ಪರ್ದೇಶಿ ಸಂಸ್ಕೃತಿಚೆ ವ್ಯಾಮೋಹಾನಿ ಆಯಚೆ ತರ್ನಾಟೆ ಆಮ್ಗೆಲೆ ಸನಾತನದ ಧರ್ಮ, ಸಂಸ್ಕಾರ, ಸಂಸ್ಕೃತಿ ವಿಸರತಾ ಆಸ್ಸಾತಿ. ಅಶ್ಶೀ ಜಾಲಯಾರಿ ಹಳೂ ಹಳೂ ತ್ಯಾ ದೋಳ್ಯಾಕ ದೀಸ್ನಾಶಿ ವತ್ತಾ. ತಾಜೇನ ಶಾಂತಿ, ಸಮಾಧಾನ, ಆರೋಗ್ಯ ಸಕ್ಕಡ ಪಾಡ ಜಾತ್ತಾ. ತ್ಯಾ ಖಾತೇರಿ ಹರ್ಯೇಕ್ಲ್ಯಾನಿ ಜಾಗೃತ ಜಾವ್ಕಾ, ಆಮಗೇಲೆ ಧರ್ಮಾಕ ಸಂರಕ್ಷಣ ಕೊರಕಾ. ಅಶ್ಶಿ ಮ್ಹೊಣು ದೈವಜ್ಞ ಬ್ರಾಹ್ಮಣ ಸಮಾಜಾಚೆ ಮಠಾಧೀಶ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತಿ ಮಹಾಸ್ವಾಮ್ಯಾನಿಂ ಗಂಗಾವತಿಂತು ಆಪೋವ್ಣಿ ದಿಲ್ಲಿ.
ತಾನ್ನಿ ಶಹರಾಚೆ ಶ್ರೀರಾಮಲಿಂಗೇಶ್ವರ ಬಡಾವಣೆಂತು ಶ್ರೀ ಜ್ಞಾನ ಗಣಪತಿ ದೇವಳಾಂತು ಪಯ್ರಿ ಆಯ್ತವಾರು ದಿನಾಂಕ. ೧೪-೧೨-೨೦೨೫ ದಿವಸು ಆಯೋಜನ ಕೆಲೀಲೆ ದೈವಜ್ಞ ದರ್ಶನ ಕಾರ್ಯಕ್ರಮಾಂತು ಆಶೀರ್ವಚನ ದಿತ್ತಾ ಉಲೋನು ಸಮಾಜಾ ಖಾತ್ತಿರಿ ವೇಳ್ಯಾಚೆ ದಾನ ದಿವ್ಚೆ ಅಭ್ಯಾಸು ವಾಡ್ಡೊನು ಘೆವ್ಕಾ. ಗಂಗಾವತಿ ಶಹರಾಂತು ದೈವಜ್ಞ ಸಮಾಜಾ ತಾಕೂನು ಜ್ಞಾನ ಗಣಪತಿ ದೇವಳ, ಕಲ್ಯಾಣ ಮಂಟಪ, ಭೋ ಜನಶಾಲಾ ಕೊರನು ಸಮಾಜಾಚೆ ಉದರ್ಗತಿಕ ಸಕಡಾನಿ ವಾವರೋ ಘಾಲ್ಲ್ಯಾ. ತುಮ್ಗೆಲೆ ಚರಡುವಾಂಕ ಚಾಂಗ ಸಂಸ್ಕಾರ ದಿವ್ಚೆ ಮೂಖಾಂತರ ಸನಾತನ ಧರ್ಮ ವ್ಹರಯಚೆ ಕಾರ್ಯ ಕರಾ. ಚರಡುಂವಾಂಗೆಲೆ ವ್ಹರಡಿಕ (ಲಗ್ನ) ಕೊರಚಾಕ ವಿಳಂಬ ಕೊರಚಾಕ ವಚ್ಚುನಾಕ್ಕಾತಿ, ಕುಟುಂಬ ಪರಿವಾರ ವಾಡ್ಡೊನು ಸಮಾಜ ಬಾಂಚೆ ಕಾಮ ಕೊರಚಾಕ ಮುಖಾರ ಸರಕಾ ಮ್ಹೊಣು ಸಲ್ಲೋ ದಿಲ್ಲೆ. ದೈವಜ್ಞ ದರ್ಶನ ಮೂಖಾಂತರನೂತನ ಪೀಠಾಧಿಕಾರಿ ಜಾವ್ನು ಶ್ರೀ ಸುಜ್ಞಾನೇಶ್ವರ ಭಾರತೀ ಸ್ವಾಮ್ಯಾಂಕ ನೇಮಣೂಕಿ ಕೆಲ್ಲ್ಯಾ ಮ್ಹಳ್ಳೆ.
