ಹುಬ್ಬಳ್ಳಿ ಶಕ್ತಿನಗರಾಂತು ಆಸ್ಸುಚೆ ಶ್ರೀ ಕಾಶೀಮಠ ವೆಂಕಟ್ರಮಣ ದೇವಳಾಂತು ಅಗಸ್ಟ್ ೧೫ಕ ಶ್ರಾವಣ ಮಾಸಾಚೆ ಶ್ರೀ ಸತ್ಯನಾರಾಯಣ ಪೂಜಾ ವಿಜೃಂಭಣೆರಿ ಚಲ್ಲೆ. ಸಕ್ಕಾಣಿ ೧೧-೩೦ಕ ಪೂಜಾ, ೧೨.೩೦ ಘಂಟ್ಯಾಕ ಮಹಾಮಂಗಳಾರ್ತಿ, ತೀರ್ಥ-ಪ್ರಸಾದ ವಾಂಟಪ ಆನಿ ಧೋಂಪಾರಾ ೧-೦೦ ಘಂಟ್ಯಾಕ ಮಹಾ ಅನ್ನಸಂತರ್ಪಣ ಚಲ್ಲೆ.
ಹುಬ್ಬಳ್ಳಿ ಶ್ರೀ ಕಾಶೀಮಠ ವೆಂಕಟ್ರಮಣ ದೇವಳಾಂತು ಪ್ರತಿ ವರ್ಷ ಚೊಲಚೆ ಶ್ರೀ ವರಮಹಾಲಕ್ಷ್ಮೀ ವ್ರತ ಅಗಸ್ಟ್ ೧೬ಕ ಚಲ್ಲೆ. ತತ್ಸಂಬಂಧ ಸುರವೇಕ ಆಯ್ಯಿಲೆ ಸಕ್ಕಡಾಂಕ ಉಪಹಾರಾಚೆ ವ್ಯವಸ್ಥಾ ಕೆಲೀಲೆ. ಸಕ್ಕಾಣಿ ೯-೩೦ ಘಂಟ್ಯಾಕ ಜಿ.ಎಸ್.ಬಿ. ಸಮಾಜಾಚೆ ಸುವಾಸಿನಿ ಬಾಯ್ಲಮನ್ಶೆ ತಾಕೂನು ಸಾಮೂಹಿಕ ಚೂಡಿ ಪೂಜನ ಚಲ್ಲೆ. ೧೧-೦೦ ಘಂಟ್ಯಾಕ ಸುವಾಸಿನಿ ತಾಕೂನು ಕುಂಕುಮಾರ್ಚನ ಪೂಜಾ, ಉಪರಾಂತ ಮಂಗಳಾರ್ತಿ ಚಲ್ಲೆ. ತ್ಯಾ ದಿವಸು ಏಕಾದಶಿ ಆಶ್ಶಿಲೆ ನಿಮಿತ್ತ್ಯಾನ ಪೂಜಾ ಉಪರಾಂತ ಪ್ರಸಾದ ಫಳಾರಾಚೆ ವ್ಯವಸ್ಥಾ ಆಶ್ಶಿಲೆ. ಹುಬ್ಬಳ್ಳಿ-ಧಾರವಾಡಾಚೆ ಸುವಾಸಿನಿ ಬಾಯ್ಲಮನ್ಶೆ ಹೇ ವೇಳ್ಯಾರಿ ವ್ಹಡ ಅಂಕಡ್ಯಾರಿ ಉಪಸ್ಥಿತ ವ್ಹರಲೀಲೆ.