ಸಮಾಜಾಂತುಲೆ ವಯೋವೃದ್ಧಾಂಗೆಲೆ ಹಿತರಾಕವಣಾ ಖಾತ್ತಿರಿ ಕಾರ್ಕಳಾಚೆ ಜಿಎಸ್ ಬಿ ಸಮಾಜ ಹಿತರಕ್ಷಣಾ ವೇದಿಕೆಚೆನಿ ಘಾಲ್ನು ಘೆತ್ತಿಲೆ ಮಹತ್ವಾಕಾಂಕ್ಷಿ ಯೋಜನಾ ಜಾಲೀಲೆ ವಯೋವಂದನಾ' ಆತಿಥ್ಯಗೃಹ ಇಮಾರತ್ತಾಚೆ ನಿರ್ಮಾಣಾಚೆ ಧರ್ತರೆಚೀ ಉಪಾಸನಾ (ಭೂಮಿ ಪೂಜಾ) ಆನಿ ಬುನ್ಯಾದೀ ಫಾತರ ಘಾಲಚೆ (ಶಿಲಾನ್ಯಾಸ) ಕಾರ್ಯಕ್ರಮ ೨೦೨೬ಚೆ ಫೆ.೮ಕ ಕಾಶೀ ಮಠಾಧೀಶ ಶ್ರೀ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆಂ ಜನ್ಮ ನಕ್ಷತ ದಿವಸು ಬಹ್ಮಾವರ ತಾಲೂಕಾಚೊ ಉಪ್ಪೂರಾಂತು ಚಲ್ತಾ ಮ್ಹಣ್ಚೆ ಮಾಹಿತ ಮೆಳ್ಳಾ. ಶ್ರೀ ಕಾಶೀ ಮಠಾಧೀಶ ಶ್ರೀಮದ್ ಸಂಯಮೀಂದ್ರ ತೀರ್ಥ ಸ್ವಾಮ್ಯಾನಿಂ ಕೊಂಚಾಡಿ ಮೊಕ್ಕಾಂತು ಆಶೀರ್ವಾದ ಕೊರನು ಅನುಗ್ರಹ ಕೆಲೀಲ್ವರಿ ಶ್ರೀ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೊ ಜನ್ಮ ಶತಮಾನೋತ್ಸವ ಪ್ರಯುಕ್ತ ಪೂಜ್ಯ ಸ್ವಾಮ್ಯಾಂಗೆಲೆ ಜನ್ಮನಕ್ಷತ್ರದ ದಿವಸೂಚಿ ಭೂಮಿಪೂಜಾ ಆನಿ ಶಿಲಾನ್ಯಾಸ ಕಾರ್ಯಕ್ರಮಾಚೆ ಆಯೋಜನ ಕೆಲ್ಲ್ಯಾ.
ತ್ಯಾ ದಿವಸು ಕಸ್ಸಲೆ ಕಾರ್ಯಕ್ರಮ ಚಲ್ತಾ?
ತ್ಯಾ ದಿವಸು ಸಕ್ಕಾಣಿ ೮.೩೦ ಘಂಟ್ಯಾಕ ಇಮಾರತ್ತಾಚೆ ಶಿಲಾನ್ಯಾಸಾಚೆ ಶಿಲೆಂಕ (ಬುನ್ಯಾದೀ ಘಾಲ್ಚೆ ಫಾತರಾಂಕ) ಅಮ್ಮುಂಜೆ ಶ್ರೀ ದಾಮೋದರ ದೇವಳಾಚಾನ ಮೆರ್ವಣಿಗೆಚೇರಿ ಉಪ್ಪೂರಾಕ ಹಾಡತಾತಿ. ಧೋಂಪಾರಾ ೧೨.೪೫ಕ್ಕೆ ಶಿಲಾನ್ಯಾಸ ಕಾರ್ಯಕ್ರಮ ಸಂಪನ್ನ ಜಾತ್ತಾ ಮ್ಹೊಣು ಜಿ.ಎಸ್.ಬಿ. ಹಿತರಕ್ಷಣಾ ವೇದಿಕೆಚೆ ಮಾರ್ಗದರ್ಶಕ, ಉಡುಪಿ ಅನಂತ ವೈದಿಕ ಕೇಂದ್ರಾಚೆ ವೇದಮೂರ್ತಿ ಚೇಂಪಿ ರಾಮಚಂದ್ರ ಅನಂತ ಭಟ್ ಮಾಮ್ಮಾನಿ ಸಾಂಗ್ಲ್ಯಾ. ತ್ಯಾ ದಿವಸಾಚೆ ಕಾರ್ಯಕ್ರಮ ಸಕ್ಕಾಣಿ ೧೦ ಘಂಟ್ಯಾಚಾನ ಧೋಂಪಾರಾ ೧೧.೪೫ ಪರಿಯಂತ ತತ್ಸಂಬಂಧ ಸಭಾ ಕಾರ್ಯಕ್ರಮ ಚಲ್ತಾ. ವೇ. ಮೂ ಚೇಂಪಿ ರಾಮಚಂದ್ರ ಭಟ್ ಮಾಮ್ಮಾಲೆ ನೇತೃತ್ವಾರಿ ಧಾರ್ಮಿಕ ವಿಧಿ ವಿಧಾನ ಚೋಲ್ನು ಮಾಗಿರಿ ಶಿಲಾನ್ಯಾಸ ಕಾರ್ಯ ಘಡ್ತಾ. ಶ್ರೀ ಸುಧೀಂದ್ರ ತೀರ್ಥ ಸ್ವಾಮ್ಯಾಂಗೆಲೆ ಜನ್ಮ ಶತಮಾನೋತ್ಸವ ಪ್ರಯುಕ್ತ ಧೋಂಪಾರಾ ೧೨ ತಾಕೂನು ೨ ಘಂಟ್ಯಾ ಪರಿಯಂತ ನಾಮಾಧಿಕ ಗಾಯಕ ಬೆಂಗಳೂರ್ಚೆ ಶ್ರೀ ಶಂಕರ ಶಾನ್ಭೋಗ್ ಆನಿ ತಂಡ ನಿಮಿತ್ತ್ಯ ವಿಶೇಷ ಭಕ್ತಿ ಸಂಗೀತ ಕಾರ್ಯಕ್ರಮ ಚಲ್ತಾ
ವಯೋವಂದನಾ’ ಆತಿಥ್ಯಗೃಹಾಂತು ಕಸಲೆ ಆಸ್ತಾ? ತಾಜ್ಜೆ ಮುನಾಪೋ ಕೋಣಾಕ ಮೆಳ್ತಾ?
