ಮನುಷ್ಯ ಜೀವಿ ಹೇ ಭೂಂಯ್ಚೆ ವಯ್ರಿ ಎತ್ತನಾ ಏಕಳೋಚಿ ಎತ್ತಾ. ಆವಯಿಲೆ ಗರ್ಭಾಂತು ನವ್ವ ಮ್ಹಹಿನೋ ವಾಡ್ಡೂನು ಭೂಂಯ್ಚೆ ವಯ್ರಿ ಜನ್ಮುಚೆ ಭಿತ್ತರಿ ತಾಕ್ಕಾ ಆನು, ಬಾಂವು, ಬೈಣಿ, ಮಾಂತು, ಮಾಂವ, ಬಾಪ್ಪಾ, ಮೌಶಿ, ಆಜ್ಜೊ, ಹೊಳೆಮಾ ಅಶ್ಶಿ ಸಬಾರ ಸಂಬಂಧಿಕ ಸೃಷ್ಟಿ ಜಾತ್ತಾತಿ. ತಾನ್ನಿ ತಾಗೆಲೆ ರಕ್ತ ಸಂಬಂಧಿ ಮ್ಹಣೋಸೂನು ಘೆತ್ತಾತಿ. ಪಯ್ಲೆ ಕಾಲಾಂತು ಹಾನ್ನಿ ಸಕ್ಕಡ ಒಟ್ಟೂ, ಏಕ್ಕಾ ಘರ್‍ಕಡೆ ಏಕಳ್ಯಾಂಕ ಏಕಲೆ ಅನುಸರ್‍ಸುನು ಆಸ್ತಾ ಆಶ್ಶಿಲೆ. ತಾಕ್ಕಾ ಅವಿಭಕ್ತ ಕುಟುಂಬ ಮ್ಹಣತಾಲೆ. ಗಟ್ಟಿ ಜಾವನು ಬಾಂದೂನು ದವರೀಲೆ ರಾಕಡಾ ಬೋರೆ ವರಿ, ಕೋಣಾಕ ತರಿ ತಾಂಗೆಲೆ ವಿರುದ್ಧ ವಚ್ಚೆಕ ಭಽಯಿ ದಿಸ್ತಾಶ್ಶಿಲೆ. ಜಾಲಯಾರಿ ಕಾಲಕ್ರಮೇಣ ಅವಿಭಕ್ತ ಕುಟುಂಬ ವಿಭಕ್ತ ಜಾಲ್ಲೆ, ಆತ್ತಂತು ಮೈಕೋ ಕುಟುಂಬ ಜಾಲ್ಲ್ಯಾ. ನಾಂಗ್ಟಾನ ವಚ್ಚೆ ಕಿತ್ಲಕಿ ಸಮಸ್ಯಾ ವ್ಹಡ ಕೊರನು ಪರಸ್ಪರ ದ್ವೇಶ, ಜಾಳಾನಿ ಕುಟಂಬ ಕುಡ್ಕೊ ಕುಡ್ಕೊ ಜಾವ್ನು ಘೆಲ್ಲಿಂತಿ, ಕೋಣೆ ಜಾಲಯಾರೀಚಿ ಸುಲಭಾರಿ ತಾಂಚೇರಿ ದೌರ್ಜನ್ಯ ಕೊರಯೇತ ಜಾಲ್ಲ್ಯಾ. ಆಮ್ಗೆಲೆ ಹಿಂದೂ ಧರ್ಮಾಚೆ ಅವಿಭಕ್ತ ಕುಟುಂಬಾಚೆ ಪರಂಪರಾ ಹಾಜ್ಜೇನ ಮೋಡ್ನು ಪೋಡ್ನು ಮಸ್ತ ಕುಟುಂಬ ಮಾನಸಿಕ, ದೈಹಿಕ ಮಾತ್ರ ನ್ಹಂಹಿ ಹತಾಶ ಪರಿಸ್ಥಿತಿಕ ಶಿರಕೂನು ವಳವಳ್ಚೆ ಆಮ್ಮಿ ಸಕ್ಕಡೆ ಪಳಯತಾ ಆಸ್ಸಾತಿ.
