ವೈಕುಂಠ ಏಕಾದಶಿ ಹರ್‍ಯೇಕ ವೈಷ್ಣವಾಂಕ ಪವಿತ್ರ ದಿವಸು ಜಾವ್ನಾಸ್ಸ. ಧನು ಮ್ಹಹಿನ್ಯಾಂತು ಯವಚೆ ಶುಕ್ಲ ಪಕ್ಷ ಏಕಾದಶಿ ದಿವಸು ಹಾಜ್ಜೆ ಆಚರಣ ಕರತಾತಿ. ಹೇ ದಿವಸು ಸ್ವರ್ಗಾಚೆ ಬಾಗಿಲ ಉಗಡ್ತಾ ಮ್ಹಣ್ಚೆ ನಂಬಿಗಾ ಆಸ್ಸಾ. ದಕ್ಷಿಣಾ ಭಾರತಾಂತು ಮಸ್ತ ಶೃದ್ಧಾ-ಭಕ್ತಿಂತು ಆಚರಣ ಕೊರಚೆ ಹೇ ವೈಕುಂಠ ಏಕಾದಶಿಕ ಕೇರಳಾಚೆ ಲೋಕ ‘ಸ್ವರ್ಗವತಿಲ್ ಏಕಾದಶಿ’ ಮ್ಹೊಣು ಆಚರಣ ಕರತಾತಿ.
ಸಗಳೆ ವರಸಾಚೆ ಸರ್ವ ಏಕಾದಶಿ ಪೈಕಿ ವೈಕುಂಠ ಏಕಾದಶಿ ಅತ್ಯಂತ ಶ್ರೇಷ್ಠ ಏಕಾದಶಿ ಮ್ಹಣೋನು ಘೆತ್ತಾ. ಹೇ ದಿವಸು ಉಪಾಸಿ ವ್ಹರ್ನು ಶ್ರೀಹರಿಲೆ ಸ್ಮರಣ, ಮಾಗಣಿ ಕೊರಚೆ ನಿಮಿತ್ತ್ಯಾನ ಆಮ್ಮಿ ಸೀದಾ ಸ್ವರ್ಗಾಕ ಪಾವತಾತಿ ಮ್ಹೊಣು ಹಿಂದೂಧರ್ಮ ಗ್ರಂಥಾಂತು ವರೇನ ಸಾಂಗ್ಲ್ಯಾ. ಸ್ಮರಣೆ ಖಾತ್ತಿರಿ ವಿಷ್ಣು ಅಷ್ಟೋತ್ತರ, ವಿಷ್ಣು ಸಹಸ್ರನಾಮಾಚೆ ಸ್ಮರಣ ಕೊರಯೇತ. ಕೆಲವ ಕಡೇನ ನೀದ ಕಾಣಾಶಿ ಜಾಗರಣ ವರೇನ ಕರತಾತಿ. ದಿವಸ ಬಽರಿ ಕರ್ಕಟ (ತಾಂದಲಾನ ಕೆಲೀಲೆ ಆಹಾರ), ಪಿಯಾವು, ಲೊಸಣಿ ಖಾಯನಾತಿ. ವೈಕುಂಠ ಏಕಾದಶಿ ದಿವಸು ಮರಣ ಪಾವಲೇರಿ ಮೋಕ್ಷ ಮೆಳ್ತಾ ಮ್ಹಣ್ಚೆ ನಂಬಿಗಾಯಿ ಆಸ್ಸಾ.