ಸಕ್ಕಡ ಮೂಲಭೂತ ಸೌಕರ್ಯ ಆಸ್ಸುಚೆ ಸಕಲ್ಚೆ ಮಾಳಿಯೇಚೆ ಬರಶೀ ತೀನಿ ಮಾಳಿಯೇಚೆ (೧+೨) ಇಮಾರತ್ತಾಂತು ಪ್ರತಿಯೆಕ್ಕಾಂತು ಚೋವೀಸ ಸುಸಜ್ಜಿತ ಕೂಡ ನಿರ್ಮಾಣ ಜಾತ್ತಾ. ಚರಡುಂವ ನಾಶ್ಶಿಲೆ ಆನಿ ಸ್ವತಂತ್ರಜಾವ್ನು ಕಾಳಜೀ ಘೆವಚೆ ತ್ರಾಣ ನಾಶ್ಶಿಲೆ, ದುರ್ಬಳೆ, ದುರ್ಬಲ ಜಿಎಸ್ಬಿ ಸಮಾಜಾಚೆ ಮ್ಹಾಲ್ಗಡ್ಯಾಂಕ ಹಾಂಗಾ ಪಯ್ಲೆಚೆ ಆದ್ಯತಾ ದಿತ್ತಾತಿ. ಅಸ್ಸಲ್ಯಾಂಕ ನಿಃಶುಲ್ಕ ಜಾವ್ನು ಪುಕ್ಕಟ ಜಾವ್ನು ವಾಸ್ತವ್ಯಾಕ ಅವಕಾಶ ದಿತ್ತಾತಿ. ದುಡ್ವಾಳು ಜಾವ್ನಾಸ್ಸುನು, ಚರಡುಂವ ನಾತ್ತಿಲೆ ಮ್ಹಾಲ್ಗಡ್ಯಾಂಕ ಅಗತ್ಯ ಶುಲ್ಕಾ ಬರಶಿ ವಾಸ್ತವ್ಯಾಕ ಅವಕಾಶ ದಿವ್ಚೆ ವಿಚಾರು ಆಸ್ಸಾ. ಜಾಂವೊ ಚರಡುಂವಾನಿ ಪರ್ದೇಶಾಕ ಜಾಂವೊ ದೂರಾಚೆ ಗಾಂವಾಕ ವಚ್ಚುಕಾ ಜಾಲೀಲೆ ಅನಿವಾರ್ಯ ಸಂದರ್ಭು ಆಯ್ಯಿಲೆ ತೆದ್ದನಾ ಆವಯಿ-ಬಾಪಯಿಂಕ ಆಪೋನು ವ್ಹರಚಾಕ ಸಾಧ್ಯ ಜಾಯನಾತ್ತಿಲೆ ಪರಿಸ್ಥಿತೀರಿ ನಿಗದಿತ ಶುಲ್ಕ ಘೇವ್ನು ತಾತ್ಕಾಲಿಕ ಜಾವ್ನು ಆಶ್ರಯ ದಿವಚೆ ಸುವಿಧಾ ವರೇನ ಆಸ್ಸಾ ಮ್ಹೊಣು ಜಿಎಸ್ಬಿ ಸಮಾಜ ಹಿತರಕ್ಷಣಾ ವೇದಿಕೆಚೆ ಸಂಚಾಲಕ ಆರ್.ವಿವೇಕಾನಂದ ಶೆಣೈ, ಅಧ್ಯಕ್ಷ ಜಿ.ಸತೀಶ್ ಹೆಗ್ಡೆ ಕೋಟ ಆನಿ ಪ್ರಧಾನ ಕಾರ್ಯದರ್ಶಿ ಸಾಣೂರು ನರಸಿಂಹ ಕಾಮತ್ ತಾನ್ನಿ ಸಾಂಗ್ಲ್ಯಾ.