ಅಸ್ಸಾಲೆ ಕಾಳ್ಕಾಚೆ, ಆತಂಕಾಚೆ ಛಾಯಾ ಸಕ್ಕಡೆ ಪಸರತಾ ಆಸತಾನಾ ಕುಂದಾಪುರ ತಾ|| ಸುಣ್ಣಾರಿ ಮ್ಹಣ್ಚೆ ಲ್ಯಾನ ಗಾಂವಾಂತು ಸಕಡ್ಯಾಂಕ ಮಾದರಿ ಜಾವ್ಚೆ ತಸ್ಸಾಲೆ ಏಕ ಅಪರೂಪಾಚೆ ಕಾರ್ಯಕ್ರಮ ಚಲ್ಯಾ ಮ್ಹಣಚೆ ಖರೇಚಿ ಸ್ವಾಗತ ಕೊರನು ಅಭಿನಂದನ ಕೊರಕಾ ಜಾಲೀಲೆ ಕಾರ್‍ಯ ಮ್ಹಳಯಾರಿ ಚ್ಹೂಖ ಜಾಯಸನಾ. ಬಾಪಯಿಲೆ ನವ್ವಾ ಚರಡುವಾಂತು ವಾಂಚೂನು ವ್ಹರಲೀಲೆ ದೊಗ್ಗ ವಯೋವೃದ್ಧ ಬೈಣಿಲೆ ಮಾಂತಾರಪಣಾಚೆ ಆಶೆ ಪ್ರಮಾಣೆ ಏಕ್ಕಡೆ ಸಗಳೇ ಕುಟುಂಬಾಕ ಮೆಳೋನು, ಸರ್ವಾನಿ ಥೊಡೆ ಕಾಳ ಪೂಣಿ ಮೇಳ್ನು ಖುಷೆನಿ ಕಾಡ್ಕಾ ಮ್ಹಣ್ಚೆ ಕಲ್ಪನ ದವರೂನು ಘೇವ್ನು ಮೇ ೧೭ ತಾರೀಖೆಕ ಚಲೀಲೆ ಕಾರ್ಯಕ್ರಮ ಯಶಸ್ವಿ ಜಾಲ್ಲ್ಯಾ. ಏಕ್ಕಾ ಘರಾಂತು ಪಾಂಚ ಪೀಳ್ಗಿಚೆ ದೊನಶೆ ಪಶಿ ಚ್ಹಡ ಲೋಕಾಂಕ ಸೇರ್‍ಸಿಲೆ, ಸೇರ್‍ಸುನು ಏಕಳ್ಯಾಂಕ ಏಕಳ್ಯಾನಿ ಗುರ್‍ತು ಕೊರನು ಘೆವಚೆ ತಶ್ಶಿ ಕೆಲೀಲೆ ಹೇ ವಿಚಾರು ಶ್ಲಾಘನೀಯ ವರೇನ ವ್ಹಯಿ.
ಶಂಬರ ಬಽರಿ ವರ್ಷಾ ಮಾಕಶಿ ಖೇತಿ, ಸಾನ ವೇಪಾರ ಕೊರನು ಘೇವನು ಆಯಲೀಲೆ ಮೊಗೆಬೆಟ್ಟು ಸುಬ್ಬಣ್ಣ ಶ್ಯಾನುಭಾಗ್ ತಾಂಕಾ ೯ ಲೋಕ ಚರಡುಂವ. ತಾಂತು ವಯೋಸಹಜ ಜಾವನು ಸಾತ ಲೋಕ ಮರಣ ಪಾವ್ಲಿಂತಿ. ಸುಬ್ಬಣ್ಣ ಶ್ಯಾನುಭಾಗ್ ಹಾಂಗೆಲೆ ಚೆಲ್ಲಿಯಾ ಚರಡುಂವ (ಧೂಂವ್ವ) ಜಾಲೀಲೆ ೯೬ ವರ್ಷಾಚೆ ನನ್ಯಕ್ಕ (ಶಾಂತಾದೇವಿ) ತಶೀಚಿ ೯೪ ವರ್ಷಾಚೆ ಗುಲಾಬಿ ಆಪಣೇಲೆ ಕುಟುಂಬ ಬರಶಿ ವಾಂಚಲಿಂತಿ. ತಾಂಕಾ ಆಪಣೇಲೆ ಕುಟುಂಬಾಚೆ ಸಕ್ಕಡಾಂಕ ಏಕ್ಕಡೆ ಪಳಯಕ ಮ್ಹಣಚೆ ಆಶಾ. ಶಂಬರ ಬಽರಿ ಲೋಕಾನಿ ಏಕ್ಕಡೆ ಮೇಳ್ನು ಪರಸ್ಪರ ಗುರ್‍ತು ಕೊರನು ಘೆವ್ಚೆ, ಪಟ್ಟಾಂಗ ಮಾರ್‍ತೆ, ಕುಶಾಲ ಕೊರಚೆ, ತಾಂಗೆಲೆ ಜೀವನಾಚೆ ಪೊರನೆ ಘಟನಾ ಯಾದ ಕೊರನು, ತರ್ನಾಟೆಂಕ ಸಾಂಗಚೆ, ಗರಜ ಆಶ್ಶಿಲ್ಯಾಂಕ ಮದತ್ ದಿವಚೆ ಹಾಜ್ಜೆನ ಮೆಳಚೆ ಜ್ಞಾನ, ಅನುಭವ, ಸಂತೃಪ್ತಿ, ಆನಂದ ರೀಲ್ಸ್ ಪಳಯತಾನಾ ಮೇಳ್ನಾ, ಫಾರಿನ್ ಟೂರ್ ಕೆಲಯಾರಿ ಮೇಳ್ನಾ.
