ಹುಬ್ಳಿ ಶ್ರೀ ವೆಂಕಟ್ರಮಣ ದೇವಳಾಂತು ವೈಕುಂಠ ಏಕಾದಶಿ

Vedio Link : https://youtu.be/iUGoPA--QvA?si=SwIxvG4sT1MDIUZj

ವೈಕುಂಠ ಏಕಾದಶಿ ದಿವಸು ವೆಗವೆಗಳೆ ದೇವಳಾಂತು ನಾನಾ ನಮೂನ್ಯಾನಿ ವೈಭವಾರಿ ಉತ್ಸವು ಆಚರಣ ಕರತಾತಿ. ವೈಕುಂಠ ಏಕಾದಶಿ ದಿವಸು ಉತ್ತರಾಚೆ ವೈಕುಂಠ ದ್ವಾರಾ ಮುಖಾಂತರ ಶ್ರೀ ಮಹಾವಿಷ್ಣುಲೆ ದರ್ಶನ ಕೆಲಯಾರಿ ಶ್ರೇಷ್ಠ ಮ್ಹಣಚೆ ಕಾರಣಾಕ ತ್ಯಾ ದಿವಸು ವಿಶೇಷ ದಿವಸು ಮ್ಹಣೋನು ಘೆತ್ತಾ. ತಿರುಪತಿಚೆ ಶ್ರೀ ವೆಂಕಟರಮಣಾಲೆ ದರ್ಶನ ಹೇ ದಿವಸು ಕೊರನು ಪುನೀತ ಜಾವ್ಕಾ ಮ್ಹೊಣು ಕೋಟಿಗಟ್ಲೆ ಭಕ್ತ ಅಪೇಕ್ಷ ಪಾವತಾತಿ. ಜಾಲಯಾರಿ ಸಕಡಾಂಕ ಕಲಿಯುಗಾಚೆ ಕಲ್ಪವೃಕ್ಷ ತಿರುಪತಿ ವೆಂಕಟರಮಣಾಲೆ ದರ್ಶನ ಕೊರಚಾಕ ಜಾಯ್ನಾ. ತಿರುಪತಿ ವರೀಚಿ ಹುಬ್ಬಳ್ಳಿ ನೃಪತುಂಗಾ ಗುಡ್ಡೇರಿ ವಿರಾಜಮಾನ ಹುಬ್ಬಳ್ಳಿಚೆ ಶ್ರೀ ಕಾಶೀಮಠ ವೆಂಕಟರಮಣ ಸ್ವಾಮಿ. ತಾಗೆಲೆ ದೇವಳಾಂತು ವೈಕುಂಠ ಏಕಾದಶಿ ದಿವಸು ಆಸ್ತಿಕ ಭಕ್ತಾಂಕ ವಿಶೇಷ ತಶೀಚಿ ಅರ್ಥಪೂರ್ಣ ಜಾವ್ನು ಭಗವಾನ ಶ್ರೀ ವೆಂಕಟರಮಣ ದೇವಾಲೆ ದರ್ಶನಾಚೆ ವ್ಯವಸ್ಥಾ ಕೊರನು ಘೇವ್ನು ಆಯ್ಲಿಂತಿ. ಅವುಂದು ಡಿಸೆಂಬರ್ ೩೦ ಕ ವೈಕುಂಠ ಏಕಾದಶಿ ದಿವಸು ಹುಬ್ಬಳ್ಳಿ ಶ್ರೀ ವೆಂಕಟರಮಣ ದೇವಳಾಚೆ ಪರಿಸರ ಶೃಂಗಾರ ಪಾವ್ನು, ದೈವಿಕ ತೇಜಾನಿ ಝಗಝಗ್ತಾಲೆ. ಪರಿಸರ ಸ್ನೇಹಿ ಜಾವನು ದೇವಳಾಕ ಫೂಲ, ವಿದ್ಯುತ್ ದೀಪಾನಿ ಅಲಂಕಾರ ಕೆಲೀಲೆ. ದೇವು ಲಕ್ಷ್ಮೀ ವೆಂಕಟೇಶ್ವರಾಕ ವರೇನ ತಶೀಚಿ ಶೃಂಗಾರ, ಧಾರ್ಮಿಕ ವಿಧಿ-ವಿಧಾನ ಚಲತಾಲೆ.

ತ್ಯಾ ದಿವಸು ಸಕ್ಕಾಣಿ ೭-೦೦ ಘಂಟ್ಯಾಕಚಿ ವಿಶೇಷ ಶ್ರೀ ದೇವಾಲೆ ದರ್ಶನ ಆರಂಭ ಜಾಲ್ಲೆ. ರಾತ್ತಿಕ ವರೇನ ದೇವ ದರ್ಶನ ಅವ್ಯಾಹಿತ ಜಾವ್ನು ಚಲ್ಲೆ. ಹಜಾರ ಬಽರಿ ಲೋಕ ತ್ಯಾ ದಿವಸು ವೈಕುಂಠ ದ್ವಾರಾಂತು ಶ್ರೀ ವೆಂಕಟರಮಣ ದೇವಾಲೆ ದರ್ಶನ ಘೇವ್ನು ಪುನೀತ ಜಾಲ್ಲೆ. ವಿಶೇಷ ಪೂಜಾ ವರೇನ ಚಲ್ಲೆ. ದೇವಳಾಚೆ ವಠಾರ ಪರಿಸರ ಸ್ನೇಹಿ ಜಾವ್ನು ಶೃಂಗಾರ ಕೆಲೀಲೆ. ದೇವಾಲೆ ದರ್ಶನಾಕ ಆಯ್ಯಿಲ್ಯಾಂಕ ತಿರುಪತಿ ಮ್ಹಣ್ಕೆ ಪ್ರಸಾದ ರೂಪಾನಿ ಉಂಡೊ(ಲಡ್ಡು) ವರೇನ ವಾಂಟಿಲೆ. ವ್ಯವಸ್ಥಾಪಕ ಸಮಿತಿಚೆ ಅಧ್ಯಕ್ಷ ಶ್ರೀ ದಿನೇಶ ಪೈ ಮಾಮ್ಮಾಲೆ ಮುಖಾಲಪಣಾರಿ ಸರ್ವ ಕಾರ್ಯ ಚಂದಾಯಾರಿ ಚೋಲ್ನು ಸರ್ವಾನಿ ತಾರೀಪು ಕೆಲ್ಲೆ.