ವೈಕುಂಠ ಏಕಾದಶಿಕ ಪದ್ಮಪುರಾಣಾಂತು ಆಸ್ಸುಚೆ ದಂತಕಥೆ ಪ್ರಮಾಣೆ `ಮುರನ್ ಮ್ಹಣ್ಚೆ ಅಸುರು ಭೂಂಯ್ಚೆರಿ ಋಷಿ-ಮುನಿಂಕ ಅಪಾರ ದುಃಖ ದಿವನು ಮಾಗಿರಿ ಸ್ವರ್ಗಾಕ ಯವ್ನು ಥಂಯಿ ವರೇನ ದೇವತೆಂಕ ಅಪಾರ ಉಪದ್ರವ ದಿವಚಾಕ ಲಾಗ್ಲೊ ಕಂಯಿ. ತಾಗ್ಗೆಲೆ ಕ್ರೌರ್ಯ ಭೊಗಚಾಕ ಜಾಯನಾಶಿ ದೇವತೆ ಸಕ್ಕಡ ವಿಷ್ಣುಲೆ ವಚ್ಚುನು ತಾಗೆಲೆ ಉಪಟಳಾನಿ ರಾಕ ಮ್ಹೊಣು ಮಾಗ್ಲೆ. ತೆದ್ನಾ ವಿಷ್ಣು ತಾಣೆ ತಪಸ್ಸಾನಿ ಘೆತ್ತಿಲೆ ವರ ಪ್ರಕಾರ ನವೀನ ಆಯುಧ ಜಾಂವೊ ಸ್ತ್ರೀಶಕ್ತಿನ ಮಾತ್ರ ಹತ ಜಾತ್ತಾ. ಮ್ಹೊಣು ತಾಗೆಲೆ ನಾಶಾ ಖಾತ್ತಿರಿ ತುಮ್ಮಿ ಸಕಡ್ಯಾನಿ ಉಪಾಸಿ ವ್ಹರ್ನು ವ್ರತ ಕೊರಕಾ ತಾಜೇನ ಸೃಷ್ಟಿ ಜಾವಚೆ ಶಕ್ತೀನಿ ತಾಕ್ಕಾ ನಾಶ ಕೊರಚಾಕ ಜಾತ್ತಾ ಮಳ್ಳೆ.
ಕಶ್ಶಿತರಿ ಹೇ ರಾಕ್ಷಸಾಲೆ ಉಪಟಳಚಾನ ಪಾರಜಾವಕಾ ಮ್ಹೊಣು ಸಕ್ಕಡ ದೇವತಾ ಲೋಕ ಏಕ ದಿವಸು ಅನ್ನಾಹಾರ ತ್ಯಾಗ ಕೊರನು ಉಪಾಸಿ ವ್ಹರಲೆ. ತೆದ್ನಾ ಗುಹಾಂತು ಆರಾಮ ಘೆತ್ತಾ ಆಶ್ಶಿಲೊ ಮಹಾವಿಷ್ಣು ವಯ್ರಿ ಮುರಗನ್ ಆಕ್ರಮಣ ಕೊರಚಾಕ ಆಯಲೊ. ತೆದ್ನಾ ವಿಷ್ಣುಲೆ ತಾಕೂನು ಏಕ ಸ್ತ್ರೀಶಕ್ತಿ ಪ್ರಕಟ ಜಾತ್ತಾ. ತ್ಯಾ ಮುರಗನ್ನಾಕ ಜಳೋನು ಉಡ್ಡಯತಾ. ಮುರುಗನ್ ಹತ ಜಾಲ್ಲೊ. ತ್ಯಾ ಶಕ್ತಿಕ ವಿಷ್ಣು ಏಕಾದಶಿ ಮ್ಹೊಣು ನಾಂವ ದವರಲೊ. ಆನಿ ಕೋಣ ಏಕಾದಶಿ ವ್ರತಾಚರಣ ಕೊರನು, ಉಪಾಸಿ ವ್ಹರ್ನು ಆಪಣೇಲೆ ಸ್ಮರಣ ಕರತಾತಿಕಿ ತಾನ್ನಿ ಮೋಕ್ಷ ಪಾವತಾತಿ ಮ್ಹೊಣು ವರ ದಿಲ್ಲೊ.
ಹಾಜ್ಜೆ ಅರ್ಥು ಮ್ಹಳಯಾರಿ ಕಾಮ, ಕ್ರೋಧ, ಲೋಭ, ಮೋಹ, ಮದ, ಮತ್ಸರ ಮ್ಹಣಚೆ ಅರಿಷಡ್ ವರ್ಗಾಚೆ ಆಕರ್ಷಣೆಂತು ಶಿರಕೂನು ಮನುಷ್ಯು ಆರೋಗ್ಯ, ಆನಂದ, ಶಾಂತಿ, ಸಮಾಧಾನ ಸಕ್ಕಡ ನಾಶ ಕೊರನು ಘೆತ್ತಾ. ತಶ್ಶಿ ಆಪಣೇಲೆ ಭಕ್ತಾಂಗೆಲೆ ದೈಹಿಕ ಆನಿ ಮಾನಸಿಕ ಆರೋಗ್ಯ ಪಾಡ ಜಾವಚಾಕ ನಜ್ಜ ಮ್ಹಣ್ಚೆ ಉದ್ದೇಶಾನಿ ಏಕಾದಶಿ ವ್ರತಾಚರಣ ಪರಂಪರಾ ಆರಂಭ ಜಾಲ್ಲೆ.