ಸಕಡಾಂಕ ಮೆಳ್ಕಾ, ತಾಂಗೆಲೊಟ್ಟು ಮಿಳಿತ ಜಾವ್ಕಾ ಮ್ಹಣಚೆ ಕುಟುಂಬಾಚೆ ಮ್ಹಾಲಗಡೆ ದೊಗ್ಗಾಲೆ ಇಚ್ಛೇನಿ ಫುಟ್ಟಿಲೆ ಕಲ್ಪನೆಕ ಕುಟುಂಬಾಚೆ ಸಕ್ಕಡ ಲೋಕಾನಿ ಸಾಥ ದಿಲ್ಲಿ. ಸುಣ್ಣಾರಿ ಮ್ಹಣ್ಚೆ ಸಾನ ಗಾಂವಾಂತು ಬಾಂದಿಲೆ ನವೀನ ಘರ್‍ಚೆ ಘರಾ ವಕ್ಕಲ ಜಾವ್ನು ೩ ವರ್ಷ ಮಾತ್ರ ಜಾಲೀಲೆ. ಪಯ್ಲೆ ವರ್ಷ ಗೃಹಪ್ರವೇಶ, ಪೊರು ಯಕ್ಷಗಾನ ಬಯಲಾಟ ಚಲೀಲೆ. ತೀಸರೆ ವರ್ಷಾಚೆ ಕಾರ್ಯಕ್ರಮ ವರೇನ ವೈಶಿಷ್ಠ್ಯ ಪೂರ್ಣ ಜಾವನು ಚಲಯಸಿಕಾ ಮ್ಹಣ್ಚೆ ವಿಚಾರು ದವರೂನು ಘೇವ್ನು ಘೆಲೀಲೆ ಚಾರ್‍ಪಾಂಚ ಮ್ಹಹಿನ್ಯಾ ತಾಕೂನು ಕಾರ್ಯಕ್ರಮಾಚೆ ರೂಪುರೇಷಾ ತಯಾರ ಕೊರನು ಮೊಗೆಬೆಟ್ಟು ಸುಬ್ಬಣ್ಣ ಶ್ಯಾನುಭಾಗ್ ತಾಂಗೆಲೆ ಪಾಂಚ ಪೀಳ್ಗಿಚೆ ೨೦೦ ಪಶಿ ಚ್ಹಡ ಲೋಕಾಂಕ ಏಕ್ಕಡೆ ಮೆಳಯಿಲೆ.
