಾಹಿತ್ಯ ಅಕಾದೇಮೀ ತಾಕಾ ವಳಖೂನ, ವಾಡ್ಡೋನು ಆನೀ ಪ್ರೋತ್ಸಾಹನ ದಿವಪಾಚೇಂ ವ್ಹಡಲೇಂ ಕಾಮ ಕರತಾ ಆನೀ ಮುಖಾರೀ ಕರತಲೀ. ಖಾಸಾ ಕರೂನ ಕೋಂಕಣೀ ಲೋಕಕಲಾ ಸಾಂಬಾಳಪಾಕ ಆನೀ ವಿಕಸೀತ ಕರಪಾಕ ಅಕಾದೇಮೀ ಸತತ ವಾವುರತಲೀ. ಕೊಂಕಣಿ ಭವನಾಚೊ ಕಾಮ ಅನುದಾನಾಚೆ ಊಣೆಪಣಾನಿ ಅರ್ಧಾಕ ರಾಬಲ್ಯಾ. ತ್ಯಾ ಪೂರ್ತಿ ಕೊರಚಾಕ ತೀನಿ ಕೋಟಿ ರುಪಯಾಚೆ ಗರಜ ಆಸ್ಸಾ. ಮಂಕಾಳ ವೈದ್ಯಾನಿಂ ಹಾಜ್ಜೆ ಪಶಿ ಮಾಕಶಿ ಕೊಂಕಣಿ ಅಧ್ಯಯನ ಪೀಠ ರಚನಾ ಕೊರಚಾಂತು ಮುಖೇಲ ಪಾತ್ರ ಘೆತಲ್ಯಾ, ಕೊಂಕಣಿ ಭವನಾಕ ವರೇನ ಅನುದಾನ ಮೆಳಯಚಾಕ ತಾನ್ನಿ ಮುಖ್ಯಮಂತ್ರ್ಯಾ ಕಡೇನ ವಿನಂತೀ ಕರಚೀ ಅಶೇಂ ತಾಂಣೀ ಮಂತ್ರ್ಯಾ ಕಡೇನ ವಿನಂತಿ ಕೇಲೇಂ.
ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೆ ಮಾಜಿ ಅಧ್ಯಕ ಜಾಲೀಲೆ ಶ್ರೀ ರೊಯ್ ಕ್ಯಾಸ್ತಲಿನೊ ತಾನ್ನಿ ಉಲೋನು ಮಂಕಾಳ ವೈದ್ಯ ತಶೀಚಿ ಕೊಂಕಣಿ ಲೋಕಾಂಗೆಲೊ ಮಧೇಚೆ ಸಂಬಂದಾಚೀ ಪ್ರಶಂಸಾ ಕೇಲಿ.
ಹೇ ವೇಳ್ಯಾರಿ ನುಸ್ತೇಂಮಾರೀ(ಮೀನುಗಾರಿಕಾ) ಅಪಘಾತಾಂತ ಮರಣ ಪಾವಿಲ್ಲ್ಯಾ ನುಸ್ತೇಕಾರಾಂಚ್ಯಾ ಕುಟುಂಬಾಂಕ ಕರ್ನಾಟಕ ಸರಕಾರಾಚಾನ ಮೆಳೀಲೆ ೫೦ ಲಾಖ ರುಪಯಾ ಪಶಿ ಚ್ಹಡ ಲುಕಸಾಣ ಭರಪಾಯಾಚೆ (ಧನ ಸಹಾಯಾಚೆ) ಚೆಕ್ ಮಂತ್ರಿ ಮಹೋದಯಾನಿ ವಾಂಟಿಲೆ.
ಖಾರ್ವಿ ಸಮಾಜಾಚೊ ಮುಖೇಲ ಶ್ರೀ ಸುಬ್ರಾಯ ಬಿ ಖಾರ್ವಿ, ಶ್ರೀ ರವಿ ಟಿ. ನಾಯಕ್, ಶ್ರೀ ರತ್ನಾಕರ ಎಂ. ಖಾರ್ವಿ, ತಶೀಚಿ ನವಾಯತಿ ಸಮಾಜಾಚೆ ಮುಖೇಲ ಶ್ರೀ ಇನಾಯಿತುಲ್ಲ ಶಾಬಾಂದ್ರಿ ಮಾನಚೆ ಸೊಯರೆ ಜಾವ್ನು ಆಯಲೀಲೆ. ಕೊಂಕಣಿ ಖಾರ್ವಿ ಕಲಾಮಾಂಡ್ ಹಾಜ್ಜೆ ಸಂಚಾಲಕ ಶ್ರೀ ಶ್ರೀಧರ ಎಂ. ಖಾರ್ವಿ ತಾನ್ನಿ ಆಬಾರ ಮಾನ್ಲೆ. ಶ್ರೀ ಕೇಶವ್ ಗಣೇಶ್ ತಾಂಡೆಲ್ ತಾನ್ನಿ ಕಾರ್ಯಕ್ರಮಾಚೆ ನಿರೂಪಣ ಕೆಲ್ಲಿ. ಅಕಾಡೆಮಿಯ ಸದಸ್ಯ ಶ್ರೀ ನವೀನ್ ಲೋಬೊ, ಶ್ರೀ ದಯಾನಂದ ಮಡ್ಕೇಕರ್, ಶ್ರೀ ಜೇಮ್ಸ್ ಲೋಪಿಸ್ ತಶೀಚಿ ಮಾಮ್ದು ಇಬ್ರಾಹಿಂ ಹಾನ್ನಿ ಕಾರ್ಯಕ್ರಮಾಂತು ಹಾಜೀರ ಆಶ್ಶಿಲೆ.