ವೈಕುಂಠ ಏಕಾದಶಿ ಕಿತಯಾಕ ಮಹತ್ತ್ವಾಚೆ ಮ್ಹಳಯಾರಿ ಶ್ರೀ ಕೃಷ್ಣಾನಿ ಅರ್ಜುನಾಕ ಭಗವದ್ಗೀತಾ ಸಾಂಗಿಲೆ ದಿವಸು ಹೇಂಚಿ ಕಂಯಿ. ಕಶ್ಶಿ ಕುರುಕ್ಷೇತ್ರಾಂತು ಹುತಾತ್ಮ ಜಾಲೀಲೆ ಸಕಡಾಂಕ ಮೋಕ್ಷ ಪ್ರಾಪ್ತಿ ಜಾವೊ ಮ್ಹೊಣು ಶ್ರೀ ಕೃಷ್ಣಾನಿ ಆಶೀರ್ವಾದು ಕೆಲ್ಲಕಿ ತಶೀಚಿ ಹೇ ದಿವಸು ಶ್ರೀ ವಿಷ್ಣುಲೆ ಸ್ಮರಣ ಕೆಲೀಲೆ ಜ್ಞಾಪಕಾಂಕ ಸ್ವರ್ಗ ಪ್ರಾಪ್ತಿ, ಮೋಕ್ಷ ಪ್ರಾಪ್ತಿ ಮ್ಹಣತಾತಿ. ನೈಶಿ ಶಿಯ್ಯಾಕಾಲ, ತುಳಸಿ ಲಗ್ನ ಜಾಲ್ಲ ಮಾಗಿರಿ ಸಕ್ಕಡೆ ವ್ಹರಡಿಕ-ಮೂಂಜಿಚೆ ಗೌಜ ಚಲ್ತಾ ಆಸ್ತಾ. ಲೋಕ ಪಂಚಭಕ್ಷ ಖಾವ್ನು ಅನಾರೋಗ್ಯಾಕ ಶಿರಕೂಚೆ ಸಾಧ್ಯತಾಯಿ ಆಸತಾ. ತ್ಯಾ ಖಾತ್ತಿರಿ ಉಪಾಸ ಉರ್ನು, ದೇವಾಲೆ ಸ್ಮರಣ, ಜಪ, ತಪ ಕೊರಚೆ ಮಾತ್ರ ನ್ಹಂಹಿ ದೇವಳಾಕ ವಚ್ಚೆ ಮ್ಹಳಯಾರಿ ಶಾರೀರಿಕ ವ್ಯಾಯಾಮು ಕೊರಚೆ ನಿಮಿತ್ತ್ಯಾನ ಶರೀರ ಆನಿ ಮನ ದೊನ್ನೀ ಸದೃಢ ಜಾತ್ತಾ. ಹೇ ಆರೋಗ್ಯ ನಿಯಮು. ಏಕಾದಶಿಚೆ ಮೂಲ ಉದ್ದೇಶು ನಿರಂತರ ಆರೋಗ್ಯ ಸದೃಢ ಜಾವ್ನು ದವರೂನು ಘೆವ್ಚೆ ಮ್ಹಣ್ಚೆ ನಂಬಿಗಾ ಆಸ್ಸಾ. ಉಪಾಸು ಶಾರೀರಿಕ ತ್ಯಾಜ್ಯ ಭಾಯ್ರಿ ಘಾಲಚಾಕ ಅನ್ಕೂಲತಾ ಕೆಲಯಾರಿ ಧ್ಯಾನ, ಪ್ರಾರ್ಥನಾ, ದೇವಳಾಚೆ ದರ್ಶನ, ದೇವಪೂಜಾ ನಿಮಿತ್ತ್ಯಾನಿ ಮನಾಂತು ಸಾತ್ವಿಕತಾ ವಾಡ್ತಾ. ಮ್ಹಳಯಾರಿ ಮನಾಚೆ ಆರೋಗ್ಯ ಆನಿ ಶಾಂತಿ ವೃದ್ಧಿ ಜಾತ್ತಾ. ಶೀತ ಮುರಗನ್ ರಾಕ್ಷಸಾಲೆ ವಾಸ ಸ್ಥಾನ ಮ್ಹಣತಾತಿ. ತ್ಯಾ ಖಾತ್ತಿರಿ ಉಪಾಸಾ ದಿವಸು ಶೀತ ಜವ್ನಾಶಿ ಆಸ್ಸುಚೆ. ಉದಕಾಕ ತುಳಸಿ ದಳ ಘಾಲ್ನು ತ್ಯಾಂಚಿ ಉದ್ದಾಕ ಪಿತ್ತಾ ನಿರಾಹಾರ ಉಪಾಸ ಕರ್ತಾಲಿ ಆಸ್ಸಾತಿ. ನಾತಲೇರಿ ರಾತ್ತಿಕ ದೂದ ಆನಿ ಫಳ ಮಾತ್ರ ಘೇವ್ನು ಉಪಾಸ ಕರತಾತಿ. ಪ್ರಸಾದ ರೂಪಾಂತು ವರೇನ ಫಳ ಆನಿ ದುದ್ದಾನಿ ತಯಾರ ಕೆಲೀಲೆ ಪ್ರಸಾದ ವಾಂಟಿತಾತಿ.