ಮೊಗೆಬೆಟ್ಟು ಸುಬ್ಬಣ್ಣ ಶ್ಯಾನುಭಾಗ್ ತಾಂಕಾ ದೊಗ್ಗ ಲೋಕ ಪೂತ (ಚಾಲ್ಲ್ಯಾ ಚರಡುಂವ). ವ್ಹರಲೀಲೆ ೭ ಲೋಕ ಧೂವ್ವ(ಚೆಲ್ಲಿಯಾ ಚರಡುಂವ) ಹೇ ಪಯ್ಲೇಚೆ ಪೀಳಿಗಾ. ದೊನ್ನೀಚೆ ಪೀಳ್ಗಿಂತು ೩೬ ಲೋಕ ಆಸ್ಸಾತಿ. ತೀಸರೆಚೆ ಪೀಳ್ಗಿಂತು ೧೨೫ ಲೋಕ ಆಸಲೇರಿ ಚೌತೆಚೆ ಪೀಳ್ಗಿಂತು ಆಸ್ಸುಚೆ ೧೦೬ ಲೋಕ. ಆನಿ ಪಾಂಚಾಚೆ ಪೀಳ್ಗಿಂತು ೨೦ ಲೋಕ ಆಸ್ಸಾತಿ. ಹಾನ್ನಿ ಸಕ್ಕಡ ಸುಣ್ಣಾರಿ ಜಾಂವೊ ಕುಂದಾಪುರ ತಾಲೊಕಾಂತು ಮಾತ್ರ ನಾಂತಿ. ನೌಕರಿ, ವೃತ್ತಿ, ವೇಪಾರಾ ಖಾತೇರಿ ದೇಶಾಚೆ ವೆಗವೆಗಳೆ ಜಾಗೆಂತು, ಆನಿ ವಿದೇಶಾಂತು ವರೇನ ವಚ್ಚುನು ರಾಬಲಿಂತಿ. ಕುಟುಂಬಾಚೆ ಸಮ್ಮಿಲನ ಖಾತೇರಿ ಹಾಂಕ ಸಕಡಾಂಕ ಸೊದ್ದುನು, ಸಂಪರ್ಕ ಕೊರನು ಪಯಲೇಚೆ ಹಂತಾರಿ ಭೆಟ್ಟುಚಾಕ ಮೆಳೀಲ್ಯಾಲೆ ಕುಟುಂಬಿಕಾಲೆ ಸೋಶಿಯಲ್ ಮಿಡಿಯಾ ಗ್ರೂಫ್ ರಚನ ಕೊರನು ಕಾರ್ಯಕ್ರಮಾಚೆ ಸರ್ವ ಮಾಹಿತಿ ವಾಂಟೂನು ಘೆತ್ಲೆ. ಆನಿ ಸಕಡಾಂಕ ಹೇ ಸಮ್ಮೀಲನಾಕ ಯವಚಾಕ ವಿನಂತಿ ಕೆಲ್ಲಿ. ತಾಜ್ಜೆ ನಿಮಿತ್ತ್ಯಾನಿ ಮೊಗೆಬೆಟ್ಟು ಸುಬ್ಬಣ್ಣ ಶ್ಯಾನುಭಾಗ್ ವಂಶವೃಕ್ಷಾಂತುಲೆ ಇರತ್ತುರು ಶತಬೆಟ್ಟು, ಕಂಡ್ಲೂರು, ಮೊಗೆಬೆಟ್ಟು, ಕಲ್ಮರ್ಗಿ, ಶಿರಿಯಾರ, ಕೋಟ, ಧಾರವಾಡ, ಸುಣ್ಣಾರಿ, ಮೊಗೆಬೆಟ್ಟು-ಸುಣ್ಣಾರಿ ಅಶ್ಶಿ ನವ್ವಾ ಕುಟುಂಬಾಚೆ ಧಾರ್‍ಲೆ, ಬಾಯ್ಲ, ಚರಡುಂವ ಮೇಳ್ನು ೨೦೦ ಪಶಿ ಚ್ಹಡ ಸದಸ್ಯಾನಿ ಪುನರ್ಮಿಲನ ಕಾರ್ಯಕ್ರಮಾಂತು ವಾಂಟೊ ಘೆತ್ಲೆ.
