ಮಂಗಳೂರು ವಿಶ್ವಕೊಂಕಣಿ ಕೇಂದ್ರ ಸಹಯೋಗಾನ ‘ವರ್ಧನಿ’ ಪ್ರಾಯೋಜಕತ್ವಾರಿ ಆನಿ ಸಾಧನಾ ಬಳಗ ಸಹಕಾರಾನ ಆಯೋಜನ ಕೆಲೆಲೆ “ಬಾಲರಂಗ” ಚೆರ್ಡುವಾಂಗೆಲೆ ನಾಟಕ ತರಬೇತ ದಿವಚೆ ತೀನಿ ದಿವಸಾಚೆ ರಾವಪಾಚೆ (ರೆಸಿಡೆನ್ಸಿಯಲ್) ವ್ಯವಸ್ಥಾ ಸಹಿತ ಮುಫತ ತರಬೇತ ಶಿಬಿರಾಚೆ ಸಮಾರೋಪ ಸುವಾಳೊ 13 -10-2026 ತಾರ್ಕೆರ ವಿಶ್ವ ಕೊಂಕಣಿ ಕೇಂದ್ರಾಂತ ಚಲ್ಲೆಂ.
ಕಾರ್ಯವಳೀಚೆ ಶುರವೇಕ ಶಿಬಿರಾರ್ಥಿಂನಿ ತಾನ್ನಿ ಶಿಬಿರಾಂತ ಶಿಕುನ ಕಾಳೆಲೆ ಗೀತ ಗಾಯನ ಆನಿ ನೃತ್ಯ ಪ್ರದರ್ಶನ ಕೆಲೆಂ. ನಂತರ ಶಿಕಿಲೆ ನಾಟಕಾಚೆ ಪಯಲೆ ಏಕ ಝಳಕ ಪ್ರದರ್ಶನ ಕೆಲೆಂ. ಹ್ಯಾ ನಾಟಕ ನಾಮನೆಚೆ ನಾಟಕಕಾರ ಮಾನೆಸ್ತ್ ಜಗನ್ ಪವಾರ ಆನಿ ರಚನಕಾರ -ಮಾನೆಸ್ತ್ ಪ್ರಕಾಶ ಶೆಣೈ ಆನಿ ಬಣ್ಣದಿಲೆಲೊ -ಮಾನೆಸ್ತ್ ಅರುಣ ಪ್ರಕಾಶ ನಾಯಕ್, ವಿನ್ಯಾಸ -ಮಾಣೆಸ್ತ್ ಸತೀಶ್ ಪಿ ನೀನಾಸಂ, ಸಂಗೀತ- ಭಾವನಾ ಪ್ರಭು ,ಖೇಳ್- ಪುಷ್ಪಲತಾ ಭಟ್, ನೄತ್ಯ-ಮಂಜುಳಾ ಕಾಮತ್, ಹಾನ್ನಿ ವೇದಿರಿ ಉಪಸ್ಥಿತ ಆಶಿಲಿಂಚಿ. ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಸಿ ಎ ನಂದಗೋಪಾಲ ಶೆಣೈ ಹಾನ್ನಿ ಸಭೆಕ ಉದ್ದೇಶಿಸುನು ಉಲಯತಚಿ “ಬಾಲರಂಗ” ಶಿಬಿರ ಚೆರ್ಡುವಾಂಗೆಲೆ ಶಿಕ್ಷಣ ಒಟ್ಟೂಚಿ ತಾಂಗೆಲೆ ಮನಾಂತುಲೆ ಭಾವನಾ ಭಾಯರ ಹಾಡಚಾಕಯ ಸಹಾಯ ಜಾತ್ತಾ ತಶೀಂಚಿ ಚೆರ್ಡುಂವಾಂಗೆಲೆ ಭಿತ್ತರಿ ಆಸುಚೆ ಪ್ರತಿಭಾ ದಿಸೂನ ಯೆತಾ. ಹ್ಯಾ ನಿಮಿತ್ತ ರಂಗಾಭಿನಯಾಚೆ ಅಭಿರುಚಿ ಆಸುನು ಮಾತೃ ಭಾಷಾ ಅಭಿಮಾನಯ ಜಾಗೃತ ಜಾತ್ತಾ ಹ್ಯಾ ನಿಮಿತ್ತ ತರಬೇತಿ ದಿವಚೆ ಕಾರ್ಯಗಾರ ವಿಶ್ವ ಕೊಂಕಣಿ ಕೇಂದ್ರಾನ ಹಾತಾಂತ ಘೆತಲಾಂ ಅಶಿಂ ಸ್ಪೂರ್ಥಿದಾಯಕ ಉತ್ರಂ ಸಾಂಗುನು ಶಿಬಿರಾಂತ ಭಾಗಿ ಜಾಲ್ಲೆಲೆ ಸಂಪನ್ಮೂಲ ವ್ಯಕ್ತಿಂಕ ಆನಿ ಸ್ವಯಂ ಸೇವಕಾಂಕ ಯಾದಸ್ತಿಕಾ ದೀವನು ಮಾನ ಕೆಲೆಂ.
ಶಿಬಿರಾರ್ಥಿಂನಿ ತಾನ್ನಿ 3 ದಿವಸ ಭರ ಶಿಬಿರಾಂತ ಘೆತ್ತಿಲೆ ತಾಂಗೆಲೆ ಅನುಭವ ಸಭೆಂತ ವಾಂಟುನ ಘೆವನ್ ಸಂತೋಷ ಪಾವಲಿಂತಿ. ವಿಶ್ವಕೊಂಕಣಿ ಕೇಂದ್ರಾಚೆ ಲಕ್ಷ್ಮೀ ಕಿಣಿನ ಕಾರ್ಯವಳೀಚೆ ಸತ್ರ ಸಂಚಲನ ಕೆಲೆಂ. ಅಶೋಕ ನಾಯಕ್ ಹಾನಿ ದೆವು ಬರೆಂ ಕೊರೊ ಸಾಂಗಲೆಂ. ಒಟ್ಟು 3 ದಿವಸಾಚೆ ರಾವಪಾಚೆ (ರೆಸಿಡೆನ್ಸಿಯಲ್) ಹ್ಯಾ ವಿಶೇಷ ‘ಬಾಲರಂಗ’ ಶಿಬಿರಾಂತು ಸುಮಾರ 50 ಚೆರ್ಡುಂವ ಮುಫತ್ ಖಾಣ ಜೆವಣಾ ವ್ಯವಸ್ಥಾ, ರಾವಪಾಚೆ ವ್ಯವಸ್ಥಾಚೆ ಸಾಂಗಾತಾಕ ನಾಟಕ ಕಲೆಚಾ ವೆವೆಗಳೆ ವಿಷಯಾರ ತರಬೇತ ಘ್ಹೆತಲಿಂಚಿ.