ಸಾನಿಧ್ಯ ಘೆತ್ತಿಲೆ ಶ್ರೀ ಸುಜ್ಞಾನೇಶ್ವರ ಭಾರತೀ ಸ್ವಾಮ್ಯಾನಿ ಉಲೋನು ಮ್ಹಾಲ್ಗಡೆ ಸ್ವಾಮ್ಯಾಂಗೆಲೆ ಮಾರ್ಗದರ್ಶನ, ಸಮಾಜಾಚೆ ಸಹಕಾರಾನಿ ಸಕ್ಕಡ ಮೇಳ್ನು ಪರಮಾತ್ಮಾಲೊ ಸೇವಾ ಕೊರಚಾಕ ಮುಖಾರ ಸರಾ. ಮ್ಹಳ್ಳೆ.
“ಪೂಜ್ಯ ಸ್ವಾಮ್ಯಾಂಗೆಲೆ ಸಮಾಜಾ ಖಾತಿಹಾಂಗಾಸ್ಸುಚೆ ಆವಯಿ-ಬಾಪಯ್ನಿ ತಾಂಗೆಲೆ ಚರಡುಂವಾ ಖಾತ್ತಿರಿ ಅವಶ್ಯ ಕಾಳಜಿ ಘೇನಾತ್ಲ್ಯಾರಿ ಮುಕಾರಿ ತಾಜ್ಜೆ ಪರಿಣಾಮ ಮಸ್ತ ವಾಯ್ಟ ಜಾತ್ತಾ. ಸಮಾಜ ಬರೆಂ ಜಾವ್ನು ಉರಲ್ಯಾರಿ ಆಮ್ಗೆಲೆ ಘರ, ಕುಟುಂಬ ಬರೆಂ ಉರ್ತಾ, ಆಮ್ಮಿ ಬರೆಂ ಉರಲ್ಯಾರಿ ಸಮಾಜ ಬರೆಂ ಉರ್ತಾ. ಕಿತಯಾಕ ಮ್ಹಳಯಾರಿ ಸಮಾಜಾಚೆ ದುಸರೇ ಚರಡುಂವ ಖೇಳಚಾಕ ವತ್ತಾತಿ. ದುಸ್ರೆ ಚರಡುಂವ ವಾಯ್ಟ ಆಸಲೇರಿ ಆಮ್ಗೆಲೆ ಚರಡುಂವ ವಾಯ್ರ ಜಾವನು ವತ್ತಾತಿ. ಹೇ ವಿಷಯು ಪೋಷಕಾನಿ ಕಳೀತಾಕ ಹಾಡ್ನು ಘೆವ್ಕಾ ಅಶ್ಶಿ ಮ್ಹೊಣು ಗಂಗಾವತಿಚೆ ಸ್ವರ್ಣೋದ್ಯಮಿ ಆನಿ ನಾಮಾಧಿಕ ಸಾಮಾಜಿಕ ಕಾರ್ಯಕರ್ತು ಶ್ರೀ ಸುಬ್ರಹ್ಮಣ್ಯ ರಾಯ್ಕರ ತಾನ್ನಿ ಸಾಂಗ್ಲೆ. ಸಮಾಜಾಚೆ ಮ್ಹಾಲ್ಗಡೆ ಶ್ರೀ ರಂಗನಾಥ ವೇರ್ಣೇಕರ ತಾನ್ನಿ ಪ್ರಾಸ್ತವಿಕ ಉತ್ರ ಉಲಯಿಲೆ.
ಮಾಜಿ ಶಾಸಕ ಪರಣ್ಣ ಮುನವಳ್ಳಿ, ಮುಖೇಲ ಜಾಲೀಲೆ ತಿಪ್ಪೆರುದ್ರಸ್ವಾಮಿ, ನಾರಾಯಣರಾವ ವೈದ್ಯ, ಸರಾಫ್ ವೇಪಾರಿ ಸಂಘಾಚೆ ಅಧ್ಯಕ್ಷ ನಾಗೇಶ ಪತ್ತಾರ, ಸುಬ್ರಮಣ್ಯ ರಾಯಕರ, ಶ್ರೀಪಾದ ಭಟ್ಟ, ಪಾಡುರಂಗ ರೆವಣಕರ, ಪದ್ಮನಾಭ ವೇರ್ಣೇಕರ, ಮಂಜುನಾಥ ವರ್ಣೆಕರ, ಬಾಲಾಜಿ ಪಾಲನಕರ, ಸುಜಾತಾ ಕುರ್ಡೇಕರ, ಸುಧೀರ ದಿವಾಕರ, ಹರಿಶ ರಾಯಕರ, ಗಣೇಶ ರೇವಣಕರ ಸಹಿತ ಅಪಾರ ಅಂಕಡ್ಯಾಚೆ ದೈವಜ್ಞ ಸಮಾಜ ಬಾಂದವ ಹೇ ವೇಳ್ಯಾರಿ ಉಪಸ್ಥಿತ ವ್ಹರಲೀಲೆ.