ಶಿವಮೊಗ್ಗಾಚೆ ಸಾರಸ್ವತ ಸೌಹಾರ್ದ ಪತ್ತಿನ ಸಹಕಾರಿ ಸಂಘ ನಿಯಮಿತ ಹಾನ್ನಿ ಕಿಣಿ ಲೇ-ಔಟಾಂತು ಏಕ ಕೋಟಿ ರೂಪಯಾ ಪಶಿ ಚ್ಹಡ ದುಡ್ಡು ಖರ್ಚುನು ನಿರ್ಮಾಣ ಕೆಲೀಲೆ ನೂತನ ಕಟ್ಟಡ ಸಾರಸ್ವತ ಸೌಧ ಹಾಜ್ಜೆ ಉದ್ಘಾಟನಾ ಸಮಾರಂಭ ಆರತಾಂ ಶ್ರೀ ಪರ್ತಗಾಳಿ ಜೀವೋತ್ತಮ ಮಠಾಧೀಶ ಜಾಲೀಲೆ ಪರಮಪೂಜ್ಯ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಸಂಪನ್ನ ಜಾಲ್ಲೆ.ಸಾರಸ್ವತ ಮ್ಹಣ್ಚೆ ಶಬ್ದಾಕ ಖಂಚೇಯಿ ಕಳಂಕ ಯಾನಾ ತಶ್ಶಿ ಸರ್ವ ಡೈರೆಕ್ಟರಾನಿ ಜಾಗೃತೇರಿ ಏಕ ಮನಾನಿ ಜೋಡ್ನು ಸಾರವಂತ ಜಾಲೀಲೆ ಸಾರಸ್ವತ ಶಬ್ದಾಕ ಮಹತ್ವ ದಿವ್ಕಾ ಮ್ಹೊಣು ಪೂಜ್ಯ ಸ್ವಾಮ್ಯಾನಿ ಹೇ ಸಂದರ್ಭಾರಿ ಆಪೋವ್ಣಿ ದಿಲ್ಲಿ. ಸಮಾರಂಭಾಚೆ ಅಧ್ಯಕ್ಷತಾ ಬ್ಯಾಂಕಾಚೆ ಅಧ್ಯಕ್ಷ ಶ್ರೀ ಎಂ. ಆರ್. ಗೋಪಾಲಕೃಷ್ಣ ಪಂಡಿತ ತಾನ್ನಿ ಘೆತ್ತಿಲೆ.
ಸಮಾರಂಭಾಕ ವಿಶೇಷ ಆಹ್ವಾನಿತ ಜಾವನು ಶಿವಮೊಗ್ಗ ಜಿ.ಎಸ್.ಬಿ. ಸಮಾಜಾಚೆ ಅಧ್ಯಕ್ಷ ಶ್ರೀ ಭಾಸ್ಕರ ಜಿ. ಕಾಮತ್ ಆಯ್ಯಿಲೆ. ಹೇಂಚಿ ವೇಳ್ಯಾರಿ ಶ್ರೀ ಸಹಕಾರಿಚೆ ಸಂಸ್ಥಾಪಕ ಅಧ್ಯಕ್ಷ ಶ್ರೀ ದೇವಸಾಸ ಎನ್. ನಾಯಕ್ ನಿವೇಶನ ಕ್ರಯಾಕ ದಿಲೀಲೆ ತಶೀಚಿ ಸಹಕಾರಿಚೆ ಸಂಸ್ಥಾಪಕ ನಿರ್ದೇಶಕ ಶ್ರೀ ನರಸಿಂಹ ಕಿಣಿ ಆನಿ ಕಟ್ಟಡ ನಿರ್ಮಾಣಾಚೆ ಇಂಜಿನಿಯರ್ ಶ್ರೀ ಎಂ.ಆರ್. ಅರ್ಜುನ್ ಪೈ ತಾಂಕಾ ಪೂಜ್ಯ ಸ್ವಾಮ್ಯಾಂಗೆಲೆ ಹಾತ್ತಾನಿ ಸನ್ಮಾನ ಚಲ್ಲೆ. ಉದ್ಘಾಟನಾ ಅಪಾರ ಅಂಕಡ್ಯಾರಿ ಸಮಾಜ ಬಾಂದವ ಆನಿ ಸಹಕಾರಿಚೆ ಗ್ರಾಹಕ ಉಪಸ್ಥಿತ ಆಶ್ಶಿಲೆ. ಅಖೇರಿಕ ಪೂಜ್ಯ ಸ್ವಾಮ್ಯಾಂಗೆಲೆ ದಿವ್ಯ ಕರಕಮಲಾನಿ ಸಕ್ಕಡ ಫಲಮಂತ್ರಾಕ್ಷತ ಸ್ವೀಕಾರ ಕೆಲ್ಲೆ.