ವೈಕುಂಠ ಏಕಾದಶಿಕ ಆಧ್ಯಾತ್ಮಿಕ ಶುದ್ಧೀಕರಣಾಚೆ ದಿವಸು ಮ್ಹೊಣು ಆಪಯತಾತಿ. ಮನುಷ್ಯಾ ಭಿತ್ತರಿ ಆಸ್ಸುಚೆ ನಕಾರಾತ್ಮಕ ಶಕ್ತಿ ಭಾಯ್ರಿ ಘಾಲ್ನು ಸಕಾರಾತ್ಮಕ ಜಾಂವೊ ಧನಾತ್ಮಕ ಶಕ್ತಿ ವೃದ್ಧಿ ಕೊರನು ಆಧ್ಯಾತ್ಮಿಕ ಆನಿ ಶಾರೀರಿಕ ಶಕ್ತಿ ವರ್ಧನ ಜಾವಚೆ ವರಿ ಕರತಾ. ಮ್ಹಳಯಾರಿ ದೈಹಿಕ ಆನಿ ಆಧ್ಯಾತ್ಮಿಕ ಜಾಂವೊ ಮಾನಸಿಕ ಶುದ್ಧೀಕರಣ ಜಾವ್ನು ಮನುಷ್ಯಾಲೆ ಬಲವರ್ಧನ ಜಾತ್ತಾ. ತಾಗೆಲೆ ಮನ ಸುದೃಢ ಜಾತ್ತಾ.
ವೈಕುಂಠ ಏಕಾದಶಿ ದಿವಸು ವೈಕುಂಠ ದ್ವಾರ ಕಾಡ್ತಾ. ಕೆಲವ ಕಡೇನ ಹಾಕ್ಕಾ ಬೀಷ್ಮ ಏಕಾದಶಿ ಮ್ಹೊಣೂ ಆಪಯತಾತಿ. ವೈಕುಂಠ ಏಕಾದಶಿ ದಿವಸು ಸಮುದ್ರ ಮಂಥನ ಘಡ್ಲೆ ಮ್ಹಣತಾತಿ. ಒಟ್ಟಾರೆ ಮಹಾವಿಷ್ಣುಲೆ ಕೃಪಾ ಘೆವಚಾಕ ವೈಕುಂಠ ಏಕಾದಶಿ ಚಾಂಗ ವೇಳು ಮ್ಹಣತಾತಿ. ಅವುಂದು ವೈಕುಂಠ ಏಕಾದಶಿ ೨೦೨೫ಚೆ ಜನವರಿ ೧೦ಕ ಆಸ್ಸಾ. ಸಕ್ಕಡ ದೇವಳಾಂತು ವೈಕುಂಠ ದ್ವಾರ ಸ್ಥಾಪನ ಕೊರನು ಭಕ್ತ ಬಾಂಧವಾಂಕ ಶ್ರೀ ವಿಷ್ಣು ಪರಮಾತ್ಮಾಲೆ ಕೃಪಾ ಮೆಳಚೆ ಸದವಕಾಶ ಪ್ರಾಪ ಕರತಾತಿ. ತಿರುಮಲ ವೆಂಕಟರಮಣ ದೇವಳಾಂತು ವೈಕುಂಠ ಏಕಾದಶಿ ಮಸ್ತ ವಿಜೃಂಭಣೆರಿ ಘಡ್ತಾ.