ಮೇ ೧೭ ದಿವಸು ಸಾಂಜವಾಳಾ ಮೊಗೆಬೆಟ್ಟು ಕುಟುಂಬಾಚೆ ಪುನರ್ಮಿಲನ! ಸುಣ್ಣಾರಿಚೆ ಮ್ಹಾಲ್ಗಡ್ಯಾಲೆ ಘರ್‍ಕಡೆ ಮೊಗೆಬೆಟ್ಟು ಸುಬ್ಬಣ್ಣ ಶ್ಯಾನುಬಾಗ್ ಟ್ರಸ್ಟ್ ತರಪೇನಿ ವಿಜೃಂಭಣೆರಿ ಚಲ್ಲೆ. ಹೇ ವೈಭವಾಕ ಮ್ಹಳಯಾರಿ ಸಮಸ್ತ ವಂಶವೃಕ್ಷ ಏಕತ್ರ ಕೊರಚಾಕ ಕಾರಣ ಜಾಲೀಲೆ ವಯೋವೃದ್ಧ ಬೊಬ್ಬಯಿಣಿ ನನ್ನಕ್ಕ ಆನಿ ಗುಲಾಬಿ ಹಾಂಕಾ ವೇದಿಕೆರಿ ಬಸಕರೋನು ತಾಂಗೆಲೆ ಎದ್ರಾಕ ಮೊಗಬೆಟ್ಟು ಶ್ಯಾನುಬಾಗ್ ಕುಟುಂಬಾಚೆ ಪಾಂಚ ಪೀಳ್ಗಿಚೆ ಲೋಕಾನಿ ಸ್ವಪರಿಚಯ ಕೊರನು ಘೆತ್ಲೆ. ನಮ್ನಮೂನೇಚೆ ಖೇಳು, ಪದ, ನಾಚ, ನೃತ್ಯ, ಕುಶಾಲ ಬರಶಿ ತಾಂಗತಾಂಗೆಲೆ ಅಭಿಪ್ರಾಯ, ಅನುಭವ, ಪ್ರತಿಭಾ ವರೇನ ವಾಂಟೂನು ಘೆತ್ಲೆ. ಆನ್ನೇಕ ವಿಶೇಷ ಮ್ಹಳಯಾರಿ ಬರ್ಗರ್, ಚಾಟ್ಸ್ ಮ್ಹಣ್ಚೆ ಆಧುನಿಕ ಯುಗಾಂತು ಆಮ್ಚಗೇಲೆ(ಜಿ.ಎಸ್.ಬಿ.) ಖಾಣ-ಜವಣಾಚೆ ಸ್ವಾದ ಘೇವ್ನು, ನವೀನ ಪೀಳ್ಗಿಚಾಂಕ ತಾಜ್ಜೆ ರೂಚಿ ಕಳಯಿಲೆ. ಸಾನ್ಪಣಾಚೆ ಉಡಗೋಸು ಹಾಡಯಚೆ ಖಾತೇರಿ ಖೇಡೆ ಗಾಂವಾಂತು ಮೆಳ್ಚೆ ನಮ್ ನಮೂನೇಚೆ ಫಳ ವರೇನ ಸೊದ್ದುನು ಹಾಡ್ನು ತಾಜ್ಜೆ ಗುರ್‍ತು ಕೊರನು ದಿಲೀಲೆ ಆನ್ನೇಕ ವಿಶೇಷ. ಟ್ರಸ್ಟ್ ಮೂಖಾಂತರ ಕುಟುಂಬಾಚೆ ಶಿಕ್ಷಣ ತಶೀಚಿ ಆರೋಗ್ಯ ಸಂಬಂಧಿ ವಿಚಾರಾಂಕ ಸಹಕಾರ ಕೊರಚೆ ಚಿಂತನಾ ದವರೂನು ಘೆತ್ಲ್ಯಾ ಮ್ಹೊಣು ಕೋಳ್ನು ಆಯಲಾ. ಹೇ ವೈಶಿಷ್ಠ್ಯ ಪೂರ್ಣ ಕಾರ್ಯಕ್ರಮಾಕ ಪೂರ್ವಭಾವಿ ಜಾವ್ನು ಮೊಗಬೆಟ್ಟು ಶ್ಯಾನುಭಾಗ್ ಕುಟುಂಬಾಕ ಸಂಬಂಧ ಪಾವ್ವಿಲೆ ಮಾಕಶೀಚೆ ಸಂಗ್ರಹಿತ ಪೋಟೋ, ಪುನರ್ಮಿಲಾಚೆ ಆಹ್ವಾನಾಕ ವಿಡಿಯೋ ಕ್ಲಿಪ್ ತಯಾರ ಕೊರನು, ಯಶಸ್ವ್ವಿ ಜಾವನು ಜಾಲತಾಣಾಕ ವಾಪರೂನು ಘೆತ್ಲೆ. ಅಶ್ಶಿ ಏಕ ವೈಶಿಷ್ಠ್ಯಪೂರ್ಣ ಆನಿ ಅಪರೂಪಾಚೆ ಕಾರ್ಯಕ್ರಮ ಕುಟುಂಬ ಸದಸ್ಯಾಲೆ ಮನಾಂತು ಮಸ್ತ ಕಾಳ ಪಾಚವೆ ಜಾವನು ವ್ಹರಚೆ ವರಿ ಜಾಲೀಲೆ ಪಟ್ಟಿಕ ನ್ಹಂಹಿ.